އެއްފަރާތް

ނޯޓް : މި ވާހަކައިގައިވާ ހާދިސާތަކާއި، ވާގޮތާއި، އެއްވެސް ކަމެއް އެއްވެސް ފަރާތަކާއި ގުޅުމެއްވާކަމަށް ދޭހަ ކުރެވޭނަމަ އެއީ އިއްތިފާގެކެވެ. މިއީ މުޅިން ހިޔާލީ ވާހަކައެކެވެ.

މާލޭގެ އެންމެ ބާރުބޮޑު އެއް ސަރަޙައްދުގައި ހުރި ފަސްބުރީގެ ޒަމާނީ އިމާރާތުގެ އެންމެ މަތީ ފަންގިފިލާއިން ފެންނަނީ މުއްސަނދިކަމާއި ޝާހީ ދިރިއުޅުމެއްގެ ފުރިހަމަ ތަސްވީރެވެ. އަގުބޮޑު އިޓަލީ ފަރުނީޗަރާއި، ބޭރު ޤައުމުތަކުން ގެނެސްފައިވާ ޒީނަތްތެރި ކްރިސްޓަލް ބޮކިތަކުން މުޅި ގެ ވަނީ ޖަރީކުރެވިފައެވެ. އެއީ ރައްޔިތުންގެ މަޖިލީހުގެ ނުފޫޒުގަދަ މެންބަރު އަފްރާޙުގެ ގެއެވެ. ނަމަވެސް، އެ ގޭގެ ޗާލޫ ފާރުތަކުގެ އެތެރޭގައި ވަނީ ހަޤީޤީ ހަމަޖެހުމެއް އަދި އުފާވެރިކަމެއް ނެތް ފަޅު ދިރިއުޅުމެކެވެ.

އަފްރާޙު ސިޔާސީ ވާދަވެރިކަމާއި ބޮޑެތި ވިޔަފާރީގެ ކަންކަމުގައި ދުވާލާއި ރޭގަނޑު ހޭދަކުރައްވަމުން ގެންދެވިއިރު، އަނބިކަނބަލުން ޒީނިޔާ އަވަދިނެތި އުޅުއްވީ މަތީ ފަންތީގެ ސެލޫންތަކާއި، ޕާޓީތަކާއި، އިޖުތިމާޢީ ކުލަގަދަ ޙަފްލާތަކުގައެވެ. މި ދެމަފިރިންގެ ދެމެދުގައި ޒަމާނުއްސުރެ އޮންނަ ފިނި ހަނގުރާމައާއި އަރާރުމުގެ ސަބަބުން، ގޭތެރޭގައި އޮންނަނީ ބީރައްޓެހި މާޙައުލެކެވެ. މި ދެމަފިރިންގެ ހުރި ހަމައެކަނި ދަރިފުޅަކީ އުމުރުން ވިހި އަހަރުގެ ލަމްޝާއެވެ. ލަމްޝާ ބޮޑުވަމުން އައީ ބޭނުންވި ކޮންމެ އެއްޗެއް ފައިސާއިން ހޯދައިދެވުނު، އެއްވެސް މަނާކުރުމެއް ނެތް މާޙައުލެއްގައެވެ. ނަމަވެސް، އޭނާއަށް ގެއްލިފައިވަނީ ދީނީ ރިވެތި ތަރުބިއްޔަތާއި މައިންބަފައިންގެ ހަޤީޤީ ކުލުނެވެ. މީގެ ނަތީޖާއެއްގެ ގޮތުން ލަމްޝާ ވެގެންދިޔައީ ހުޅަނގުގެ މިނިވަން ދިރިއުޅުމަށް ލޯބިކުރާ، އިސްލާމީ ވާޖިބުތަކަށް ފަރުވާކުޑަ، އަދި ބޭރުފުށުގެ ވިދުމާއި ދަޅަތަކަށް މާބޮޑަށް ހެއްލޭ ޒުވާނަކަށެވެ.

