ބާޣީންގެ ބިރުވެރި އަޑު ( ސަމާސާ އަދަބު )

• – – މާހިދު މުހައްމަދު / ފްރެޝްކޯނަރ / ނ. ހެނބަދޫ – –

( މިއީ މިރަށުގައި ހިނގި ހަޤީޤީ ހާދިސާތަކެއްގެ މައްޗަށް ލިޔެފައިވާ ސަމާސާ އަދަބެކެވެ. މިލިޔުމުގައި ބޭނުންކޮށްފައިވާނީ މިހާދިސާ ދިމާވި މީހުންގެ އަސްލު ނަންތަކެއް ނޫނެވެ. )

މިރެއަކީ ހެނބަދޫގައި ވަރަށް ޚާއްޞަ އަދި އެހާމެ ބޮޑު ރެއެކެވެ. ކޮންމެ އަހަރެއްގެ ޑިސެންބަރުގައި އަންނަ މެހެމާނުގެ ވިހެއި ދުވަސް ފާހަގަ ކުރުމުގެ ރެއެވެ. ރަށުގެ ރައްޔިތުން މިރެއަށް ތައްޔާރުވުމުގައި އުޅޭއިރު ހީވަނީ ރެވިތެޔޮ ވަށައިގެން އުޅޭހެންނެވެ. އެހާވެސް ދުވަސް ފޯރިގަދަވެފައި އުފާވެރިއެވެ. މިރޭ އޮންނަ ކެއުމަށާއި ޝޯވއަށް މީހުންތައް ތިބީ ކެތްނުލަވާފައެވެ.

އެރޭގެ މެންދަމު 12 ޖެހީއެވެ. ކަމަނަ އަކީ އުމުރުން 60 އަހަރުގެ އަންހެނެކެވެ. އޭނާ ހުރީ ގެއާ މާދުރުނޫން ހިސާބެއްގައި މީހަކާ މައްލަވަކުރާށެވެ. އޭނާގެ ބާރު އަޑުން މުޅިތަން ވަނި ގުގުމާލާފައެވެ. ކުއްލިއަކަށް އިވުނީ ގަދަފަދަ އަޑެކެވެ. އެ އިވުނު ގަދަ އަޑުން ކަމަނައަށް ދެކަމުހާޖަތަށް އެއްފަހަރާ ނުދެވުނީ ކިރިޔާއެވެ. އެއީ ދުވަހަކުވެސް އިވިފައިނުވާފަދަ ނާމާން އަޑެކެވެ. ހީވަނީ ބާޣީން އަރައިގެން އުޅޭ އަޑުހެންނެވެ. އެވަގުތު ވިދަންވެސް ފަށައިފިއެވެ. އެވަގުތު ކުޑަކަމުދާންވެސް އޭނާ ހުރީ ލޮލުންބޮލުންއެދިގެން ކަމުން ގަޔަށް ލެވުނުހާ ބާރެއްލައި ދުވެބަޑިބަޑިޖަހާފައި ގެއާ ދިމާލަށް ދިޔައީ އެއެއްމިއެއް ބަލާފައެއް ނޫނެވެ. ވާނީވެސް އެހެންތާއެވެ. އެއުޅެނީ ބާޣީން އަރައިގެން ވިއްޔާއެވެ. ސަލާމަތްވެވޭތޯ މަސައްކަތްކުރަން ޖެހޭނެ ނޫންހެއްޔެވެ؟

މީހާއަކީ ފަލަ ބަރުހެލި މީހެއްކަމުން ދުވެލި ހުރީ ފުރަތަމަ ގިޔަރުގައެވެ. ހަލުވިކަމާއެކު ދުވެފައި ދަނިކޮށް ދެން އިވުނީ އަސަރުގަދަ ބަން އަޑެކެވެ. އެއާއެކު ކަމަނަ އޮތީ ބިންމައްޗަށް ގުޅައަކަށް ޖެހިފައެވެ. ގަހެއްގެ މުލަކަށް ފައި ބީހުނީއެވެ. ވަރަށް ހާލުން ތެދުވެ އަނެއްކާވެސް އޭނާގެ ދަތުރު ފެށިއެވެ. ގެއާ ހިސާބަށް ކަމަނައަށް ދެވުނީ ތިންތަނަށް އެގޮތަށް ވެއްޓުމަށްފަހުއެވެ. މަންޒަރު ފެނުނު މީހެއްނަމަ ހިތުގެ ހިނގުން ހިނދުކޮޅަކަށް ނަމަވެސް އޭގެ ވާޖިބު ދޫކޮށް ހިމޭންވީސް ކަންނޭނގެއެވެ.

