ހައިރާ? (އެއްވަނަބައި)

“ހޭއި ލަވް. ދެންބުނެބަލަ އޭރު ބުނަން އުޅުނުވާހަކަ. ތިހާ ހިތްތަޅުވަން ނޫޅެބަ. ހެއިލްގެ ކަންކަމުގަ އަހަރެން ވަރަށް ކެތްމަދުވާނެ އިނގޭ.” ޒަކްޔަންގެ ބަރު، ފިރިހެންވަންތަ އަޑުން ލުއި ހިނިތުންވުމެއްގެ އަޑު އިވިގެން ދިޔައެވެ. “ޔަން، މަންމަ މެންނަށް ޔަން އިންޓްރޮ…” ހައިލިޔާ ގެ ވާހަކަ މެދުކަނޑާލަން ޒަކްޔަންއަށް މަޖުބޫރުވިއެވެ. “ހެއިލް. ލަވް، ވަރަށް އާރޖެންޓްކޮށް ދާންޖެހިއްޖެ. ބާއި ލަވް” ޒަކްޔަން ފޯނު ކަނޑާލިއިރު ހައިލިޔާއަށް އޭނާގެ މަންމަގެ ދިހަ މިސްޑް ކޯލާއި ބައްޕަގެ އަށް މިސްޑްކޯލު އަދި ސަތާރަމެސެޖު އައިސްފައިވެއެވެ. ހާސްވެފައިވާ ހައިލިޔާ މެސެޖުތައް ކިޔާލިއިރު ގެޔަށް އައުމަށްބުނެފައި ވެއެވެ.

ލައިގެންއުޅި މަޑު ވައިލެޓް ގަމީސް ރަނގަޅަށް ޕެންސިލް ސާރކްޓް ދަށަށްޖަހާލަމުން އުނަގަނޑުން ތިރިއަށް އޮންނަ ފުރިހަމަބުޅި އިސްތަށިގަނޑު އަތުން ރީތިކޮށްލަމުން އަރައިގެން ހުރި އުސްބޫޓާއެކު ދުވެވުނުގޮތަކަށް ދުވަމުން އޮފީހުން ނިކުމެ ހައިލިޔާ ކާރު ގަރާޖުން ނެރެ ބާރަށްދުއްވާލިއެވެ. އަދި އޮފީހަށްގުޅާލިއެވެ. “ރިޝްފާ. ހުރިހާ މީޓިންތަކެއް ކެންސަލްކޮށްލާ.”

އަވިގަދަކަމުން އަވިއައިނުގެ އެހީގައި ދެލޯފޮރުވާލައިގެން ހުރި ޒަކްޔަން އައިނުނެގުމަށްފަހު ޖީބަށްލަމުން އެބޮޑު އިމާރާތަށް ނަޒަރު ހިންގާލިއެވެ. ދަންނަ ގެއެއްކަމުން ހިތްތެޅުމުން ދިޔައެވެ. ލިފްޓަށްއަރާ ހަތްވަނަ ފަންގިފިލާއަށް ފިތާލުމަށްފަހު ކެތްތެރިކަމެއްނެތި އޭނާ މަޑުކުރަމުންދިޔައީ އެދޮރުހުޅުވޭނެ ވަގުތަކަށެވެ. ދޮރު ހުޅުވުމާއެކު ފަހަތުގައި ތިބި މީހުންނަށްބެލުމެއްވެސް ނެތި ޒަކްޔަން ނިކުމެގެންގޮސް ބެލް އަޅާލިއެވެ. ދޮރުހުޅުވާލީ ވަރުގަދަ، ބިޔަ، އިސްކޮޅުން ދިގު ފިރިހެނެކެވެ. އޭނާ ހުރީ ކޯޓުފަޓުލޫނަގެއެވެ. ހީވާގުތުން އެއީ އޮފީހެއްގެ ބޮޑުމީހެކެވެ.

