ހިތުގެ ވިންދު 3

ލައިބްރަރީގެ ހިމޭންކަން މުގުރާލީ އިޝްޔާގެ މަލާމާތުގެ ހިނިގަނޑުންނެވެ. ކިޔާނާގެ އަތުގައި އޮތް ފޮޓޯގަނޑަށް ބަލަހައްޓައިގެން ހުރިއިރު، އޭނާގެ ދެލޮލުން ހޯސްލާފައި ކަރުނަ ފައިބަމުން ދިޔައެވެ. ދިހަ އަހަރު ކުރިން ގެއްލިފައިވާ ލޯބިވާ ބައްޕަގެ ހަނދާންތައް ކުއްލިއަކަށް އައިސް އޭނާގެ ސިކުނޑީގައި ބޮނޑިވެގަތެވެ.
“ބުނޭ އަމާރު! މި ފޮޓޯ… މި ފޮޓޯ އަމާރުގެ އަތަށް އެރީ ކިހިނެއް؟” ކިޔާނާގެ އަޑު ވަނީ ކުރަކިވެފައެވެ. އޭނާގެ މޭގަނޑު ފަޅައިގެން ހިނގައިދާނެހެން ހީވިއެވެ.
އަމާރު ހުރީ އިސްދަށަށް ޖަހައިގެންނެވެ. އޭނާއަށް ކިޔާނާގެ މޫނަށް ބަލާކަށް ނުކެރުނެވެ. “ކިޔާނާ… އަހަރެން… އަހަންނަށް ވަގުތުދީ. މިއީ ވަރަށް ދިގު ވާހަކައެއް…”
“އޯހް! ވަގުތުދޭށޭ؟” އިޝްޔާ ކުރިއަށް ޖެހިލަމުން މަލާމާތުގެ ރާގަކަށް ބުންޏެވެ. “ކިޔާނާ، އޭނަ ތި އުޅެނީ ކިޔާނާގެ ބައްޕަގެ މުދާގަނޑު…”
“އިޝްޔާ! ހަމަ މިހާރު ހުއްޓާލާ!” އަމާރުގެ އަޑު ލައިބްރަރީތެރޭގައި ގުގުމައިގެން ދިޔައެވެ. އޭނާގެ ދެލޯ ވަނީ ރުޅިން ގޮސް ރަތްވެފައެވެ. “މިތަނުން ދޭ!”
އިޝްޔާ ކުޑަކޮށް ސިހުނު ނަމަވެސް، ތުންފިއްތާލަމުން އެނބުރި ހިނގައްޖެއެވެ. އަމާރު އަނެއްކާވެސް ކިޔާނާއާ ދިމާއަށް އެނބުރުނެވެ. ނަމަވެސް އެވަގުތު ކިޔާނާ އޭނާގެ އަތުގައި އޮތް ފޮޓޯގަނޑު މެޔާލައި ބޮނޑިކޮށްލަމުން، ގިސްލަމުން ލައިބްރަރީން ބޭރަށް ދުއްވައިގަތެވެ. އަމާރު ކިޔާނާގެ ފަހަތުން ދާން ފިޔަވަޅެއް ކުރިއަށް އަޅާލިތަނާ، ކުއްލިއަކަށް މީހަކު އައިސް އޭނާގެ މޭގައި އަތްއަޅައި ކޮއްޕާލިއެވެ.
އެއީ **ޒުކަން** އެވެ.
“މަޑުކުރޭ އަމާރު. ކިޔާނާގެ ފަހަތުން ދާނެ ކަމެއް ނެތް،” ޒުކަންގެ އަޑުގައިވަނީ ހަރުކަށިކަމެވެ.
“ޒުކަން، މަގުން ދުރަށް ދޭ. އަހަރެން އޭނާއަށް ޙަޤީޤަތް ކިޔައިދޭން ޖެހޭނެ،” އަމާރު ހާސްކަމާއެކު ބުންޏެވެ.
