ވީމޭ އިންތިޒާރުގައި – 34 (ފަހުބައި)

“ކިޔާން މޮޔަ ނުވެބަލަ.. ކިޔާންއަށް ކޮން ކަމެއްތަ އަހަރެން ރީޝް ދެކެ ލޯބިވިޔަސް.. ނޫޅެމޭ ތިމީހުންގެ ދިރިއުޅުން ހަލާކު ކުރާކަށް.. އެލީޒާ ހެދިހެން އަހަރެންވެސް ފިލަންވީތަ؟ ލަންޑަނަށް ގޮސްގެން ރީހާންވެސް އެއައީ އެންމެފަހުން އެލީޒާ ނުފެނިގެން..” މާއިލް އަށް މުހިންމުވީ ރީޝަމްގެ އުފަލާއި ކިޔާންގެ އުފަލެވެ. ކިޔާން އެއްޗެއް ނުބުނެ ބަލަހައްޓައިގެން ހުއްޓެވެ.”މީގެ ފަހުން ރީޝަމްއަށް ކިޔާންގެ ފަރާތުން ދުރުކަމެއް ފެނިގެން ނުވާނެ. އެހެން ނޫނީ..” އިންޒާރު ދީފައި މާއިލް ދެލޯ އަޅާލިއެވެ. “އެހެން ނޫނީ ކީއްކުރާނީ؟ މަ ކާލާނީ؟” ކިޔާން ވެސް ދެބުމަ ކައިރި ކޮށްލިއެވެ.”ކިޔާން ހަމަ އަސްލަށް ބޭނުންތަ މަ ރީޝްއާ މެރީ ކުރަން؟؟..”

**34 ވަނަ ޕާޓު**

“މާއިލް-..” ހަމައެކަނި އެހެން ބުނެފައި ކިޔާން ހުއްޓާލީ ރީހާން އައިސް އެތަނަށް މަޑުކޮށްލުމުންނެވެ.”ރީޝަމް އެބަ އުޅޭތަ؟..” ރީހާންގެ އަޑުގައި ހިތްހަމަ ނުޖެހުން ހުއްޓެވެ.”ކީއްކުރަން އޭނަ ހޯދަނީ؟..” ކިޔާން ވެސް ކޮށްލީ ސުވާލެކެވެ.”ވާހަކައެއް ބުނަން..” އެތެރެއަށް ބަލާލަމުން ރީހާން ބުންޏެވެ.”ތި ބުނަން އުޅޭ އެއްޗެއް މަގޭ ކައިރީގަ ނުބުނެވެނީތަ؟..”

“އަހަރެމެންގެ އަމިއްލަ މައްސަލައެއް އެއީ.. ދައްތަ ވެސް ބުނެގެން އެއްކޮށް އެ ޚަބަރު ދެނީ.. އަހަރެން ރީޝް އާއި މީޓް ކުރަން ފުރުސަތު ނުދޭނަމަ ބުނޭ ދައްތަ ބުންޏޭ ޔަމާން އާ ވާހަކަ ދައްކަން ބޭނުމޭ..އަހަރެމެން ގޮވައިގެން..” ޒުވާބަކަށް ދާން ބޭނުން ނުވުމުން ރީހާން ބުންޏެވެ. ކިޔާން ފާޑަކަށް ހޫމްއޭ ބުނެލުމުން ރީހާން ދިޔައެވެ.”ސޯ ތިބުނީ މަ ރީޝް އާ މެރީ ކުރާށޭ ތަ؟..” މާއިލް އަނގައަށް ގޮތެއް ހަދާލިއެވެ.”ދެން ދާންއުޅޭ.” މާއިލް ފައްސާލަމުން ކަހަލަ ގޮތަށް ކިޔާން އެތެރެއަށް ވަނެވެ.

