އިހުމާލް

” ކުއްލި ގޮތަކަށް މުޅި ޙަޔާތުގެ ކުލަ ބަދަލުވެ ހިނގައްޖެޔޭ.. ޔާ އިލާހީ އަޅުގެ މި ހިތަށް ކެތްނުވާވަރު ވެއްޖެޔޭ.. ލޯބި ތިޔަ އެސްފިޔަ ތަކާއި އެކު…” އިޒްކާގެ މޯބައިލް ފޯނު ދިޔައީ ރިންގްވަމުންނެވެ. ހެދުން ތަކެއް އިސްތިރި ކުރުމުގައި އަވަދިނެތި މަސްޢޫލުވެ އުޅެމުންދިޔަ އިޒްކާއަށް އޭނާގެ ފޯނު ރިންގްވާކަމެއް ރޭކާވެސް ނުލައެވެ. ވާނީވެސް އެހެންތާއެވެ. އިޒްކާގެ ފޯނު ވީތަނެއް ޚުދު އޭނާއަކަށް ވެސް ނޭނގެއެވެ. ރޭގަ ގެއަށް އައިސް، ފޯނު ކޮޓަރި އަށް އެއްލާލި ގޮތަށް އަދިވެސް ފޯނު އޮތީ ކޮޓަރި އެނދުމަތީގައެވެ. އިޒްކާގެ ހިތުން އޭނާގެ ފޯނަށް ދެވިފައިވާ މަޤާމަކީ ފެން ކައްކާ ބޮލީގެ ޢިއްޒަތުގެ މަޤާމު ވިއްޔާއެވެ.

އިޒްކާ އިސްތިރިކުރަމުންދިޔަ ހެދުން އިސްތިރިކޮށް ނިމުމުން، އެ ހެދުން ހިފައިގެން ކޮޓަރިއަށް ވަން ވަގުތެވެ. އޭރުވެސް އޭނާގެ ފޯނު ރިިންގަވަމުން ދިޔައެވެ. އޭނާގެ ކަންފަތުގައި ފޯނުގެ ރިންގް ޖެހުމުން، ފޯނު ހޯދުމަށް އަވަސް ވެގަތެވެ. އެއްލި ކަޅިއަކުން ލޮލުގައި އަޅައިގަތީ އެނދުމަތީގައި ބަންޑުން އޮތް އޭނާގެ ފޯނެވެ. އަވަސް ފިޔަވަޅު ތަކެއްގައި ގޮސް އިޒްކާ އޭނާގެ ފޯނު ނެގިއެވެ.”ލޯބީ!! ސޮރީ!! ފޯނު ރިންގް ވާކަމެއް އިޒޫ އަކަށް ނޭނގެ..” ހިތާމަކަން އެކުލެވިގެންވާ މަޑުމޮޅި ރާގެއްގައި އިޒްކާ ވާހަކަ ދެއްކީ އޭނާގެ ލޯބިވެރިޔާ އައިމަނާއެވެ.”އޯކޭ ދެން.. އިޒޫގެ އުޒުރެއް ދުވަހަކުވެސް ހުހެއް ނުވާނެ ވިއްޔަ! މިރޭ އަށްގަޑި ބައިކަން ހާއިރު އަންނަށްޗޭ ވިލިމާލެ ފެރީ ގިމަތަ ކައިރިއަށް. ވަރަށް ބޮޑު ސަޕްރައިޒް އެއް ދޭނަން.” ސަކަ މިޒާޖެއްގެ ވެރި އައިމަން ބުންނެވެ. ”ދެން ލޯބީ މިރޭ ވެސް އެތަނަށްތަ؟ އަނެއްކާ އަށްގަޑި ބަޔަކަށް އިޒޫ އަކަށް ތައްޔާރެއް ވެސް ނުވެވޭނެ” އިޒްކާ ޅަކުއްޖެއް ފަދައިން ބޮޑާހާކައިލިއެވެ. ” ދެން އިޒޫ ކުސްމުސް ނުތަޅާ އަންނަށްޗޭ ޕްލީޒް.. ވަރަށް ވަރަށް ބޮޑު ސަޕްރައިޒް އެއް ދޭނަމޭ..” ޖަވާބުގައި އައިމަން ބުންޏެވެ.

ފޯނު ބޭއްވުމަށްފަހު އިޒްކާ ވަނީ ފާހާނާ އަށެވެ. ކުޑަކޮށް ތާޒާ ވެލުމަށްށެވެ. އެއަށްފަހު ރަންގުމޫ ކުލައިގެ ޓޮޕް ކޮޅަކާއި ނޫ ޖިންސެއް އޭނާގެ ލޫޅާފަތި ހަށިގަނޑަށް މަހާލިއެވެ. އަވަސް ހިނގުމެއްގައި ގޮސް ވިލިމާލެ ފެރީ ގިމަތަ ކައިރި ހުއްޓެލިއެވެ. ނަމަވެސް އެހެން ދުވަސްތަކާއި ޚިލާފަށް އައިމަން ފެންނާކަށް ނެތެވެ. އަނެއްކާ އައިމަން ސަމާސާއެއް ކޮށްލީބާވައެވެ. އިޒްކާގެ ހިތަށް އަރައި ފައިބަމުން ދިޔައެވެ.

”އަހަރެން ދޯ ތިހޯދަނީ.. ފަހަތް ބަލާލަބަ..” އެއީ ހަމަ އެ މަސްތީ އަޑެވެ. އައިމަންގެ ޖާދޫވީ އަޑެވެ. އިޒްކާ ލަހެއްފަހެއް ނެތި ފަހަތް ބަލާލިއެވެ. އޭނައާއި ދިމާކުރިމަތީގައި އަތް ފުރަގަހަށް ލައިގެން އެ ހުރީ އައިމަނެވެ. މީގެ ކުޑައިރުކޮޅެއް ކުރިން އެ މީހަކަށްޓަކައި މުޅި މާޙައުލަށް ނަޒަރު ހިންގި އިޒްކާގެ ލޯބިވެރިޔާއެވެ.

އިޒްކާ އާއި އައިމަން ދެ ލޯބިވެރިން ގޮތުގައި ގޮސް ބާޑިފަށުގައި ހުރި ‘ޑައިނަމޯ’ އަށް ވަނެވެ. ‘ޑައިނަމޯ’ ގެ އެތެރެ ސިފަ ކުރެވެނީ ލޯބިވެރިންގެ މަރުކަޒެއްގެ ގޮތުގައެވެ. ކަނުކަނުގައްޔާއި ބިއްބިތުގައި ކަށިނޫފުރައިގެ ޒުވާނުން ވަނީ ފުނި ޖެހިފައެވެ. ދެ ޖިންސުން މައްސުނިވެފައެވެ. ތިނޯހެއްގެ ތުނޑު ޖައްސައިލާނެ ތަންކޮޅެއްވެސް ނެތެވެ.

ހާލު މާލުން އުޅެގެން، އިޒްކާ އާއި އައިމަން ސީޓެއް ހޯދިއެވެ. އަދި ކާން ބޭނުންވާ ތަކެއްޗަށް އޯޑަރު ދިނެވެ. ” އިޒޫ! އަހަރެމެން ދެމީހުންނަށް މިހާރު މި ގޮތަށް ލައްކަ ދުވަހު އުޅެވިއްޖެއްނު. ހަނދުވަރު ކުރަތްޕެއް ހެން ވެސް އުޅެވިއްޖެ އެއްނު.. ދެން އަހަރެން އިޒޫ އާއި ރައްޓެހި ވެގެން އުޅޭކަށް ބޭނުމެއް ނޫން..”

ނުނިމޭ