“ކޮން ޙަޤީޤަތެއް؟ ކަލޭގެ އާއިލާއިން އޭނާގެ ބައްޕައަށް ހެދި ގޮތުގެ ޙަޤީޤަތްތަ؟ ނޫނީ ކަލޭ މިއަދު އޭނާއާ ތި ގާތްވަނީ ކަލޭގެ ބައްޕަގެ އަމުރަށް ކަންތަ؟” ޒުކަންގެ ބަސްތަކުން އަމާރުގެ ފިޔަވަޅުތައް ގަނޑުވިއެވެ. “އަމާރު… ކިޔާނާގެ ދިރިއުޅުން ހަލާކު ނުކުރޭ. ކަލެއަށް އޭނަދެކެ ލޯތްބެއް ނުވެވޭނެ.”
“އަހަރެން އައީ އޭނާ ރައްކާތެރިކުރާށޭ! އެކަމަކު… އެކަމަކު މިހާރު އަހަރެންގެ ހިތް…” އަމާރުއަށް ބުނެވުނީ އެހިސާބަށެވެ. ޒުކަންގެ ދެލޮލުން ފެނުނީ އިންތިހާ ދަރަޖައިގެ ހަސަދަވެރިކަމެވެ.
އެވަގުތު ކޮލެޖުގެ ކޯޓްޔާޑް ތެރޭގައި ހުރި **ޒައިނަބް** އަށް ކިޔާނާ ރޮމުން ދުވެފައި ދިޔަ މަންޒަރު ފެނުނެވެ. ޒައިނަބް ކަންބޮޑުވެފައި “ކިޔާ!” އޭ ކިޔައި ގޮވާލަމުން އޭނާގެ ފަހަތުން ދުއްވައިގަތެވެ. ކަންދިމާކުރި ގޮތުން ކަނަކުން އެނބުރުނު ވަގުތު، ޒައިނަބް ގޮސް ޖެހުނީ މީހެއްގެ ގައިގައެވެ. ކައްސާލައިގެން ވެއްޓެން ދިޔަ ޒައިނަބްގެ އުނަގަނޑުގައި ހިފަހައްޓައިލީ **ޒައިން** އެވެ.
ދެމީހުންގެ ހަތަރުކަޅި ބައްދަލުވެގެން ދިޔައެވެ. ޒައިންގެ ފުން ދެލޮލަށް ބަލަހައްޓައިގެން ހިނދުކޮޅަކަށް ޒައިނަބްއަށް އޮވެވުނެވެ. ނަމަވެސް ކުއްލިއަކަށް ހޭވެރިކަންވެ، އަވަހަށް ތެދުވެ ހެދުން ރަނގަޅުކޮށްލިއެވެ.
“ބަލައިގެން އުޅެބަލަ،” ޒައިން ލުއި ހިނިތުންވުމަކާއެކު ބުންޏެވެ.
“ސޮރީ… އެކަމަކު ކިޔާނާ… އޭނަ ވަރަށް ބޮޑަށް ރޮމުން އެ ދިޔައީ. އަނެއްކާ ޒައިންގެ ކޮއްކޮ އޭނާއަށް ކަމެއް ކުރީތަ؟” ޒައިނަބް ޝައްކުގެ ނަޒަރަކުން ޒައިންއަށް ބަލާލިއެވެ. ޒައިންގެ މޫނުމަތީގެ ކުލަވަރު ބަދަލުވިއެވެ. އިޝްޔާ އަނެއްކާވެސް ގޯހެއް ހެދީކަން އޭނާއަށް ޔަޤީންވިއެވެ.
ކިޔާނާ ގެއަށް ވަދެ ދޮރު ތަޅުލިއެވެ. އޭނާގެ މަންމަ ގޭގައި ނޫޅޭ ވަގުތެއް ކަމުން މުޅި ގޭތެރޭގައި ވަނީ ހިމޭންކަމެވެ. ކިޔާނާ ގޮސް ކޮޓަރީގެ އެނދުމައްޗަށް ވެއްޓިގަނެ ބާރަށް ރޯން ފެށިއެވެ. އަމާރު ފެނުމުން އޭނާގެ ހިތުގައި އުފެދުނު ރީތި ވިންދު، މިހާރު ވަނީ އޭނާގެ މުޅި ނަފްސު ޒަޚަމްކުރާ ކަނޑިއަކަށް ބަދަލުވެފައެވެ.