“ރީޝަމް..” އެތެރެއަށް ވަނުމުގެ ކުރިން ކިޔާން އެއްކުރި ހުރިހާ ހިއްވަރެއް ލައިގެން ރީޝަމްއަށް ގޮވާލިއެވެ. ވަގުތުން ރިޔާއަށް ކޮންމެވެސް ކަމެއް ކޮށްދޭން ހުރެފައި ރީޝަމް އައެވެ. ރިޔާ ވެސް ފަހަތުން އައެވެ.”ކިހިނެއް ވީ ކިޔާ؟…” ހިނިތުންވަމުން ރީޝަމް އެއްސެވެ.”އަ.. އަހަރެން ރީޝަމް ވަރިކުރަން ބޭނުން..” ކިޔާން ބުނި ޖުމްލައިން ރީޝަމްއަށް ދެލޯ ބޮޑުކޮށްލެވުނެވެ.”ރިޔާ އެހަށް ވަދޭ އެތެރެއަށް!.” ލިބުނު ޝޮކްގައި ރީޝަމް ރިޔާ އާއި ދިމާއަށް ތަންކޮޅެއް ބާރަށް ވާހަކަ ދެއްކިއެވެ.

“ކިޔާން ކީކޭތަ ތި ކިޔަނީ؟؟” ރީޝަމް ކިޔާންގެ ގަމީހުގައި ހިފާ ތަޅުވައިގަތެވެ.”އެއްޗެހި ޕެކް ކުރޭ.. ކޯޓަށް ދާން ވެސް ތައްޔާރު ވެގެން ހުންނާތި.” ކިޔާން ރީޝަމް އާއި ދުރުވެލަމުން ބުންޏެވެ. ވީ ދެރައިން ރީޝަމްއަށް ނޫނެކޭ ކިޔާފައި ހަޅޭއްލަވައި ގަނެވުނެވެ.”ހެޔޮނުވާނެ ކިޔާން ޕްލީޒް! ރިޔާއަށް ވާނެ ގޮތަކާއި މެދު ކުޑަމިނުން ވިސްނާލަބަލަ އަހަރެން މަތިން ފޫހިވިޔަސް…” ރޮމުން ރީޝަމް އާދޭސް ކުރިއެވެ. ކިޔާންއަށް އެއްޗެކޭ ނުބުނެވުނެވެ. އެހެން ކަމުން ކޮޓަރިއަށް ވަދެގެން ދިޔައީއެވެ. ރީޝަމް ރޯންފެށިއެވެ. ކިޔާން ކިތަންމެ ދުރުން އުޅުނަސް މިވަރު ކަމަކަށް އެދޭނޭ ދުވަހަކު ވެސް ރީޝަމްގެ ހިތަކަށް ނާރާ އެވެ.

ކިޔާން ފާޚާނާ އާއި ދިމާއަށް މިސްރާބު ޖެހީ ތާޒާ ވެލުމަށެވެ. ފެންވަރާލައިގެން ކިޔާން ނިކުތް އިރު ރީޝަމް ކޮޓަރިއަށް ވަންނަނީއެވެ. ދެލޯ ވަނީ ރުއިމުގެ ސަބަބުން ރަތްވެފައެވެ. ކިތަންމެ އަޅާ ނުލާން މަސައްކަތް ކުރި ނަމަވެސް ކިޔާންގެ ހިތަށް އުނދަގޫވިއެވެ. ރީޝަމްއަށް ސަމާލުކަން ނުދޭކަމަށް ހަދަމުން ކިޔާން ގަމީހަކާއި ޖިންސެއް ލައިގެން ކޮޓަރިން ނިކުތީ ކޯޓަށް ދިއުމަށެވެ.

