ްއިންތިޒާރު (ފުރަތަމަ ބައި)

ދަންވަރުގެ ހަމަ ހިމޭން ވަގުތެވެ. މަދުން ނަމަވެސް ދުއްވާ އެއްޗެއް ފެނިލިޔަސް މާލޭގެ ބާރު ބޮޑު މަގުތައް އޮތީ ހަމަހިމޭންވެފައެވެ. ވިއްސާރަ މޫސުމެއް ކަމުން މުޅި ފަޒާ އެއްކޮށް އޮތީ ފިނިހިފާލާފައެވެ. މި ފިނި ރޭ އެންމެން އަރާމު ތަންމަތީގައި ނިދީގެ ފޮނިކަން ލިބިގަންނަމުން ދިޔައިރު “ހެވެންލީ” ގޯތިތެރެ ގުގުމާލައިފައިވަނީ ޕިޔާނޯގެ ހިތްގައިމު މިޔުޒިކުގެ އަޑުންނެވެ. ފަރިތަކަމާއެކު މާޔާ ޕިޔާނޯގެ ފިތްތަކާ ކުޅެމުން ދިޔައީ ދެލޯ މަރާލައިގެން އިނދެއެވެ. ކޮޓަރީގެ ވަށައިގެން ހުރި ކުޑަދޮރުތައް ހުޅުވާލައިފައި ހުރުމުން ފިނި ވައިރޯޅިތަށް އައިސް އެ މޫނުގައި ބީހިލައެވެ. ދޫ ކޮށްލެވިފައިވާ ފަން އިސްތަށިގަނޑު އެގޮތް މިގޮތަށް ވިހުރެމުން ދިޔައެވެ. ސިކުނޑީގައި އެތައް ހިޔާލު ތަކެއް އެނބުރެމުން ދިޔައިރު މިޔުޒިކުގެ އަޑު އިރުއިރު ކޮޅާ ބާރުވަމުން ދިޔައެވެ. އިސާހިތަކު އެ ދެލޯ ފުރިގެން އައީ ތާޒާ ކަރުނައިންނެވެ. ހިފެހެއްޓުމެއް ނެތި އެ ދިގު އެސްފިޔަތަކުގެ ދޭތެރެއިން ކަރުނަތަށް ކޯތާފާތް މައްޗަށް ދެމިގެންފިއެވެ.

“މާޔާ!..” ޕިޔާނޯ ކުޅެން ގެއްލިފައި އިން މާޔާ ސިއްސައިގެން ދިޔައީ ފަހަތުން މީހަކު އައިސް އޭނަގެ ކޮނޑުގައި އަތް ބާއްވާލުމުންނެވެ. ސިއްސައިގެން ދިޔަ ވަރުން މާޔާއަށް އެނބުރިލެވުނީ ކަރުނަތައް ނުވެސް ފޮހެއެވެ. މާޔާގެ ކަރުނުން ފުރިފައި ހުރި ދެލޯ ފެނުނު ހިނދު މަލީހާ ގެ ހިތް ހިނދުކޮޅަކަށް ނަމަވެސް މަޑުޖެހިލި ފަދައެވެ. “މަންމާ” ކުރެހިފައިވާ އަޑަކުން މާޔާ މަންމައަށް ގޮވާލީ ކަރުނަ ފޮހެލަމުންނެވެ. މަލީހާ ހިނިތުންވެލަމުން މާޔާގެ އިސްތަށިގަނޑުގައި ފިރުމާލީ އޯގާތެރިކަމާއެކުގައެވެ. “ކީއްވެ ނުނިދާ ތިއުޅެނީ؟ މިއޮތް ފިނިރޭ ދަރިފުޅު ކުޑަދޮރުތައް ހުޅުވާލައިގެން އިންނަ އިރު ފިންޏެއްވެސް ނުވަނީތަ؟” މަލީހާ ދޮރުތައް ލައްޕަމުން ސުވާލުކޮށްލިއެވެ. “ނިދަން އުޅެއުޅެ ނިދި ނައިސްގެން ބޭރަށް ނުކުމެލިއިރު ޕިޔާނޯ ފެނުނީމަ ކުޅެލާ ހިތްވީ. ޕިޔާނޯގެ އަޑަށް ދޯ މަންމަ ތިހޭލީ؟ ސޮރީ.. ” މާޔާ އަތުގައި އޮތް ވޫލްކޮޅު އިސްތަށިގަނޑުގައި އައްސާލަމުން މަންމަ އަށް ނަޒަރެއް ދިނެވެ. އޭރު މަލީހާ ދޮރުތައް ލައްޕާލާފައި ފޮތިގަނޑުތައް ދަމާލަނީއެވެ. “މަންމަ ދޭ ނިދަން. އަހަރެންވެސް މިދަނީ ދާން. މިހާރު ނިދި އެބައާދޭ.” މާޔާ މަންމައަށް ހިނިތުންވުމެއް ހަދިޔާކޮށްލަމުން ހިނގައިގަތެވެ. ފަހަތުން މަލީހާ ވެސް ހަމަ އެކަނި ގުޑް ނައިޓް އޭ ކިޔާފައި ހިނގައިގަތެވެ.  މާޔާ ކޮޓަރިއަށް ވަންނަންދެން މަލީހާ ދުރުގައި މަޑުކޮށްލައިގެން ބަލަން ހުއްޓެވެ.

