ބަރުބާދު (ހަވަނަބައި)

ކައިލް ކޮޓަރި ދޮރު ހުޅުވާލައިފައި ވަދެގެން އައީ އަހަރެންނަށް މަންމަ ބުނި އެއްޗެއް ޤަބޫލް ނުކުރެވިގެން މަންމަގެ މޫނަށް ބަލަހައްޓައިގެން އޮއްވައެވެ. ކައިލް އަހަރެން ސަލާމަތްކުރަންވީ ކީއްވެގެން ހެއްޔެވެ؟ އޭނާއަށް ރަނގަޅުވާނީވެސް އަހަރެން މަރުވިއްޔާއެވެ. އަހަރެންނަށް އެއްފަހަރު މަންމަގެ މޫނަށް އަނެއް ފަހަރު ކައިލްގެ މޫނަށް ބަލަމުން ދިޔައީމެވެ. މަންމަގެ މޫނުމަތިން އުފާވެރިކަން ފެންނައިރު ކައިލްގެ މޫނުމަތިން ފެންނަނީ ހިތާމައިގެ އަސަރެވެ. ކުއްލިއަކަށް އަހަރެންގެ ހިތުގައި ގޮތް ނޭގޭ ބިރުވެރިކަމެއް އުފެދިގެން ދިޔައެވެ. މަންމަ މިހާ ހަމަޖެހި ހިނިތުންވެފައި މިއިންނަނީ ކީއްވެގެންބާއެވެ؟

“..ދަރިފުޅާ.. ދެން އަރާމްކޮށްލާ..” މަންމަ އަހަރެންގެ ބޮލުގައި ފިރުމަމުން ދިޔައެވެ. “..މާބޮޑަށް ކަންކަމާ ނުވިސްނާތި.. ހުރިހާކަމެއްވެސް މަޑުމަޑުން ހަމަޔަކަށް އެޅިދާނެ..”

މަންމަ އިންނަނީ ހިނިތުންވެފައެވެ. އެންމެ ސިކުންތުކޮޅަކަށްވެސް އެހިނިތުންވުން ފިލައިގެނެއް ނުދެއެވެ. މަންމަ ހިނިތުންވާންޖެހޭ އެއްވެސް ސަބަބެއް އަހަރެންނަކަށް ނުވިސްނުނެވެ. މިރޭ ހިނގާދިޔަ އެއްވެސް ކަމެއް މަންމަގެ ހަނދާނުގައި ހުރިހެނެއްވެސް ހިޔެއްނުވެއެވެ. އަހަރެންގެ ދިރިއުޅުމަށް ޒަލްޒަލާއެއް އައިސްފައިވާކަން މަންމައަށް ނޭގެނީހެއްޔެވެ؟ ނޫނީ އެހުރިހާ ކަމެއް ނުވާކަމަކަށް ހަދާލައިގެން ހިނިތުންވުމެއް ދައްކައިގެން އިންނަނީ ހެއްޔެވެ؟

“..މަންމަ ދެން މިދަނީ ނިދާލަން..” މަންމަ އެނދުން ތެދުވަމުން ކައިލްގެ ކޮނޑުމަތީ އަތް ބާއްވާލިއެވެ. “..ދަރިފުޅުމެން ދެން ނިދާލާ..”

މަންމަ ކޮޓަރިން ނުކުމެގެން ދިޔައިރުވެސް އަހަރެންނަށް އޮވެވުނީ ވިސްނާށެވެ. މަންމައަށް މިހާ ބޮޑު ބަދަލެއް މިއައީ ކީއްވެގެން ހެއްޔެވެ؟ މަންމައަށް ކައިލްގެ ހަޤީޤަތް އެނގިފައި އޮތްހެން ހީވެސް ނުވެއެވެ. ދެން މިހުރީ ކައިލްއެވެ. އަހަރެންނަށް ކައިލްގެ މިލާ މޯޅިވެފައިވާ މޫނަށް ބަލާލެވުނީ ސުވާލުގެ ނަޒަރަކުންނެވެ. ކައިލް މިހާ މަޑުމޮޅިވެ ދެރަވެފައި މިހުންނަނީ ކީއްވެގެންބާއެވެ؟

