ފަނާ (1 ވަނަ ބައި)

ދިހަ އަހަރުގެ ދިގު އިންތިޒާރަކަށް ފަހު ސްކޫލު ދައުރު ނިމުމަކަށް އައި ކަމުގެ އުފާ ފާހަގަ ކުރުމަށް ބޭއްވި ހަފްލާ ނިންމާފައި، އެކުވެރިންކޮޅަކާއި އެކު ހޯލުން ނުކުތް ނަދާގެ މޫނުމަތީގައި ވީ އުފާވެރި ކަމުގެ ނަކަލީ ފަރުދާއެކެވެ. ސްކޫލު ގޭޓުން ނުކުމެ ފަހަރަކު އެކުވެރިއަކާ އަލްވަދާއު ކިޔައި ނިމުމާއެކު، ގެޔާއި ދިމާއަށް ދާން ހިނގައިގަތް ނަދާގެ މޫނު މަތިން އެ އުފާވެރިކަން ފޮހެވި، މާޔޫސް ކަމެއް ވެރިވެގެން ދިޔައެވެ. އެއީ އޭނާގެ ހިތުގެ ހަގީގީ ހާލެވެ. އެކުވެރިންނަކީ ވެސް ވަގުތީ ބައެކެވެ. ސްކޫލު ގެ ހަތަރު ފާރު ތެރޭގައި އިސްރާފު ވެގެން ދިޔައީ އެއްވެސް ފައިދާއެއް ނެތް އަހަރުތަކެއް ކަމަށް އޭނާ ގަބޫލު ކުރިއެވެ.

އުފާވެރިކަމެއް ނެތް، މާނަ ނެތް ދިރިއުޅުމެއް ކުރިއަށް ގެންދިޔުމަށް، އެއްވެސް އުންމީދެއް ނެތި ހުރެ ގެޔަށް ގޮސް އޭނާ ވަނީ، އެކަކު ވެސް އޭނާއަށް މަރުހަބާ ކިޔާނެ ކަމަށް ހީކޮށްގެން ހުރެއެއް ނޫނެވެ. ނަމަ ވެސް ފެންޑާގެ ދޮރު ހުޅުވުމާއެކު ޕޮއްކިޔާފައި ގޮވި އަޑަކާއެކު ގަޔާ ދިމާއަށް ބުރައިގެން އައީ ކުލަކުލައިގެ ރިބަންކޮޅުތަކަކެވެ. ގަތް ސިހުމާއެކު ބާރަށް ފިއްތައިލެވުނު ދެ ލޯ އަލުން ހުޅުވުނުއިރު ނަދާގެ ކުރިމަތީގައި ހުރީ ދެން ދުވަހަކު ވެސް ބައްދަލު ނުވާނެކަމަށް އޭނާއަށް ގަބޫލު ކުރެވިފައިވި މީހެކެވެ.

“ކޮންގްރެޓްސް!” ހެވި ދިލިފައި ހުރެ ޒިވާން ބުނެލިއެވެ. އޭނާގެ އަތުގައި އޮތް ފިނިފެންމާ ބޮނޑިއާއި މޭޒުމަތީގައި އިން ކޭކަށް ނަދާގެ ސަމާލުކަމެއް ނުލިބުނީ، ޒިވާންގެ މޫނަށް ކަޅިޖަހައި ނުލައި ބަލަހައްޓައިގެން ހުރެވުނީތީއެވެ. އެންމެ ފަހުން އޭނާއަށް ފެނުނު ޒިވާނަށް ވުރެ މި ޒިވާން ހާސްތަން ތަފާތެވެ. އިސްކޮޅުން އިތުރު ފޫޓެއްހާތަން ދިގުވެ، ބައިމަތި ފުޅާވެފައި، މޫނުމަތީގެ ފިރިހެންވަންތަކަށް އިތުރެވެ. ނަމަވެސް އެ ދެލޮލުގައި ވި ޅަ މިޒާޖާއި، ފެންނަ މީހެއްގެ ހިތާއި ކުޅެލާފަދަ އުޖާލާ ހިނިތުންވުމަށް ފަނޑުކަމެއް ނާދެއެވެ. އެއީ ހުވަފެނެއް ނޫންކަން ގަބޫލު ކުރަން ދަތިވެފައި، ބުނާނެ އެއްޗެއް، ހަދާނެ ގޮތެއް ނޭނގިފައި ނަދާ ހުއްޓައި ދެން ވެސް އަނގައިން ބުނީ ޒިވާނެވެ.