ކޮޓަރީގެ ދޮރު ލައްޕާލަމުން މާޔާ މަޑުމަޑުން ހިނގާލާފައި ގޮސް އެނދުގެ ކޮޅުގައި އިށީދެލިއެވެ. މަންމަ ހިތްހަމަޖައްސާލަން ނިދި އާދެޔޭ ބުންޏަސް، ހަގީގަތަކީ އަދި ނިދީގެ އަސަރެއް ވެސް ނެތްކަމެވެ. އިރުކޮޅަކު އެއިން ގޮތަށް އިނދެފައި މާޔާ ތެދުވެގެން ގޮސް އަލަމާރި ކައިރިއަށް ހުއްޓިފައި ތިރީގައި އިށީދެލިއެވެ. އަލަމާރީގެ ތިރީ ވަތްގަނޑުން ނެގި ފޮޓޯގަނޑުގައި ހިފަހައްޓާލަމުން އެއް އަތުން އެ ފޮޓޯގައި ފިރުމާލީ މީހަކު ކައިރީގައި ހުރިނަމަ އެމީހެއްގެ މޫނުގައިވެސް ފިރުމާލާނެހާ ލޯބިންނެވެ. ފޮޓޯގައި ތިބި ދެމީހުން ކުރެ އެކަކަކީ ހުދު މާޔާއެވެ. ދެން ހުރީ ފިރިހެން ކުއްޖެކެވެ. ދެ މީހުން ޕިޔާނޯ ކުޅެން ތިއްބާ ނަގާފައިވާ ފޮޓޮއެކެވެ. މާޔާ ޕިޔާނޯގެ ފިތްތަކާ ކުޅެން އިން އިރު ފިރިހެން ކުއްޖާ މާޔާއާ ޖެހިގެން އިށީދެ އިނީ މާޔާގެ މޫނަށް ބަލަހައްޓައިގެން ހިނިތުންވެފައެވެ. މާޔާވެސް ހުދު ދަތްތައް ދައްކާލައިގެން އިނީ ހެވިފައެވެ. އެ ފޮޓޮއަށް ބަލަހައްޓައިގެން އިންދާ ދެލޮލަށް ކަރުނަ އައީ ކޮންއިރަކު ކަމެއްވެސް މާޔާއަކަށް ނޭގުނެވެ. ކަރުނައިގެ ތެރެއިން މާޔާ ހިނިތުންވެލީ އެ ދުވަސް ހަނދާން ކުރަމުންނެވެ.

