އަހަރެންގެ މިނިވަންކަން ކޮބައި ހެއްޔެވެ؟

އަހަރެންނަކީ އަންހެން ކުއްޖެކެވެ. “ދިވެހި މުސްލިމެކެވެ”. އަހަރެންނަށް އިނގޭ ގޮތުގައި ދިވެހިންނަކީ ސައްތައިން ސައްތަ މުސްލިމުންނެވެ. މުސްލިމަކަށް ވީތީ ކޮންމެހެން ކުރަންޖެހެނީ 2 ކަމެކެވެ. އެއީ ނަމާދު ކުރުމާއި ޤުރުއާން ކިޔެވުމެވެ. އަންހެނުންނާއި ފިރިހެނުންނަކީ ހަމަހަމަ ބައެކެވެ. އެއީ ހެދުން އެޅުމާއި އުޅުމުގައިވެސް މެއެވެ. ނަމަވެސް އަތުގެ އިނގިލިތަކުން ގުނާ ލެވޭ ވަރަށް ބުރުގާ އަޅާފައި ތިބޭ މީހުންވެސް އަހަރެން ދެކެމެވެ. ޤަބޫލު ކުރާގޮތުން ބުރުގާއެއީ މުސްކުޅިން އަޅާ އެއްޗެކެވެ. ނޫނީ އައިބެއް ފޮރުވަން އަޅާ އެއްޗެކެވެ. އަހަރެންނަށް ދީނީ ގޮތުން ކަންކަމުގެ ޙަޤީޤަތެއް އޭރަކު ނޭނގެއެވެ.

އެއްދުވަހަކު އަހަރެން ވާރެޔާއި ތެމިގެން އުޅެނިކޮށް ވެއްޓި ނިތްކުރި ވަރަށް ބޮޑަށް ފަޅައިގެން ގޮއްސިއެވެ. ރަނގަޅު ވީއިރު 2 އިންޗި ދިގު ބައި އިންޗި ފުޅާ ލަކުނެއް ނިއްކުރީގައި ލައިފިއެވެ. އަދި އެތައް ބައެއްގެ މަލާމާތް އެ ލަކުނަށް ރައްދުވާން ފަށައިފިއެވެ. އަހަރެންގެ މިނިވަންކަން ކޮބައިހެއްޔެވެ؟ އަހަރެން އެކަމާ ލަދުން އެ ލަކުނު ފިލުވަން ވަރަށް މަސައްކަތް ކުރީމެވެ. ނަމަވެސް އަހަރެންނަށް ފޫނެތްފަޔަށް ފެންފުރުނީއެވެ. ދެން ހިތަށް އެރިއެވެ. އަހަރެން ބޮޑުވެގެން ބުރުގާ އަޅާނީއެވެ. އޭރުން އެހެންމީހަކަށް އެލަކުނެއް ނުފެންނާނެއެވެ.

އޭގެ 5 ވަރަކަށް އަހަރު ފަހެވެ. ބުރުގާ އަޅާމީހުން ގިނަވާން ފަށައިފިއެވެ. ހެދުމުގެ ކުލަވެސް ކަޅަށް ބަދަލުވާތީ ފެންނަން ފަށައިފިއެވެ. އަހަރެންނާއި އެކީގައި އުޅޭ ކުދިންވެސް މަލަމަތި ބަދަލު ކުރަންފަށައިފިއެވެ. އިސާހިތަކު މަންމަ އަހަރެން ބުރުގާ އެޅުމަށް ބުންޏެވެ. ނަމަވެސް މި ފަހަރު އަހަރެން އިންކާރު ކުރީމެވެ. ކީއްވެކަމެއް ހުދު އަހަރެންނަކަށް ނޭނގެއެވެ. އެއީ ބަޔަކު ކަމެއްކުރާތީ ކުރަން އަހަރެން ފޫހިވަނީ ކަމުގައި ވެދާނެއެވެ. މަންމަގެ ބުނުމަކަށް ބަދަލެއްނައެވެ. އެންމެފަހުން އަހަރެންވެސް ބުރުގާއަޅައި ކުލަބަދަލު ވެއްޖައީމެވެ. ގިނަދުވަސްތަކެއްނުވެއެވެ. ރައްޓެހިންގެ ސަބަބުން ކުރީގައި ނުލާފަދަ ގަޔަށް ބާރު ކުރު އެއްޗިސް ލާންފެށިއްޖެއެވެ. ބަޔަކު ކުރާތީ ކަމެއް ކުރަންވެއްޖެ ނަމަ ވާނީވެސް މިހެންތާއެވެ.

