ވިސްނާ ހުރޭ

ގުނަމުން މިދާ ވަގުތަށް ނިމުން އަންނާނެކަން ވިސްނާ ހުރޭ

އުނިކަންނުވާ ހަމަ އެއްކަމެއް ދުނިޔޭގަ ނެތްކަން އެނގި ހުރޭ

ދެ އިރަށް ބަދަލު ވާހެން ހެދުން އުޅުމާ ގުޅުންތައް ބަދަލުވޭ

އެ އިރެއްގެ އޮއިވަރު ހުރި ދިމާ ފާހަގަ ކުރުމުގައި ދެމިހުރޭ

އިރުއަލި ކެނޑޭހިނދު ފަހަތުގައި ހުރި ހިޔަނިވެސް ވަގުތުން ފިލާ

ފިރުމާ އަތުން ކަންކަށިމަތީ ވިހެލާނެކަން ދަނެގެން ހުރޭ

ރިހުމާ ތަދުގެ އެ ފަރާތަކީ ލޯއްބާ އުފާ ކަމުގާ ވި އިރު

ރިހުމަށް އިޒުނަ ދޭން އައި އަމުރު ލޯއްބާ ގުޅޭނެ، ބަލަން ހުރޭ

ނުރުހުމުގެ އަލިފާނުން ފެށޭ ލޯބިގެ ހުޅުކޮޅު ރޯވުމަށް

ރުހުމުގެ ލޮލަށް އައިބެއް ފެނުން ދުރުވާނެޔޭ، ހޭލާ ހުރޭ

ލޯބިން ގުޅޭ ހިތަކަށް ސަފުން ބާކީވުމެއް އަމުދުން ނެތަސް

ލޯބީގެ ނަން ވިޔަފާރިއަށް ވާހިނދު އެއާ ދުރުގައި ހުރޭ