*****

އެއީ މީގެ 12 އަހަރު ކުރީގެ ފޮޓޮއެކެވެ. މާޔާގެ 13 ވަނަ އުފަންދުވަހުގައި ނަގާފައިވާ ފޮޓޮއެކެވެ. އާއިލާގެ އެންމެންގެ ހާޒިރުގައި ކޭކު ފަޅާ ނިންމާލައިފައި މާޔާ އަތުގައި ހޭކިފައި ހުރި އައިސިން ދޮންނަން ބަދިގެއަށް ދަނިކޮށް އައިނައި ތަނެއް ނޭނގި ކުއްލިއަކަށް ކޮންމެވެސް މީހަކު އައިސް މާޔާގެ ދެލޯމަތީގައި އަތް އަޅާލިއެވެ. ސިއްސައިގެން ދިޔަވަރުން މާޔާ ކަރުފަޅައިގެންދާހާ ބާރަށް ހަޅޭލައްވައިގަންނަމުން އެމީހެއްގެ އަތުގައި ބާރަކަށް ދަތް އަޅައިގަތެވެ. ވީ ތަދުން އެމީހާ އަތްދޯއި އޭ ކިޔާފައި އަތް ނައްޓުވާލައިފައި މާޔާ ދަތް އެޅިތަނުގައި ފިރުމަންފެށިއެވެ. “ކިޔާން…..” މިނިވަން ވުމުން މާޔާ އެނބުރިފައި ކުރިމަތީގައި ހުރި މީހާ ފެނުމުން ދަތްތަކަށް ބާރުލާފައި ކިޔާލިއިއެވެ. “ގޮވާނެ ކަމެއް ނެތޭ ދެން. މިނިކާ މީހެއްތަ ތީ؟ އަހަރެން އެއޮތް ވަރުން ސަޕްރައިޒް އެއް ދޭން އުޅުނީމަ ދަތްއަޅާލީ.. ” ކިޔާން މާޔާއަށް ދެލޯ އަޅާލަމުން ހިނގައިގަތެވެ. “ތީ މީހުން ސަޕްރައިޒް ދޭ ގޮތްތަ؟ އަހަރެން ހީކުރީ މީހަކު އަހަރެން ކިޑްނެޕް ކުރީ ކަމަށް.. ވަރަށް ތަދުވޭތަ އެބަ؟ ” މާޔާ ދެރަވެފައި ހުރެ ކިޔާން ގެ ފަހަތުންގޮސް އެއަތުގައި ހިފާލަމުން ސުވާލުކޮށްލިއެވެ. ކިޔާން ދެރަވެފައި ބޯ ޖަހާލީ މާޔާ އިތުރަށް ދެރަކޮށްލުމުގެ ނިޔަތުގައެވެ. “އެއްކަލަ ދެމީހުން ފެއްޓީދޯ.. ޕިސް ޕިސް.. ކިޔާން ބުނެބަލަ ދެން. ކޮން ސަޕްރައިޒް އެކޭ؟” މަލީހާ ހެވިފައި ހުރެ އައިސް ކިޔާންއާ ސުވާލުކޮށްލިއެވެ. މާޔާވެސް އެއްބާރުލުމުގެ ގޮތުން ކިޔާންގެ މޫނަށް ބަލާފައި ބުމަ އަރުވާލީ ޝައުގުވެރިކަން ދައްކާލަމުންނެވެ. “ހިނގާ ދާން. އެކަމަކު މިފަހަރު ދަތް ނާޅައްޗޭ!” ކިޔާން މާޔާގެ ދެލޮލުގައި އަތްއަޅާލަމުން ހިނގައިގަތެވެ. ފަހަތުން އާއިލާގެ އެހެން މެންބަރުންވެސް ހިނިތުންވެފައި ތިބެ ހިނގައިގަތެވެ.

ކިޔާން އެއް އަތުން މާޔާގެ ލޮލުގައި އަތްއަޅާލައިގެން ހުރެ އަނެއް އަތުން މާޔާގެ އަތުގައި ހިފައިގެން ހުރެ ހިނގަމުން ގޮސް މަޑުކޮށްލީ މާޔާ އުޅޭ ކޮޓަރީގެ ކުރިމައްޗަށެވެ. ކޮޓަރީގެ ދޮރު ހުޅުވާލަމުން ކިޔާން މާޔާގެ ލޯމަތިން އަތް ނަގާލައިފައި ކުޑަކޮށް ފަހަތަށް ޖެހިލާ ޖީބަށް އަތް ޖަހާލިއެވެ. މަޑުމަޑުން މާޔާ ދެލޯ ހުޅުވާލައިފައި ކުރިމަތީ ހުރި ހުދު ފޮތި ގަނޑުން  ބަންދުކޮށްފައި ހުރި ބޮޑު އެއްޗަށް ބަލާލީ ހައިރާންވެފަ ހުރެއެވެ. ފަހަތަށް އެބުރި ކިޔާން އަށް ބަލާލީ ކޯއްޗެއްހޭ އަހާލާ ފަދައިންނެވެ. “ގޮސް ފޮތިގަނޑު ނަގާބަލަ. އޭރުން އެގޭނެ އެއްނު.” ކިޔާން މާޔާގެ ދެކޮނޑުގައި ހިފާ ކުޑަކޮށް އެތެރެއަށް ކޮށްޕާލިއެވެ. މާޔާ ހިނގާލާފައި ގޮސް ފޮތިގަނޑު ނަގާފައި، ކޯއްޗެއްކަން އެނގުމުން ބާރަކަށް ހަޅޭލަވައިގެންފައި އަނގަ މަތީ އަތް އަޅާލީ ދެލޯ ބޮޑުކޮށްލަމުންނެވެ. “ޕިޔާނޯ”  މާޔާ ހެވިފައި ހުރެ އައިސް ކިޔާންގެ ގައިގެ އޮޅުލައިގަތެވެ. “ތެންކިއު ސޯ މަޗް ބެސްޓް ފްރެންޑް.. އެކަމަކު އަހަންނަކަށް ނުވެސް އެނގޭ މިއާ ކުޅޭކަށްވެސް.” މާޔާ ކިޔާންގެ އަތުގައި ހިފައިގެން ގޮސް ޕިޔާނޯކައިރީގައި ބަހައްޓާފައި ހުރި ގޮނޑީގައި އިށީދެލިއެވެ. “ދެން ދަސްކުރާނީއޭ. އަހަރެން ޕިޔާނޯ ކުޅެން ދަސްކޮށްދޭ މީހަކު ވެސް ހޯދައިފިން. ޑޯންޓް ވޮރީ ވެން ކިޔާން އިޒް ހިއަރ..” ކިޔާން އެއްލޯމަރާލަމުން މާޔާގެ އިސްތަށިގަނޑާ ކުޅެލިއެވެ.

