އެކުވެރިޔާ

މިއަދަކީ އަހަރެން ޗުއްޓީއަށް މާލެއައިދުވަހެވެ. ވަގުތަކީ މެންދުރުގެ ރަތްދަކަ އަވިދިން ވަގުތެވެ. އަހަރެންނާއި އަހަރެންގެ އެކުވެރި ސަމާއާއެކު އުޅެން ހަމަޖެހިފައިވާ ގެއަށް އާދެވުނުއިރު ގަޑިން އެކެއްޖަހައި ބޮޑުވެއްޖެއެވެ. ކާރުން ފޭބުމަށްފަހު ޑްރައިވަރު އަތަށް ރަންދިހަ ފަހެއް ނޫޓުގެ 100 ރުފިޔާ ދިއްކޮށްލުމުން އޭނާގެ ދަތްޕިލަ ސޭލުއަޅުވާލުމަށްފަހު ހިނގައްޖެއެވެ. ހަށިފުރާ ފުން ނޭވާއެއްލުމަށްފަހު މަގުގެ ދެކޮޅު ބަލާލީމެވެ. ހާދަހާވާ މީހުން ގިނައެވެ. މަސްމާރުކޭޓަށްވުރެ ކަންތައް ނުބައެވެ. ދަތުރުކުރުމުން ވެފައިވާ ވަރުބައްޔެއްގެ ސަބަބުން އަވަހަށް ތަންމައްޗެއްގައި އޮށޯވެލުމަށް ހިތް ކިޔަން ފެށިއެވެ.

އަހަރެން އަތުގައިއޮތް ޒަމާނީ ތަޅުދަނޑިން ފާރުގައި ހަރުކޮށްފައިވާ ހަތަރެސްކަން ބޯޑަކަށް ދިއްކޮށްލުމުން ހުޅުވިއްޖެއެވެ. ފޮށި ތަންމަތި ހިފައިގެން ބާރަށް ހިނގައިފައިގޮސް ރިސެޕްޝަން ޑެސްކު ކައިރީގައި މަޑުކޮށްލީމެވެ. އެތަނުގައި އިން އަންހެންކުއްޖާ ފަރި ގޮތަކަށް ހިނިތުންވެލާފައި އަހަރެންއަތަށް އެހެން ތަޅުދަނޑިއެއް ދިނެވެ. ވަގުތު ބޭކާރުނުކޮށް އެހިފައިގެންގޮސް ލިފްޓަށް އަރާ އަށަކަށް ފިތާލީމެވެ. އެތެރޭގައިހުރި އެޕާޓުމެންޓަށްވަދެ ދޮރުލައްޕާފައި އެނބުރުނުއިރު ހުއްޓުންނޭރީ ކިރިޔާއެވެ.

މާތްކަލާކޯއެވެ! އަނެއްކާ ސަމާ ކޮބައިހެއްޔެވެ؟ އަމިއްލަ ދަރިފަދައިން އޮޅުކޮށްގެން ގެންގުޅޭ ލޯބި ލޯބި ގުރާގެމަތިން ހަނދާންނެތެން އަހަރެންފަހެ މޮޔަވީހެއްޔެވެ. ސަމާ ވީތަނެއް ހޯދަން ސިކުނޑީގެ އެންމެ އަޑިއަށް ފީނައި ނުވިތާކަށް ރާޅާއަޅައި ފަތައިވެސް ނިމިއްޖެއެވެ. އެކަމަކު ހަމަހިލާ ސަމާވީތަނެއް ހަނދާނަކަށްނައެވެ.
ދޫނި ތުނބުން ފުމޭ އަޑަށް އަހަރެން ހޭވެރިކަންވިއެވެ. ބަލާލިއިރު ފޯނަށް ނުދަންނަ ނަމްބަރަކުން ގުޅަނީއެވެ. އަވަސްއަވަހަށް ފޯނު ކަންފަތުޖެހީމެވެ. ގުޅީ ބޭރުގައި ހުރި ސެކިއުރިޓީ އޮފިސަރެވެ. އަދި ގާތުގައި އަހަރެންގެ ގުރާ އެބައިންކަމަށް ޙަބަރު ދިނެވެ. އިންޖިނެއް އިސްޓާޓުކޮށްލުމުންދާ ބާރުމިނުގައި އެއޮފިސަރު ހުރި ދިމާލަށް ދިއުމަށް ދުއްވައިގަތީމެވެ.

އަހަރެން ފެނުމުން ސަމާ އުދުހިލާފައި އައިސް ކޮނޑުމައްޗަށް އެރިއެވެ. ކޮށްފައިހުރި އަސަރުން އަހަރެންގެ ޒަމާންވީ އެކުވެރި ސަމާ މަޑުމަޑުން އަތަށްލައި މަޢާފަށް އެދެން ފެށީމެވެ. އަހަރެން އެވަރަށް މާފަށް އެދުނުއިރުވެސް ސަމާއަށް ކެހެރުވަކެކޭވެސް ހީނުވެއެވެ. ސެކިއުރިޓީ އޮފިސަރު އަހަރެމެންނަށް ބަލާލައިފައި ބޯކަހާލުމަށްފަހު އެތާ ގޮނޑިއެއްގައި އިށީނދެއްޖެއެވެ. އަހަރެން އޭނާއަށް ޝުކުރު އަދާކުރުމަށްފަހު ސަމާއާއެކު އަނބުރައި އައިކޮޅަށް ދިޔައީ ދެން ދުވަހަކުވެސް ސަމާމަތިން ހަނދާންނަައްތައިނުލަން ހުވާކޮށްގެންނެވެ.

(ނިމުނީ)