ލޯބިވޭ އަނަންތަކަށް… – 7

ކައިވެނީގެ ކަންތައްގަނޑު…

“މީކާއިލު؟ މިތަނުގައި ކީއްކުރަނީ؟” ޔުން ސިހިފައި ސުވާލު ކުރިއެވެ.

ޔުން ހިފައިގެންހުރި ފޮށި މީކާއިލުގެ އަތަށް ނަގަމުން ބުންޏެވެ. “އަހަންނަށް މަޢާފުކުރޭ. ނުބުނެ މިތަނަށް އައީމާ.” ޔުން އަދިވެސް ބަލަމުން ދިޔައީ މީކާއިލުއަށެވެ.

“އަހާނ. ތިއީތަ މީކާއިލުއަކީ؟” ސީމާ މީކާއިލުއާ ދިމާއަށް ބަލަން ހުރެފައި ބުންޏެވެ.

“މީކާއިލު، މިއީ އަހަރުންގެ އެންމެ ލޯބިވާ ބޮޑުދައިތަ! އެންމެ ކުޑައިރުއްސުރެވެސް ބަލާބޮޑުކުރީ ބޮޑުދައިތަ.” ޔުން މީކާއިލު ކައިރީ ހުރެ ބުންޏެވެ.

“ސީމާއްތަ، ވަރަށް އުފާވެއްޖެ ބައްދަލުވީތީ!” މީކާއިލު ކުޑަ ހިނިތުންވުމެއް ފާޅު ކުރަމުން ބުންޏެވެ. “އަހަންނަށް އަދި މިރަށަށް މިއައީ ފުރަތަމަ ފަހަރަށް. ކުރިން ޖައްސާނުލެވުނީ ބުރަކޮށް އުޅޭތީވެ.” މީކާއިލު އުޒުރު ކިޔައިދެމުން ދިޔައެވެ.

