ގިލަން

އައި.ޖީ.އެމް.އެޗް ހޮސްޕިޓަލުގެ އޮޕަރޭޝަން ތިއޭޓަރު ދޮރުމަތީގައި އައްފާނު ހުރީ ހިނގާލަ ހިނގާލައެވެ. ތެޅި ތެޅި އޮތް ހިތަކާއެކުގައެވެ. އޭނާގެ މަންމަ ރަމީޒާއާ އެކުގައެވެ. އޭނާ ވަނީ ތަޤްދީރުގެ ނިޔާ ކަނޑައެޅޭނެ ގޮތް ބެލުމަށް ކެތް މަދު ވެފައެވެ. އޭނާގެ ދަރިފުޅު ސާޖިދާގެ އޮޕަރޭޝަނަށް ވާނެ ގޮތަކާމެދު ހިތްއަވަސް ވެފައެވެ.

އޮޕަރޭޝަން ކުރެވެމުން އެދާ ސާޖިދާއަކީ  އައްފާނުގެ ދެލޮލުގެ ނޫރެވެ. ދިރިހުރުމުގެ އަސްލާއި ބާރެވެ. އުންމީދުގެ ހުޅު ކޮޅެވެ. ސާޖިދާ އަކީ ނުކުޅެދުންތެރިކަން ހުންނަ ކުއްޖަކަށް ވުމުން ސާޖިދާގެ މަންމަ އޭނާ އައްފާނާ ހަވާލުކޮށްފައި، ބިދޭސީ މީހަކާ އިނދެގެން ރާއްޖޭން ބޭރަށް ބަދަލުވީއެވެ. ކައްޗަރެއް ހޯދުމަށްޓަކައެވެ. ނަމަވެސް އައްފާނުގެ މަންމަ ރަމީޒާގެ އެހީތެރިކަމާއެކު އައްފާނު ދިޔައީ ސާޖިދާއަށް ބޭސްފަރުވާ ކުރަމުންނެވެ.

[ ސާޖިދާ އަކީ މަންމަން ކުއްޖެއް. ހިތުގައި ލޯވަޅެއް ވެސް އެބަހުރި. އެކަމަކު ހިތްވަރު އެލުވައިލައިގެން ނުވާނެ.  ﷲގެ އިރާދަ ފުޅުން މި މަންޖެ އަދި ރަނގަޅުވާނެ.] ފުރަތަމަ އޮޕަރޭޝަނަށްފަހު ޑަކުޓަރު ވިދާޅުވިއެވެ. އެއީ އައްފާނުގެ އުންމީދުގެ ހުޅުކޮޅު ކަނިވެގެން ދިޔަ ފުރަތަމަ ފަހަރެވެ. ނަމަވެސް އޭނާގެ މަންމަގެ ނަސޭހަތާއެކު ޢަޒުމްގެ ކަމަރު ހިތުގެ އެންމެ ފުނުގައި ބަނދެލީއެވެ.

ސާާޖިދާގެ ކޮންމެ އޮޕަރޭޝަނަކީ އެތައް ބައިވަރު ފައިސާ ޚަރަދުވާނެ ކަމަކަށްވުމުން އައްފާނު ނިންމީ އިތުރު ގަޑީގައިވެސް މަސައްކަތް ކުރާށެވެ. ވަޒީފާގައި ހޭދަކުރާ އަށްގަޑިއިރުގެ އިތުރުން ހަވީރާއި ރޭގަނޑުގެ ބޮޑުބައެއްގައިވެސް މަސަކަތުގައި ހޭދަކުރާށެވެ. ހަމަ އެ މައުސޫމް ސާޖިދާ އަށްޓަކައެވެ.

އައްފާނު ގިނަރޭރޭ ގެއަށް އަންނައިރު ހުންނަނީ މެންދަމުން އަލިވެ ތިނެއް ޖަހާފައެވެ. އެހާ ފަސްކޮށް ގެއަށް އަންނައިރުވެސް މުޅި ކޮޓަރީގައި ގުގުމާފައި ހުންނަނީ ސާޖިދާގެ ވޭނީ ކުކުރުމުގެ އަޑެވެ. [އައްދޯތް] އޭ ބުނާ އަޑު އަނގައިން ނުނުކުތަސް ޢަމަލުން އެކަން ސާބިތުވެއެވެ. އަމިއްލަ އުފަން ދަރިއަކު އެފަދަ ޙާލެއްގައި އުޅުމަށް އެދޭނީ ކޮން ބައްޕައެއް ހެއްޔެވެ؟

އައްފާނުގެ ކެތްތެރިކަން ކޮޅުންލާން ފެށިއެވެ. ވަގުތުން ވަގުތަށް އޮޕަރޭޝަން ކުރެވޭނެގޮތް މެދުވެރިވުމަށް ހިތް ގޮވަން ފެށިއެވެ. ނަމަވެސް މާލީ ތަނަވަސްކަން އެ ކަމަށް ޖާގަ  ނުދިނުމުން އެކަން ކުރެވެން ނެތީއެވެ. އިތުރު ގަޑީގެ މަސަކަތުން މާ އެދެވޭ ނަތީޖާއެއް ނުފެނުމުން، އައްފާނު ނިންމީ ސަރުކާރުގެ މަތީ ފަރާތްތަކަށް ދަންނަވާށެވެ.