ގިނައިރުތަކެއް ވަންދެން ރުއިމަށްފަހު، ކިޔާނާ ތެދުވެ ކަބަޑުގެ އެންމެ ތިރީ ވަތްގަނޑު ހުޅުވާލިއެވެ. އެތަނުގައި އޮތީ އޭނާގެ ބައްޕަގެ އެންމެ ފަހުގެ ހަނދާންތައް ރައްކާކޮށްފައިވާ ދަގަނޑު ފޮށްޓެކެވެ. ކިޔާނާ ތުރުތުރުއަޅާ އަތަކުން އެ ފޮށި ހުޅުވާލިއެވެ. އޭގެ ތެރޭގައި ހުރި ބައްޕަގެ އަތުލިޔުމުގެ ފޮތްތަކާއި، ބައެއް ލިޔެކިޔުންތައް ހާވަން ފެށިއެވެ. އަމާރުގެ އަތުގައި އޮތް ފޮޓޯއާ ގުޅޭ އެއްވެސް ނިޝާނެއް ފެނޭތޯއެވެ.
ކުއްލިއަކަށް ބައްޕަގެ ކަޅު ކޯޓުގެ ޖީބެއްގެ ތެރެއިން ބާވެފައިވާ ސިޓީއުރައެއް ފެނުނެވެ. ކިޔާނާ އަވަސްއަވަހަށް އެ ކަނޑާލައި އޭގައި އޮތް ކަރުދާސްގަނޑު ނިއުޅާލިއެވެ. އެއީ ބައްޕަގެ އަތުލިޔުމެވެ.
*”ލޯބިވާ ކިޔާނާ… މި ސިޓީ ދަރިފުޅަށް ފެންނައިރު ބައްޕަ ދުނިޔޭގައި ނެތުން އެކަށީގެންވޭ. ބައްޕައަށް ވަރަށް ބޮޑު ކުށެއް ކުރެވިއްޖެ. ‘އަޙްމަދު’ ގެ އާއިލާއަށް ބައްޕައަށް ދެވުނު ކެހީގެ ސަބަބުން، އަހަރެމެންގެ ފުރާނައަށް ވަނީ ނުރައްކާވެފައި. އެކަމަކު ހަނދާންކުރާތި… މުސްތަޤުބަލުގައި ދަރިފުޅު ރައްކާތެރިކުރަން ‘އޭނާ’ އަންނާނެ. އެއީ އަޙްމަދު…”*
ސިޓީގެ ބާކީ ބައި ވަނީ ފެންތިކިތަކަކުން ފޭދި، ކިޔަން ނޭނގޭ ވަރު ވެފައެވެ. ކިޔާނާގެ ނޭވާ އަވަސްވިއެވެ. ‘އަޙްމަދު’ އަކީ ކާކު ހެއްޔެވެ؟ އަމާރުއާ މިކަމާ އޮތީ ކޮން ގުޅުމެއް ހެއްޔެވެ؟
ހަމަ އެވަގުތު ކިޔާނާގެ ފޯނަށް މެސެޖެއް އައި އަޑު އިވުނެވެ. ފޯނު ނަގައި ބަލާލިއިރު އެއީ ނުދަންނަ ނަންބަރަކުން އައިސްފައިވާ މެސެޖެކެވެ.
*”އަމާރުގެ އާއިލާއަކީ ކިޔާނާގެ ބައްޕަ ގެއްލުމުގެ އަސްލު. ކިޔާނާގެ ބައްޕަ މަރާލީ އަމާރުގެ ބައްޕަ! ޙަޤީޤަތް ބަލަން ބޭނުމިއްޔާ މިރޭ 8:00 އަށް އާޓިފިޝަލް ބީޗަށް އާދޭ.”*
ކިޔާނާގެ އަތުން ފޯނު ދޫވެގެން ބިންމައްޗަށް ވެއްޓުނެވެ. އޭނާގެ ދެލޯ ބޮޑުވެ، މުޅި މީހާ ގަނޑުވިއެވެ. އަމާރު… އޭނާ އެންމެ ފުރަތަމަ ލޯބިވި ޒުވާނާ… އެއީ އޭނާގެ ބައްޕަގެ ގާތިލުގެ ދަރިފުޅު ހެއްޔެވެ؟ މިއީ ތެދަކަށް ވެއްޖެނަމަ، ކިޔާނާގެ ދިރިއުޅުން މުޅިން ފުނޑުފުނޑުވީއެވެ.
(ނުނިމޭ)