ކައިލް މަޑުމަޑުން އެނދު ކައިރީ ދެކަކޫ ޖައްސާލަމުން އިށީނީ ކުށްވެރިޔަކު ފަދައިންނެވެ. އަދި އަހަރެންގެ އަތްތިލަ އޭނާގެ ދެއަތުގެ ތެރެއަށްލާ ފިއްތާލަމުން ތުންފަތާ ކައިރިކޮށްލިއެވެ. އަހަރެންނަށް ދެލޯ ބޮޑުކޮށްލެވުނެވެ. މިވަނީ ކިހިނެއް ހެއްޔެވެ؟ ކައިލްގެ ތުންފަތް އަހަރެންގެ އިނގިލި ތަކުގައި ޖެހުމާއެކު އަހަރެންގެ ހަށިގަނޑު ތެރޭ ކަރަންޓްގެ އޮޔެވަރެއް ދަތުރުކޮށްލިއެވެ. އެޔާއެކު އަހަރެންނަށް ދެލޯ މަރާލެވުނެވެ. ހުރިހާކަމެއްގެ މަތިން ހަނދާންނެތި ހިޔާލީ ފުންކަނޑަކަށް އަހަރެން ގެނބިގެންދިޔައެވެ.
އަހަރެންނަށް ކައިލް މަޑުމަޑުން ގިސްލާއަޑު އިވެމުންދިޔައެވެ. އަހަރެންގެ އަތްތިލައަށް ފިނިކަމެއް އިޙްސާސްކުރެވެމުން ދިޔައެވެ. މަޑުމަޑުން ދެލޯ ހުޅުވާލުމާއެކު އަހަރެން އަތުގައި ހިފަހައްޓައިލައިގެން އިން ކައިލް ގިސްލަމުންދިޔަ މަންޒަރު ފެނިފައި ލިބުނީ އިތުރު ޚައިރާންކަމެކެވެ.

“..އައި އޭމް ސޮރީ.. ސޮރީ..” ކައިލް ބެދިފައި އަޑަކުން ބުނެލިއެވެ. “..ރިއަލީ ރިއަލީ ވެރީ ސޮރީ..”

އަހަރެންނަށް ކައިލްއަށް ބަލަން އޮވެވުނީ ބުނާނެ އެއްޗެއް ނޭގިގެންނެވެ. އޭނާ މާފަށް އެ އެދެނީ ކޮންކަމަކަށްކަމެއް އަހަރެންނަކަށް ނޭގެއެވެ. ޤައިމުވެސް އޭނާއަށް އުޅެވުނު ގޮތާމެދު ހިތާމަކޮށް ރޮއެ ނުހަދާނެކަން ޔަޤީނެވެ. އެހާ އަވަހަށް ހަތިޔާރު ބަހައްޓާފައި މާފަށް ނޭދޭނެކަން ޤައިމެވެ. އަދި އަހަރެން ދެކެ ފޫހިވާ މީހަކު އަހަރެންނަށް އަނިޔާއެއް ދެވިގެންވެސް ރޯނެ ހެނެއް ހިޔެއްނުވެއެވެ.

“..ދެން ދުވަހަކުވެސް އެހެނެއް ނޫޅޭނަން..” ކައިލް އަހަރެންނަށް ބަލާލިއެވެ. އެލޮލުތެރެއިން ކަރުނަ ފައިބަމުން ދިޔައީ ހިފެހެއްޓުމެއްނެތިއެވެ. “..ދުވަހަކުވެސް ލޫޝްއަށް ދެރަގޮތެއް ނަހަދާނަން.. އައި އޭމް ސޮރީ.. އަހަންނަށް މާފުކޮށްދީ..”

ކައިލްއަށް އުޅެވުނު ގޮތާމެދު ހިތާމަކޮށް ރޮއެ ހަދަނީއެވެ. މާފަށްވެސް އެދެނީއެވެ. އަހަރެންނަށް މިފެންނަނީ ހުފަނެއްބާއޭވެސް އެތަކެއް ފަހަރަކު ހިތަށް އެރިއެވެ. ކައިލްގެ ލޮލުން ފައިބަމުން އެދަނީ ހަޤީޤީ ކަރުނަ ހެއްޔެވެ؟ ހަޤީޤަތެއްކަމަށް ޤަބޫލްކުރަން އުނދަގުލެވެ.

“..ކައިލް..” އަހަރެން ކައިލްއަށް ގޮވާލަމުން އަތްދަމާގަތީމެވެ. ކައިލް ރޯމަންޒަރު ނުބަލަންވެގެން މޫނު އަނެއް ފަރާތަށް އަނބުރާލީމެވެ. ފެންނަމުންދަނީ ހަޤީޤަތްކަމަކަށް އަހަރެންގެ ހިތެއް އެއްބަހެއް ނުވިއެވެ. ކައިލްއަށް އިތުބާރުކުރަން އުނދަގޫވިއެވެ. ކައިލް އެއުޅެނީ ގޮތް ހުސްވެގެންނެވެ. މަންމަ ގުޅުން ކަނޑާލާނެ ވާހަކަ ބުނީތީ މޮޅު އެކްޓްތަކެއް ކުރަނީއެވެ.

