ހިތުން ނުފިލި މަސްދަތުރު

އެންމެ ކުޑައިރުންސުރެ ވެސް ބައްޕައާއެކު މަސްބާނަން ދިޔުމަކީ އަހަރެން އެންމެ ކުރާހިތްވާ ކަމެވެ. ނަމަވެސް އެފަދަ ފުރުޞަތެއް އަދި ލިބޭ ގޮތެއް ނުވެ އެވެ. އެކަމަކު މިފަހަރު ދާނަމެވެ. ބައްޕަ ބުނުއްވާފައިވަނީ ކުލާހުން އެއްވަނަ ހޯދުމަށެވެ. އެކަން އަހަރެން ކާމިޔާބު ކޮށްފީމެވެ. ވީމާ ބައްޕަ އަހަރެންގެ އެދުން ފުރިހަމަކޮށްދޭން އެއްބަސްވީ ވަރަށް ވެސް އުފަލާއެކުގަ އެވެ.

ފުރަން ހަމަޖެހިފައިވާ ގަޑިއަށް ބައްޕަ އާއި އެކު އަހަރެން ވެސް ދިޔައީމެވެ. ބައްޕަ އަހަންނަށް ވަނީ އޮށްޓަކުން ކުޑަ ވަރެއްގެ ދޮށްޓެއް ވެސް ހަދާދީފަ އެވެ. ބައްޕަ ދޯނީގައި އިތުރު ހައެއްކަ މީހުންވެސް ދެއެވެ. އެމީހުން އަހަންނަށް ގޮވަނީ “ކުޑަ ކެޔޮޅު” ގެ ނަމުންނެވެ. އަހަރެން ހުރީ ފަޚުރުވެރިވެފަ އެވެ. ފަތިހުގެ ފިނިފިނި ރޯޅި ތަކުންނާއި، ދޯނި ދަތުރުކުރަމުން ދާއިރު އިވޭ ރާޅުގެ ލުއިލުއި މިޔުޒިކުގެ އަޑުން، އަދި ދޫނިސޫފާސޫފީގެ ގޮވުމުން މާހައުލަށް ހިތްފަސޭހަކަން ގެނުވައިދެ އެވެ. އަހަރެން އިނީ ދޯނީގެ އެއްފަރާތެއްގަ އެވެ. ބައްޕަގެ މޮޅު ކެޔޮޅުވެރިކަމަށް ފަޚުރުވެރި ވެފަ އެވެ.

ދޯނި ކަނޑަށް ނުކުމެއްޖެ އެވެ. ބައްޕަ އަހަރެންގާތު ބުނީ ގެގަނޑުގައި އިނުމަށެވެ. ނަމަވެސް އަހަރެން ގަދަދައްކާފައި ބައްޕައާއި އެކު މަސްބޭނުމަށް ނިކުމެއްޖައީމެވެ. ޒާހިދުބެ އަކީ އަހަރެންގެ ބޮޑުބެ އެވެ. ބައްޕަ އެން އުކަން ފެށުމުން އަހަރެން ދިޔައީ ޒާހިދުބެ ގާތަށެވެ. ލޮނުގަނޑު ފެނުމުން އަހަރެންގެ ދެލޯ ތަރަތަރަ ޖަހައިގެން ދިޔަ އެވެ. ލޮނުގަނޑު މަތީގައި މަސްތައް ފުމެނީ އެވެ. ބައިވަރޭ ބުންޏަސް ބައިވަރެވެ. ދޯނި ތަންކޮޅެއް ތިލަ ނަމަ މަސްތައް ދޯންޏަށް ވެސް އެރީހެވެ.

ބައްޕަގެ އަމުރަށް ދޯނި މަޑުޖެހިއްޖެ އެވެ. މަސްބާނާ މަންޒަރު ވަރަށް ފައްކަލެވެ. މަހަކަށްފަހު މަހެކެވެ. އެމީހުން މަސްބާނާ ފަރާތްނޫން އަނެއްފަރާތުގައި އަހަރެން، އަހަރެންގެ “ދޮށި” ކަނޑަށް ތިރިކޮށްގެން އިނީމެވެ. ބޭބެމެން، ބައްޕަމެން މަސްބާނާ ގޮތަކަށް އަހަންނަކަށް މަހެއް ނުބެވެ އެވެ. އަހަރެންގެ “އެންކޮޅު” މާ ނުބައީތާ އެވެ. ކުއްލިއަކަށް އަހަރެންގެ ދޮށްޓަށް ކުއްލިއެއް ޖެހިއްޖެ އެވެ. ޒާހިދުބެ އެވަގުތު ނުހިފެހެއްޓި ނަމަ އަހަރެން ބޯވަތަށް ވެއްޓޭނީ މާސިންގާ ކަނޑަށެވެ. އަހަރެމެންނަކަށް ވިސްނާލާކަށް ދެވަނަ ސިކުންތެއް ނުލިބުނެވެ. ދޯނި އެއްފަރާތަކަށް އަރިވެއްޖެ އެވެ. މަސްބޭނުމުގެ ފޯރީގައި ތިބި މީހުންތައް ވެސް ދޯނީގެ އެއްކަނަކަށް ގުޅައަކަށް ޖެހިއްޖެ އެވެ.