ގެއަށް ދެވުނުއިރު ކަމަނައަށް ހުރީ ތިންތަނަށް ވެއްޓުމުގެ ސަބަބުން އޭނާގެ ހާޖަތުގެ އެއްބައި ކަނޑިއްކަށް ފުރިހަމަކޮށްފައެވެ. އެގަޑީގައި ބަޣީންގެ އަޑުވެސް ހުރީ ހިނދުކޮޅަކަށް މެދުކެނޑިފައެވެ. ގެއަށް ވަތްގޮތަށް އޭނާ މަސައްކަތްފެށީ ގިފިއްޔަށް ވަދެ އޭނާގެ ހާޖަތުގެ ބާކީބައި ފުރިހަމަކުރާށެވެ. އެވަގުތު ކޮޓަރިން ނުކުތް ކަމަނަގެ ފިރިމީހާ ތަކުރާރު ދެލޯ މުދުނަށްއެރީ ފެނުނު ހިތްގައިމު މަންޒަރަކުންނެވެ. ލޮލަށް ފެނުނީ ހަގީގަތެއްކަމަށް ގަބޫލު ނުކުރެވިގެން ދެތިން ފަހަރު ލޯވެސް އުނގުޅާލިއެވެ. ނަމަވެސް ކޮންމެ ފަހަރަކުވެސް ފެންނަނީ ހަމަ އެއް މަންޒަރެކެވެ. “މަންޖޭ!!! މިތަނަށް؟” ހައިރާންވެހުރެ ތަކުރާރު ބުނެލިއެވެ. އެއާއެކު ކަމަނަ ހަމަހޭވެރިކަންވިއެވެ. ވާނުވާ ރޭކާލިއެވެ. އޭނާއަށް ކުޑަކަމުދާން އިނދެވުނީ ގިފިލިކަމަށް ހީކޮށް ގޭގެ ސިޓިންރޫމުގައެވެ. ބިރުގަތްފައިހުރިވަރުން ކަމަނައަށް ގިފިލިވެސް އޮޅުނީއެވެ. ނަމަވެސް މިހާރު މިއޮތީ ވާނެ އެއްޗެއްވެ ނިމިފައެވެ. “ތަކުރާރާ ބާޣީން އަރައިގެން އެބަ އުޅެޔޭ” ކަމަނަ ތުރުތުރުލާފައިވާ އަޑަކުން ބުނިއިރު ހީވަނީ ރޮނީހެންނެވެ. ދުވެފައިގޮސް ކޮޓަރިއަށް ވަދުނީ ތަކުރާރާ ތަކުރާރެއް ކިޔާފައެވެ.

ކަމަނަ ގިފިލިގައި އުޅެނިކޮށް އެއްކަލަ އަޑު އަނެއްކާވެސް އިވެން ފަށައިފިއެވެ. ކަމަނަގެ ހިތް ތެޅޭވަރުން ރޯމަހެއް މަރަށް ތެޅޭފަދައެވެ. އެހެން ނުވާންވީ ސަބަބެއްވެސް ނެތެވެ. މިރޭ ބާޣީންގެ ކިބައިން އޭނާގެ ފުރާނަ ސަލާމަތްވިއްޔާވެސް ރަނގަޅެވެ. އެވަގުތު އޭނާ ހުރީ ވަރަށް ކަރުހިތްކައިގަނެފައެވެ. ފެންބޯން ބޭނުންވެފައެވެ. ނަމަވެސް ކާގެ ހުންނަނީ ގެއާ ވަކިންކަމުން ފެންބޯން ދާކަށްވެސް އޭނާގެ ކެރުންތެރިކަން އެއްބަހެއް ނުވިއެވެ. އެކަމަކު ކަރުހިއްކުން ނުފިލުވާ ކެތްކުރާނީވެސް ފަހެ ކިހިނަކުން ހެއްޔެވެ؟ އެވަގުތު ކަމަނަގެ ސިކުނޑިއަށް އައީ އެކަމަށް އޮތް ހަމައެކަނި އަދި މޮޅު ހައްލެވެ. ގިފިލީގައި ހުރި ފެންވަޅުން އޭނާގެ ދެލޯ ތަގުޅިކޮށްލައިގެން ހުރެ ދާންޏެއްގެ ފެން ބޮއެގެން ދިޔައެވެ.

އޭގެ އަނެއް ދުވަހެވެ. ހެނދުނު ކަމަނަ ހޭލިއިރު އޮތީ ގަދައަށް ހުން އައިސްފައެވެ. ފުރަތަމަވެސް އޭނާ ބެލީ ރޭގައި ހިނގި ހަނގުރާމައިގެ ޚަބަރެއް ލިބޭތޯއެވެ. ނަމަވެސް މީހުންތައް ހަމަޖެހިލާފައި އުޅޭގޮތުން ރޭގައި ކަމެއް ހިނގިހެންވެސް ހީނުވެއެވެ. މީހުންގާތު އަހައި އޮޅުންފިލުވުމުން އޭނާއަށް އެނގުނީ ރޭގައި ޝޯވ ނިންމާފައި ހަވާ އެރުވީކަމެވެ. އެއީ ބަޑިބޭހުގެ ކުޅިވަރު އަޑުކަމެވެ. ވާނުވާ އޮޅުންފިލި އިރު އޭނާ ހުރީ އޭނާއަށް އުޅެވުނުގޮތް ހިތަށްއަރާފައި ހެވޭވަރުން ކެތްނުވެފައެވެ. ވާނީވެސް އެހެންތާއެވެ. އެފަދަ ޒާތެއްގެ ބިރުވެރި ކަމަކާ އޭނާއަށް މިވީހާ ތަނަށް ކުރިމަތިވެފައެއް ނެތެވެ. އެންމެ ފަހުން ކަމަނައަށް މިޖެހުނީ ހަސްފަތާލަށް ދާށެވެ.

• – – ނިމުނީ – –