މަޢާފް ލިބިދާނެ ހެއްޔެވެ؟

ޢއުޑުމަތީގއި ހުރި އޮރެންޖު ވިލާތަކުން ދިޔައީ އިރުއޮއްސެންް އުޅޭކަމުގެ އިންޒާރު ދެމުންނެވެ. މަގުމަތީގައި ހޭލަމޭލަވެ އުޅޭ މީހުންވެސް އަދަދަކަށްވުރެ އަދަދެއް ދިޔައީ މަދުވަމުންނެވެ. މަދުން ނަމަވެސް ދިވެހިންގެ އާދައެއް ކަމުގައިވާ ދެނަމާދު ދޭތެރޭ ގުރުއާން ކިޔެވުމުގެ އަޑު މިރަށުގެ ކޮންމެ ގެެއަކާއި ކައިރިވި ނަމަވެސް އިވެއެވެ. މުރާލި އެކުވެރި ހިތްހެޔޮ ބަޔަކު ދިރިއުޅޭ ރަށެކެވެ. ބ. އޭދަފުށްޓެވެ. ނަމަވެސް ފަޒާއަށް ވެރިވެގަތް އަނދިރިކަމާއެކުވެސް ފުށްޓަރުފަރާތު ޖޯލީގައި އަންހެން ކުއްޖަކު އޮތެވެ. އަނގައިން މަޑު ގިސްލުމެއްގެ އަޑު ބޭރުވޭވޭ ހުއްޓެވެ. މޫނުމަތީގައި ކަރުނައިގެ ނިޝާން ފެންނަން ހުއްޓެވެ. ރަތްވެ ދުޅަވެފައިވާ ދެލޯ ހެކިދެނީ ގިނައިރުތަކެއް ވަންދެން ރޮއެފައި ހުރިކަމެވެ. “މަންމާ.. މަށަށް މާފުކޮށްދީ. މިހުރިހާ ކަމެއްވެސް މިވީ އަަހަންނާއި ހެދި” އެހެން ފަތިވަރެއްހެން ކިޔަމުން އެ ކުއްޖާ ރޮމުން ގެންދިޔައެވެ. އޭނާއަށް ކުރިން އުޅެވުނު ގޮތްތަކުގެ މަންޒަރު ފްލޭޝްބެކް ވަމުން ދިޔައެވެ.
4 މަސް ކުރި
“ކިހާބޮޑު އުނދަގުލެއްްތަ މިއަންހެނާއާއި ހެދި. ނިދާލެވެންވެސް ނޯވެއޭ. ކަލޭ ތިހާ ސޯލިހުމީހަ ދޭބަލަ ސައްވީސް ގަޑިއިރު މުސައްލަމަތީ އިންނަން” ނައިރާ ރުޅިއައިސް އޭނާގެ މަންމައަށް ހަޅޭއްލަވައިގަތެވެ. ނަމަވެސް އެ ނިޔަނެތި މަންމަގެ ދުލުން އުފް ވެސް ބޭރުނުކޮށްލައެވެ. “ތިއުޅުން ދޫކޮށްލާނީ ކޮންއިރަކުންތަ ދަރިފުޅާ؟ ރާބޮއެ އެންމެހާ ނުބައި ފާޙިޝް އަމަލްތައް ކުރަމުން ދިޔައިރުވެސް މިނޫން ދުވަހެއް އަންނާނެކަމަށް ހީނުކުރަންތަ؟ ތި ހެދުން އެޅުމުގެ ވައްޓަފާޅިއެއްވެސް. ހަމަ ހެދުން ލައިގެން އޮރިޔާމުންނޭ ތިޔަތިބެނީ” އެ މަންމަ މަޑުމައިތިރި ކަމާއެކު ނަސޭހަތް ލައިދިނެވެ. ނައިރާ އަތްޖަހާލިއެވެ. “ވާސަރީ! މައުޅޭނެ ގޮތަކަށް މައުޅޭނީ. އަދި މުސްކުޅިވީމަ ހެޔޮ އަމަލު ކުރެވޭނެ. މިދުވަސްކޮޅު ހަމަ މަޖާ ނަގާނީ. ކަލޭ ދުވަސްކޮޅަކުން މަރުވާންނުން. ކަލޭ އަނެއްދުވަހަށް ތައްޔާރުވެބަލަ. މަ ނޫޅެމޭ ކަލޭ އުޅޭހެން ކަޅުފޮތިގަނޑެއްް ގައިގައި އޮޅާގެން އުޅޭކަށް ހުއް!” “ދަރިފުޅު ކީއްވެތަ މަންމަދެކެ ތިހާ ރުޅިއަންނަނީ” އެމަންމަ އަށް ރޮވުނެވެ. މަޔަކު