ހަނގާކުރުން

އަހަރެމެން ތެރޭގައި ހަނގާކުރުމަކީ މިހާރު ވަރަށް އާންމުކަމެކެވެ. މިއީ ނައްތާލަންޖެހޭ ދަށުދަރަޖައިގެ ޢަމަލެކެވެ. ހަނގާކުރުމަކީ ހަމައެކަނި އަތްފައިން ގެއްލުން ދިނުމެއްނޫނެވެ. ހަނގާކުރުމަކީ އަނގަބަހުން ނުވަތަ ވަސީލަތެއް ބޭނުންކޮށްގެން ގެއްލުން ދިނުމެވެ. އުނދަގޫ ކުރުމެވެ. އަނިޔާކުރުމެވެ. އަދި މި ނޫންވެސް އެކި ގޮތްގޮތަށް ހަނގާކޮށްއުޅެއެވެ. ޖިސްމާނީ ގޮތުންނާއި ނަފްސާނީ ގޮތުންވެސް ހަނގާކޮށްއުޅެއެވެ.

ބައެއް މީހުން އެކަން ކުރަނީ މަޖަލަކަށެވެ. ބައެއްފަހަރު ދެރައެއް ދިނުމުގެ ގޮތުންވެސް ހަނގާކުރެއެވެ. ހަނގާކުރެވޭ މިހާއާމެދު ނުވިސްނައެވެ. އެމީހާގެ އިހްސާސްތަކާއިމެދު ނުވިސްނައެވެ. އަނެއްބަޔަކު ހަނގާކުރަނީ މީހުންގެ ސަމާލުކަން ހޯދުމަށެވެ. ނުވަތަ އޭނަގެ ހުރި ޖެހިލުންކުޑަކަމާއި ބާރުވެރިކަން ދެއްކުމަށެވެ. ބައެއް ކުދިންނަކީ ހަނގާކުރިޔަސް ކެތްކޮށްގެން ތިބޭ ކުދިންނެވެ. މަސްލަހަތަށް ޓަކައެވެ. ނަމަވެސް އަނެއްބައި ކުދިންނަކީ ހަނގާކުރުމުން ރައްދުދޭ ކުދިންނެވެ. ބުނާ ބަހަކަށް ނުވަތަ ކުރާ ޢަމަލަކަށް ރައްދުދޭ ކުދިންނެވެ. ނަމަވެސް މިއީ އެންމެ ރަނގަޅުގޮތެއްނޫނެވެ. ބަދަލުގައި ރައްދު ދިނުމުން އިތުރު ހަމަނުޖެހުން އުފެދިގެންދެއެވެ. ހަނގާކުރުމާއި ކުރިމަތިލާންވާނީ ވިސްނުންތެރިކަމާއި ހިކުމަތްތެރިކަމާއެކުގައެވެ.

ހަނގާކުރުން ހުއްޓުވާނީ ކިހިނެތްބާ؟ ތިމާއަށް ނުވަތަ އެހެން މީހަކަށް ވެސް ހަނގާކުރާތަން ފެނިއްޖެނަމަ ، އެކަން ނުކުރުމަށް ބުނެ ހުއްޓުވާށެވެ. އަދި އެކަމުގެ ހުރި ގެއްލުމާއި ނުބައިކަމާއި ކިޔައިދޭށެވެ. އަދި ހަނގާކުރުމުގެ ޢަމަލެއް ހިނގާނަމަ އެކަން ކަމާބެހޭ އެންމެންނަށް އަންގަންވާނެއެވެ. ސުކޫލުގެ މާހައުލުގައި މި ކަހަލަ ކަމެއް ހިނގާނަމަ، މުދައްރިސުންނާއި ޕްރިންސިޕަލްއަށް އަންގަންވާނެއެވެ.

ހަނގާކުރުން ދެނެގަންނާނެ ބައިވަރު ގޮތްތަށް ވެސް ހުރެއެވެ. މިގޮތުން މީހުންގެ ކުރިމަތީގައި ތިބާގެ އަގުވައްޓައިލާ ގޮތަށް ވާހަކަދެއްކުމަކީ ހަނގާކުރުމެވެ. އަދި މީހެއްގެ ގައިގައި ހުންން ސިފައަކަށް މަލާމާތްކޮށް ޖޯކު ޖެހުމަކީވެސް ހަނގާކުރުމެވެ. މީހުން ނުރުހޭ ވަނަމުން ގޮވުމާއި، ނުކުރާ ކަންކަން ބޮލުގައި އެޅުވުންވެސް ހިމެނޭނީ ހަނގާކުރުމުގެ ތެރޭގައެވެ. މީހެއްގެ މައްޗަށް ބާރުފޯރުވުމުގެ ނިޔަތުގައި ބިރުދެއްކުމާއި އަމުރުކުރުމާއި އަދި ކަންކަމަށް މަޖުބޫރުކުރުމަކީ ހަނގާކުރުމެވެ.

ހަނގާކުރުން ހުއްޓުވުމުގެ ގޮތުން ކުރެވެން އޮތް ހުރިހައި ކަމެއް ކުރުމަކީ ކޮންމެ ފަރުދެއްގެވެސް ޒިންމާއެކެވެ. މިކަން ކުރުމަށްޓަކައި ، ކުޑައިރުއްސުރެން ފެށިގެން ދަރިންނަށް މިކަމުގެ ނުބައިކަމާއި އަދި ހުރި ގެއްލުން ކިޔައިދީ ހަދަންޖެހެއެވެ. އަދި  އަނެކުންގެ އިހްސާސްތައް ދަންނަންޖެހޭނެކަން ވިސްނައިދޭންޖެހެއެވެ. ހަނގާކުރެވެން ފެށޭތަނުން ، ކަމާބެހޭ މީހުންނާއި މިކަން އެންގުން ވަރަށް މުހިންމެވެ. އެހެންނޫންނަމަ މިކަން ފުޅާވެ ނުހުއްޓުވޭ ހިސާބަށް ހިނގައިދާނެއެވެ.

މީހަކު ތިބާއަށް ހަނގާކުރާނަމަ ބިރުނުގަނެ އެކަމުން ސަލާމާތްވާން މަސަތްކަތްކުރާށެވެ. ހަނގާކުރުމުން ސަލާމާތްވުމަކީ ތިމާއަށް ލިބިފައިވާ ހައްޤެއްކަމާއި އަދި އެކަމުން ސަލާމާތްވުމުގެ ބާރު ލިބިގެންވާކަން ގަބޫލުކުރާށެވެ. ތިމާއަށް ލިބިފައިވާ ގެއްލުމުގެ ސަބަބުން ޖެހިލުންވެ ހިތްދަތިނުވާށެވެ. އަދި ކެރިގެން ކުރިމަތިލުމަށް އަޒުމު ކަނޑައަޅާށެވެ. ހަނގާކުރުމުން ސަލާމާތްވުމުގެ ހައްގު ކޮންމެ މީހަކަށް ވެސް ލިބިގެންވެއެވެ. ހަނގާކުރުމަކީ ވަރަށްވެސް ދަށުދަރަޖައިގެ ޢަމަލެކެވެ. ހަނގާކުރުން ބަލައިނުގަންނާށެވެ.

( ނިމުނީ )