“މިއައި ނައްޓެ ބަލައި. އަހަރެން ބުނީމެންނު ދިހައެއް ނިންމީމަ މާލެ ގެންދާނަމޭ.” ޒިވާން ބުނި އެތިން ނަދާ ހައްތަހާ ހައިރާން ވިއެވެ. މިއީ ހަމަ ހުވަފެނެކޭ އަމިއްލަ ނަފްސަށް ބުނެލެވުނެވެ. “ވަރަށް ސަޕްރައިޒް ވެފަ ދޯ ތި ހުރީ. އެހެންވެއޭ ނުބުނެ އައީ ވެސް.” ޒިވާންގެ ހިނިތުންވުމަކަށް ފަނޑުކަމެއް ނާދެއެވެ. ޒިވާން ދިއްކޮށްލި މާބޮނޑިގައި ހިފި ނަދާ، ވަރަށް ހިތްވަރު ކޮށްފައި ހަމަ ބިމަށް ފައިބައި، މޫނު މަތިން ހައިރާން ކަމުގެ ކުލަވަރު ފޮރުވައިލިއެވެ. އެއީ ހުވަފެނެއް ނޫނެވެ.

“މިއޮއްހާ ދުވަހު ހަބަރެއް ނުވެފަ ކީއްކުރަން މާލެ ގެންދަން ތި އުޅެނީ؟ މާލެއިން އަންހެނުން ހުސްވީ ތަ؟” ހިތްހަމަ ނުޖެހިފައި ހުރިކަން ފޮރުވަން މަސައްކަތް ކުރަމުން ނަދާ މަޑުމަޑުން ބުނެލިއެވެ. އޭނާ ޒިވާންގެ މޫނަށް ބެލުން ހުއްޓައިލީ، އެ ހިނިތުންވުން ފެނުމުން ހިތަށް ކުރި އުނދަގުލެއްގެ ސަބަބުންނެވެ.

ޒިވާނަކީ ނަދާ އެންމެ ކުޑައިރުންސުރެ އެކުގައި އުޅެ ބޮޑުވި އަވައްޓެރިއެކެވެ. ނަދާގެ އުމުރުން ބާރަ އަހަރުގައި ޒިވާން މާލެ ބަދަލުވި އިރު ޒިވާންގެ އުމުރުން ތޭރަ އަހަރެވެ. ކޮންމެ ދުވަހަކު ގުޅާނަން ކަމަށް ބުނި ޒިވާންގެ ފޯނު ކޯލުތައް މަދުވަމުން ގޮސް ހަބަރެއް ނުވާތާ ހަތަރު އަހަރު ވާން ގާތް ވެފައިވީ އިރު، ނަދާގެ ހިތުގައި ޒިވާނަށް ޓަކައި އުފެދުނު ފަނޑު އިހުސާސްތައް ވަނީ އެކީހެން ފިލައި ގޮސްފައިކަމަށް ނަދާ ގަބޫލު ކުރިއެވެ. ޒިވާނަކީ ވެސް އަނބުރައި ނުލިބޭނެ ވަގުތީ އެކުވެރިއެއް ގޮތުގައި ނަދާ ދެކުނެވެ.

