ފާތާނިކެ

ފަހުބައި

ނުހަނު ހަމަޖެހިލައިގެން އެހާމެ އަރާމުގައި ނިދާލާފައިއޮތް ފާތާނިކެ ފެނުމާއެކުހެން ނާގިތުގެ މޫނުމަތިން އުފަލާއި ހިތްހަމަޖެހުން ފާޅުވެގެން ދިޔައެވެ. އެއާއެކުހެން ހަމަޖެހުމުގެ ނޭވާއެއްލަމުން ގައިން ހިރަފުސްފޮޅާލިއެވެ. އަދި ވަރަށް ޝައުޤުވެރިކަމާއެކު މުޅި ކޮޓަރިތެރެއަށް ނަޒަރު ހިންގާލިއެވެ.
ނާގިތު މަޑުމަޑުން ގޮސް މޭޒުކައިރިއަށް ހުއްޓުމާއެކުހެން އޭނާގެ ނަޒަރު އަމާޒުވީ މޭޒުމަތީގައިއޮތް ފޯނަށެވެ. އެފޯނު އެންމެ ފުރަތަމަ ފެނުނު ދުވަހުން ފެށިގެން، އެފޯނަށް އެދިއެދިހުރި ނާގިތުގެ މޫނުމަތިން ފާޅުވަމުންދިޔަ އުފަލާއި ހިތްހަމަޖެހުން އިތުރުވެގެން ދިޔައެވެ. އެއާއެކުހެން ހިނިތުންވެސް ވެލެވުނެވެ.
ފޯނު ނަގައި ޖީބަށްލަމުން ނާގިތު ބަލާލީ ފާތާނިކެއަށެވެ. އޭރުވެސް ނުހަނު ހަމަޖެހިލައިގެން އެހާމެއަރާމުގައި ފާތާނިކެ ނިދާލާފައި އޮތެވެ. އެހެންކަމުން އެތަނުގައި އޭނާއަށް އެއްވެސް ނާމާންކަމެއް ނެތްކަން ނާގިތަށް ޔަގީންވިއެވެ.
މޭޒުމަތީގައިއޮތް ތަޅުދަނޑިފަތި ހިފައިގެން ގޮސް އަލަމާރި ހުޅުވާލުމާއެކުހެން ދޮރުފަތުން ބާރުއަޑެއް އިވިގެން ދިޔައެވެ. އެއާއެކުހެން ފާތާނިކެއަށް ހޭލެވި ހަޅޭލަވައިގަތެވެ. ފާތާނިކެ ހަޅޭލަވައިގަތްއަޑާއެކުހެން ނާގިތު ދިޔައީ ސިއްސައިގެންނެވެ.
ނާގިތު އަވަސްއަވަަހަށް އެނދާދިމާއަށް ބަލާލިއިރު ފާތާނިކެ ތެދުވަނީއެވެ. އެއާއެކުހެން ނާގިތުގެ ލޮލުގައި އަޅައިގަތީ އެނދުމަތީ އޮތް ބާލީހެވެ.
އޭނާގެ ގޮތް ފާތާނިކެއަށް އެނގުމުގެކުރިން އޭނާގެ އަތްދަށުން ސަލާމަތްވާން ޖެހޭނެކަމުގައި ނާގިތު ނިންމިއެވެ.
ފާތާނިކެއަށް ނުތެދުވެވިގެން އުޅެނިކޮށް ނާގިތު ގޮސް ބާލީސްނަގައި ފާތާނިކެގެ މޫނުމަތީގައި ބާލީސްއަޅައި އެނދުމަތީ ބޭއްވިއެވެ. އަދި އޭނާއަށް ނުތެދުވެވޭނެހެން ބާރުކޮށްލިއެވެ.