“..ލޫޝް..” ކައިލް އަހަރެން އަތުގައި އަނެއްކާވެސް ހިފާލިއެވެ. “..ލޫޝް.. އަހަރެންނަށް އިނގޭ އިތުބާރު ކުރަން އުނދަގޫވާނެކަންވެސް.. އެހެންނަމަވެސް އަހަންނަށް އެއް ފުރުޞަތުދީ.. އަހަރެން އިޞްލާޙްވާނަން.. ލޫޝް ބޭނުންވާ ކަހަލަ ފިރިއަކަށްވާނަން.. ޖަސް ގިވް މީ ވަން ޗާންސް..”

ކައިލްއަށް މަޖުބޫރުވެގެން ނަމަވެސް އަހަރެން ކިބައިން މިހާއަވަހަށް މާފަށް އެދޭނެކަމަކަށް ހިޔެއްނުކުރަމެވެ. އަހަރެންނަށް ހީވެފައި އޮތީ އޭނާ އަހަރެންނާ ދިމާއަށް ބަލާވެސް ނުލާނެކަމަށެވެ. އަހަރެންދެކެ އަންނަ ރުޅި އާއި ފޫހި އިތުރުވެގެންދާނެ ރެޔަކަށް މިރޭ ވާނެކަމަށްވެސް ހީކުރެވުނެވެ. ނަމަވެސް ކައިލް އެއިނީ އޭނާގެ އުޅުން އިސްލާޙްކޮށް އަހަންނާއެކު އާފެށުމަކުން ފަށަން ތައްޔާރުވެގެންނެވެ. އަހަރެންގެ ފިރިމީހާ އަހަންނަށް ލިބެނީއެވެ. ކައިލްއަށް މާފުދީ މޮހެވެމުންދިޔަ ކާވެނީގެ ގޮށް ބާރުކޮށްލަންވީއެވެ. އެހެނަސް އެކަން ކުރުމަށް ފަސްޖެހެވެނީ ކީއްވެގެން ހެއްޔެވެ؟ އަހަރެން އުފާނުވާންވީ ކީއްވެގެން ހެއްޔެވެ؟ ހާސްވުންތަކަކާއި ބިރުވެރިކަމެއް ހިތުގައި މިވަނީ ކީއްވެގެންހެއްޔެވެ؟ އަހަރެންނަށް ކަންތައްކުރެވުނީ ރަނގަޅަށް ނޫންކަމަށް ހިތް އެބަބުނެއެވެ. ކައިލްއަށް އިތުބާރު ނުކުރުމަށް ސިކުނޑި ވިސްނާއެބަދެޔެއެވެ.

“..ކައިލް އަހަރެންދެކެ ލޯބި ނުވެއެއްނުން.. ކައިލް ލޯބިވަނީ ޔުމްނު ދެކެއެއްނުން..” އަހަރެން ކައިލްއާ ދިމާއަށް ބަލާވެސް ނުލާ އޮތްގޮތަށް އޮވެ ބުނެލީމެވެ. “..ޔުމްނުއާ އިންނާކަށް ބޭނުމެއް ނުވެތަ؟..”

އަހަރެން ބޭނުންވީ ކައިލްގެ ތެދުވެރިކަން ބަލާލާށެވެ. އޭނާ ޔުމްނުދެކެ ލޯބިނުވާކަމަށް ބުނެފިނަމަ މިފެންނަ ހުރިހާ ކަމަކީ ހަޤީޤަތެއްނޫންކަމަށް ޤަބޫލްކުރެވުނީއެވެ.

“..އަހަރެން ޔުމްނުދެކެ ލޯބިވަން..” ކައިލް މަޑުމަޑުން ބުނެލި އަޑުއިވުނެވެ. އަހަރެންނަށް ދެލޯ މަރާލެވުނެވެ. “..އެހެނަސް ޔުމްނުއާ އިންނާކަށް މިހާރު ބޭނުމެއްނޫން.. އަހަރެން ބޭނުންވަނީ ލޫޝް..”

“..ކީއްވެ ކުއްލިއަކަށް އިންނަން ބޭނުންނުވީ..” ސަބަބު އެގުންނަމަވެސް އަހަރެން އެސުވާލްވެސް ކުރީމެވެ.

“..ޔުމްނުއަކީ އަހަރެން އުންމީދުކުރިކަހަލަ އަންހެނެއްނޫން..” އަހަރެންނަށް އިވިގެން ދިޔައީ އަހަރެންގެ ހިތުގައި އޮތް ޖަވާބެއް ނޫނެވެ. “.. އަހަރެންނަށް މިރޭ ޔަޤީންކުރެވިއްޖެ ޔުމްނުކަހަލަ އަންހެނަކާ އެކީ އުޅިގެން އަހަރެންނަށް އެއްވެސް އުފަލެއް ނުލިބޭނެކަން.. ލިބުނަސް ލިބޭނީ ގެއްލުމެއް.. އޭނާއަކީ ރުޅި ކޮންޓްރޯލް އިން ނެއްޓޭ ނުރައްކާތެރި އަންހެނެއް..” ކައިލްގެ ދަލުގައި ޖެއްސުމަށް މޮޅުވާހަކައެއް ދައްކަން އުޅުމުން އަހަރެން ހިތުގައި ފޫހިކަމެއް އުފެދުނެވެ.