“އެއީ މައްސަލައެއް ނޫން! މިހާރު ތިހުރީ އާދެވިފައެއްނު!” ސީމާ މީކާއިލުގެ ކޮނޑުގައި އަތް ބާއްވަމުން ބުންޏެވެ. ސީމާ އިސްކޮޅު ކުރުކަމުން ޖެހުނީ އަތް މައްޗަށް ނަގާށެވެ.

~~~~~

ދުވާލުގެ ބުރަ މަސައްކަތަށްފަހު، މުޅި އާއިލާ އެއްސުފުރާއެއްގެ ދޮށުގައި އިށީނެވެ. މުޅި ކާމޭޒު މަތި ފުރާލާފައިވަނީ އެކި ޒާތުގެ މީރު ކާތަކެތިންނެވެ. ސުރުވާތަކާއި، ‘ބިބިންބަޕު’ފަދަ ތަފާތު އެކި ބާވަތްތައް ހިމަނާފައިވެއެވެ. (‘ބިބިންބަޕު’ އެއީ ކޮރެއާއަށް ޚާއްސަ ކެއުމެކެވެ. މިއީ ބަތަށް މަހާއި، ބިސްގަނޑުފަދަ ތަކެތި އަޅާ، ކެއުމުގެ ކުރިއަށް އެއްކޮށްލާ ކެއުމެކެވެ.)

“މީކާއިލު ދުވަހަކުވެސް ބިބިންބަޕު ކެއިންތަ؟” ‘ބިބިންބަޕު’ އަޅާފައިވާ ތަށި ނަގާ މީކާއިލުއާ ދިމާއަށް ގެންދަމުން ސީމާ ބުންޏެވެ.

“ނޫނޭ. އަދި މި ކެވެނީ.” މީކާއިލު ކުރުގޮތަކަށް ބުންޏެވެ.

“މާ ރަނގަޅެއްނު! ބަނޑުބޮޑުވާ ވަރަށް ކައްޗޭ ދަރިފުޅާ.” ޖަމީލު އޭނާގެ ޖުމުލަ އަތުރާލިއެވެ. “ސީމާ މިހުރީ މިއަދު ބޮޑު ޖާފަތެއް ހަދާފައި. ހުރިހާ އެންމެން ރަނގަޅަށް ކައި!” ޖަމީލު އެހެން ބުނުމަށްފަހު ކެއުމައިގެން ކުރިއަށް ދިޔައެވެ.

“ޔުން. ގިނައިން ކައިބަލަ. މިހާރުވެސް ތިހުރީ އިލޮއްޓެއްހެން. މާދަމާ ކައިވެނި ކުރާއިރު ހޭނެތިއްޖެއްޔާ ޔޯ؟” ސީމާ ކަންބޮޑުވެ ސުވާލު ކޮށްލިއެވެ.

“އެކަމު މާ ފަލަވެއްޖެއްޔާ ކިހިނެއް ހުދު ހެދުން ލަނީ؟” ޔުން މާދަމާ އޮތް ކައިވެނި ހަނދާންކޮށްލަމުން ބުންޏެވެ.

“އަޅެ ބިބިންބަޕު ކައިގެން އެއްރެއަކުން ފަލައެއް ނުވާނެ.” ސީމާ ހިތްހަމަނުޖެހިފައި ބުންޏެވެ.

“މިހާރު އަޅައިނުލާ. ކައިވެނިކުރުމަށްފަހު، ޔުންއަށް ރަނގަޅަށް ކާންދޭނަން. ހާސްނުވޭ.” މީކާއިލު ޔުންގެ ކޮނޑަށް އަތް ވައްޓާލަމުން ބުންޏެވެ.

“އެ ބުނީއެއްނު..” ޔުންވެސް މީކާއިލުއާ އެއްބައިވިއެވެ.

“އާނ. މައްސަލައެއް ނެތް މީކާއިލު އެހެން ބުނަންޏާ. އެހެންނޫނަސް ޔުންއަށް އެންމެ ފުރަތަމަ ނަޒަރުން ލޯބިވެވުމީ އެެއީ ދޮގަކަށް ނުވާނެ…” ސީމާ ކެއުމަށް ސަމުސާ ނަގަމުން ބުންޏެވެ.

“އެހެންތަ؟ ޔުން އަހަރުން ގާތު އެ ވާހަކައެއް ނުބުނޭ.” މީކާއިލު ޔުންއާ ދިމާއަށް އެނބުރެމުން ސުވާލުވެރި މޫނެއް ދައްކާލިއެވެ.

“އެއީ އަބަދުވެސް ޔުންގެ ގޮތް. އޭނާގެ އިހުސާސްތައް ދުވަހަކުވެސް ރަނގަޅަކަށް ހާމައެއް ނުކުރާނެ؛ އެކަމު މީކާއިލުދެކެ ނިކަން ލޯބިވާނެ!” ޖަމީލު މީކާއިލުގެ ކޮނޑުގައި އަތް ބާއްވާލަމުން ބުންޏެވެ.

“ކާފާ! މާބޮޑަށް ނުކިޔާ….” ޔުންއަށް ނުތަނަވަސްވެރިކަން ވެރިވަމުން ދިޔައެވެ.

“އާނ. ކާތަކެތީގެ ހޫނު ކެނޑެނީ. ހިނގާ ހުރިހާ އެންމެން ކާން ފަށަން؟” ޖަމީލު ޔުންގެ އެއްވެސް ކުކުރުމަކަށް ނުބަލާ ބުންޏެވެ.

“ޝުކުރިއްޔާ، ޖަމީލުބޭ. އަހަރުން މިހުރީ ބިބިންބަޕު ރަހަބަލައިލާ ހިތުން.” މީކާއިލު އިތުރުކޮށްލިއެވެ.

އެއްވެސް ވާހަކައެއް ނުދައްކާ ހުރިހާ އެންމެންވެސް ކެއުމައިގެން ކުރިއަށް ދިޔައެވެ. ދޭތެރެ ދޭތެރެއިން ޔުންއާއި މީކާއިލު އެކަކު އަނެކަކަށް ނަޒަރު ހިންގާލައެވެ. ނަމަވެސް އެކަކު ބަލައިލާ އިރަށް އިސްދަށަށް ޖަހައެވެ. ނުވަތަ އެހެން ފަރާތަކަށް ބަލައިލައެވެ.

