ވަދާއީ ސަލާމް

ދުނިޔެ ދޫކޮށް ކޮންމެ މީހަކުވެސް ނިމިދާނެއެވެ. އެމީހަކާއެކު ގެންދެވޭނީ އެމީހަކު ކޮށްފައިވާ އަމަލްތަކެވެ. ސަލާމަތް ހޯދެން އޮތީވެސް ދުނިޔޭގައި އުޅުމަށް ދެވުނުވަގުތު ހެޔޮގޮތުގައި ބޭނުންކޮށްގެންނެވެ. ނަމަވެސް މި ވަގުތީ ދުނިޔެއަށް ގެއްލި ހަލާކުވެ އެ ކުޑަ ވަގުތުކޮޅުގެ ބޭނުން ހިތުހުރި ގޮތަކަށް އެތައްބަޔަކު އުޅެމުންދެއެވެ.

އަކްރަމް އަދި ސަބާހް އަކީ ގާތް ދެ އެކުވެރިންނެވެ. ސްކޫލް ދައުރުއްސުރެ ވަރަށް ގާތްކޮށް އުޅެމުން އައި ދެމީހުންނެވެ. ސްކޫލް ދައުރުގައި ސަބާހްއަކީ މޮޅެތި ވަނަތައް ހާސިލްކުރަމުން އައި މީހެކެވެ. މީހުންގެ ގަދަރުވެސް ލިބިފައިވާ މީހެކެވެ. ނަމަވެސް އަކްރަމްއަކީ އޭގެ އިދިކޮޅެވެ. ސްކޫލް ދައުރުގައި ކިޔެވުމާ އަޙުލާގްވެސް އެހާ ދަށެވެ. އަކްރަމް ވަނީ ސްކޫލްތެރޭގައި ހިންގި މާރާމާރީއަކާ ގުޅިގެން ސްކޫލުން ވަކިކޮށްފައެވެ. ނަމަވެސް އޭނާ އަކީ ސަބާހްގެ ހެޔޮކަމާ ނަސޭހަތް އަބަދުވެސް ލިބެމުން އަންނަ މީހެކެވެ. އޭނާ މިދުނިޔެއިންވެސް އެންމެ އިތުބާރުކޮށް އަޑުއަހަނީ ސަބާހްގެ ވާހަކަތަކެވެ. އަދި އުޅުން އިސްލާހް ކުރެވޭތޯ ވަރަށް މަސައްކަތްވެސް ކުރެއެވެ. ނަމަވެސް އަކްރަމް އަކީ ސްކޫލުން ކަނޑާލީސުރެ ނުފޫޒުގަދަ ގްރޫޕްއެއްގެ މެމްބަރެކެވެ. އެމީހުން އޭނާ ގިނަފަހަރު ހެޔޮމަގަށްދާން މަސައްކަތްކުރާއިރަށް އޭނާއަށް ފުރައްސާރަކޮށް ހަދައެވެ.

އެއްދުވަހެއްގެ ފަތިހެވެ. ނަމާދުކޮށް ނިންމާލައިގެން ސަބާހް މިސްކިތުން ނުކުމެ ސައިބޯން ހޮޓަލަށްވަނެވެ. ސައިބޯން އިށީންދެފައި އޭނާގެ އެކުވެރި އަކްރަމްއަށް ގުޅާލަން ފޯނު ނެގިއެވެ. ކުއްލިއަކަށް އިވުނީ ބާރު އަޑުފައްގަނޑެކެވެ. ސަބާހް ދުވެފައި ބޭރަށް ނުކުތްއިރު ވަނީ ސައިކަލަކާއެކު ޒުވާނަކު ބިންމައްތަށް ޖެހިފައެވެ، އަދި އެ ޒުވާނާއަށް ދެމީހަކު ދަނީ ލަޓިބުރިން ހަމަލާދެމުންނެވެ. ސަބާހްއަކަށް މަންޒަރުބަލާކަށް ނުހުރެވުނެވެ. އައި ބާރުމިނެއްލާފައި އައިސް މަރާމާރީ ހުއްޓުވަން މަސައްކަތް ކުރީ ފިސާރެ ކެރިހުރެއެވެ. ދެ މީހުން ހަމަލާދެމުން ދިޔަ ލައްޓިބުރިތަކުގެ މެދަށްވަދެ ސަބާހްގެ ބުރަކަށިން ވެއްޓިފައިވާ ޒުވާނާ ދިޔައީ ދިފައު ކުރަމުންނެވެ. ހުއްޓާލުމަށް އެދި އާދޭސްވެސް ކުރަމުންނެވެ. ﷲ سُبْحَانَهُ وَ تَعَالَى އަށްޓަކައި ބިރުވެތިވުމަށް ގޮވާލަމުންނެވެ. ސަބާހްގެ އަޑަށް އެތައްބަޔަކު އެހީވާން އަންނަންފެށުމުން މަރާމާރީ ހުއްޓާލުމަށްފަހު ދެމީހުން ދުވެ ފިލާފިއެވެ. އެމީހުން ފިލުމާއެކު ވެއްޓިފައިވާ ޒުވާނާއަށް ރަނގަޅަށް ސަބާހް ނަޒަރު ހިނގާލިއެވެ. އެއީ އޭނާގެ އެކުވެރި އަކްރަމްއެވެ. އެއްވެފައި ތިބި މީހުންގެ އެހީއާއެކު އަކްރަމް ހޮސްޕިޓަލްއަށް ގެންދެވުނެވެ. އަދި ފަރުވާދެވުމަށްފަހު ހޮސްޕިޓަލްގައި އެޑްމިޓް ކުރެވުނެވެ. އަކްރަމް ބެލެހެއްޓުމުގެ ހުރިހާ ކަމެއް ކުރަނީ ސަބާހްއެވެ. ކޮންމެ ދުވަހަކު ވަޒީފާ ނިންމަށް ފަހު އަކްރަމްއާއެކު އެތައްވަގުތެއް ހޭދަކުރެއެވެ.