“..އޭނާ އުޅުނީ ލޫޝާގެ ފުރާނަ ދުއްވާލަން..” އަހަރެންނަށް ކުއްލިއަކަށް ލޯ ހުޅުވާލެވުނެވެ. އަދި އެނބުރި ކައިލްގެ މޫނަށް ބަލާލެވުނީ ސުވާލުގެ ނަޒަރަކުންނެވެ. ޔުމްނުގެ ފަހަތުން އެފެނުނު ހިޔަންޏަކީ ކައިލް ހެއްޔެވެ؟ ކައިލް ދެތުންފަތް ފިއްތާލަމުން ބޯޖަހާލިއެވެ.

“..ލޫޝް ޓައިލްސް ގަނޑުމައްޗަށް ވެއްޓުނު އިރު ނިތްކުރި މަތި ފަޅައިގެން ގޮސް ހުރިތަނުން ބައިވަރު ލޭތައްފައިބަމުން ދިޔަ..” ކައިލް އިތުރަށް އޮޅުންފިލުވާ ދިނެވެ. “. އެހެންވެ އަހަރެން ފޮތިގަނޑެއް ޔުމްނުއަތަށް ދިނުމަށްފަހު ލޫޝާގެ ނިތްކުރީގައި އައްސާލުމަށް ބުނަމުން އެއްޗެހި ލައިގެން ބޭރަށް ނުކުތީ އަވަހަށް ބޭސް ގަންނަންވެގެން.. އަހަރެން ބޭރަށް ނުކުތްފަހުން ފޯން މަތިން ހަނދާންވީ.. ފޯން އޮންނާނީ ކޮޓަރިގަ.. ނަސީބެއް ކަންނޭގެ ފޯން ބަލާދިޔުމުގެ ވިސްނުމެއް އައިކަންވެސް.. އަހަރެން ހިޔެއްނުކުރަން ޔުމްނު ރުޅިއައިސްފައި ހުރި ނަމަވެސް އެފަދަ ކަމެއްކޮށްފާނެކަމަކަށް.. އަހަރެން ދިޔައިރު އޭރު ޔުމްނު ޔުމްނު އޭރު ލޫޝާ ނޭފަތްމަތީ ފޮތިގަނޑެއް..” ކައިލްގެ ތުރުތުރު ލަމުންދިޔަ އަޑު ކުއްލިއަކަށް ހުއްޓުނީ ވާހަކަ ދައްކަން އުނދަގޫވި ވަރުންނެވެ. ކައިލްގެ ހިތުގެ އެންމެ ފުނަށް އެހާދިޘާގެ އަސަރުކޮށްފައިވާ ކަހަލައެވެ. އޭނާގެ ދެއިނގިލިން ލޮލަށް ފިތާލީ ނުރޯން ހިތްވަރުކުރަމުންނެވެ. އިރުކޮޅަކު އެހެން އިނުމަށްފަހު ކައިލް ވާހަކަ ދައްކަންފެށިއެވެ.