~~~~~

ރޭގަނޑު ދަންވިހެން ޔުން ނިދަން ތައްޔާރުވުމަށް ކޮޓަރި ތައްޔާރު ކުރަން ދިޔައެވެ. ސީމާވެސް ޔުންއަށް ލުއިކޮށްދޭން ފަލަނގު ފޭލި އަޅަން އުޅުނެވެ. “ޔުން؟ ބޮޑުދައިތަ ދެން މި ދަނީ އޮށޯންނަން! އެހާ ގިނައިރު ވަންދެން ސާފުކުރުމުގައި ނޫޅެއްޗޭ!” ސީމާ ބަނާތު އަޅާ، އޭގައިވާ ރޫތައް ފިލުވަމުން ބުންޏެވެ.

“ލައްބަ. އިރުކޮޅަކުން ނިމޭނެ. އަހަރެންވެސް މި ދަނީއޭ!” ޔުން ރީތިވާ މޭޒު ފޮޅުމައިގެން ކުރިއަށް ދިޔައެވެ.

“މީކާއިލު؟ އިހަށް ބޭރުގައި މަޑުކޮށްލާ! އަދި ސަފެއް ނުވޭ. އަވަހަށް ނިދައްޗޭ!” ސީމާ ކޮޓަރީެ ދޮރުން ނުކުންނަމުން ބުންޏެވެ.

“ލައްބަ. އަވަހަށް ނިދާނަމޭ.” މީކާއިލު ބުނަމުން ކޮޓަރީގެ ރީތިވާ މޭޒު ކައިރީ ހުރި ޔުން ގާތަށް ދިޔައެވެ. “މިއީ ކަލޭގެ ކޮޓަރި؟”މީކާއިލު ޖީބަށް އަތް ޖަހާލައިގެންހުރެ، ވާތުން ދާގީ ދަމަމުން ވަނެވެ.

“ލަ..ލައްބަ، ކަލޭ މިރޭ ނިދާނީ މި ކޮޓަރީގައި. އަހަރެން މިދަނީ ބޮޑުދައިތަ ކޮޓަރިއަށް ނިދަން.” ޔުން ސިހިގެންފައި ބުންޏެވެ. “މާފު ކުރޭ މި ކޮޓަރި އެހާ އަރާމު ނުވީތީ. ދެން މާދަން އަންނާނަން.” ޔުން މީކާއިލު ހުރި ދިމާއަށް އެނބުރިފައި ބުންޏެވެ. އޭރު މީކާއިލު އޭނާގެ ދާގީ ގެނެސް ރޭގަނޑަށް ބޭނުންވާނޭ ތަކެތި ނަގަނީއެވެ.

“އެއީ މައްސަލައެއް ނޫނޭ….” މީކާއިލު ދާގީ ފޮށީގެ ޒިބަށް ދަމާލަމުން ބުންޏެވެ.

“އެ ކީއްވެ އަންނަ ވާހަކަ ކުރިޔާލައި ނުބުނީ؟” ޔުން އަދިވެސް ސުވާލު ކުރަނީ މީކާއިލު އަވަހަށް އައި ސަބަބެއް ނޭނގިގެންނެވެ. “އަވަހަށް އަންނަ ވާހަކަ ބުނިނަމަ، އަހަރެން ކަލެއަށް ރަނގަޅު ފެންވަރުގެ ކޮޓަރިއެއް ތައްޔާރު ކޮށްދިނީމުސް.” ޔުން މީކާއިލުގެ ލޮލާ ދިމާއަށް ނަޒަރު ހިންގަމުން ބުންޏެވެ. މީކާއިލު ދާގީ ފޮށި ބޭއްވުމަށްފަހު، ޔުންއާ ދިމާއަށް އެނބުރުނެވެ.