“އެއްޗެއްގަ ލައިގެންފި! ދޯނި ދަށުގަ އެއްޗެއް އެބައުޅޭ!” ބައްޕަ ހަޅޭއްލަވާގަތެވެ.

ދޯނި ދެފަރާތަކަށް ހެލެމުން ދިޔަ އެވެ. އަހަންނަށް ފައި އެޅެނީ ކިރިޔާ އެވެ. ޒާހިދުބޭގެ އެހީގައި އަހަރެން ގެގަނޑަށް ވަދެއްޖެއީމެވެ. އޭރު އަހަރެންގެ ހިތް ހީވަނީ މޭ ފަޅާލާފައި ނުކުމެދާނެހެންނެވެ. ޒާހިދުބެ އަހަރެން ގާތު އެތަނުން ނުނިކުންނައްޗޭ ކިޔާފައި ދިޔައީ އެވެ. އެކަކަށް ވެސް ދޯނި ކައިރީގައި އެއުޅެނީ ކޮން އެއްޗެއް ކަމެއް ނޭނގެ އެވެ.

އަހަންނަކަށް އެކަނި ހުންނާކަށް ފަސޭހައެއް ނުވި އެވެ. ދޯނި ތަންކޮޅެއް މަތަވުމުން އަހަރެން ނުކުތީމެވެ. އޭރު ބައްޕަމެން ތިބީ އެން އުކާތާ ކައިރީގަ އެވެ. ބައެއްމީހުން ފޯނު ކުރަނީ އެވެ. އަހަންނަށް އެޅުނީ ބަރާބަރު ދެފިޔަވަޅެވެ. ކުއްލިއަކަށް ދޯނި އަރިވެއްޖެ އެވެ. އަހަރެން ދިޔައީ އެއްލިގެންނެވެ. ރޯމަހެއް ހެންނެވެ. ފުރޮޅެމުން ފުރޮޅެމުން ގޮސް ޖެހުނީ ދޯނީގެ އެއް އަރިއަށެވެ. އެއަރިމަތި ތިލަނަމަ އެދިޔަ ގޮތަށް އަހަރެން ވެއްޓުނީހީ ސީދާ ކަނޑަށެވެ. ޖެހުނު ގޮތަކުން މާބޮޑަކަށް ތަދެއްނުވެ އެވެ. ބޯހިއްލާލާފައި ކަނޑަށް ބަލައިލީމެވެ. އެވަގުތު އަހަރެންގެ މޭގަނޑު އަނގަޔަށް އައި ކަހަލަ އެވެ. ފެނުނީ ގަދަ ފެހި ކުލައަކަށްދާ މަހެއްގެ ބިޔަ އުރަފަތް ގަނޑެވެ. އޭތި އަޑިޔަށް ދިޔަތާ މާ ގިނައިރެއް ނުވެ އެވެ. ދެތިން ސިކުންތުގެ ތެރޭގައި ފެނުނީ ލޮނުގަނޑު ފޮނުޖަހާފައި މައްޗަށް އެރިތަނެވެ. މާތް ކަލާކޯ އެވެ! އޭގެ ދިގުމިނުގައި ތިރީހަކަށް ފޫޓު ހުރެދާނެ އެވެ. އުރަފަތްގަނޑު ވަނީ ހުޅުވާލާފަ އެވެ. ކުޑަމިނުން އޭގެ ލޮލުގައިވާ ނޫކުލައިގެ ތޫނު ވިދުވަރުވެސް އަހަރެން ދުށީމެވެ. ދޯނި މަތިން ފުންމާލި އެ މަހުގެ އެންމެ ތަންފުކެއް ވެސް ދޯނީގައި ޖެހުނުނަމަ، މުޅި ދޯނި ފިސްފިސް ވީހެވެ. އެދިޔަގޮތަށް އޭތި ޖެހުނީ އަނެއް ފަރާތު ލޮނުގަނޑަށެވެ. ދޯންޏަށް ހީވީ ޒަލްޒަލާއެއް އައި ހެންނެވެ. އޮއިވަރުގައި ޖެހި ދޯނި އެކީ އެކައްޗަކަށް ބަންޑުން ޖެހިއްޖެ އެވެ.

ހަޅޭއްލަވަމުން އަހަރެން ލޯ ހުޅުވާލީމެވެ. އޭރު ފިނިވެގެން މުޅިމީހާ ތުރުތުރު އަޅަ އެވެ. އަހަރެން އޮތީ އެނދުން ވެއްޓި ތަޅުންގަނޑު މަތީގަ އެވެ. މިފެނުނީ ހުވަފެނެއްކަން އެނގުނީ އެހާ ހިސާބުންނެވެ. އެދުވަހު ބައްޕަ އާއިއެކު މަހަށް ދާން އުޅެފައި އަހަރެން ނުދިޔައީ ބޮލުގައި ރިއްސާތީއޭ ކިޔާފަ އެވެ…

=ނިމުނީ=