ލަމްޝާގެ ޙަޔާތަށް އެންމެ ފުރަތަމަ އައީ މުޢާޒެވެ. މުޢާޒަކީ އަފްރާޙުގެ ވަރަށް ގާތް ރަޙްމަތްތެރިއެއްގެ ދަރިއެކެވެ. އިސްލާމީ ރިވެތި އަޚްލާޤުން ޒީނަތްތެރިވެފައިވާ، ޔުނިވަރސިޓީ ތަޢުލީމު ނިންމައި، އަމިއްލަ މަސައްކަތުން ކާމިޔާބު އައިޓީ ކުންފުންޏެއް ހިންގަމުން އައި ހީވާގި، ޚުލްޤުހެޔޮ ޒުވާނެކެވެ. މުޢާޒު އަފްރާޙުގެ ގެއަށް އައިސް އުޅުމުގެ ތެރޭގައި ލަމްޝާ ދެކެ ލޯބިވެވުނެވެ. އަދި އޭނާ ލަމްޝާއަށް ކައިވެނި ހުށަހެޅީ ވަރަށް މާތް މަޤްޞަދެއްގައެވެ. ލަމްޝާއަށް ތެދުމަގު ދައްކައި، ދެދުނިޔޭގެ ބާއްޖަވެރިކަން ހޯދައިދިނުމުގެ އިޚްލާޞްތެރި ނިޔަތުގައެވެ.

ނަމަވެސް، މުޢާޒުގެ އެ ހުށަހެޅުން ލަމްޝާއަށް ވީ ބޮޑު ޖޯކަކަށެވެ. މުޢާޒުގެ ތުނބުޅިއާއި، އޭނާ ދައްކާ ދީނީ އަދި އަޚްލާޤީ ވާހަކަތަކަށް ލަމްޝާ މަލާމާތްކުރިއެވެ. “ތިހާ ދީންވެރި، ބޯދާ ވިސްނުމުގެ މީހަކާއެކު އަހަރެންގެ މިނިވަންކަން ޤުރުބާނެއް ނުކުރެވޭނެ. އަހަރެން ބޭނުމީ ޒަމާނާ އެއްވަރަށް ދުނިޔެ ބަލަން، މިނިވަންކަމާއެކު އުދުހެން،” ލަމްޝާ ވަރަށް ހަރުކަށިކޮށް ބުންޏެވެ. އަދި އޭނާގެ ހިތުގައި މުޢާޒަށް އެއްވެސް ޤަދަރެއް ނުދީ، މުޢާޒުގެ އިޙްސާސްތައް އެއްފަރާތް ކޮށްލިއެވެ.

އޭގެ ދުވަސްކޮޅެއް ފަހުން، މާލޭގެ މަޝްހޫރު އަގުބޮޑު ކެފޭއަކުން ލަމްޝާއަށް ޝާހީންއާ ދިމާވިއެވެ. ޝާހީންއަކީ އަގުބޮޑު ސްޕޯޓްސް ކާރުތައް ދުއްވާ، ބްރޭންޑެޑް ހެދުންތައް އަޅައިގެން، ޕާޓީތަކުގައި ވިދާލައިގެން އުޅޭ ޒުވާނެކެވެ. އޭނާގެ ދުލުގެ ފޮނިކަމާއި، މުއްސަނދިކަން ދައްކައިގެން ޖެހި ދަލުގައި ލަމްޝާ ވަރަށް ފަސޭހައިން ބެދުނެވެ. ޝާހީން ލަމްޝާއަށް ކައިވެނި ހުށަހެޅިއެވެ. އަފްރާޙު، ޝާހީންގެ އަޚްލާޤާއި އުޅުމާމެދު ސުވާލު އުފައްދައި، މި ކައިވެންޏާ ދެކޮޅު ހެދިއެވެ. ނަމަވެސް، ލަމްޝާ އޭނާގެ އަމިއްލަ ގޮތްދޫނުކުރުމުގައި ހިފަހައްޓައި، ކައިވެނި ނުކޮށްދީފިނަމަ އަމިއްލައަށް މަރުވާނެ ކަމުގެ ބިރުދެއްކިއެވެ. އެންމެފަހުން، ދަރިފުޅުގެ ހިތްހަމަޖެއްސުމަށްޓަކައި މައިންބަފައިންނަށް މަޖުބޫރުވީ އެ ކައިވެންޏަށް ރުހޭށެވެ.