ނާގިތުގެ އަތްދަށުން ސަލާމަތްވުމަށް ފާތާނިކެ މަސައްކަތް ކުރަމުންދިޔައެވެ. އެހެނަސް އެކަމުގައި އޭނާއަށް އެއްވެސް ކާމިޔާބެއް ނުލިބި ފަސްވަރަކަށް މިނިޓްތެރޭގައި ފާތާނިކެގެ ހުރިހާ ހަރަކާތެއް ހުއްޓި މުޅިމީހާ ހަމަހިމޭންވިއެވެ. ބާލީސް ނަގައި ފާތާނިކެގެ މޫނަށް ބަލާލުމާއެކުހެން އޭނާ އެއޮތީ ހަބަރު ހުސްވެފައިކަން ނާގިތަށް ޔަގީންވިއެވެ.
ބާލިސްނަގައި ދުރުގައި ބޭއްވުމަށްފަހު ނާގިތުގޮސް އަލަމާރިކައިރިއަށް ހުއްޓުނުއިރު އޭނާގެ މޫނުމަތިން ފާޅުވަމުންދަނީ ހިތްހަމަ ޖެހުމުގެ އަސަރުތަކެވެ. ހިނިތުންވުމުގެ ކުލަވަރެވެ.
އަލަމާރީގައި ހުރި އެތައްބައިވަރު ފައިސާ އާއި ރަންރިހީގެ ގަހަނާތަކުގެ އިތުރުންވެސް ނާގިތު ބޭނުން އެއްޗެއް އޮތްނަމަ އެއެއްޗެއް ނެގުމަށްފަހު އަލަމާރިދޮރުލައްޕައި ތަޅުލިއެވެ. އަދި ތަޅުދަނޑި ގެން ގޮސް މޭޒުމަތީގައި ބޭއްވުމަށްފަހު ކޮޓަރިން ނުކުންނަމުން ފާތާނިކެއަށް ބަލާލިއެވެ. އޭރު ވެސް ފާތާނިކެ ހަބަރު ހުސްވެފައި އޮތުމުން ނާގިތުގެ ގޮތް އޭނާއަށް ނޭނގޭނެކަން ނާގިތަށް ޔަގީންވިއެވެ.
ކޮޓަރީގެ ދޮރުލައްޕާލުމަށްފަހު ނާގިތު ގޮސް އެގެއިން ނުކުމެ ގޭ ދޮރުލައްޕާފައި އަވަސް އަވަހަށް އެހިސާބުން ފިލާ ރައްކާވިއެވެ.
ނާގިތު ގޮސް އަލިތަރިހޮޓަލަށް ވަތްއިރު، ލޯންޗްދުއްވާއުޅޭ ރައްޒާގު އެތަނުގައި ކޮފީބޯން އިނެވެ.
ވަރަށް އަވަހަށް އޭނާގޮވައިގެން އޭނާގެ ރަށަށް ގޮސް ދިނުމަށް ނާގިތު އެދުމުން، ރައްޒާގުގެ މޫނުމަތިން ހައިރާންކަން ފާޅުވެގެން ދިޔައެވެ. އަދި އަވަސްއަވަހަށް އެކަމާބެހޭގޮތުން ސުވާލުކުރިއެވެ.
މިހާ ފަސްގަޑިއެއްގައި ކުއްލިއަކަށް ރަށަށްދާން ތިޔައުޅެނީ ކީއްވެގެންތޯ ސުވާލުކުރަމުން، ދަތުރުކުރެވޭނީ ވަގުތުން ފައިސާ ދޭ ގޮތަށް ކަމަށް ރައްޒާގު ބުންޏެވެ.