ދުވަސްތައް ފާއިތުވެ އަކްރަމް ހެޔޮހާލަށްއެޅި ހޮސްޕިޓަލްއިން ދޫކޮއްލާ ދުވަސް ޖެހިއްޖެއެވެ. ނަމަވެސް އޭނާގެ މޫނުމަތިން ފެންނަމުންދަނީ މާޔޫސްކަމެވެ. ސަބަބު އޮޅުންފިލުވާލަން އަކްރަމްއާ ސަބާހް ސުވާލްކޮއްލުމުން އެނގިގެންދިޔައީ އޭނާ ދާނެ ތަނެއް ނެތްކަމެވެ. ސަބާހް އޭނާގެ ރަހްމަތްތެރިޔާ ހާސްނުވުމަށް ބުނެ ދޫކޮއްލި ދުވަހުން ފަށައިގެން ކުއްޔަށް ތަނެއްގައި ބަހައްޓާދިނެވެ. އަދި އަކްރަމްއަށް ސަބާހް އެތައްކަމެއް އުނގަންނާދިނެވެ. ދިރިއުޅުން އެއްކޮއް ބަދަލުކޮއްލިއެވެ. މިހާރު އަކްރަމްއަކީ ކުރީގެ އަކްރަމް އެއްނޫނެވެ. ބުރަކޮށް މަސައްކަތްކޮއް ހަލާލް އާމްދަނީ ހޯދާމީހެކެވެ. މީހުންނަ ހިތްހެޔޮ މީހުން ދަންނަ ގަދަރުކުރާ އުފާވެރި މޫނެކެވެ.

އެއްދުވަހެއްގެ މެންދުރެވެ. ސަބާހްއަށް އަކްރަމް ގުޅާފައި ވަރަށް އަވަހަށް ބައްދަލްކޮއްލަން އެދުނެވެ. ރަހްމަތްތެރިޔާގެ ދައުވަތަށް ސަބާހް އޭނާއާ ބައްދަލްކުރަން ދިޔައެވެ. ހަމަ ދިޔުމާއެކު ފުރުތަމަވެސް ދިއްކޮއްލީ ކަރުދާހެކެވެ. ސަބާހް އެ ކަރުދާސް ރަނގަޅަށް ބަލާލިއެވެ. އުފަލުން ދެލޮލުން ކަރުނަ އޮހޮރުނެވެ. އެއީ އަކްރަމްގެ ހައްޖު ދަތުރުގެ އެއްބަސްވުމެވެ. އޭނާގެ ރަހްމަތްތެރިޔާ ބުރަ މަސައްކަތްކޮއްގެން އެދަނީ ހައްޖަށްށެވެ. ފުރަން އޮތީ ޖެހިގެން އޮތް ދުވަސްކަމުން ބާކީ ކުރަން ހުރި ހުރިހާ ކަމެއްގައި ސަބާހް އަކްރަމްއަށް އެހީވިއެވެ. އަދި ފުރުވަން ދިޔުމަށްފަހު އެކަކު އަނެކަކަށް އަލްވަދާއު ކިޔާ ސަލާމްކޮއް ހެޔޮދުއާ ކުރުމަށްފަހު އަކްރަމް ފުރުވާލާފައި ސަބާހް ގެއަށް އައެވެ. އަކްރަމް ފުރިތާ ދިހަ ދުވަސްފަހެވެ. ނުދަންނަ ނަމްބަރަކުން ފޯނެއް އައުމުން ސަބާހް ފޯނު ނަގާ ކަންފަތުގައި ޖައްސާލިއެވެ. ވާހަކަ ދެއްކީ އަކްރަމްއެއް ނޫނެވެ. ހައްޖު ކޯޕްރޭޝަންގެ މުވައްޒިފެކެވެ. އޭނާ އަކްރަމް ނިޔާވި ޙަބަރު ދިނެވެ. إِنَّا لِلّهِ وَإِنَّـا إِلَيْهِ رَاجِعُونَ މިއަދު ސަބާހްއާ އޭނާގެ އެކުވެރިޔާ ވަކިވެގެން އެދިޔައީ ވަދާއީ ސަލާމް ކުރުމަށް ފަހު ހެޔޮ ނިމުމަކުންނެވެ.

• – ނިމުނީ –