ރޮއްވައިފި ދަރިޔަކަށް ސުވަރުގެ ނުދެއްވާނެކަންވެސް ނޭނގެނީބާއެވެ. “ކަލޭގެ ލޯ ތިިހެން އިންނާތީ. މަގޭ ރަށްޓެހިން ހާދަ މަލާމަތެއް މަށަށް ކުރެޔޭ! އަޑުއިވިއްޖެތަ. ރައްކާވޭ މިތަނުން. މަށަށް ކިރިޔާވެސް ގޮތެއް އޮތްނަމަ މި ބޮލަށް ވެއްޓެންވެފައި އޮތް ގެގަނޑުގައި ނޫޅޭނަން” ނައިރާ ހަޅޭއްލަވައިގަތެވެ. އެ މަންމައަށް ރޮވިފައި އެ ދަރިފުޅާ ދިމާލަށް ބަލަހައްޓައިގެން ހުރެވުނެވެ. “އަޑެއް ނީވޭތަ މިހިރަ ހަޑިގިއްލާޔާ. ޗީ. ރައްކާވާށޭ” ނައިރާ އަޑުލިޔެވެ. އެއަށްފަހު ފައިން ޖަހާ ވައްޓާލާ ފިހިގަނޑުންވެސް ތެޅިއެވެ. އެމަންމަގެ ދުލުން ޝަކުވާގެ އެންމެ ބަހެއްވެސް ބޭރުނުކޮށްލައެވެ.
___________________
ދުވަސްތައް ފާއިތުވަމުން ދިޔައީ ހަލުވި ދުވެއްޔެއްގައެވެ. ހެނދުނު ނައިރާ ކޮޓަރިން ނުކުތްއިރު ސައިނަހަދާ ހުރުމުން މީހާ ފުފުނެވެ. މަންމަގެ ކޮޓަރި ތަޅުނުލާ ހުރުމުން ވަދެވުނެވެ. އޭރު މަންމަ އޮތީ ކުކުރާލަ ކުކުރާލަ މުޅި ގައިގައި ރަޖާ އޮޅާލައިގެން އޮތެވެ. “އޭއި ސައިހަދަން ދާންވީ. ފާޑަކަށް ކުކުރަ ކުކުރަ އެބައޮތެންނު” ނައިރާ ކެކިކެކި ހުރެ ބުންޏެވެ. “ދަރިފުޅާ. މަންމަަ މިއޮތީ ހުމާއޭ. ބޭސްގުޅައެއް ގެެނެސްދީބަލަ. މިމަންމައަށް ރަހުމްކުރޭ.” ހިތެއްއޮތް މީހެއްނަމަ އެމަންމަގެ ހިތްދަތި ބަސްތައް އަޑުއިވި ހިތްފަޅައިގެން ދިޔައީހެވެ. ނަމަވެސް ނައިރާގެ ހަށިގަނޑުގައި ހިތެއްގެ ބަދަލުގައި އެއޮތީ ހިލަގަނޑެއް ކަންނޭނގެއެވެ. “ހުރޭ! ރަނގަަޅަށް ރަހުމު ކޮށްދޭނަމޭ” މިހެންކިޔާ ފާހާނައަށްވަދެ ފެންބާލީދީއެއް ހިފައިގެން ނުުކުތެވެ. ވާންއުޅޭގޮތް އެނިކަމެތި އިންސާނާއަށް އެނގުުުނެއްކަަމަކު ކުރެވޭނެ ކަމެއްނެތިފައި ހިރިނުލެވިފައި އޮތީއެވެ. ފެންބާލިދީ އޮއްސާލާފައި ދަމާ ކޫއްތަމުން ބަދިގެއަށް ގެންދިޔައެވެ. “ސައިހަދާ!” ނައިރާ އަމުރު ކުރިއެވެ. ހަށިގަނޑުގައި ވަރެއްނެތް ހާލު އެމަންމަ ބާރަ ރޮށްޓާއި މަސްހުނިކޮޅެއް އެދަރިފުޅަށް ހަދައިދިނީ ހިތްބުރަކަމެއް ނެތިއެވެ. “ޗީ. މިމަސްހުނިގަނޑުގައި ހާދަ ލޮނުގަދައޭ. ރޮށިވެސް ރޯނުފިލާ. އަން ކަލޭ މީއްޗިހި ކައި. މަމިދަނީ ބޭރަށް” މަންމަގެ މޫނުމައްޗަށް މަސްހުނިތަށި ޖަހާ އަނގަޔަށް 11 ރޮށި އެކީ ގަންނުވާލިއެވެ. އެމަންމަ އިސްދަށަށްޖެހި ރޮވިފައި ހުއްޓެވެ.