“އޭ، ތި ދެން ކޮން ވާހަކައެއް؟ އަހަރެން ވަރަށް ބިޒީކޮށޭ އުޅުނީ. ކިތަންމެ އަންހެނުންނެއް ލިބުނަސް އަހަރެން ދުވަހަކު ވެސް ނައްޓެ ހަނދާނެއް ނުނެތޭ.” ސަމާސާ ރާގަކަށް ޒިވާން ބުނެލިއެވެ. އެކަމާ ނަދާ އިތުރަށް ހިތްހަމަ ނުޖެހުނެވެ. ޒިވާން އޭނާއަށް ދީފައިވާ ވަނަން ވެސް މިހަރު ނަދާއަކަށް ކަމަކު ނުދެއެވެ. ދެން ޒިވާން ކުރާ ހުރިހާ ކަމެއް ނަދާއަށް ކަމުނުދާނެ ކަންނޭންގެއެވެ. ހަނދާން ނުނެތެއޭ ބުނި މީހާ މެސެޖެއްހާ ހިސާބު ވެސް ނުކުރާތީ ނަދާ ހުރީ ޒިވާން ދެކެ ފޫހި ވެފައެވެ.

“ދެން ތުން ދަމައިގެން ނުހުރެބަލަ. އާދޭ ކޭކު ފަޅަން.” ނަދާގެ ހިތުގައި ވި އެއްވެސް ޖަޒުބާތަކަށް ޒިވާންގެ ފަރުވާލެއް ނެތެވެ. އޭނާ ހުރީ ނިކަން އުފަލުންނެވެ. އެ ހިނިތުންވުމުގެ ފަހަތުގައިވީ ކޮން މަގުސަދެއްބާއޭ ނަދާގެ ހިތަށް އެރިއެވެ.

ގައިގައި ހުރި ރިބަންކޮޅުތައް ފޮޅަމުން ކޮޓަރިއަށް ވަދެ، އަތްދަބަހާއި މާ ބޮނޑި ރީތިވާ މޭޒުމަތީ ބާއްވާފައި އެނބުރި ކޮޓަރިން ނުކުންނަން ދިޔަ ނަދާގެ ހިތަށް ކުއްލި ހާސްކަމެއް ވެރިވިއެވެ. ގޭގައި އެ ވަގުތު އޭނާއާއި ޒިވާން ފިޔަވައި އެކަކު ވެސް ނެތެވެ. މަންމަ ޝަރާ އުޅޭނީ އަބަދުހެން ކޮންމެ ވެސް ފިރިހެނަކާ ބައްދަލު ކުރަން ގޮހެވެ. އަންހެން ކޮއްކޮ ނަޒާހާ ވީ ޗުއްޓީއަށް ދަތުރު ގޮހެވެ. މީގެ ހަތަރު އަހަރު ކުރިން ޒިވާނާއެކު ގޭގައި ހުންނަން މާ ބޮޑު ކަމަކަށް ނުވިޔަސް މިހާރު ޒިވާނަކީ އޭނާއަށްވުރެ މާ އިސްކޮޅުން ދިގު، ގައިގައި މާ ބާރު ހުރި ފިރިހެނެކެވެ. ހަތަރު އަހަރު ތެރޭގައި މީހެއްގެ މިޒާޖާއި ނިޔަތް ބަދަލު ވެގެންދާނެ ގޮތް އަންދާޒާ ވެސް ނުކުރެވިދާނެއެވެ.

ލޯގަނޑު ކުރިމައްޗަށް އަރައި، ހުޅުވައިފައި ހުރި ކޮޓަރީގެ ދޮރުން ބޭރުން ފެންނަން ހުރި ސޯފާގައި އިން ޒިވާނަށް ނަދާ ބަލައިލީ ލޯގަނޑުންނެވެ. އަދި ވެސް ވަރަށް ހެވިފައި، ފޯނާއި ކުޅެން އިން ޒިވާންގެ ކިބައިން ނުބައި ނިޔަތެއްގެ ހިލަމެއް ވޭތޯއެވެ. އެހެން އެނގޭނީ ވެސް ވަކި ކިހިނެތްތާއެވެ. ނަދާއަކީ ދުވަހަކު ވެސް މި އުމުރުގައި ފިރިހެނަކާއެކީ އެކަހެރި ވި ކުއްޖެއް ނޫނެވެ. ޝަރާގެ އުޅުން ދަސްކުރާކަށް އޭނާ ބޭނުމެއް ނުވެއެވެ. ޖެހިލުން ވެފައި އިރުކޮޅަކު ހުރެހުރެފައި ނަދާ ކޮޓަރިން ނުކުތީ، ޒިވާނާއި ދުރުދުރުން އުޅުމަށާއި، ކަމެއް ގޯސްވާހެން ހީވާނަމަ އަވަހަށް ގެއިން ނުކުމެގެން ދިޔުމަށް ވިސްނައިގެނެވެ.