ނަމަވެސް ކޯޓުގެ ކުރިމަތިން ފެނުނު މަންޒަރަކުން ކިޔާން މަޑުކޮށްލިއެވެ.”ޕްލީޒް.. އަހަރެން ކީއްހޭ ކުރީ! އަހަރެން ބަލިވުމަކީ އަހަރެންގެ ކަމެއްތަ؟ ކާކު އަހަރެމެންގެ ދަރިފުޅަށް ޚަރަދު ކުރާނީ؟ އަހަރެން ވަކި ވަންނާނީ ކޮންތާކަށް؟ ހެޔޮނުވާނެ އަހަރެން ވަރި ނުކުރޭ!…” ދިހަ އެގާރަ ވަރަކަށް އަހަރުގެ ފިރިހެން ކުއްޖެއް ގޮވައިގެން ހުރި އަންހެން މީހާ އާދޭސް ކުރަމުން ދިޔައީ އޭނާގެ ފިރިމީހާ ކައިރީގައި ވަރި ނުކުރުމަށް އެދިއެވެ.”ތީ މަގޭ އަންބެއް ނޫނޭ ތިހުރީ ވަރިކޮށްފައޭ ކިތަށް ފަހަރު ހޭ ބުނަންވީ!!!.”އެ ފިރިހެންމީހާ ހަޅޭއްލަވައި ގަތީ ރުޅިއައިސްފައެވެ.

“ކިހާ ދެރަ.. އަހަރަމެންގެ މުޖުތަމަޢުގަ ވާހަކަ ރަނގަޅަށް ވާނީ ނުދެއްކިއްޔާ..” ފަހަތުން އިވުނު މީހެއްގެ އަޑުން ކިޔާން ފަހަތަށް އެނބުރުނެވެ. އޭރު ނުލާހިކު ހިތްދަތި ވެފައި އެ ތިރީސް ވަރަކަށް އަހަރުގެ މީހާ ޒުވާބު ކުރަމުންދިޔަ ދެމީހުންނާ ދިމާއަށް ބަލަން ހުއްޓެވެ.”ކީއްކުރަނީ މިތަނުގަ..” އޭނަ ކިޔާން އާއި ސުވާލު ކުރިއެވެ.”އަނެއް.. މީ ވަރީގެ ފޯމެއް ބަލާ..” ޖެހިލުންވެފައި ކިޔާން ބުންޏެވެ.”އައްދެ.. އަންހެނުން ރުޅިއެރުވީތަ؟.” އޭނާ ހިނިގަނޑެއް ޖަހާލިއެވެ.”ނޫނޭ ކުޑަ މައްސަލައެއް އޮތީމަ ދެން.. ކިހިނެއްވެ ތިއެހީ؟” ކިޔާން ކުޑަކޮށް ހިތްހަމަ ނުޖެހުނީ އެ ނުދަންނަ މީހާ ސުވާލު ކުރާތީއެވެ.

“އަހާލީ ހަމަ.. އިނގޭ އެހާ ގަޔާ ނުވާނެކަން އެކަމަކު ޖެހުނު މައްސަލަ ހައްލު ނުކޮށް ވަރިވިއްޔާ ފަހުން ޖެހިދާނެ ހިތާމަ ކުރަން ވެސް.. އަހަރެން ވެސް ފުރަތަމަ އަހަރެންގެ އަންހެނުން ވަރިކުރީ ކޫސަނި ކަމަކަށް.. މިހާރު އަހަރެން ހިތާމަ ކުރަން އެކަމަށް..” އޭނާ ވާހަކަ ދެއްކިއެވެ. ނޭނގޭ ސަބަބަކާހުރެ ކިޔާން އެވާހަކަ އަށް ޝައުގުވެރިކަން ދެވުނެވެ.”އެ ކީއްވެ ހިތާމަ ކުރަންވީ؟..” ކިޔާން އެހިއެވެ.”ކޮންމެ އެއްޗެއްގެ ވެސް މުހިންމުކަން އިނގޭނީ އެ އެއްޗެއް އަތުން ބީވެގެން ދާ ފަހުން.. ހަމަ އެގޮތަށް އިންސާނުން ވެސް.. އަހަންނަށް ވެސް ވީ އެހެން..”