“މާދަން އަހަރެންގެ އަނތްބަށްވާ މީހާ މަށަށް ުޅައިނުލީމާ އަހަރުން އަންނާނެ ދޯ!” މީކާއިލު ޔުންގެ ލޮލަށް ވެއްޓިފައިވާ އިސްތަށިކޮޅު ނަގައި ކަންފަތުގެ ފަހަތަށް ލައްވައިލިއެވެ. “ނުގުޅީމައި މި ތަނަށް އައިސްނުލާ ކޮންތާކަށް މަ ދާންވީ ވަކި؟” މީކާއިލު ޔުންގެ ފަނޑުކޮށް ރަތްވެފައިވާ މޫނަށް ބަލަމުން ބުންޏެވެ.

“ދެން އައީތީވެ ޝުކުރު…” ޔުން އަދިވެސް ހުރީ ހުއްޓުން އަރާފައެވެ. މީކާއިލުގެ ހަރަކާތްތަކަށް އަދި އޭނާއަށް ފަރިތައެއް ނުވެވެއެވެ. އެ ވިސްނުމުގައި ހުއްޓާ ކުއްލިއަކަށް މީކާއިލު ޔުންގެ ނިތްކުރިއަށް ބޮސްދިނެވެ.

“ބާއްޖަވެރި ރޭގަނޑަކަށް އެދެން އަހަރެންގެ އެންމެ ލޯބިވާ…” މީކާއިލު ޔުންއާ ދުރުވަމުން ބުންޏެވެ. ދެން އިތުރަށް އެންމެ ވަގުތެއްވެސް ހޭދަނުކޮށް އަވަސްވެފައިވާ ހިތަކާއެކު، ޔުން އެ ކޮޓަރިން ބޭރަށް ދިޔައެވެ. ބޮޑުދައިތަގެ ކޮޓަރިއަށްވަދެ، ބަނާތު އަޅައި ހަމަޖެހެވޭތޯ ބެލިއެވެ. ނަމަވެސް އޭނާ ލޮލަށް ނިދިއައީ އޭގެ އެތައް އިރެއް ފަހުންނެވެ.

މާހައުލުގައި ވަނީ ހާސްކަމާއި، އުފާވެރިކަމެވެ. ދެރަވުމާއި، ހިތްހަމަޖެހުމެވެ. ދޫނިގެ ހިތްގައިމު ގޮވެލިން މުޅި މާހައުލު އެއްއަޑުކޮށްފައިވާ ފަދައެވެ. މޭޒުތައް ރީތި ހުދު ފަރުމާއަކަށް ބަދަލު ކުރެވިފައިވެއެވެ. ހުދު ފޮތިތަކުން މުޅި މާހައުލުވަނީ ޗާލުކޮށްފައެވެ. ހުދުކުލައިގެ ފިނިފެންމާތައް މޭޒުގެ މެދުގައިވާ ކުޑަ ގުޅިއަށް ޖަހާފައިވާއިރު، ގަސްތަކުގެ އޮފިތަކުގައި ބޮކިފަތިވެސް އެލުވާފައިވެއެވެ.

“މިއަދު މީ ކަލޭ ކައިވެނި ކުރާ ދުވަސް… ކީއްވެ މަ ގާތު މި ވާހަކަ ކުރިން ނުބުނީ؟ އަދި ރޭގަވެސް ދަންވި ފަހުންނޭ ގުޅާފައި އެވާހަކަ ބުނީ.” މަހުލޫފް މީކާއިލު ތައްޔާރުވާން ހުރި ކޮޓަރީގައި ބެހެއްޓިފައިވާ ސޯފާގައި އިށީންދެގެން އިނދެ ބުންޏެވެ.

“ކަލޭ މިތަނަށް އައުމަކީ، އެކަން ސާބިތުވާނެ ސަބަބެއް.” މީކާއިލު ގިރުވާން ދޮށުގައި އަޅުވަމުން ދިޔަ ކޮކާ ޓައީ ރަނގަޅު ކުރަމުން ބުންޏެވެ.