*****

ކުއްލިއަކަށް ޖަހާލި ބާރު ގުގުރިއާއެކު މާޔާ ސިއްސައިގެން ގޮސް އަތުގައި އޮތް ފޮޓޯ ވެސް ބިންމައްޗަށް ވެއްޓިއްޖެއެވެ. އޭރު ބޯކޮށް ވާރޭ ވެހެމުން ދިޔައެވެ. ބާރު ވަޔާއެކެ ދޮރުފޮތިގަނޑުތައް ވެސް އެގޮތް މިގޮތަށް އެބުނރެމުން ދިޔައެވެ. މާޔާ ކަރުނަ ފޮހެލަމުން ބިންމަތީގައި އޮތް ފޮޓޯގަނޑު ނަގައިގެން ގޮސް ކުޑަދޮރުތައް ލައްޕާލިއެވެ. އިރުކޮޅަކު ވެހޭ ވާރެއަށް ބަލަން ހުރެލާފައި މާޔާ ފޮތި ގަނޑު ދަމާލައިފައި ގޮސް އެނދުގައި އިށީދެލިއެވެ. “ވެއާރ އާރ ޔޫ؟… ކަމް ބެކް… އައި ނީޑް ޔޫ” ފޮޓޯ ގަނޑަށް ބަލަން އިނދެ މާޔާ ވާހަކަ ދެއްކިއެވެ. ދެފައި ތިރިއަށް ބާލައިގެން އިނދެ މާޔާ އެނދުގައި އުއްޑުން  އޮށޯވެލިއެވެ. އެހެން އޮއްވާ ނިދުނީ ކޮންއިރަކު ކަމެއް ވެސް ނޭގެއެވެ.

ހެނދުނު ދިހައެއް ޖެހިއިރުވެސް މާޔާ ކޮޓަރިން ނުނިކުމެއެވެ. ބަންދު ދުވަހެއް ކަމުން މަލީހާވެސް މާޔާއަށް ގޮވާކަށް ބޭނުމެއް ނުވިއެވެ. ރޭ ނިދީ ކިހާއިރަކުކަމެއްވެސް ނޭގެއެވެ. މާޔާ ނިދިއައިސްގެނޭ ކިޔާފަ ދިޔަޔަސް މާޔާ ނުނިދާނެކަން މަލީހާއަށް ރަނގަޅަށް އެނގެއެވެ. “މަލީހާ. އަދިވެސް މާޔާ ނުހޭލަނީތަ؟ ރޭގަ ކަމެއްވީތަ އަނެއްކާ؟ މާޔާއަކީ މިހާ އިރުވަންދެން ނިދާ ކުއްޖެއްވެސް ނޫނެއްނު.” ފާއިޒު ސައިބޯން އިނދެފައި ސުވާލުކޮށްލިއެވެ. ފާއިޒުގެ ސުވާލަށް ސައިބޯންއިން މާޔާގެ ކޮއްކޮ މާއިޝާގެ ވެސް ސަމާލުކަން މަލީހާއަށް ހުއްޓުނެވެ. މަލީހާ ރޭގެ ވާހަކަ ފާއިޒު އަށް ކިޔައިދިނެވެ. “މާދަމާއަކީ އެ ހާދިސާ އަށް ހަތް އަހަރު ފުރޭ ދުވަސް.” ވިސްނުމަކަށް ގެއްލިފައި އިނދެ މާއިޝާ މަޑުމަޑުން ކިޔާލިއެވެ. މަލީހާއާއި ފާއިޒު ދެމީހުން ސިހިފައި މާއިޝާގެ މޫނަށް ބަލާލީ ހާސްކަމާ އެކުގައެވެ. އެމީހުން އެދުވަސް މަތިން ހަދާން ނެތުނީ ކިހިނެއްހެއްޔެވެ. މާޔާ ނުނިދިގެން އުޅުނު ސަބަބަކީ އެއީއެވެ.

(ނުނިމޭ)