“ޚާއްސަކޮށް ތިކަހަލަ ޒުވާން އުމުރުގައި މައްސަލަ ހައްލުކުރަން މަސައްކަތް ނުކޮށް ވަރިކުރަން ނިންމުމަކީ އަސްލު ވަރަށް ހިތާމަވެރިކަމެއް..އޭ ނެތޭ ކުރެވޭކަށް މާ ގިނައިރަކު.. ދަނީ އިނގޭ..” އެމީހާ އެހެން ބުނެފައި ދާން ހިނގައިގަތެވެ. ކިޔާންއަށް އަދިވެސް އެއްފަހަރު ކޯޓާއި ދިމާއަށް ބަލާލެވުނެވެ. އޭރު އެއްކަލަ އަންހެން މީހާ ދަރިފުޅުގެ ގައިގައި ބައްދައިގެން ރޯން އިނީ ގޮތް ހުސްވެފައެވެ. ރީޝަމް އާއި މެދު ވިސްނާލެވުނެވެ. ރީޝަމް ދޫކޮށްލާފައި ކިޔާން ދާނެ ދުވަހަކުން ރީޝަމް ވެސް ވާނީ މި ހާލުގައިތޯ އަމިއްލަ ނަފްސާއި ސުވާލު ކޮށްލެވުނެވެ. ނުވެސް ދަންނަ އަދި ކުޑަމިނުން ނަން ވެސް ނޭނގޭ މީހަކު އައިސް ދެއްކި ވާހަކަތަކުން ކިޔާންއަށް ވިސްނަން މަޖުބޫރު ވިއެވެ.

ކިޔާން ރީޝަމް އާއި އެކީ އުޅެގެން މާއިލްގެ ހިތަށް ތަދުވިޔަސް އެންމެ ރަނގަޅީ އެގޮތް ކަން އިނގުނީ ބޮޑަށް ވިސްނާލުމުންނެވެ. މާއިލް ފުރަތަމަ ބުނިހެން ދެވަނަ ލޯތްބޭ ކިޔާ އެއްޗެއް ވެސް އޮވެއެވެ. ސިދާ މި ވަގުތުން ވަގުތަށް ނޫނަސް މާއިލްއަށް އެ ނަސީބު ވެސް ލިބިދާނެއެވެ. ރީހާން އާއި ދުރުގައި ރީޝަމް ބަހައްޓައިގެން ވެސް ވަކި ފައިދާއެއް ވި ހެއްޔޭ ހިތަށް އެރުމުން ކިޔާން ބޮލުގައި ރިއްސާލިއެވެ. ކިޔާން ހިނިތުންވެލިއެވެ. އެމީހާއަށް ހިތާއި ހިތުން ޝުކުރުވެރިވެ ހެއްދެވި ފަރާތަށް ހަމްދު ކުރެވުނެވެ.

“ރީޝް..” ކޮޓަރިއަށް ވަދެފައި ކިޔާން ގޮވާލިއެވެ.”ރީހާން ބުނީ ދައްތަ ބޭނުމޭ ބައްޕައާ ވާހަކަ ދައްކަން ރީޝްމެން ގޮވައިގެން.. އެންޑް ސޮރީ..” ރިޝަމްގެ އުނަގަނޑުގައި އަތް އަޅުވާލަމުން ކިޔާން ހީނލިއެވެ.”ކިހާ އެދުން ބޮޑު މީހެއް މީ؟ ހިތަށް އެރީމަ ރީޝް ދޫކޮށްލާފަ އަލުން ލޯބިވަން؟..” ރީޝަމް އާއި ދިމާއަށް އެނބުރިފައި ކިޔާން ފުން ނޭވާއެއް ލާފައި ހުރިހާ ވާހަކައެއް ކިޔާދިނެވެ.”ނޫން ކިޔާން އެދުން ބޮޑެއް ނޫނޭ.. އެންޑް އިޓްސް އޯކޭ..” ދެލޯ ރަތްވެ ދުޅަވެފައި ހުރި ނަމަވެސް ރީޝަމް ވެސް ކިޔާންގެ ގައިގައި ބައްދާލަމުން ހިނިތުންވުމެއް ދިނެވެ.