ކާރު ރަނގަޅަށް ޕާކުވެސް ނުކޮށް ހައިލިޔާ ދުވެފައި ކަހަލަގޮތަކަށް ގެޔަށްވަނެވެ. އޭރު މުޅި އިމާރާތާ އިމާރާތުގެ ގޯތި ތެރޭގައިވަނީ ޕޮލިހުންނެވެ. އެމީހުންތަކުގެ ތެރެއިން ހައިލިޔާއަކަށް ނުދެވުނެވެ. އެމީހުން ބުނާގޮތުން ވެއްޖެޔާ ކްރައިމް ސީނެކެވެ. “އަޖައިބެއް. މީ މަގޭ ގެޔޭ!! ކޮބާތަ ތިމީހުންގެ ބޮޑުމީހާ” ހައިލިޔާ އެންމެފަހުން ރުޅިގަދަވެގެން ބާރަކަށް އަހާލިއެވެ. “ހެއިލް….” އެމީހުންގެ ތެރެއިން ޒަކްޔަން ފެނުމުން ހައިލިޔާ މަޑުޖެހިލިއެވެ. “ޔަން..ކިހިނެއްތަ ވެގެން މިއުޅެނީ..ކޮބާތަ މަންމަމެން..ޔަން މިތާނގަ ކީއްތަ ތިކުރަނީ..” ހައިލިޔާއަށް ރޮވުނެވެ. ވެގެން އުޅޭގޮތް ނޭންގުނަސް ވެގެން އުޅެނީ ބޮޑުކަމެއްކަން އޭނާއަށް އިނގެއެވެ.

ޒަކްޔަން ހަނދާނަށް އައީ މީގެ ކުޑައިރުކޮޅެއް ކުރިއެވެ.

***

“އަޅުގަނޑަކީ ޗީފް އިންވެސްޓިގޭޓަރ އަހްމަދް ޒަކްޔަން.” ބެޖުދައްކާލަމުން ޒަކްޔަން ބުނެލިއެވެ. އެވަގުތު ރޮމުން އަންހެނަކު ދުވެފައި އައެވެ. “ބައްލަވާ..އަޅުގަނޑުގެ ދަރިފުޅު..ކޮންމެސް މީހަކު…މުޅި..ލޭ..” އެޔާއެކު އެމީހަކު  އަނބުރައިގަނެގެން ވެއްޓުނެވެ. “އަޅުގަނޑުމެން މިތަން ބަލާލާނަން. ސޮރީ ފޯ ޔުއާ ލޮސް” ޒަކްޔަން ގޭތެރެއަށް ނަޒަރު ހިންގާލިއެވެ. ބިއްލޫރި މޭޒުއޮތީ ކުދިކުދި ވެފައެވެ. ލޭތަކާއެކުވެ ބުރައިގެން ގޮސްފައިވާ ބިއްލޫރި ކޮޅުތަކަށް ނޭރުމަށް ފަރުވާވެހުރެ ޒަކްޔަން ކުރިއަށް ދިޔައެވެ. އަގުބޮޑު ފަރުނީޗަރުތަކެވެ. މުޅި ގެ ރީނދޫކުލަ އަދި ހުދުކުލައި ޒީނަތްކޮށްފައިވާލެއް ވަރަށްވެސް ފުރިހަމައެވެ. ނަމަވެސް މުޅި މަންޒަރު ވަނީ ބިރުވެރިވެފައެވެ. ލޭގެ ކޯރެއްގައި ބަންޑުންއޮތް ކުއްޖާގެ ކައިރިޔަށް ޖެހިލުމަށްފަހު ޒަކްޔަން އަންގި ލައްވާލައިގެން އޭނާގެ މޫނަށް ރަނގަޅަށް ބަލާލިއެވެ. “އީރޫ…..”

ހައިރާގެ ފުރާނަނެތް މަސްގަނޑަށް ނަޒަރު ހުއްޓާލައިގެން އިން ޒަކްޔަން އިނީ ގަނޑުވެފައެވެ. މުޅި ވާއަތުގައި ވަޅި އަޅާފައި ވީއިރު ކަނާއަތުގައި ވަޅި އޮތެވެ. “ސާރ. އަޅުގަނޑުމެން ފޮޓޯނަގަން..” ޒަކްޔަން މޫނުގައި އަތް އުނގުޅާލަމުން ކޮޅަށްތެދުވިއެވެ. އަދި އެދެމަފިރި ގާތަށް ދިޔައެވެ. “ކާކަށްތޯ އެންމެ ފުރަތަމަ ހައިރާ ފެނުނީ؟” ޒަކްޔަން ދެމީހުންނަށް ބަލާލަމުން އަހާލިއެވެ.