ކޮޓަރިން ނުކުތް ނަދާ ފެނިފައި ޒިވާން އަނެއްކާ ވެސް އޭނާއާ ކަޅި ހަމަކުރަން މަސައްކަތް ކުރިއެވެ. އެހެނަސް ނަދާ ބަލަން ހުރީ ކޭކާ ދިމާއަށެވެ. ކޭކު މަތީގައި ‘ކޮންގްރެޓްސް އޮން ގްރެޖުއޭޓިންގ ނަދާ’ ލިޔެފައި އޮތެވެ. ބަދިގެއިން ވަޅިއެއް ނަގާފައި ކޭކު ފަޅަން ފެށިއިރު އެ ވަޅީގެ އިތުރު ބޭނުމެއް ވެސް ކުރެވިދާނޭ ހިތަށް އެރިއެވެ. އެ ހިސާބަށް ދާން ޖެހިދާނެހާ ބޮޑަށް ޒިވާންގެ މިޒާޖު ބަދަލުވާނެ ބާއެވެ؟ ސިކުނޑީގައި ވި ހިޔާލުތަކުގެ ހަލަބޮލިކަމުން، ފޯނުން ނަދާގެ ވީޑިއޯ ކުރަމުންދިޔަ ޒިވާން ކީ އެއްޗެއް ނަދާއަކަށް ސާފެއް ނުވިއެވެ.

ދެ މީހުން ކޭކު ކާން ތިބި އިރު ޒިވާން އަނގަ ހުއްޓާނުލައި ވާހަކަ ދައްކަމުން ދިޔައެވެ. އޭނާ މާލޭގައި ހޭދަ ކުރި އަހަރުތަކުގައި ކުރި ކަންތައްތަކުގެ ވާހަކައެވެ. ކިޔެވުމުން ލިބުނު ކުރިއެރުންތަކާއި، ކުޅިވަރުތަކުންނާއި އިތުރު ހަރަކާތްތަކުން ލިބުނު ކާމިޔާބީތަކާއި، ލިބުނުހާ އެކުވެރިންނެއްގެ ހަނދާންތަކެވެ. ވާހަކަ ހުރި ގޮތުން އޭނާ ރަށަށް ނައިސް އުޅުނީ، މާލޭގެ ދިރިއުޅުމާމެދު އެހާވެސް ހިތްހަމަ ޖެހިގެން އުޅުނީތީކަން ނަދާއަށް ނަގައިގަނެވުނެވެ. އެއާއެކު ނަދާގެ ހިތުގައި، ހަސަދައިގެ ހުޅުކޮޅެއް ރޯވިއެވެ. އޭނާއަށް ވެސް އެ ފަދަ އުފާތަކެއް އިހުސާސްކޮށްލަން ނުލިބުނީތީ ކަމެއް، ނުވަތަ ޒިވާންގެ އެ އުފާތަކުގައި ބައިވެރި ނުކުރީތީ ކަމެއް ޔަގީނެއް ނޫނެވެ. އެންމެ ފަހުން، ޒިވާން އޭނާ ލޯބީގެ ގޮތުން ގުޅުނު އަންހެން ކުދިންގެ ވާހަކަ ކިޔައިދޭން ފެށުމުން ނަދާއަށް ކުނި މޫނެއް ހަދައިލެވުނެވެ.