“..އޭރު ޔުމްނު ލޫޝާ ނޭފަތްމަތީ ފޮތިގަނޑެއް އަޅައިގެން ލޫޝާ މަރަށް ތެޅޭހެން ތެޅެނީ.. އަހަރެންނަށް ނޭގެ ހުރެވުންތަންވެސް.. ވަގުތުން ޔުމްނު އަތުގަ ހިފާދުރުކޮށްލަމުން ބަލާލިއިރު ލޫޝާގެ އެއްވެސް ހަރަކާތެއް ނެތް.. އަހަރެން ހީކުރީ ލޫޝާ މަރުވީކަމަށް.. އެހެންވެސް އަވަސްއަވަހަށް ވަގުތުންވަގުތަށް ލޫޝާ ހޮސްޕިޓަލަށް ގެންދިޔައީ.. ގެންދިޔަފަހުން އެނގުނީ ލޫޝާ މަރުނުވާކަން.. ލޫޝާ އޮތީ ބިރުންގޮސް ހޭނެތިފަ.. ދެން ބޭސް އެޅުމަށްފަހު އަހަރެން ޑޮކްޓަރ ހުއްދައާއެކު ގެޔަށްގެނައީ.. އެހިސާބުން އަހަރެންނަށް ވިސްނުނީ ޔުމްނުއަކީ އަހަރެންނަށްވެސް ހުރި ނުރައްކަލެއްކަން.. އަހަރެން މަންމަމެން ރުއްސައިގެން ޔުމްނުއާ އިންނަމަވެސް ޔުމްނުގެ ރުޅި ކޮންޓްރޯލްއިން ނެއްޓޭކަހަލަ ކަމެއް ވެއްޖެނަމަ އެކަމުގެ ނުރައްކާ ކޮންމެ މީހަކަށް ކޮންމެ ފަދަ ވަގުތެއްގައި އައިސްފާނެކަން.. އަހަރެންނަށް ޔުމްނުއަށް ވުރެ އަހަރެންގެ އާއިލާ މުހިންމު.. އެހެންވެ ޔުމްނުއާ ވަކިވުމަށް ނިންމީ.. ދެންހުރީ ލޫޝް.. އަހަރެން އެއްވެސް އިރެއްގައި ލޫޝް ވަރިކޮށްލާކަށް ނުނިންމަން.. ވަރިކުރަން ހިތަށްވެސް ނާރާ.. އަހަރެން އުޅުނީ ޔުމްނުއާ ދެއަތްބަށް އިންނަން.. އަހަރެން ހިތުން ލޫޝްއަށްވެސް ޖާގައެއްދެވިފަވޭ.. ތީ އަހަރެންގެ ފުރަތަމަ ލޯބި.. އަހަރެންގެ ހަލާލު އަނބިމީހާ.. އަހަރެންގެ ދަރިފުޅުގެ މަންމަ.. ލޫޝް އަހަރެންދެކެ އިންތިހާއަށް ލޯބިވާކަންވެސް އިޙްސާސްކުރެވޭ.. އަހަރެންނަށް ލޫޝްގެ ފަރާތުން ލޯތްބާ އަޅާލުން ލިބެމުންއައީވެސް.. ދެން ނޭގެ ކީއްވެކަމެއް ޔުމްނުގެ މައްޗަށް ހިތް ލެނބުނީ.. ޔުމްނު ފަރާތުން ލޯބި ލިބެންފެށީމަ ލޫޝްއާމެދު ފަރުވާ ކުޑަކުރެވެން ފެށުނީ.. އައި އޭމް ސޮރީ.. އެއީ އަހަރެންނަށް ހެދުނު ބޮޑު މިސްޓޭކެއް.. އަހަރެން ބޭނުން ރަނގަޅުވާން.. ލޫޝް ބޭނުންވާކަހަލަ ފިރިއަކަށްވާން ބޭނުން.. ހަމަ އެންމެ ފުރުޞަތެއްދީ..”

ކައިލްދެއްކި ވާހަކަތައް އަހަރެންނަށް ޤަބޫލްކުރެވުނެވެ. ޤަބޫލްނުކުރެވެންވީ ސަބަބެއްވެސް ނެތެވެ. ޔުމްނު އަހަރެން މަރާލަން އުޅުންކަން އަހަރެންނަށް ޔަޤީނެވެ. ޔުމްނުގެ ފަހަތުން މީހެއްގެ ހިޔަންޏެއްވެސް ވަނީ ފެނިފައެވެ. ކައިލް ބުނެފައިވަނީ ތެދުކަން އެމޫނުމައްޗަށް ބަލާލުމުންނާއި ލޮލުގައި އެވާ ކަރުނަތައް އެބަ ހެކިދެއެވެ. ނަމަވެސް ކައިލް ދެއްކި ވާހަކަތަކުން ޤަބޫލްނުކުރެވޭ ކަމެއްވެސް އެބަވެއެވެ. އަހަރެންކައިރީ އަހަރެން ވަރިކުރުމަށް ހިތަށްވެސް ނާރާކަމަށް ބުނިއިރު ކިނާން ނެތްނަމަ ވަރިކޮށްލީމުސްކަމަށް ކައިލް ޔުމްނު ކައިރީ ބުނެފައިވެއެވެ. އަހަރެން އެކަމާ ވިސްނާލުމުން އެނގުނީ އެއީ ޔުމްނު ހިތްހަމަޖައްސާލަދިނުމަށް ބުނެފައިވާ ވާހަކައެއްކަމަށެވެ.

ކުށްކުރެވޭނީ އިންސާނުންނަށްކަމަށް އަހަރެން ޤަބޫލްކުރަމެވެ. ކުށެއް ނުކުރެވޭ އިންސާނަކު ނޫޅޭނެއެވެ. އެހެންކަމުން ކުށެއްކުރެވުމުން އެކުށަށް މާފަށް އެދިއްޖެނަމަ މާފްކުރުމަކީވެސް ނެތްކަމެއް ނޫނެވެ. ކައިލް އިޞްލާޙްވާން ހުރިއްޔާ އަހަރެން އެފުޞަތު ކައިލްއަށް ދޭނަމެވެ. ނަމަވެސް މައްސަލައަކީ އިތުބާރެވެ. ގެއްލިޖެ އިތުބާރު ހޯދުމަކީ އުނދަގޫކަމެކެވެ. ނަމަވެސް އެއީ ނުވާނެކަމެއް ނޫނެވެ..