ކައިވެނީގެ ކުރީކޮޅު ވަރަށް ކުލަގަދަކޮށް، ރާއްޖެއިން ބޭރުގެ އަގުބޮޑު ރިސޯޓުތަކުގައި ޗުއްޓީ ހޭދަކުރުމުގައި ދިޔަ ނަމަވެސް، މާ ގިނަ ދުވަހެއް ނުވެ ކަންކަން އެފުށްމިފުށަށް ޖެހެން ފެށިއެވެ. ޝާހީންގެ ޙަޤީޤީ ސޫރަ ފެންނަން ފެށީ ލަމްޝާގެ އެކައުންޓުތަކުންނާއި، އަފްރާޙުގެ ނުފޫޒު ބޭނުންކޮށްގެން ބޮޑެތި ޢަދަދުތަކުން ފައިސާ ނަގަން ފެށި ހިސާބުންނެވެ. ޝާހީންއަކީ މަސްތުވާތަކެއްޗާއި، ރޭގަނޑުގެ ކުލަގަދަ ޕާޓީތަކާއި، އޮންލައިން ޖުވާގެ ވަބާގައި ޖެހިފައިވާ މީހެކެވެ. އޭނާ ކުރިން ދެއްކި މުއްސަނދިކަމަކީ ހުސް ދަރަންޏެވެ.

ގޭތެރޭގެ ޙާލަތު ދުވަހެއް ދުވަހަކަށް ގޯސްވަމުން ދިޔައެވެ. ޝާހީން ރޭގަނޑު ދަންވަރު މަސްތުގެ ޙާލަތުގައި ގެއަށް އައިސް، ލަމްޝާއަށް ބަސްމަގުންނާއި ޖިސްމާނީ ގޮތުން އަނިޔާކުރަން ފެށިއެވެ. ލަމްޝާ ކަރުނައަޅައި، ޝަކުވާކުރަން ފެށުމުން، ޝާހީންގެ އަނިޔާވެރިކަން ދިޔައީ އިތުރުވަމުންނެވެ. އެއްރެޔަކު ޝާހީން ގެއަށް އައީ އިތުރު ފައިސާ ހޯދުމަށެވެ. ލަމްޝާ ފައިސާ ދޭން ދެކޮޅު ހެދުމުން، އޭނާ ލަމްޝާގެ ގައިގައި ތަޅައި އަނިޔާކޮށް، ގޭގައި ހުރި ހުރިހާ ރަން ގަހަނާތަކާއި ކްރެޑިޓް ކާޑުތައް ފޭރިގަތެވެ. އަދި އޭގެ އަނެއް ދުވަހު އިވުނީ، ޝާހީން އެހެން އަންހެނަކާއެކު ގިނަ ޢަދަދެއްގެ ފައިސާ ހިފައިގެން ޤައުމުން ފިލައިގެން ދިޔަ ޚަބަރެވެ. އޭނާ ދިޔައީ ލަމްޝާގެ ނަމުގައި އެތައް މިލިއަން ރުފިޔާއެއްގެ ދަރަނި ލިޔެ ބަހައްޓާފައެވެ.