ރައްޒާގުގެ ސުވާލަށް ޖަވާބުދެމުން ނާގިތުބުނީ އޭނާގެ ރައްޓެއްސަކާއެކު މަސައްކަތެއްކޮށްލާން ގޮސްލަނީ ކަމަށާއި އެކަމުން ވަރަށް ރަނގަޅަށް ފައިސާލިބޭނެކަމަށް އޭނާ ބުނެފައިވާ ކަމަށެވެ. ހަމައެހެންމެ މާދަމާ ހެނދުނު މަސައްކަތް ފަށާގޮތަށް ހަމަޖެހިފައިވާތީ މިރޭ ރަށަށް ގޮސް ރަނގަޅަށް ނިދާލާން ބޭނުންވާތީ މިހާރު ދާން ބޭނުންވަނީ ކަމަށެވެ. އަދި އެހެންމެ ދަތުރުނިމޭއިރަށް ފައިސާ ދޭނެކަމަށް ވެސް ބުންޏެވެ.
ނާގިތު ތައްޔާރުވެލައިގެން ބަނދަރަށް އައުމަށާއި އޭނާ ކޮފީބޯލައިގެން ވަރަށް އަވަހަށް އެދިމާއަށް ދާނެކަމަށް ރައްޒާގު ބުންޏެވެ.
ރަނގަޅުއާމްދަނީއެއް ލިބޭކަހަލަ މަސައްކަތެއް ކޮށްލާން ދެތިން ދުވަހަކަށް އޭނާގެ ރަށަށް ގޮސްލާން އުޅޭކަމަށް، ނާގިތު އޭނާގެ އަންހެނުން ސާތިރާގާތު ބުންޏެވެ. ހަމައެހެންމެ މިގޮތަށް މަސައްކަތެއް ނުކޮށް ހުންނަތާ މިހާރު ގިނަދުވަސްތަކެއް ވުމުގެ ސަބަބުން އަތްމަތި ދަތިވެ ތަންތަނުގެ ދަރަނިބޮޑުވެ ސާތިރާގެ އާއިލާމީހުންގެ ފަރާތުން ނުރުހުން ރައްދުވަމުންދާ ދިއުމަށް ވަރަށް އަވަހަށް ހައްލެއްއަންނާނެކަމަށް ވެސް ނާގިތު ބުންޏެވެ.
ނާގިތަށް ހެޔޮވިސްނި ރަނގަޅުގޮތް އިހްތިޔާރުކުރީތީ ސާތިރާ ވަރަށް ހިތްހަމަޖެހި އުފާވިއެވެ. އަދި އެކަމަށްޓަކައި ނާގިތަށް ހިތްވަރާއި ނަސޭހަތްދީ، ފަރުވާތެރިކަމާއިއެކު ކަމަށް ކަމޭހިތައި ގަޑިއަށް ސަމާލުކަންދީ މަސައްކަތާއިގެން ކުރިޔަށް ދިއުމަށް ބުންޏެވެ.
ނާގިތު އެދުނުފަދައިން އޭނާ ގޮވައިގެން ގޮސް އޭނާގެ ރަށަށް ލުމަށްފަހު ރައްޒާގު ރަށަށް އައިސްފިއެވެ.
ހެނދު އަށްގަޑިބައި ނުވައެއް ޖަހާކަން ހާއިރެވެ. ނުހަނު އަރާމުގައި ނިދާލާފައި ނާގިތަށް ހޭލެވުނީ އޭނާގެ އަންހެނުން ސާތިރާ ފޯނުކުރުމުންނެވެ.
ކުރާންދިޔަ މަސައްކަތާއި ބެހޭގޮތުން ވާހަކަދައްކަމުން ދައްކަމުން، ފާތާނިކެ މަރުވެއްޖެކަމަށް ސާތިރާ ބުނުމާއެކު ނާގިތަށް ހީވީ ސޮކެއް ޖެހުނުހެންނެވެ. ބުނާނެ އެއްޗެއް ކުރާނެހަރަކާތެއް ނޭނގިފައި އެތައްއިރަކު ހުރެވުނެވެ. ސާތިރާ ވާހަކަދައްކަމުންދަނި ކޮށް ނާގިތު ފޯނު ކަނޑާލުމަށްފަހު ފޯނުއޮފް ކޮށްލިއެވެ. އޭރު އޭނާގެ މޫނުމަތިން ފާޅުވަމުންދަނީ ހިތާމައާއި ހިތްދަތިކަމުގެ އަސަރުތަކެވެ. ނުތަނަވަސްކަމުގެ ކުލަވަރެވެ.