“..އަހަރެން ކައިލްއަށް މާފުކޮށްފިން..” ކައިލް ހިނިތުންވެލިއެވެ. “..ކައިލްއަށް އިނގޭނެ މިހުރިހާކަމެއް މިގޮތަށްވީމަ އަހަންނަށް ކައިލްއަށް އިތުބާރުކުރަން އުނދަގުވާނެކަން.. ކައިލް ޖެހޭނީ އެއިތުބާރު އަނބުރާ ހޯދަން..”

“..އަހަރެން ލޫޝްގެ އިތުބާރު ހޯދާނަން.. މީ އަހަރެން ވާ ވަޢުދެއް..” ކައިލް ތެދުވެ އެނދުގައި އިށީންނަމުން ދެއަތް ފުޅާކޮށްލާފައި އެއަތުގެ ތެރެއަށް ވަނުމަށް ދަޢުވަތު ދިނެވެ. އަހަރެން އުފަލުންހުރެ ކައިލްގެ އަތުގެތެރޭގައި ބޮނޑިވެގަތީމެވެ. ކައިލްވެސް އަހަރެންގައިގާ ބާރަށް ބައްދާލަމުން ނިތްކުރީގައި ތުންފަތް ޖައްސާލިއެވެ. އަހަރެންގެ ހިތަށް ފިނިކަމެއް ލިބިގެންދިޔަ ހިނދު އުފާވެރިކަމުގެ ކަރުނަތިކިތަކެއް ލޮލުން ނީރާލައިފިއެވެ.

“..ޑޯންޓް ކުރައި ބޭބީ..” ކައިލް އަހަރެން ލޮލުން ފައިބަމުން ދިޔަ ކަރުނަތައް ފޮހެލަދިނީ ލޯތްބާއެކުއެވެ. އަދި އެނދުގައި އަހަރެން ބާއްވާލަމުން އަހަރެން ގާތުގައި އޮށޯތެވެ. އަހަރެން ކައިލްގެ ކޮނޑުމަތީ ބޯ އަޅާލީ ލަދުންއޮވެއެވެ. ކައިލް އަހަރެންގެ އުނަގަނޑުގައި ހިފާލަމުން ގަޔާ ކައިރިކޮށްލިއެވެ. ދެމެދަށް ވައިރޯޅިއަކަށްވެސް ނުވަދެވޭނެހާ ގާތަށެވެ. އެތަކެއް ދުވަސްތަކަކަށްފަހު ފިރިމީހާގެ ހިމާޔަތް ލިބުމުން އަހަރެންނަށް ދުނިޔޭގެ ހުރިހާ އުފަލެއް ލިބުންކަހަލަ އިޙްސާސެއް ކުރެވެމުންދިޔައެވެ.
**************
ޔުމްނު އަހަރެން ކައިރީ މަޑުމަޑުން އިށީނެވެ. އެވަގުތު އަހަރެން މަޑުމަޑުން ލޯހުޅުވާލަން މަސައްކަތްކުރުމާއެކު އަނގަމަތީ ފޮތިގަނޑު އަޅާނިވާކޮށްލިއެވެ. ޔުމްނު ފޮތިގަނޑު ނޭފަތާއެކު ނިވާކޮށްލަމުން ބާރުކޮށްލީ އަތުގަ ހުރި ބާރެއްލައިފައެވެ. އަހަރެންނަށް ނޭވާނުލެވިގެން ތެޅިފޮޅެ ގަނެވުނެވެ. ޔުމްނުގެ އަތްނައްޓުވާލަން މަސައްކަތްކުރަމުން ލޯހުޅުވާލި ހިނދު ދުރުގައި އެމަންޒަރު ބަލަން ހުރި ކައިލް ފެނުނެވެ. ކައިލް ހެވިފައި ހުރެ އަހަރެންނާ ކައިރިވެލަމުން އަތުގައި އޮތް ވަޅި ޔުމްނު އަތަށް ދިއްކޮށްލިއެވެ. ޔުމްނު ބަލާކަށްނުހުރެ އަހަރެންގެ މެޔަށް ވަޅިޖެހިއެވެ.

އަހަރެންނަށް ސިހިފައި ހޭލެވުނީ މަންމައަށް ގޮވާލަމުންނެވެ. އޭރު މުޅިމީހާ ދަލުން ފޯވެފައިވާއިރު މާނޭވާ ލެވެއެވެ. ހިތްވެސް ނެގިނެގިފައި ޖެހެމުންދިޔައެވެ. ބިރުންހުރެ ކައިލް ކޮބާތޯ ބަލާލިއިރު އެނދުގައި ކައިލް ނެތުމުން އިތުރަށް ބިރުގަތެވެ. ވަށައިގެން ނަޒަރު ހިންގާލި ހިނދު ބެލްކަންޏަށް ނުކުންނަދޮރު ހުޅުވިފައި ހުރިތަން ފެނުނެވެ.