ދެންއައީ ޙަޔާތުގައިވެސް އެންމެ ލަދުގަތް ދުވަސް ތަކާއެވެ. އެއީ އަހަރެންގެ މާހައުލު ބަދަލު ވުމުންނެވެ. އެ މާހައުލުގައި އުޅުނީ ވަރަށް “އަނގަ ބޮޑު” މީހުންނެވެ. އަހަރެން ގަޔަށް ބާރު އެއްޗިސް ލުމުން އަހަރެންގެ ވަނާތަކައި ވަކި ވަކިން އެމީހުންގެ މުޑުދާރު ދުލުން ފޮށެއެވެ. އެފަދަ ކޮންމެ ވަގުތަކު ހިތަށްއަރައެވެ. އަހަރެންގެ މިނިވަންކަން ކޮބައިހެއްޔެވެ؟ އަހަރެން ވަރަށް ލަދުގަނެއެވެ. ކަރާލައި އޮޅާފައި އޮންނަ ބުރުގާ އެހެން ބުނާ ކޮންމެފަހަރަކު ތިރިކޮއްލެވެއެވެ. މުޑުދާރީ އެމީހުންގެ ދޫ އެކަންޏެއް ނޫނެވެ. އަހަރެންގެ ސިކުނޑިވެސް މެއެވެ. ނަތީޖާއަކަށްވީ އަހަރެން އެފަދަ ހެދުންތަކާ ދުރުވުމެވެ. ކުރީގައި ބާވެގެން ބަހައްޓާފައި ހުރި ދިގު ގަޔަށް ދޫ ހެދުންތަކާ ކައިރިވެވުމެވެ. އެންމެފަހުން އަހަރެންގެ ހެދުން އެޅުމުގެ މިންގަނޑު މުޅިންބަދަލު ކޮށްލީމެވެ. ބޮޑު ކަޅު ހެދުންތަކަކަށެވެ.

މި ކަޅު ހެދުމުގެ ތެރެއިން ކުރީގައި އަހަރެންނަށް ނުފެންނަ އެތަށް ކަމެއް ފެންނަން ފަށައިފި އެވެ. ދީނުގެ ކަންކަމަށް ސަމާލުކަން ދޭން ފެށިއްޖެއެވެ. ދީނީ ޢިލްމު ހޯދަން މަސައްކަތް ކުރަން ފަށައިފީމެވެ. ޙަޤިޤަތުގައި އިންޓަރނެޓްގެ ބޭނުން ހެޔޮގޮތުގައި ކުރަން ފެށުނީ ދެނެވެ. ޙިޖާބުގެ ވާހަކަތައްވެސް ކިޔަން ފަށައިފީމެވެ. އެހެންނަމަވެސް އެއީ މުޙިންމު ކަމެއް ކަމުގައި ނުދެކެވުނެވެ. އިދިކޮޅުހަދާ މީހުންގެ ވާހަކަތައް އޭރުވެސް ކޮންމެވެސް ވަރަކަށް ޤަބޫލު ކުރެވޭތީއެވެ.

ދުވަސްވަރަކީ އަހަރެންގެ ފުރާވަރުގެ ދުވަސްވަރުކަމުން ރަނގަޅު މީހަކު ޙަޔާތަށް ލިބޭތޯ ﷲ ގެ ހަޟްރަތުގައި ދަންނަވަމުން އައީމެވެ. މާގިނަ ދުވަސްތަކެއްނުވެ އަހަރެން ބޭނުންވާ ކަހަލަ މީހަކު އަހަރެންނާ ކައިވެނި ހުށައަޅައިފިއެވެ. އަދި އިސްލާމީ އެންގޭޖްމަންޓް އަކުން އެންގޭޖް ކުރެވުނެވެ. މަދު މަދުން ވާހަކަވެސް ދައްކަމެވެ.

މިހެން އުޅުމުގެ ތެރޭގައި އަހަރެންގެ ސަމާލުކަން ހުއްޓުނީ އެއްދުވަހަލު ބުނެލި ޖުމުލައަކަށެވެ. “އަހަރެންނަށް މޫނު ފެނުމުންވެސް ވަރަށް ހިތްހަމަ ޖެހުން ލިބޭ. ތި މޫނު އެހެންމީހުންގެ ފިތުނައިން ފޮރުވަންވީނު”. އަހަރެން މިކަމާ ވަރަށް ވިސްނީމެވެ. ހިތަށް އެރިއެވެ. އަހަރެންގެ މޫނަށް ބަލައި ކިތައްމީހުން އެފަދައިން ހިތްހަމަޖެހުން ހޯދާނެ ބާއެވެ؟ އަހަރެން އެންމެ ނުރުހޭމީހުންވެސް މީ މޫނަށް ބަލައި އުފާ ހޯދަނީއެވެ. މި މޫނުފެނި ކިތަށް މީހުންގެ ހިތައް ފިނިކަން ލިބިފައިވާނެ ހެއްޔެވެ؟ ހަސަދަ ވާ މީހުންގެ ކިތަކެއް ވިހަ ޖުމްލަ ތަކެއް މި މޫނަށް އަމާޒު ވެފައިވާނެބާއެވެ؟ އަހަރެންގެ މޫނުގެ އަގު ކޮބައިބާއެވެ؟ އަހަރެންގެ މިނިވަންކަން ކޮބައިބާއެވެ؟ އަހަރެންގެ މޫނުވަނީ ހިލޭ މީހުން އިންސާފު ކުރުމަށް ދޫކޮށްލެވިފައެވެ. އަހަރެންނަށް ދެރަވެ ރޮވިއްޖެއެވެ. އަހަރެންގެ ފިރިމީހާއަށްޓަކައި މި މޫނު ރައްކާ ނުކުރެވުނީތީ ލަދުގަންނަން ފަށައިފިއެވެ. އަހަރެންގެ މިނިވަންކަންވަނީ މި ހިޖާބުގައިކަން ވިސްނިއްޖެއެވެ. ވަގުތުން އަހަރެން އަޒުމް ކަނޑައެޅީމެވެ. އިސްލާމީ ފުރިހަމަ ހިޖާބުން ނިވާވެ އަހަރެންގެ މުޅި ހަށިގަނޑު ފިރިމީހާއަށްޓަކައި ރައްކާކުރުމަށެވެ. ﷲ އެކަލާނގެ މޫރިތި ކަލާމްފުޅުގައި ވަޙީ ކުރައްވާފައިވާ ބަސްފުޅަށް ތަބަޢަވުމުގެ ގޮތުންނެވެ. .