“އަހަރެން ހިއެއް ނުކުރަން ކަލޭ އެހާ އަވަހަށް އަނތްބެއް ހޯދާނެކަމަކަށް… އަދި މާ ދުވަހެއްވެސް ނުވޭ ކަލޭގެ މަންމަ ދެވަން އުޅުނު އަންހެން ކުއްޖާއަށް ނޫނެކޭ ބުނިފަހުން. ދެން ކަލޭ ތި އިންނަނީ ކޮން އަންހެނަކާ؟” މީކާއިލުގެ އެންމެ ގާތް ރައްޓެހި މަހުލޫފު ސުވާލު ކުރިއެވެ.

“އެއީ ހަމަގައިމުވެސް ‘ބުލައިންޑު ޑޭޓު’ން ދިމާވި އަންހެނާއެއް ނޫން.” މީކާއިލު މަހުލޫފުއާ ދިމާއަށް އެނބުރެމުން ބުންޏެވެ.

“އޭނ؟ ދެން ކާކު؟” މަހުލޫފު ސުވާލުވެރި މޫނެއް ހެދިއެވެ. އޭނާއަށް ގަބޫލު ނުކުރެވިގެން އުޅުނީ މީކާއިލުގެ ލޯބީގެ ހަޔާތް އެހާ އަވަހަށް ބަދަލުވިކަމެވެ.

މީކާއިލު ޔުން ތައްޔާރުވާން އުޅުނު ކޮޓަރީގައި ޓަކި ދިނެވެ.

“ދާރިސް މީކާއިލް! އަދި ޔުންއަށް ފުރިހަމައަށް ތައްޔާރެއް ނުވެވޭ.” އީނާ ދޮރުން ބޯ ދިއްކޮށްލުމަށްފަހު ބުންޏެވެ.

“މި އަންނަނީ ޔުންއާ ދެތިން ބަހެއް ބުނެލާފައި.” މީކާއިލު ގަދަކަމުން ދޮރު ހުޅުވާލާފައި ވަނެވެ. “ޔޫން…” މީކާއިލުއަށް ހުއްޓުން އެރީ އޭނާގެ ކުރމަތިން ފެނުނު މަންޒަރުންނެވެ. ކައިވެނި ކުރާ ހެދުމުގައި ހުރި ޔުން ފެނުމުން މީކާއިލުގެ ދެ ލޯ ބޮޑުވެގެން ދިޔައެވެ. އެންމެ ފަހުން އޭނާގެ ކޯތާފަތްމަތި ފަނޑު ރަތްކުލައެއް އަރަން ފެށިއެވެ. އަދިވެސް އިސްތަށިގަނޑުގައި އެއްޗެއް އަޅުވަން އުޅުނު ޔުން އާނއެކޭ ބުނަމުން ފަހަތަށް ބަލައިލިއެވެ. އޭރު މީކާއިލުގެ ހިތް ތެޅެމުން ދިޔައެވެ. ދެ މީހުންވެސް ތިބީ ފުދޭވަރަކަށް ހިތްތެޅިލަ ތެޅިލައެވެ.

“ޔުން. މިއީ އަހަރެންގެ އެންމެ ގާތް ރަހުމަތްތެރިޔާ، އަދި ވިޔަފާރީގައިވެސް ބައިވެރިޔާ، މަހުލޫފް. މިއަދު ކައިވެނި ހަފުލާ ހިންގާނީ މަހުލޫފް.” މީކާއިލު ހަމައަކަށް އެޅެމުން ބުންޏެވެ.

“އުފާވެއްޖެ ބައްދަލުވީތީ. އަހަންނަކީ އައިޝަތު ޔުން… ކައިވެނި ހަފުލާ ހިންގަން އެއްބަސްވީތީ ވަރަށް ބޮޑަށް ޝުކުރު އަދާކުރަން.” ޔުން ވަރަށް އަދަބުވެރިކަމާއެކު ބުންޏެވެ.