މި ހިތްދަތި ހާދިސާއިން ލަމްޝާގެ މުޅި ދިރިއުޅުން އަނދަވަޅަކަށް ވެއްޓުނެވެ. އޭނާ ފުން ޑިޕްރެޝަނަކަށް ގޮސް، ކޮޓަރިން ނުނިކުމެ، ކެއުމާއި ބުއިމުން މަޙްރޫމްވެ، މުޅިން އިނދަޖެހުނެވެ. އަފްރާޙުގެ ސިޔާސީ ބާރަކަށްވެސް، މަންމަ ޒީނިޔާގެ މުއްސަނދިކަމަކަށްވެސް ލަމްޝާގެ ހިތް ކުދިކުދިވެފައިވާ މިންވަރަކަށް ޝިފާއެއް ނުދެވުނެވެ. މުޅި ގޭތެރެއަށް ވެރިވެފައިވަނީ ހިތާމައާއި މާޔޫސްކަމެވެ.
މި ނާޒުކު ދަނޑިވަޅުގައި، ލަމްޝާގެ ހާލަތު އިވިފައި މުޢާޒު އަނެއްކާވެސް އެ ގެއަށް ޒިޔާރަތްކުރިއެވެ. މުޢާޒު އައީ މާޒީ ހަނދާންކޮށްދީ މަލާމާތްކުރާކަށް ނޫނެވެ. އޭނާ އައީ އޯގާތެރިކަމާއި ރަޙުމުން ފުރިގެންވާ ހިތަކާއިގެންނެވެ. ލަމްޝާ ލަދުވެތިކަމާއެކު އިސްދަށަށް ޖަހައިގެން، ކަރުނަ އަޅަމުން ދިޔަ ވަގުތު، މުޢާޒު ވަރަށް މަޑުމައިތިރިކަމާއެކު ވާހަކަދެއްކިއެވެ.
“ލަމްޝާ، އިންސާނުންނަށް ކުށް ކުރެވޭނެ. ދުނިޔޭގެ ކެހިވެރިކަމުގައި ޖެހުމަކީ އެންމެންނަށްވެސް ވެދާނެ ކަމެއް. އެކަމަކު ހަނދާންކުރާތި، ﷲ ގެ ރަޙްމަތް ހުރިހާ ކަމަކަށްވުރެ ތަނަވަސް. ދުނިޔޭގެ ހުރިހާ ދޮރެއް ބަންދުވިޔަސް، އިސްތިޣްފާރާއި ތައުބާގެ ދޮރު އަބަދުވެސް ހުންނާނީ ހުޅުވިފައި” މުޢާޒު ހިތްވަރު ދިނެވެ.

މުޢާޒުގެ އިޚްލާޞްތެރި، އޯގާތެރި ބަސްތަކުން ލަމްޝާގެ ހިތުގައި ނިވިފައިވާ އުންމީދުގެ ހުޅުކޮޅު އަލުން ރޯވިއެވެ. މުޢާޒު ލަމްޝާއަށް ދީނީ ފޮތްތަކާއި، ކީރިތި ޤުރްއާނުގެ ތަރުޖަމާ ގެނެސްދީ، ނަމާދުގެ އަރާމާއި ހިތްހަމަޖެހުން ހޯދާނެ ގޮތް ކިޔައިދިނެވެ. ލަމްޝާ ރޭގަނޑުގެ ފަހުބައިގައި ތެދުވެ ދަމުނަމާދުކޮށް، ކަރުނައަޅައި ތައުބާވާން ފެށިއެވެ. ﷲ ގެ ކަލާމްފުޅު ކިޔަވަން ފެށުމުން، އޭނާގެ ހިތުގައި ކުރިން އޮތް ހުރިހާ ނުތަނަވަސްކަމަކާއި ބިރުވެރިކަމެއް ފިލައިގޮސް، ބަޔާންކުރަން ނޭނގޭ ފަދަ އަމާންކަމެއް ވެރިވިއެވެ.
ލަމްޝާގެ ދިރިއުޅުމަށް އައި ބޮޑު ބަދަލު ފެނި، އަފްރާޙާއި ޒީނިޔާވެސް ހައިރާންވެ އަންތަރީސްވިއެވެ. ލަމްޝާ އޭނާގެ ކުރީގެ ޒަމާނީ، ކުރު ހެދުންތައް ދޫކޮށްލައި، ފުރިހަމައަށް އިސްލާމީ ޙިޖާބުން ޒީނަތްތެރިވިއެވެ. އޭނާގެ މޫނުމަތިން ކުރިން ފެންނަން ހުރި ފޮނިކަމާއި ބޮޑާކަމުގެ ބަދަލުގައި، މިހާރު ފެންނަނީ މަޑުމައިތިރިކަމާއި، ތަޤްވާވެރިކަމާއި، ޙަޤީޤީ ރީތިކަމެވެ. މުޢާޒުގެ މިންނަތް މަސައްކަތުން، ޝާހީން ދޫކޮށްފައި ދިޔަ ޤާނޫނީ މައްސަލަތަކާއި ދަރަނީގެ ކަންކަންވެސް ހައްލުކޮށް، ލަމްޝާ އެ ބުރައިން ސަލާމަތްކޮށްދިނެވެ. އަދި ޝަރުޢީ ހަމަތަކުގެ މަތިން ޝާހީންގެ ކިބައިން ލަމްޝާ ވަރިކުރެވުނެވެ.