” يَا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاء الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ ذَلِكَ أَدْنَى أَن يُعْرَفْنَ فَلَا يُؤْذَيْنَ وَكَانَ اللَّهُ غَفُورًا رَّحِيمًا ”

” އޭނަބިއްޔާއެވެ! ކަލޭގެފާނުގެ އަނބިއަނބި ކަނބަލުންނާއި، ކަލޭގެފާނުގެ ދަރިދަރި ކަނބަލުންނާއި، މުއުމިނުންގެ އަންހެނުން، އެކަނބަލުންގެ ފޭރާންތަކުން ނިވައިވެ ތިބުމަށް ކަލޭގެފާނު އެކަނބަލުންނަށް ވިދާޅުވާށެވެ! އެކަނބަލުން އެނގިގެން ވުމަށާއި، އެކަނބަލުންނަށް އުނދަގޫ ނުލިބުމަށް އެގޮތް މާ ގާތްކަން ބޮޑެވެ. ﷲ އީ، ގިނަގިނައިން ފާފަފުއްސަވާ، ރަޙީމްވަންތަ ރަސްކަލާނގެ ކަމުގައި ވޮޑިގެންވެއެވެ. ” (ސޫރަތުލް އަޙްޒާބު 59 )

އާއެކެވެ. މިހާރު އަހަރެންނަކީ ﷲ ގެ އިރާދަފުޅުން ފުރިހަމަ ހިޖާބުން ހިޖާބުވެ ހުރި އަތްބަކީމެވެ. އަހަރެންގެ މުޅިހަށިގަނޑު ފިރިމީހާއަށްޓަކައި ރައްކާކޮއްގެނެވެ. ފިތުނައިން ރައްކާތެރިވެގެންނެވެ. މި ފަރުދާގެ ތެރޭގައި އަހަރެންގެ ފުރިހަމަ މިނިވަންކަމާއެކުގައެވެ. ކުރީގައި އަހަރެންނާ ފޮށެ އުޅުނުމީހުން މިހާރު އަހަރެން ފެނުމުން އިސްޖަހާހައިވެއެވެ. މަގުމަތީގައި މީހުންގައިގައި ކޭތެމުން ދުވާމީހުން އަހަރެންނަށް މަގުން ހިނގާނޭތަން ދައްކައެވެ. އަހަރެންނަށް ފާރަލަމުން އައި މީހުން މިއަދު ގެއްލިއްޖެއެވެ. އަހަރެންގެ މޫނުން ހިތްހަމަޖެހުން ހޯދާ މީހުން އިނދަޖެހިއްޖެއެވެ.

އުޚްތާއެވެ! ތިބާއަށްވެސް މި ފުރުޞަތު އެބައޮތެވެ. މީހުންގެ ތެރޭގައި ނީލަން ކިޔާ މީހަކަށް ތިބާ ނުވާށެވެ. ތިބާއަކީވެސް އަގު ބޮޑު އެއްޗެކެވެ. ތި ހަށިގަނޑުފިތުނައިގެ ބަސްތަކުން ރައްކާކުރާށެވެ. ތިބާއަކީ ހިލޭ މިހުންގެ ހިތްހަމަ ޖެހުންކަމުގައި ނުވާށެވެ. ތިބާގެ ތި ފަރި ވަނާތައް ފޮރުވާށެވެ. ފުރިހަމަ ހިތްހަމަޖެހުން އޭރުން އޮތީ ތިބާއަށެވެ. ތިބާ މިނިވަންވީތީއެވެ. އެހެންމީހުންގެ ވިހަ ބަސްތަކުން ސަލާމަތްވީތީއެވެ. ﷲގެ މަގުގައި ފައިތިލަ ޘާބިތު ކުރެވުނީތީއެވެ. މި ހިތްހަމަޖެހުން މިހާރު އަހަރެންނަށް ލިބެއެވެ. الحمد لله