“ދެން މިއީ ޔުންގެ އެންމެ ގާތް އެކުވެރިޔާ، އީނާ.” އީނާ މަހުލޫފުއާ ދިމާއަށް ބަލައިލަމުން ހިނިތުންވިއެވެ.

‘އަހަރުންވެސް އުފާކުރަން އެންމެންނާ ބައްދަލުވީތީ. އަދި ހާއްސަކޮށް ޔުން.’ މަހުލޫފު ހިތާހިތުން ކިޔާލިއެވެ.

“އަހަރުން ކުރިންވެސް ބުނިފަދައިން މި ކައިވެންޏަކީ ސިއްރެއް. އެހެން އެއްވެސް މީހަކަށް އަހަރެމެންގެ ގުޅުން ކިޔައިދީގެން ނުވާނެ!” މީކާއިލު މަހުލޫފުގެ ކޮންޑުގައި އަތް ބާއްވާލަމުން ބުންޏެވެ.

“މައްސަލައެއް ނެތް!” ވަގުތުން މަހުލޫފު ބޮޑުމައި އިނގިލި ހިއްލާލަމުން ބުންޏެވެ. “އެހެންވިއްޔާ، ފަހުން ވާހަކަދައްކަން ހިނގާ، އިހަށް މިދަނީ ފަރިތަކޮށްލުމަށް.” މަހުލޫފު ކޮޓަރިން ނުކުތުމަށް ދިޔައެވެ.

“އަހަރެންވެސް. ސީމައްތަ އަހަރެންގެ އެހީއަށް އެދުނު ކުރިން.” އީނާވެސް ނުކުންނަން ދިޔައެވެ. “ހަމަޖެހޭ. ހާސްނުވާތި! ހަނދާންކުރާތި އަބަދުވެސް ހިނިތުންވާން!” އީނާ އެހެން ކިޔައި ނަސޭހަތް ކިޔަމުން ކޮޓަރިން ނުކުތެވެ.

“އަހަރެމެންގެ މޫނުން ހާސްކަން އެބަ ފެނޭތަ؟” ޔުން މީކާއިލުއާ ސުވާލުކޮށްލިއެވެ.

“އަހަރެން ނުވޭ…. އެކަމު ކަލޭ ވޭތަ؟” މީކާއިލު ޔުންގެ މޫނަށް ބަލަމުން ބުންޏެވެ.

“ހާސްވާނެއްނު! އަހަރެމެންގެ މި ތަމުސީލުގަނޑު އެހެން މީހުންނަށް ފަޅާ އަރާފާނެވިއްޔަ…” ޔުން ކުޑަކޮށް ހިތް ބިރުގެންފައިވާ ހާލު ބުންޏެވެ.

“އެހެންވެ ދޯ ބައެއް މީހުން ކައިވެނި ކުރާ ދުވަހު މޮޔަވަނީ… ނުވަތަ ފިލަނީ…. މިއީ ދޯ އަސްލު އެ މީހުން ކުރާހާ އިހުސާސްތައް.” ޔުން ހާސްވަމުން ދިޔައެވެ. އޭނާއަށް މި ކުރެވޭ ކަމުގެ ބޮޑުމިން ވިސްނަމުން ދިޔައެވެ.

އިސާހިތަކު މީކާއިލު ޔުންގެ މޫނާއި ގާތްވިއެވެ. “އަހަރެމެން ބޮސް ދޭން ފަރިތަކުރަންވީތަ؟ އެހެންވިއްޔާ ކަލޭގެ މޫނު އަނެއްކާ ‘މޭކަޕު’ ކުރަން ޖެހިދާނެ.” މީކާއިލު ޔުންގެ ތުންފަތާ ގާތްވަމުން ބުންޏެވެ.

“މަޑުން ހުރޭ!! ކަލޭ ތިނޫން އެއްޗެއް ވިސްނަބަލަ! އަބަދު ބޮސްދިނުން.” ޔުން އައިސް ބާރުގައި މީކާއިލު ފަހަތަށް ކޮށްޕާލަން އުޅުނެވެ. ނަމަވެސް ވަގުތުން މީކާއިލު ޔުންގެ އަތުގައި ހިފެހެއްޓިއެވެ.