ފާތާނިކެ މަރުވެގެން އެދިޔައީ އޭނާގެ ސަބަބުންކަމުގައި ނާގިތަށް އަމިއްލައަށް ގަބޫލުކުރެވޭންފެށިއެވެ. އޭނާ މަސައްކަތް ކުރީ ފާތާނިކެ ހޭނައްތާލައިގެން އޭނާގެ މަޤްސަދު ހާސިލުކުރާން ނަމަވެސް މަންޒަރު މިވަނީ ބަދަލުވެގެން ގޮސްފައެވެ. ފާތާނިކެ ހޭނައްތާލުމަށް އޭނާ ކުރި މަސައްކަތަށްފަހު ފާތާނިކެގެ ފަރާތުން އެއްވެސް ހަރަކާތެއް ނުފެންނަކަން ނާގިތަށް ޔަގީންވެއެވެ.
ވަގުތުތައް ފާއިތުވަމުން އައިސް އިރުއޮއްސިއްޖެއެވެ. ކޮފީއެއް ބޯލުމަށްޓަކައި ހޮޓަލަށް އައިސް އޭނާގެ އަންހެނުން ސާތިރާއަށް ގުޅައި ރަށުގެ ހާލަތާބެހޭގޮތުން ނާގިތު މަޢުލޫމާތު ހޯދިއެވެ. ހެނދުނުގަޑީ ފޯނުކަނޑާލީ ކީއްވެތޯ ސާތިރާ ސުވާލުކުރުމުން ނާގިތުބުނީ މަސައްކަތުގައި އުޅެމުންދިޔަ ގަޑިއަކަށްވާތީ މަސައްކަތަށް ބުރޫއަރާފާނެތީ ފޯނުކަނޑާލީކަމަށެވެ.
ފާތާނިކެގެ މަރާއިގުޅިގެން ރަށުތެރޭގައި ތަފާތުއެއްވެސްކަމެއް ނުހިނގާކަމުގައި ސާތިރާ ބުނުމުން ނާގިތަށް ވަރަށްބޮޑު ހިތްހަމަ ޖެހުމެއް ލިބިގެންދިޔައެވެ. ހަމައެހެންމެ އޭނާގެ މޫނުމަތިން ފާޅުވަމުންދިޔަ ނުތަނަވަސްކަމާއި ކަންބޮޑުވުން ފިލައި އުފަލާއި ހިތްހަމަޖެހުން ފާޅުވެގެން ދިޔައެވެ.
ނާގިތު އޭނާގެ ރަށަށް ދިޔައީ ރަނގަޅުއާމްދަނީއެއް ލިބޭފަދަ މަސައްކަތެއް ލިބުމުން އޭނާގެ ރައްޓެއްސަކާއެކުގައި އެމަސައްކަތް ކުރާން ކަމަށް ބުނެފައި ނަމަވެސް އޭނާ އެރަށުގައި އެއްވެސް މަސައްކަތެއް ނުކުރާކަން އެރަށުގެ އެންމެނަށް ކަހަލަގޮތަކަށް އެނގެއެވެ. އެހެނަސް އޭނާގެ ފަރާތުން ފެންނަމުންދިޔަ ތަނަވަސްކަން ގިނަބަޔަކަށް ފާހަގަކުރެވެމުން ދިޔައެވެ.