* * * * *
ރަށްޓެހިންނާއެކު ރަލުގެ ކުޅިކުޅެ ނިންމާފައި ގަހުުކުރީ ހުރެގެން ނައިރާ ކޮޓަރިއަށް ވަނެވެ. އޭރުވެސް މަންްމަ ޖެހިގެން ހުރި ކޮޓަރިން ކުކުރާއަޑު އިވެއެވެ. އެކަން މާބޮޑުކަމަކަށް ނައިރާއަކަށް ނުވިއެވެ. ނުވާންނޫންހެއްޔެވެ؟ އޭނާ އެއިނީ އެހެން ދުނިޔެއެއްގައި ވިއްޔާއެވެ.
* * * * *
ނައިރާއަށް ނިދިން ހޭލެވުނީ ގޭތެރޭގައި މާ އަޑުގަދަ ވުމުންނެވެ. ކޮޓަރިން ނުކުތްއިރު ފެންޑާތެރެ ވަނީ ފުރި ތޮއްޖެހިފައެވެ. އެތާގައި ލަކުޑި އެނދެއްގެ މަތީގައި ހިނަވާ ކަފުންކޮށްފައި އޮތް މީހަކު އޮތެވެ. ނައިރާ ކައިރިއަށްގޮސް ބަލާލިއިރު ފެނުނީ މަންމަގެ ހިނިތުންވެފައިވި އުޖާލާ މޫނެވެ. ފާތުމަދައިތަ ނައިރާއަށް ސިޓީއުރައެއް ހަވާލުކުރިއެވެ. ނައިރާ މަންމައަށް ކިތަންމެ ނަފްރަތެއް ކުރިނަމަވެސް އެމަންމަ ނެތުމުގެ ފަޅުކަން އެހިތަށް އިހްސާސްވަނީ އިންތިހާއަށެވެ. މަޑުމަޑުން ސިޓީއުރަ ކަނޑާ ކިޔަން ފެށިއެވެ.
___________________
____________
މަންމަގެ ލޯބިލޯބި ނައިރާއަށް
މިސިޓީ ދަރިފުޅަށް ލިބޭއިރު މަންމަ ވާނީ މިފަނާވަނިވި ދުނިޔެއާއި އަލްވަދާއު ކިޔާފަކަންނޭނގެއެވެ.