“..ކައިލް..” ކައިލްއަށް ގޮވާލަމުން އެނދުންތެދުވީމެވެ. މަޑުމަޑުން ފިޔަވަޅުތައް އަޅަމުން ދޮރާ ހަމައަށް ދެވުނުއިރު ކައިލް ވާހަކަ ދައްކާ އަޑުއިވުނެވެ.

“..ބުނެފީމެއްނުން މަށަށް އުނދަގޫ ނުކުރާށޭ.. ދެން ކަލޭ މަށަށް ގުޅާފިޔާ މަމީ ނުބައި ނުލަފާ މީހެއްކަން އަންގާލާނަން.. ހަނދާންކުރާތި..” ކައިލް އެހެން ބުނަމުން ފޯން ކަނޑާލަމުން އެނބުރިލުމާއެކު އަހަރެން ފެނުމުން ކޮންމެސް ވަރެއްގެ ސިހުމެއްލިބުނެވެ. ނަމަވެސް ވަގުތުން ހިނިތުންވެލަމުން ހަމަޖެހިލިއެވެ.

“..ޔުމްނު…” ކައިލް ބުނެލިއެވެ. އަހަރެން ބޯ ޖަހާލީ ޔުމްނުކަން އެނގެޔޭ ބުނަންވެގެންނެވެ. އޭނަގެ އުނދަގޫ އަހަރުމެންނަށް ފޯރާނެކަން އަހަންނަށް މާކުރިންވެސް އެނގެއެވެ. ކައިލް ހެއްލިގެން އެމަޅީގައި އަލުން ނުޖެހުނިއްޔާ ކިތަންމެހާވެސް ރަނގަޅެވެ.

“..ކިހިނެއްވީ ހޭލެވުނީ..” ކައިލް އެހިއެވެ.

“..ކަމެއްނުވެ.. ހަމަ ހޭލެވުނީ..” އަހަރެން ކަމެއް ނުވާކަމަށް ބުނެ އޮޅުވާލީ  އަހަރެން ކައިލްއަށް ޝައްކުކުރާކަން ނާންގަންވެގެންނެވެ. ހުވަފެނަކީ ބިލާހެއްކަމަށް ޤަބޫލްކުރަމެވެ. ނަމަވެސް އަހަރެންނަށް އެހުވަފެން އެގޮތަށް ފެނުމުގެ ފަހަތުގައިވެސް ކޮންމެވެސް ހިކުމަތެއްވާނެއެވެ. ފަހަރުގައި އެއީ ކައިލްއަށް ސަމާލުވުމަށް ލިބުނު އިންޒާރަކަށްވެސް ވެދާނެއެވެ.
************
އަހަރެންނަށް ހެނދުނު ހޭލެވުނީ 09 ޖަހަން އުޅެނިކޮށެވެ. އަވަސްއަވަހަށް ތެދުވަނިކޮށް މަންމަ ކޮޓަރިއަށް ވަންނަމުން އަމުރުވެރި ރާގެއްގައި ނުތެދުވުމަށް ބުންޏެވެ. ނަމަވެސް މަންމަ ހުރީ އުފާވެފައެވެ. މަންމަ ފަހަތުން ކިނާންވެސް ކޮޓަރިއަށް ވަނެވެ. މަންމަ އުފާވެފައި ހުންނަ ސަބަބު އަހަރެންނަށް އެގިއްޖެއެވެ. ކައިލްވަނީ މަންމައަށްވެސް ހުރިހާ ވާހަކައެއް ކިޔާދީ މަންމަ ކިބައިންވެސް މާފަށް އެދިފައެވެ.

“..މަންމީ.. ކޮއްކޮ މަންމިއަށް ޑިސްޓާބް ނުކުރީ ޑެޑީ ބުނީމަ..” ކިނާން ދުވެފައި އައިސް އެނދަށް އެރިއެވެ. “..ޑެޑީ ބުނީ މަންމި ބަލިއޭ.. ބަސްއަހައްޗޭ..”

“..އެހެންތަ މަންމި ގެ ޕްރިންސް..” އަހަރެން ކިނާން ގަޔާލާ ބޮނޑިކޮށްލީމެވެ. މަންމަ އައިސް އަހަރެން ބޮލުގައި ފިރުމާލިއެވެ.

“..ކީއްވެތަ ގޮވާނުލީ..” އަހަރެން މަންމަގެ މޫނަށް ބަލާލަމުން އެހީމެވެ.

“..މީ ދަރިފުޅު އަރާމުކުރާ ދުވަސް..” މަންމަ ބުންޏެވެ.