ހުރިހާ ކަމެއް ހައްލު ވުމުން ރީޝަމް ބޭނުންވީ ރީހާން އާއި ބައްދަލު ކުރަންށެވެ. ކިޔާންގެ އެއްވެސް މައްސަލައެއް ނެތުމާއި އެކު އާނިޔާ މެންގެއަށް ރީޝަމް ދިޔައެވެ.”ބައްޕައާ މީޓް ކުރަން މި އައީ..” ސޯފާގައި ލިއީޝް އާއި އެކީ އިން ރީހާންއަށް ބަލާލަމުން ރީޝަމް ބުންޏެވެ.”އޯހ އަސްލުތަ؟ ކިޔާން ކޮބާ؟.” އާނިޔާ ރެޑީވަމުން އެހިއެވެ.”ގޭގަ ވީ.. ބުނި އޯކޭއޭ..” ރީޝަމް ހީނލަމުން ރީހާން ކައިރީގައި އިށީނދެ ވާހަކަ ދައްކަން ފެށިއެވެ. ލިއީޝް ވަގުތުން ރީޝަމްގެ ގައިގައި ބައްދާލަމުން ހަނދާންވި ވާހަކަ ބުންޏެވެ.

★★★

އާނިޔާގެ ކޯލްއަކަށް އިންތިޒާރު ކޮށްގެން ހުރި ޔަމާން ރިންގްވަމުން ދިޔަ ފޯނަށް ބަލާލިއެވެ. ގުޅަނީ އާނިޔާއަށް ވުމުން ހިތްހަމަ ޖެހިފައި ފޯނު ނަގާ ކަންފަތުގައި ޖައްސާލިއެވެ. އޭނާގެ ދެ ދަރިންނާއި އެކީ ބައްދަލު ކުރަން ބޭނުންވާކަން ބުނުމުން ޔަމާން ނުރުހުނަސް ފާޑަކަށް ހިތްހަމަ ވެސް ޖެހުނެވެ.”މި ދަނީ.. އަދިވެސް ރަށުގަ ދޯ؟..” އާނިޔާ އެހިއެވެ.”ހޫމް އަވަސް ކުރާތި..” ޔަމާން ޖަވާބު ދީފައި ފޯނު މޭޒުމަތީގައި ބޭއްވިއެވެ. ރެސްޓޯރެންޓް ގެ ނަން ވެސް ބުނެފައެވެ. އެހާ ގިނައިރު އިންތިޒާރު ކުރާކަށް ނުޖެހުނެވެ. އެ ތިން މީހުން އައިސް ޔަމާން އިން މޭޒު ކައިރީގައި އިށީނެވެ. އަހަރު ތަކަކަށްފަހު އަނިޔާވެރިޔާގެ ކުރިމަތީގައި އިންނަން ޖެހުމުން ރީހާން ހިތް ފުރުނީ ރުޅިވެރިކަމުންނެވެ. ރީޝަމް އިނީ އިސްޖެހިގޮތަށް ނަގަން ނުކެރިފައެވެ.

“ކީއްކުރަން ވާހަކަ ދައްކަން ބުނީ؟.. ކުރިން ފަހަރު ގޮތަށް ކޫސަނި ކަމެއްތަ އަނެއްކާ؟..” ޔަމާން އެހީ ފޮނި ގޮތަކަށެވެ.”ނޫނޭ.. ރީހާން އައުމަށްފަހު އަހަރެން ބޭނުންވީ ހުރިހާ ހަޤީޤަތެއް ހޯދަން.. ކިޔާދެވިދާނެތަ؟..” މަޑުމައިތިރި ކަމާއި އެކު އާނިޔާ އެހިއެވެ.”ކޮން ކަމެއް..” ޔަމާންގެ ދެބުމަ ކައިރިވިއެވެ.”ތިހާ އަނިޔާވެރިވާން ޖެހުނު ސަބަބު..” އާނިޔާ ޖަވާބު ދިނެވެ.”އައްދެ.. ރޭޝްމާ އެންމެ ގާތް އެކުވެރިޔާއަށް ވެސް ނުބުނޭތަ؟.. މަކަރުވެރިއޭ ދޯ..” މަލާމާތުގެ ހީނލުމަކާއި އެކު ޔަމާން ދުރު ބަލާލިއެވެ. ރީހާންއަށް ނުހުރެވިގެން ލޯ އަޅާލެވުނެވެ.”އެންމެ ރަނގަޅު.. ރޭޝްމާގެ ބަނޑުގައި އޮއްވާ މަރުވި ރިފާ އަކީ އަހަރެންގެ ދަރިއެއް ނޫން..ލިހުވާންގެ..” ޔަމާންގެ ޖުމްލަ ރީހާންގެ ކަންފަތް ދަށުގައި ގުގުމާލިއެވެ. އާނިޔާއަށް ދެލޯ ބޮޑުކޮށްގެން ހުރެވުނެވެ.