“ކޮބާ! މިހާރު އެ ހާސްކަން ފިލައި ދިޔައީނު؟” މީކާއިލު ދޮރާ ދިމާއަށް އެނބުރި ހިނގައިގަންނަމުން ބުންޏެވެ. ޔުންއަށް އެއްޗެކޭ ނުބުނެވި ދެންމެ ވީކަންތައްތަކާ ވިސްނަން ހުއްޓެވެ.

ކައިވެނި ކުރާ ބޮޑު ހަރުގޭގައި ހުރިހާ އެންމެން އަޑުމަޑުކޮށްގެން ތިބީ ކައިވެނިވެވޭ އަންހެނާ ގެންނަންދެނެވެ. ޖަމީލު އަތުގައި ހިފައިގެން ޔުން ހިނގާލާފައި އައެވެ. އަޅާފައިވާ ރަތް ދޫލަ މަތިން ބޮޑު މާބޮނޑިއެއް ހިފައިގެން އައެވެ. މީކާއިލުއާ ގާތްވީ ވަރަކަސް ޔުންގެ ހިތް އޮބިނޯންނަވަރަށް ތެޅެމުން ދިޔައެވެ. މީކާއިލު ނިކަން ފަރިތަކަމާއެކު ޔުންގެ އަތުގައި ހިފިއެވެ. އޭރު ޖަމީލުވެސް ދެ ކުދިންގެ ދެމެދުގައި ހުއްޓެވެ. ހިނިތުންވެވިފައެވެ. އެ ދުވަސް ދެކެން ބޭނުންވެފައި ހުންނަތާ އެހާވެސް ދުވަސް ވެއްޖެއެވެ.

ދެ މީހުންވެސް އަނގޮޓި ބަދަލު ކުރިއެވެ. ޔުންގެ ކަނާތު ކަށި އިނގިލީގައި އަނގޮޓި ލައްވާލުމަށްފަހު މީކާއިލު ޔުންގެ މޫނަށް ބަލައިލިއެވެ. އޭރު މީކާއިލުގެ އާއިލާ އެކުހެން ހިތްހަމަޖެހިފައި ފުރިހަމައޭ ކިޔަމުން ދިޔައެވެ. ހުވާތަކާއި ވައުދުތައް ލައިދެމުން ދިޔައެވެ.

“ކައިވެނި ކުރުމަށް ވެވުނު ވައުދުތަކާއި، ހުވާތައް އެކުލަވާލުމަށް، ބޮސްދީ.” މަހހުލޫފު މައިކުން ކިޔަމުން ދިޔައެވެ.

“މިއީ އަހަރެމެން ފަރިތަކުރިކަންތައް ދައްކާލާ ވަގުތު. ކުޑަކޮށް ހިނިތުންވޭ!” މަޑުމަޑުން މީކާއިލު ޔުންއާ ދިމާއަށް ބުންޏެވެ.

“އޫނ. މިހާ ގިނި މީހުން ކުރިމަތީގައި ފަރިތައެއް ނުކުރަމެންނު؟” ޔުންގެ އަޑު ދިޔައީ ރާރާ އަޅައިގެންނެވެ.

“ލޯ މަރާލާ!” މީކާއިލު ޔުންގެ މޫނާ ގާތްވަމުން ބުންޏެވެ. މީކާއިލުގެ ދެ ތުންފަތް ޔުންގެ ދެ ތުންފަތާއި ބައްދަލުވިހެން ކައިވެނި ހަފުލާގައި ބައިވެރިވި އެންމެން ވަރަށް ހޫނު އަތްތިލަބަޑިއެއް ޖަހާލިއެވެ. ޔުންގެ މޫނު ރަތްވެގެން ދިޔައިރުވެސް މީކާއިލު ދޫނުކޮށް ހުއްޓެވެ.

(ނުނިމޭ)