“..ގުޑް މޯނިން ލޫޝް..” ކައިލް ތަބަކެއް ހިފައިގެން ކޮޓަރިއަށް ވަންނަމުން ބުނެލިއެވެ. އެމޫނުމަތިންވެސް ފެންނަނީ ތާޒާކަމެވެ. އުފާވެރިކަމެވެ. އެނދުކައިރީ ހުރި ސައިޑް ޓޭބަލްމަތީ ތަބަށް ބަހައްޓަމުން އަހަރެންނާ ކައިރިކޮށްލިއެވެ. ތަބަށް ތެރޭގައި ހުރީ ހެނދުނުގެ ނާސްތާއެވެ. ހުނިލީ ރޮއްޓާއި މަސްހުންޏެވެ. ޖޫސްތައްޓަކާއި ފެންތައްޓެއްވެސް ހުއްޓެވެ. އަހަރެންނަށް ކައިލްގެ މޫނަށް ބަލާލެވުނެވެ.

“..ދެން މީ ކޮންކަމެއް..” އަހަރެންނަށް ބުނެވުނެވެ. “..ކައިލް އޮފީހަށްވެސް ނުދަންތަ.. އަހަރެން މިތަނުން ހިރިނުލެވެހާ ބައްޔެއް ނޫނޭ..”

“..މިއަދު މީ ލޫޝް އަރާމްކުރާ ދުވަސް.. މާގިނަ ވާހަކަ ނުދައްކާ މަޑުމަޑުން އިނދޭ..” ކައިލް ރޮށިކޮޅެއް ނައްޓާލަމުން މަސްހުނި ކޮޅަކާއެކު އަހަރެންގެ އަނގަޔާ ކައިރިކޮށްލިއެވެ. އަހަރެން އަނގަ ނުހުޅުވާ އިނުމުން ބުމަ އަރުވާލަމުން އަނގަ ހުޅުވަން ބުންޏެވެ. އަހަރެން ކައިލްއާ ދިމާއަށް ލޯ އަޅާލަމުން ރޮށި ކޮޅު އަނގަޔަށް ލަމުން މަންމައަށް ބަލާލިއިރު މަންމަ ހުރީ ފެންކަޅިވެފައެވެ. އަހަރެންވެސް ކުޑަކޮށް ފެންކަޅިވިއެވެ. އެއީ އުފާވެރިކަމުގެ ކަރުނައެވެ.

“..އަހަރެން މިއަދުން ފެށިގެން މިހުރީ ޗުއްޓީގަ..” ކައިލް އަނެއްކާވެސް ރޮށިކޮޅެއް ދިއްކޮށްލަމުން ބުނެލިއެވެ. “..އަދި ލޫޝްއަށް ދޭން އެބައޮތް ވަރަށްބޮޑު ސަޕްރައިޒްއެއްވެސް..”

“..ކޯއްޗެއް.. ކޮން ސަޕްރައިޒް އެއް..” އަހަރެންނަށް އެހުނެވެ.

“..ބުނީމަ ސަޕްރައިޒް ސަޕްރައިޒަކަށް ނުވާނެދޯ.. މިގޭ ސިޓިންގ ރޫމްގަ އެބައިން އެސަޕްރައިޒް.. އަވަސްކޮށްލާ..” ކައިލް ޖޫސްތަށި އަހަރެންގެ ތުންފަތުގައި ޖައްސާލަމުން ބުނެލިއެވެ.

“..ކޮއްކޮވެސް ނުބުނާނަން އިނގެ ޑެޑީ..” ކިނާންވެސް އަނގަމަތީ އަތް އަޅާލަމުން ބުނެލީ އެސަޕްރައިޒްއެއް އޭނަގެ އަނގައިން ބޭރުވެދާނެތީ ކަންނޭގެއެވެ. އަހަރެން ގާތަށް ހިނިއައެވެ. މަންމައާއި ކައިލްވެސް ހޭންފެށިއެވެ.

އަހަރެން ސައިބޮއެ ނިމުމާއެކު ކައިލް މޭޒު ދުރުކޮށްލަމުން ގޮސް ދޮރު ހުޅުވާލިއެވެ. އަދި އަތުގެ އިޝާރާތުން އެތެރެއަށް އައުމަށް އެދުނެވެ. އަހަރެންނަށް ޔަޤީންކުރެވުނީ ސިޓިން ރޫމްގައި އިނީ ކޮންމެވެސް މީހެއްކަމެވެ. އެއީ ކާކުކަން ބެލުމުގެ ޝަޢުޤުވެރިކަމެއް އުފެދިގެން ދިޔައެވެ.

“..ސަޕްރައިޒް..” ކުއްލިއަކަށް އެމީހަކު ކޮޓަރި ދޮރުމައްޗަށް އަރަމުން ފިރިހެން ވަންތަ ބަރު އަޑަކުން ބާރަށް ބުނެލިއެވެ.

“..ލޫޠު..” އަހަރެންނަށް ލިބުނު ހައިރާންކަމާއެކު ކުއްލިއަކަށް ކޮޅަށް ތެދުވެވުނެވެ.