“ތެދު އެއީ.. އެކަން އިނގުނީމަ އަހަރެން ޤަބޫލެއް ނުކުރަން ރީހާން އާ ރީޝަމް އަކީ ވެސް މަގޭ ދަރިން ކަމަކަށް.. އާނިޔާއަށް ވެސް ފެންނާނެ މަ ކައިރިން ވަކިވެގެން އޭނަ ދިޔައީ ލިހުވާން ކައިރިއަށް.. އަހަންނަށް ހެކި ދައްކަންށޭ ކިޔާފަ ދެމީހުންގެ ޑީއެންއޭ ޓެސްޓް ހަދާފަ ދެއްކި އެކަމަކު މަށެއް ޤަބޫލެއް ނުކުރާނަން.. އުންމީދު ކުރަން ސާފު ވެއްޖެކަމަށް..” ޔަމާން އިނީ ނުރުހުންވެފައެވެ. އާނިޔާ އިތުރު އެއްޗެއް ބުނުމުގެ ކުރިން ޔަމާން ނިކުމެގެން ދިޔައީއެވެ. ރީހާން އަށާއި ރީޝަމްއަށް އެކަކު އަނެކަކަށް ބަލާލެވުނީ ހައިރާންވެފައެވެ. ޔަމާން ރޭޝްމާ ދެކެ ލޯބި ވާނަމަ އެހާ ވަރަށް ޝައްކު ކުރަންވީ ކީއްވެ ހެއްޔޭ އެންމެންގެ ހިތަށް އެރިއެވެ. އާނިޔާ ބުނީ ފަހަރުގައި ޔަމާން އެ ޝައްކު ތަކުގައި ހުރެ ރޭޝްމާ މަތިން ފޫހި ވެސް ވެދާނެއޭއެވެ. ގެއަށް އައިސް ކިޔާން ކައިރީގައި ރީޝަމް ހުރިހާ އެއްޗެއް ކިޔާދިނެވެ. ލިއީޝް އަށް ވެސް ރީހާން ކިޔާދިނެވެ.

“ދެން އަދިވެސް ނުވިސްނަންތަ އެކްސިޑެންޓްގެ ވާހަކަ ބުނާކަށް؟..” އެރޭ ނިދަން އޮވެފައި ކިޔާން އެހިއެވެ.”ހޫމް.. ދައްތަ ކައިރީ އެހީމަ އިތުރަށް ބުނާނެ ކަމެއް ނެތޭ އިނގެންވާ ދުވަހުން އިރާދަކުރެއްވިޔާ ދޮންބެއަށް އިނގޭނެއޭ ބުނީ..” ރީޝަމް ބުންޏެވެ. އިރުކޮޅަކު ވާހަކަ ދައްކަން އޮވެފައި ރީޝަމްއަށް ނިދުނު އިރު ކިޔާން އަށް އޮތީ ނިދިފައެވެ. މާއިލްގެ އެދުމަށް ކިޔާން ކަންތައް ކުރީ ރީޝަމް ދެކެ ލޯބިވާތީއެވެ. އެކަން މާއިލްއަށް ވެސް އިނގެއެވެ. އިރާދަކުރެއްވިޔާ އޭނައަށް ވެސް އަދި ބައިވެރިޔަކު ލިބޭނެއެވެ. ރީޝަމް އާއި ކިޔާން ނިދީގައި ކައިރިވެލަމުން އެކަކު އަނެކަކުގެ ގައިގައި ބައްދާލިއެވެ. ކުރި އިންތިޒާރުގެ ނިމުން އައީ ހިތްތަކަށް އުފާވެރިކަން ގެނެސްދެމުންނެވެ.

– ނިމުނީ –