ލޯބިވާ ދަރިފުޅާއެވެ. މަންމައާއި ބައްޕަގެ ކައިވެނި ނުގަބޫލުގައި ކުރެވުމުން ދެއާއިލާގެވެސް އެއްވެސް އެހީިއެއް ނުލިބެއެވެ. ދަރިފުޅަށް ދެމަހުގައި ބައްޕަ ނިޔާވުމުން ދަތިހާލުގައި ދަރިފުޅު ތިހާހިސާބަށް ގެންގޮސްދިނީ ދަރިފުޅު ތި ނަފްރަތު ކުރާމަންމައެވެ. މަންމަ ހުންނަގޮތުން ދަރިފުޅު މަންމައަށް ނަފްރަތުކުރާކަމީ މަންމައަށް ސިއްރުވެފައި އޮތްކަމެއް ނޫނެވެ. މަންމަގެ ލޮލަށް މިހެން ދިމާވި ހާދިސާ ކިޔައިދޭނަމެވެ. ދަރިފުޅާއިއެކު ކުޅެންއުޅުނު ކުއްޖަކު ގާބުރިއެއް އެއްލިތަނާ ދަރިފުޅުގެ ލޮލުގައި ޖެހުނީއެވެ.. ދެން ދަރިފުޅުގެ އެއްލޮލުގެ ފެނުން މުޅީން ގެއްލުނެވެ. ފެނުމުގެ އުފަލުން ދަރިފުޅު މަހްރޫމްނުކުރުވަން ވެގެން އަހަރެންގެ ގަހަނާތަކާއި ރަށުން މަންމައަށް ލިބުނު ގޯތި ވިއްކާލީމެވެ. އެއަށްފަހު ފަރުވާއަށް އިންޑިޔާއަށްގޮސް މަންމަގެ ލޯ ދަރިފުޅަށް ހަދިޔާ ކުރީމެވެ. ދަރިފުޅާއެވެ. މަންމަގެ އެންމެ ފަހު ވަސިއްޔަތަކީ ދަރިފުޅު އިސްލާމްދީނަށް ލޯބިކޮށް ތިއުޅޭ ނުބައި އުޅުން ދޫކޮށްލުމެވެ. ނަމާދު ނާޅާށެވެ. އައުރަ ނިވާކުރާށެވެ. މާތްﷲ ހަރާމްކުރެއްވި އެންމެހައި ކަންކަމުން ދުރުހެލިވާށެވެ. މިމަންމައަށް ހެޔޮދުއާ ކޮށްދެއްޗެވެ.
ދަރިފުޅުދެކެ އަބަދުވެސް ލޯބިވާ -މަންމަ-
______________________
_______________
ސިޓީ ކިޔާ ނިމުނުއިރު ނައިރާ އިނީ ހިތްފަޅައިގެން ދާވަރުވެފައެވެ. އެމަންމަ އޭނައަށްޓަކައި އެވީ ހާދަބޮޑު ގުރުބާނީއެކެވެ. އެމަންމައާއި ދޭތެރޭ ކަންކުރެވުނު އިހާނެތި ގޮތް ހިތަށްއަރާ މީހާއަށް ރޮވުނެވެ. ކޮންމެގޮތެއް ހަދާފައިވެސް މަންމަގެ ވަސިއްޔަތް އޭނާ ފުރިހަަމަ ކޮށްދޭނެއެވެ. އަވަސްއަވަހަށް ވުޟޫކޮށްގެން ނުކުމެ ދެރަކްއަތް ނަމާދެއްކޮށް ތައުބާވިއެވެ. އަދި މަންމައަށް ހެޔޮރަހްމަތް ލައްވާތޯ ދުޢާ ކުރިއެވެ. ދުވަހަކުވެސް ދެން އެފަދަ ފާފައެއް ނުކުރަން އަޒުމް ކަނޑައެޅިއެވެ.
* * * * *
ޚިޔާލުގެ ފުންކަނޑެއްގައި އޮޔާ ބެހެމުންދިޔަ ނައިރާއަށް ސިހުން ގެނުވީ އިޝާނަމާދު ބަންގީގެ އަޑަށެވެ. މިހާ ގިނައިރުވަންދެން މިތާ އިނދެވުނީތޯ ސުވާލްކޮށްލެވުނެވެ. އަވަސްއަވަހަށް ޖޯލިން ތެދުވެ ގެއަށް ދިޔުމަށް އަަވަސްވެގަތެެވެ. މިއަދަކީ އޭނާގެ މަންމަގެ މަރަށް 4 މަސްވީ ދުވަހެވެ. އެ މަންމަގެ ގުރުބާނީގެ އަގު އޭނާ އަދާކުރާނީ ކިހިނެއް ހެއްޔެވެ. އެމަންމަގެ ހެޔޮކަން ހިތަށްއަރާ ކޮންމެ ފަހަރަކު ރޮވެއެވެ. ޢޭނާގެ ހިތުގައި ވަނީ އެންމެ ސުވާލެކެވެ. މަންމަގެ މަޢާފް އޭނާއަށް ލިބިދާނެ ހެއްޔެވެ؟
*މަންމާއޭ މަށަށް މާފްކޮށްފާނުހޭ*
*މަންމާއޭ މަށަށް ހިތްހަލާލާލޭ ބުނޭ*
*މަންމަ ވަކިވުމުން ހާދަހާ ދެރަވެޔޭ*
*މަންމާއޭ މަށަށް މާފްކޮށްފާނުހޭ*

( ނިމުނީ )