ފާތާނިކެގެ މަރާގުޅިގެން ޕޮލިހުން ފާރަލަމުންދިޔަ މީހުންގެ ތެރެއިން އެކަކީ ނާގިތެވެ. އެރޭގެ ވަގުތެއްގައި ކުއްލިއަކަށް ނާގިތު އެރަށުން ފުރައިގެން އައުމާއި، ވޭތުވެދިޔަ ދެތިންމަހެއްހާ ދުވަހުގެ ތެރޭގައި އާމްދަނީ ލިބޭފަދަ އެއްވެސް މަސައްކަތެއް ނުުކުރާ ނާގިތުގެ ފަރާތުން ފެންނަމުންދިޔަ ތަނަވަސްކަމަކީ އޭނާއާމެދު ޕޮލިހުންނަށް ސައްކުކުރެވުނު ބައެއްކަންކަމެވެ.
ފާތާނިކެގެ މަރާއެކު އެގެއިން ގެއްލިފައިވާ ފައިސާ އާއި އަގުބޮޑު ގަހަނާތަކާއި އަދިވެސް ބައެއްތަކެއްޗާއި ގުޅިގެން މޯލްޑިވްސް ޕޮލިސް ސާވިސްގެ ފަރާތުން ކުރަމުންދިޔަ މަސައްކަތުގެ ދަށުން އަތުލައިގަތްމީހަކު ފާތާނިކެ މަރާލިކަމަށް އެއްބަސްވުން ވެގެންދިޔައީ މުޅިރާއްޖެއަށް ހާއްސަކޮށް ފާތާނިކެގެ ޢާއިލާއާއި އެރަށަށް ލިބުނު ވަރަށްބޮޑު ހައިރާންކަމަކަށެވެ.
ފާތާނިކެގެ މަރާއިގުޅިގެން ޕޮލިހުންގެ ބެލުމުގެ ދަށަށް ގެންދެވުނު ނާގިތު ފާތާނިކެ މަރާލިކަމަށް އެއްބަސްވުން ވެގެންދިޔައީ އޭނާގެ އަންހެނުން ސާތިރާއަށް ކެތްކުރެވޭވަރުގެ ކަމަކަށް ނުވިއެވެ. ހަމައެހެންމެ ރަނގަޅު އާމްދަނީއެއް ލިބޭ ކަހަލަ މަސައްކަތެއް އޭނާގެ ރަށުންލިބި އެމަސައްކަތް މާދަމާ ހެނދުނު ފަށާންޖެހޭކަމަށް ބުނެ އަވަސް އަރުވާލައިގެން އެރެއިން އެރެއަށް ފުރައިގެން ރަށަށް ދިޔައީ ކީއްވެގެންކަމާއި، އޭނާ އެރަށުގައި އެއްވެސް މަސައްކަތެއްނުކޮށް ދޮގުހަދައިގެން ސާތިރާމެންގާތަށް ނައިސް މަޑުކުރަމުން ދަނީ ކީއްވެގެންކަން ވެސް ސާތިރާއަށް އެނގުނީ މިހާރުއެވެ. ލިބުނު ހަބަރަށް ކެތްނުކުރެވިގެން ސާތިރާ އަނބުރައިގަނެގެން ވެއްޓިއްޖެއެވެ.
ފާތާނިކެގެ މަރާއިގުޅިގެން ޕޮލިހުން އަތުލައިގަތް ނާގިތުގެ ފަރާތުން ހޯދާންޖެހޭ ހުރިހާމަޢުލޫމާތެއް ހޯދައި ޕޮލިހުންގެ ފަރާތުން ކުރާންޖެހޭ އެންމެހައިކަންކަން ފުރިހަމަކޮށް ސަރުކާރުގެ ކަމާބެހޭ މުއައްސަސާތަކަށް ފޮނުވިއެވެ.
ގުދުރަތީމަރަށް ކަމަށް ނިންމައިގެންތިބެ ފާތާނިކޭގެ މަރުގެ ފުރަގަހުގައި ފޮރުވިފައިވާ ސިއްރު ހާމަވެގެންދިޔައިރު ރައްޔިތުންގެ ތެރެއިން ގިނަބަޔަކުތިބީ ބިރުން ސިހިސިހިއެވެ.
ނިމުނީ