ނީމް

ދުނޔެމައްޗަށްވަނީ ހަމަހިމޭކަން ވެރިވެފައެވެ. ވަގުތަކީ ދަންވަރުގެ ވަގުތެވެ. ނާޒިމާވަނީ ނިދީގެ މީރުކަމުން މަޙުރޫމުވެފައެވެ. އޭނާ ވަނީ ފުންޙިޔާލެއްގެ ތެރޭގައެވެ. އެހެނީ ދެލޯފަދަ ލޯބިވާ ދަރިފުޅު ނީމުގެ ޙިޔާލުގައެވެ. ނީމުގެ ހަނދާނުގައެވެ. ނީމުއަކީ ނާޒިމާއާއި ޤަފޫރަށް ލިބުނު ހަމައެކަނި ދަރިފުޅެވެ. ނީމުގެ އުމުރުން އެންމ ދެއަހަރުގައިޤަފޫރު ވަރަށް ކުއްލިގޮތަކަށް ނިޔާވީއެވެ. އެއީ ނާޒިމާގެ ޙަޔާތަށް އައި ހިތާމައިން ފުރިގެންވި ދުވަހެކެވެ. `ކުރި އަސަރެއްގެ ބޮޑުކަމުން އޭނާގެ ހެޔަށްގޮތްވެސްވިއެވެ. ނަމަވެސް ހެޔޮއެދޭ ރަޙުމަތްތެރިންނާއި އާޢިލާގެ މީހުންގެ އެހީއާއެކު އޭނާވަނީ މުޅިން އައު ދުނިޔެއަކަށް ނުކުމެފައެވެ. ދަރިފުޅަށްޓަކައެވެ. ދަރިފުޅުގެ މުސްތަޤުބަލަށްޓަކައެވެ.
ފުންޙިޔާލެއްގެ ތެރެއަށް ގެއްލިފައިން ނާޒިމާއަށް ސިހުން ލިބުނީ ފަސްއަހަރަށްދާ އޭނާގެ ދަރިފުޅު ނީމް ރޯންފެށުމުންނެވެ. ދެލޮލުން ފައިބައިފައިވާ ކަރުނަތަށް ފުހެލުމަށްފަހު ނީމުގެ ގާތަށް ދިޔައެވެ. އަދި ވަރަށް ލޯތްބާއެކު ދަރިފުޅުގެގައިގައި ބައްދާލިއެވެ. އަދި ރީތި ނާނާއެއް ކިޔައިދެމުން ނިންދެވިއެވެ. ޤަފޫރު ދުނިޔޭގައި ހުރިއިރު ނާޒިމާގެ ކުޑަ އާޢިލާ އުޅެމުން އައީ ފުދޭވަރެއްގެ ފުދޭވަރެއްގެ ތަނަވަސްކަމާއެކީގައެވެ. ނަމަވެސް ޤަފޫރު ނިޔާވުމުން އެއާޢިލާވަނީ ވަރަށް ދަތިވެފައެވެ. އެހެނަސް ނާޒިމާގެ ހިތްމަތާއި މިންނެތް މަސއްކަތުން ދިރިއުޅެލެވޭވަރުވެއެވެ.
ނާޒިމާ އިތުރު ކައިވެންޏަކަށް ނުވިންނައެވެ.
އޭނާގެ ދަރިފުޅަށް ދޮންބައްޕައެއް ހޯދައިދޭކަށް އޭނާ ބޭނުން ނުވަނީއެވެ. ނާޒިމާއަކީ ވަރަށް ރީތިކޮށް ހެދުންފަހާ މީހެކެވެ. އަދި ގަސްހެއްދުމަށް ލޯބިކުރާ އަޅުވެރި އަންހެނެކެވެ. އޭނާގެ މަސަކައްތުން އޭނާ ނީމުއަށް ކިޔަވައިދެވޭތޯ މަސައްކަތް ކުރެއެވެ. ނީމުގެ އުފަލަށްޓަކައި އޭނާ ހުރީ އޭނާގެ ފުރާނަ ޤުރުބާންކުރަންވެސް ތައްޔާރަށެވެ.