ނުރައްކާ

ނުރައްކާ

އިސްމާޢީލް ޢަލީ ކަނދޮޅުދޫ

ލޯބިވާ އަޚާއެވެ. ތިބާގެ މިތުރެއް ކަމުގައި އަހަރެން ޚިޔާރުކުރީ ކީއްވެ ހެއްޔެވެ.؟ އަހަރެންގެ ހެދުން ހުދުވެފައި ސާފުވީމަހެއްޔެވެ؟ ތިބާއަށް ތިޔަފެނުނީ އަހަރެންގެ ބޭރުފުށުގެ ރީތިކަމެވެ. ހަމައެކަނި ބޭރުފުށުގެ ރީތިކަމަށް ބަލައިގެން ނިންމާ ނިންމުންތައް ވަރަށް ހިތިކަން ތިބާއަށް އެނގޭނެއެވެ.

އަހަރެންގެ އެއްކޮޅު އަލިފާނުން ފިއްސާލުމަށްފަހު އަނެއްކޮޅު ތިބާގެ ނާޒުކު ދެތުންފަތުން ލޯބިލޯބިން ފިތާލުމަށްފަހު އެތެރެއަށް ތިޔަދަމާލާ ދަމާލުމުން ހަށިގަޑަށް އެތެރެވެގެން އެދަނީ ކޮންފަދަ ވިހަމާއްދާ ތަކެއްކަން ތިބާ އަށް ވަޒަން ކުރެވޭބާވައެވެ. އަދި ލޯތްބާއިއެކު ޖައްވު ތެރެއަށް ދޫކޮށްލާ ދުމުގެ ސަބަބުން އެތައް ބައެއްގެ ދިރިއުޅުމަށް އަސަރުކުރާނެކަން ނުވިސްނެނީހެއްޔެވެ؟

ތިބާ އަހަރެންގެ ބޭނުން ތިޔަ ހިފަނީ ތިބާގެ ފިރިހެންވަންތަކަން މީހުންނަށް ދެއްކުމަށް ކަމަށް ވެދާނެއެވެ. ނޫނީ ރަޙުމަތްތެރިންގެ ރުހުން ހޯދަން ކަމަށް ވެދާނެއެވެ. ނޫނީ އަރާމު ލިބޭތީއޭ ތިބާ ބުނެފާނެއެވެ. ނުވަތަ ފޫހި ފިލުވާލަން ކުރާ ކަމަކަށް ވެސް ވެދާނެއެވެ.

ތިބާ އަމިއްލައަށް ތިބާގެ ހަށިގަޑު ތިޔަ ހުށައަޅަނީ ނުރައްކަލުގެ ތެރެއަށެވެ. ތިބާ އަހަރެންގެ އެއްކޮޅުގައި ރޯކޮށްލުމުން އަހަންނަށް ވެގެން ދާގޮތް ތިބާއަށް ފެނޭ ނޫން ހެއްޔެވެ. މަޑުމަޑުން އަނދަމުންގޮސް ހުލިވަނީއެވެ. ބާކީ އޮންނަބައި ތިބާ އެއްލާ ލަނީ ނޫންހެއްޔެވެ؟ ތިބާގެ ހަށިގަޑަށް ވާނީވެސް ހަމަ އެގޮތެވެ. އަހަރެންގެ އަވާގައި ޖެހުމުން ހަށިގަޑަށް އެތައް ވޭނެއް ތަޙައްމަލު ކުރަން ޖެހެއެވެ. ބަލިބަލީގެ ޝިކާރަކަށް ވެއެވެ. އެންމެފަހުން މަރާއި ހަނގުރާމަ ކުރުމަށްފަހު މިފަނާވަނިވި ދުނިޔެއަށް އަލްވަދާޢު ކިޔަން ޖެހެއެވެ. މީސްތަކުން ގިސްލަމުން،ރޮމުން ކަރުނަ އަޅަމުން ތިބާގެ ހަށިގަޑު ގެންދަނީ ޤަބުރުސްތާނަށެވެ.