ލަމްޝާގެ ޢިއްދަ ހަމަވެ، އޭނާގެ ދިރިއުޅުން ފުރިހަމައަށް ހަމައަކަށް އެޅުމުން، މުޢާޒު އަނެއްކާވެސް އަފްރާޙުގެ އަރިހަށް ގޮސް، ލަމްޝާއާ ކައިވެނި ކުރުމުގެ ޝައުޤުވެރިކަން ވަރަށް އިޙްތިރާމާއެކު ފާޅުކުރިއެވެ. އަފްރާޙު އުފަލުން ގޮސް މުޢާޒުގެ ގައިގައި ބައްދައިގަތެވެ. އެއްވެސް އިރެއްގައި ދަރިފުޅަށްޓަކައި ހެޔޮލަފާ ބައިވެރިއަކު ހޯދައިނުދެވުނު ކަމުގެ ހިތާމައިގައި ހުރި އަފްރާޙަށް މިއަދު ލިބުނީ ބަޔާންކުރަން ދަތި ހިތްހަމަޖެހުމެކެވެ.
މުޢާޒުގެ ހުށަހެޅުން ލަމްޝާއަށް އިވުމާއެކު، އޭނާގެ ލޮލުން ފޭބީ ޝުކުރުވެރިކަމުގެ ކަރުނައެވެ. މާޒީގައި އޭނާއަށް ކުރެވުނު ކުށްތަކަށް މަޢާފަށް އެދެމުން، ވަރަށް އުފަލާއެކު އެ ކައިވެންޏަށް އެއްބަސްވިއެވެ.

މުޢާޒާއި ލަމްޝާގެ ކައިވެނި ކުރެވުނީ ދީނީ އަދި އިޖުތިމާޢީ ރިވެތި އުޞޫލުތަކާ އެއްގޮތަށް، ވަރަށް ބަރަކާތްތެރި، އުފާވެރި މާޙައުލެއްގައެވެ. ކައިވެންޏަށްފަހު މުޢާޒު ލަމްޝާއަށް ހޯދައިދިނީ ލޯތްބާއި، އޯގާތެރިކަމާއި، އިޙްތިރާމުން ފުރިގެންވާ އާ ދިރިއުޅުމެކެވެ. އެ ގޭތެރޭގައި ޤާއިމުވެގެން ދިޔައީ ނަމާދާއި، ޒިކުރާއި، ޤުރްއާނުގެ އަޑެވެ.

މި ހެޔޮ ބަދަލުގެ ސަބަބުން އަފްރާޙުގެ މުޅި އާއިލާއަށްވެސް ހެޔޮ އަސަރުތަކެއް ކުރިއެވެ. އަފްރާޙު ސިޔާސީ ކަންކަމުގައި ދީނީ ހަމަތައް އިސްކުރަން ފެށިއިރު، މަންމަ ޒީނިޔާވެސް ބޭކާރު ޕާޓީތައް ދޫކޮށްލައި، ހެޔޮ ޢަމަލުތަކަށް މަގުދެއްކިއެވެ. އެއްޒަމާނެއްގައި “ބޯދާ” ކަމަށް ބުނެ އެއްފަރާތް ކޮށްލެވުނު އިޚްލާޞްތެރި ޒުވާނާ، މިއަދު ވެގެންދިޔައީ ލަމްޝާ އަނދަވަޅަކުން ސަލާމަތްކޮށް، އޭނާގެ ދުނިޔެއާއި އާޚިރަތް ބާއްޖަވެރިކޮށްދިން، ޙަޔާތުގެ އެންމެ އަގުބޮޑު ނިޢުމަތް ކަމުގައެވެ.

– ނިމުނީ –