“އަޅުގަނޑަށް. މިއަދަކީ އަޅުގަނޑުގެ ހެދުން ލިބޭ ދުވަސްވީމަ ހައި ބުނެފަ އޮތީ މިބަޔަށް އަންނަން. އަހަރެން ތަޅާތަޅާވެސް ދޮރު ނުހުޅުވި. ދެން ޑަބަލްކީ ހިފައިގެން އައިސް ދޮރުހުޅުވިއިރު ….އަހަރެން ވަގުތުން ހަޝީމަށް ގުޅީ.” ހައިރާގެ މަންމަ ނީރާ ކިޔައިދިނެވެ. “އެންމެ ރަނގަޅު. މިމަރު ތަހުގީގު ކުރަންދެން އެއްވެސް މީހަކު މާލެ ދޫކޮށް ގޮސްގެން ނުވާނެ. އަޅުގަނޑުމެން އެކޮޅުން ގުޅާލާނަން”

***

“ހެއިލް..އީރޫ އިޒް ނޯ މޯ..އީރޫ އަހަރެމެންނާ ވަރަށް ދުރަށް ގޮސްފި” ހައިލިޔާގެ އަތުގައި ހިފާލަމުން ޒަކްޔަން ބުނެލިއެވެ. ހައިލިޔާ އެހުރިގޮތަށް ތިރިވިއެވެ. އެވަގުތަކީ ހައިރާގެ ހަށިގަނޑު އެންބިއުލާންސަށް ލާން ގެނެވުނު ވަގުތެވެ. ހައިލިޔާ ދުވެފައި އެދިމާލަށް ދިޔައެވެ. ފަހަތުން ޒަކްޔަންވެސް ދުއްވައިގަތެވެ. “އީރޫ…އޭ…ދޮންތާ…އީރޫ..ވައި؟؟؟” ހުދުފޮތިގަނޑަކުން ފޮރުވާލެވިފައިވާ ހައިރާގެ ހަށިގަނޑުގައި ބައްދާލައިގެން ހުރެ ހައިލިޔާ ރޯންފެށިއެވެ. ޒަކްޔަން ހައިލިޔާ ގަދަކަމުން ދުރުކޮށްލުމަށްފަހު ހަޝީމްއާ ހަވާލުކުރަމުން ހައިރާގެ ހަށިގަނޑާއެކު ނައްޓާލިއެވެ.

ޒަކްޔަންމެން ހައިރާ ގޮވައިގެން ހޮސްޕިޓަލަށް އައިތާ މާގިނައިރެއްނުވެ ހައިލިޔާމެންވެސް އައެވެ. އޭރު ހައިލިޔާގެ ރުއިން ހުއްޓިފައި ވީއިރު އެދެލޯވަނީ ރަތްވެފައެވެ. މޫނުގައިވާ މޭކަޕްތައް ފުހެވިފައި ވީއިރު އެތުންފަތުގައި މަޑުތުރުތުރެއް ވިއެވެ. ކައިރީގައި ހުރި ހަޝީމްގެ ހާލަކީ ތޯއެވެ. ބޮޑު ފިރިހެނަކަސް ހުއްޓުމެއްނެތި އޭނާ ދިޔައީ ރޮމުންނެވެ. ނަމަވެސް މަޑުންނެވެ. އޭނާގެ ބޯ ހާވާލައިފައި ވީއިރު ކަރުގައި ޓައި ނުވެސްނެތެވެ. ނީރާ ފެންނަނީ މަޑުމޮޅި ގޮތަކަށެވެ. ޒަކްޔަން މަޑުމަޑުން ގޮސް ޑޮކްޓަރާ ބައްދަލް ކޮށްލިއެވެ. “ލޭހުސްވެގެން މަރުވީ. ލަފާކުރެވޭގޮތުގައި ރޭގެ ދަންވަރުގެ ވަގުތެއްގައި މަރުވީ..އިޒް ޝީ ޔުއާ ގާރލްފްރެންޑް؟” ބޯ ހޫރާލަމުން ޒަކްޔަން ހީލިއެވެ. އަދި ހޮސްޕިޓަލުން ނިކުމެ މޫދާދިމާއަށް ހިނގައިގަތެވެ.