“އެ ހުރިހާ އެއްޗެއް އެ ކިޔައިދެނީ މަ ޖޭ ވާނެ ކަމަށް ތަ؟ ނޫނީ ހަމަ މަށާ ދޭތެރޭ އެއްވެސް ފީލިންގްސްއެއް ނެތީމަ، ރައްޓެއްސަކަށް ކިޔައިދޭހެން ކިޔައިދެނީތަ؟” ނަދާ ހިތާހިތުން ކިޔައިލިއެވެ. “ހެޔޮ. މަށަށް ކޮން ކަމެއް؟” ނަދާ އަމިއްލަ ނަފުސަށް ވިސްނައިދޭން މަސައްކަތް ކުރިއެވެ. ނަމަ ވެސް ޒިވާން ދެއްކި ހުރިހާ ވާހަކަތަކެއްގެ ތެރެއިން އެންމެ ސަމާލުކަން ދީގެން ނަދާ އަޑު އެހީ ޒިވާންގެ ލޯބީގެ ހަޔާތުގެ ވާހަކަތަކެވެ. އޭނާ ރައްޓެހިވެގެން އުޅުނީ ކޮން ކަހަލަ އަންހެން ކުދިންނަކާތޯއެވެ. އެ ކުދިންގެ ކިބައިގައި ހުރި ސިފަތަކަކީ ނަދާގެ ކިބައިގައި ވެސް ހުރި ސިފަތަކެއްތޯ އަޅައިބަލަމުންނެވެ.

އެ ގޮތުން ނަދާގެ ކަންފަތުގައި އެންމެ ބޮޑަށް އަޅައިގަތީ ޔޫޝާ ނަމަކަށް ކިޔާ ކުއްޖެއްގެ ވާހަކައެވެ. ހަ މަސް ދުވަސް ވަންދެން ޒިވާނާ ރައްޓެހި ވެގެން އުޅުނު ކަމަށް ބުންޏެވެ. ޒިވާންގެ ރާގު ހުރި ގޮތުން އޭނާ އެންމެ ބޮޑަށް ހިތްކީ ޔޫޝާއަށްހެން ހީވިއެވެ. ނަމަ ވެސް އެ ދެމީހުންގެ ގުޅުމަށް ނިމުމެއް އައިީ ޔޫޝާގެ އާއިލާއިން އޭނާ އެހެން ފިރިހެނަކާ ދެވަން ނިންމި ނިންމުމަށް ޔޫޝާ އެއްބަސް ވީތީއެވެ. ޔޫޝާއަކީ ޒިވާނަށްވުރެ އެއް އަހަރު ދޮށީ ކުއްޖަކަށް ވުމުން، އޭނާ ހުރީ އަށާރަ އަހަރު ފުރިފައެވެ.

“ހެވޭ މަށަށް. އަހަރެން މި އަންނަ އަހަރު މީހަކާ އިންނަ އިރު އޭނައަށް ވުރެ މާ ރީތި ކުއްޖަކާ އިންނާނީ. ވެޑިންގ ވެސް އެއަށް ވުރެ ގަދަކޮށް ބާއްވާނީ.” ޒިވާން ޖަދަލު ކުރާ ރާގަކަށް ބުންޏެވެ.

“މި އަންނަ އަހަރު މީހަކާ އިންނަންތަ ތި އުޅެނީ؟” އެއޮއްހާ އިރު އަނގައިން ނުބުނެ އިން ނަދާގެ ދުލުން އެ ސުވާލު ބޭރުވީ އިހުތިޔާރެއް ނެތިއެވެ.

“އޭ، މި އަންނަ އަހަރު އަދި ނީންދެވޭނެ… ދެން އަންނަ އަހަރު އިނދެވޭނީ.” ނަދާއާ ހަތަރު ކަޅި ހަމަކޮށްލި ޒިވާންގެ މޫނުމަތީގައި ކުރިން ހުރި ސަމާސާ ހިނިތުންވުމެއް ނެތެވެ. “ނަދާ އިންނާނަން ދޯ އަހަންނާ؟”

-ނުނިމޭ-