މަންމަ

އަދުގެ ދުނިޔޭގައި މަންމައިންގެ ގަދަރު މި ދަނީ ނެތެމުންނެވެ. ދަރިން ގެ ހިތުގައި މަންމައަށް ދޭންވާ އިހްތިރާމާއި ލޯބި ދަނީ ނެތެމުންނެވެ. މިއީ ވިސްނާ ފިކުރު ކުރަންޖެހޭ ބޮޑު ކަމެކެވެ. ނުވަ މަހާ ނުވަ ދުވަސްވަންދެން ، އެތަށް ވޭނަކަށް ފަހު ދަރި އަކު އުފަން މި ކުރަނީ ވަރަށް ފޮނި އުންމީދުތަކަކާއި އެކީގައެވެ. ދަރިއަކު އުފަންވުމަށްފަހު ދެން އުފުލާ ބުރަވެސް ވަކި ކުޑައެއްނޫނެވެ. އެތަށް ރެއަކު އެކަމަނާގެ ނިދި ގުރުބާން ކުރަނީ ދަރިފުޅަށެވެ. މަންމައިން އުފުލި ބުރަ އާއި ކިރުގެ އަގަކީ ދުވަހަކުވެސް އަދާކުރެވޭނެ އެއްޗެއްނޫނެވެ.

މަންމަގެ ލޯތްބާއި ކުލުނަކީ އިންސާނަކަށް ލިބޭނެ އެންމެ މަތިވެރި އެއް ނިޢުމަތެވެ. އެ ނިޢުމަތަށް ގަދަރު ނުކުރި ދަރިއަކު ، އެވަނީ މަގު އޮޅިފައެވެ. މިހާރު ބައެއް ދަރިން މައިންނަށް ހަދަނީ ހަދާނެ ގޮތެކެވެ. ކިޔަނީ ކިޔާނެ އެއްޗެކެވެ. ގެއިން ނެރެލަނީ އެއްވެސް ރަހުމެއް ނެތިއެވެ. އެކަމަނާ ބަލިވެ އެނދުމަތިވާ ދުވަހު ދަރިންނަށް ބަލަންޖެހުނީމައި ވެގެންދަނީ ބޮޑު ކަމަކަށެވެ. ގަންނަނީ ފަކުރެވެ. ކުރަނީ މަލާމާތެވެ. ހަނދާންނެތުނީ ހެއްޔެވެ؟ ތިބާ ބަލިވީމަ އެ މަންމަ މުޅި ރޭގަނޑު ތިބާގެ އަރިހުގައި ހޭދަކޮށްލަނީ އެއްވެސް ޝަކުވާއެއްނެތިއެވެ. ފަކުރެއް ވެސް ނުގަނެއެވެ. ނުހަނު ލޯބިން ތިބާއަށް މީރު އެއްޗެހި ކާންދީ ހުރިހާ ކަމެއް ބަލަހަށްޓައެވެ. އެއްޗެހި ދޮވެ އިސްތިރިކޮށް ހަދަނީ ހަމަ އެ މަންމަ އެވެ. އަދި ތިބާ ދެރަވެއްޖެނަމަ ހިތްވަރުދެއެވެ. އުފާވެރި ކަމެއް ލިބިއްޖެނަމަ އެ އުފަލުގައި ބައިވެރިވެއެވެ. ކޮންމެފަދަ ހާލަތެއް ދިމާވި ކަމުގައި ވިޔަސް، ލޯތްބާއި އޯގާތެރިކަމާއެކު، ތިބާގެ މަންމަ އަބަދުވެސް ތިބާއާއެކުވެއެވެ. ވީއިރު ، ތިބާގެ މަންމަ އާމެދު ހިތުގައި ރަހުމެއްވެސް ނުހުންނަނީ ހެއްޔެވެ؟

މަންމަ އަކީ އެންމެ މޮޅު އަދި އެންމެ ފުރަތަމަ މުދައްރިސާއެވެ. އެކަމަނާ ދަރިންނަށް ކިޔަވައިދީ ، ރިވެތި އަޙްލާގު ދަސްކޮށްދެއެވެ. އިސްލާމްދީނަކީ ކޮބައިކަމާއި ، އަޅުކަންތަށް ކުރާނެ ގޮތް ދަސްކޮށްދީ ހަދައެވެ. އަދި ދިމާވާ ގޮންޖެހުންތަކާ ކުރިމަތިލާނެ ގޮތްވެސް ކިޔާދެނީ އެ މަންމަ އެވެ.

ހަނދާން ނައްތާނުލާށެވެ! ތިބާއަށް ކިޔަވައިދީ ، ތިބާ މީހަކަށް ހަދައި ދިނީ މަންމައެވެ. މިއަދު ވަޒީފާއަށް ގޮސް އާމްދަނީ ލިބި ، އަމިއްލަ ފައިމަށްޗަށް ތެދުވެވުނީ ، މަންމަގެ ބުރަ މަސަތްކަތުންނެވެ. ތިބާގެ ކޮންމެ ކާމިޔާބީއެއްގެ ފަހަތުގައި ވަނީ މަންމަގެ ހެޔޮ ދުޢާއެވެ.

މަންމައިންނަކީ ވަރަށް ވެސް މަތިވެރި ބައެކެވެ. އަޑު އަހަމުހެއްޔެވެ؟ ސުވަރުގެ ވަނީ މަންމަ ގެ ފައިތިލަދަށުންނެވެ. ވަގުތު ފާއިތުނުވަނީސް ތިބާގެ މަންމައަށް ގަދަރު ކުރާށެވެ. އިހްތިރާމް އާއި ލޯބިދޭށެވެ. އަދި މަންމަ ގެ ކުރިމަތީގައި އުފް ވެސް ނުބުނާށެވެ. މަންމައަކީ ދަރިއަކަށް ލިބޭނެ އެންމެ އަގުހުރި އެއް ޖަވާހިރެވެ. އެކަމަނާ އުފުލި ބުރަ އާއި ވީ ޤުރުބާނީގެ އަގަކީ ދުވަހަކުވެސް އަދާކުރެވޭނެ އެއްޗެއްނޫނެވެ.

ނިންމާލަމުން ދަންނަވާނީ ، މަންމަ އަށް އިޙްތިރާމްކޮށް އެ ކަމަނާ ދެރަވެ ހިތުގައި ޖެހޭ ކަންތައްތައް ނުކުރާށެވެ. އަދި މަންމައަށް ކިޔަމަންތެރިވެ ، ހިދުމަތްކުރާށެވެ. މަންމަ ހިތުގައި ޖެހޭ ކަމެއް ނުވަތަ އެއްޗެއް ބުނެވިފަ ވާނަމަ އަވަހަށް މާފަށް އެދޭށެވެ. އަދި އެކަހަލަ ކަމެއް ދެވަނަ ފަހަރަށް ތަކުރާރު ނުކުރާށެވެ. މާތް ﷲ ހުރިހާ މަންމައިންނަށް ބަރަކާތް ލައްވާށިއެވެ. އާމީން.

ނިމުނީ