ހަތަރު އުދަރެސް ފެނުޖެހިފައިވާ އައްފާނު، އެކެއްގެ ފައިބުޑުން އަނެކެއްގެ ފައިބުޑަށް ހިނގުމުން ވެސް ލިބުނީ ތިންހާހެއްހާ ދިވެހި ރުފިޔާ އެވެ. ނަމަވެސް ހަފްތާއެއްގެ މުއްދަތައް އަވަދިނެތި ކުރެވުނު މަސައްކަތް އައްފާނު ބަލައިގަތީ ލިބުނު ކާމިޔާބެއްގެ ގޮތުގައެވެ. ދަރިފުޅަށްޓަކައި ވެވުނު ޤުރުބާނީއެއްގެ ގޮތުގައެވެ. ޙަޔާތުގެ ގިލަން ފަސޭހަ ކުރުމަށް އެޅުނު ފިޔަވަޅެއްގެ ގޮތުގައެވެ.

އާދައިގެ މަތިން މިއަދު ވެސް އައްފާނު ދިޔައީ މިނިސްޓަރެއްގެ އަރިހަށް އެހީއެއް ވެދޭތޯއެވެ. ނަމަވެސް ނަސީބު ކަންދިމާކުރި ގޮތުން އައްފާނާ ހެލްތު މިނިސްޓާރ ޒަކަރިއްޔާ އަކާ ދިމާވާގޮތެއް ނުވިއެވެ. ނަމަވެސް ޒަކަރިއްޔާއާ ގުޅޭނެ ފޯނު ނަންބަރެއް ވަނީ އޭނާގެ އަންހެނުން ދީފައެވެ.

[އައްސަލާމް ޢަލައިކުމް! އަޅުގަނޑަށް ކިޔަނީ އައްފާނު. ދަރިފުޅުގެ ބޭސްފަރުވާ އަށް ބޭނުންވާ ފައިސާ ޚަރަދު ކުރެވޭހައި، މާލީ ތަނަވަސްކަން ނެތުމުން އެހީއަކަށް އެދި މި ގުޅާލީ…] އައްފާނުގެ އަޑުގައި ވަނީ ހިތި ރާހަތެވެ. [ މައްސަލައެއް ނެތް. މިރޭ އަހަރެންގެ ގެއަށް ޖައްސާލާ.. އޭރުން ނުވަ މިލިއަން ދޭނަން.. އެކަމަކު ޝަރުތެއްގެ މަތިން. އެއީ އަހަރެންގެ ދޮށީ އަންހެން ދަރިފުޅަށް ކިޑްނީއެއް ހަދިޔާ ކޮށްދިނުން.] އެކޮޅުން ވާހަކަ ދެއްކި ޒަކަރިއްޔާ ހަރުކަށި ކަމާއެކު ބުންޏެވެ. [އަދި ބުނަން! އަހަރެންގެ ދަރިފުޅަށް އައްފާނުގެ ކިޑްނީ ވަރަށް މުހިއްމު. އޭނާގެ ބަނޑުގައި ފަސް މަހުގެ ދަރިއަކު އެބައޮތް. ވިހެއުމުގެ ތިން މަސް ކުރިން ކިޑްނީ ނުލައްވައިފިއްޔާ އަހަރެންގެ ދަރިފުޅާއި ލިބެން އުޅޭ ކާފަ ދަރިފުޅުގެ ފުރާނައަށް ނުރައްކާވާނެ. އެހެންވީމާ، އެންމެ ލަސްވެގެން މާދަމާ ތިޔަ ކިޑްނީ ދޭން ވާނެ] އަނެއްކާވެސް ޒަކަރިއްޔާ ބުންޏެވެ.

އަސްތާއެވެ! އައްފާނަށް ހާދަހާ ހިތްދަތި ވަގުތުކޮޅެކެވެ. ދުނިޔޭގައި ދިރިހުރުމުގެ ޙައްްޤުން މަޙުރޫމް ވަނީއެވެ. އާޚިރުގައި މި ޤުރުބާނީއަށް ޚާއްޞަ މަޤާމެއް އެރުވޭނެ ބާވައެވެ؟

ނުނިމޭ