ހައިރާއަކީ ޒަކްޔަންގެ ދުވަސްވީ އެކުވެރިއެކެވެ. ހައިރާއާ އެންމެ ފުރަތަމަ ޒަކްޔަންއާ ދިމާވީ ރީހެބިލިޓޭޝަނުންނެވެ. ކިޔަވަން ހުރި އިރު ހައިރާވަނީ ޑްރަގްގެ ޝިކާރައަކަށް ވެފައެވެ. ކިޔަވައިގެން ރާއްޖެއައި އިރު އެފަކީރު ހުރީ މުޅިންހަލާކުވެފައެވެ. އެކަމުން ސަލާމަތްކުރުމަށް އޭނާގެ އާއިލާއިން އެމަރުކަޒަށްފޮނުވީއެވެ. ޒަކްޔަން އަކީ އޭރު އެސެލްގެ އިންޗާޖެވެ. އޭނާއަކީ މާބޮޑު ރޭންކެއްނެތް ސެލް އިންޗާޖެކެވެ. ހައިރާ ރަނަގަޅުވަމުން އައިތަން އެންމެ ގާތުން ފެނުނު ހައިރާގެ އެންމެ ގާތް އެއްފަރާތަކީ ޒަކްޔަންއެވެ. ޒަކްޔަންއަށް ހައިލިޔާއާ ދިމާވީވެސް ހައިރާގެ ސަބަބުންނެވެ. އެދެމީހުންގެ ގުޅުމަށް މަރުހަބާކިޔާ އެކަމާ އެންމެ އުފާކުރި އެކަކަށް ހައިރާ ވާނެއެވެ. ހައިރާއަށް އެހެން އެވީ ކިޢްވެބާއެވެ؟ ގައިމު ދާދި ފަހުން އޭނާވަނީ ޒަކްޔަންއާއެކު ކަމަކު ހޮސްޕިޓަލަށްވެސް ގޮސް އެހީވެދީފައެވެ. އޭރުވެސް އެއްވެސް މައްސަލައެއްގައި އޭނާ އުޅޭ ވާހަކައެއް ނުބުނެއެވެ. މިއަދު ހައިރާގެ މަރުގެ ތަހުގީގާ ހަވާލުވެ ހުރި ޑޮކްޓަރާވެސް ވާހަކަދައްކާހެދީ ހިޔާލެއް ފިކުރެއް ނެތިއެވެ. ޒަކްޔަންއަކަށް އެކައްޗެއްވެސް ނުވިސްނެއެވެ.

ޒަކްޔަންއަށް ހިޔާލުތަކުގެ ތެރެއިން ނިކުމެވުނީ އޮފީހުން ފޯނުއައުމުންނެވެ. “އެބަދަން.” ސައިކަލު ނުލާ އާދެވުމާއެކު އަވިގަނޑުން ހިނގާފައި ދިޔުމާއެކު ވަރުބަލިކަން އިހުސާސްކުރެވުނެވެ. ޒަކްޔަން އޭނާގެ ކެބިންއަށް ވަދެ  ޗާޓެއް ކުރަހާލިއެވެ. މެދުގައި ހައިރާގެ ނަން ލިޔުމަށްފަހު ހައިލިޔާ، ނީރާ އަދި ހަޝީމްގެ ނަންލިޔެ ގުޅުވާލިއެވެ.”ސާރ، ތަހުގާގަށް އައުމަށް އާއިލާއަށް ގުޅައިފިން. މިހާރު އަންނާނެ. އޭގެ ކުރިން ސީ.ސީ.ޓީ.ވީ ފުޓެޖް ބައްލަވާލަން ހިންގަވާ.” އެތެރެއަށް ވަދެގެން އައީ ޒަކްޔަންގެ އެސިސްޓެން ބުނެލިއެވެ. ބޯ ޖަހާލަމުން ފުން ނޭވާއެއް ލުމަށްފަހު ޒަކްޔަން ހިނގައިގަތެވެ.

ސިޑިމަތީގެ ހުރިހާ ކެމެރާއެއްވަނީ ހަލާކުވެފައެވެ. ވުމާއެކު ލިފްޓުން އަރާފޭބި މީހުންނަށް ޒަކްޔަން ރަނގަޅަށް ބެލިއެވެ. އެދުވަހުގެ އިތުރަށް މުޅި ހަފްތާގެ ވީޑިއޯތައް ބެލިއެވެ. އެ ވީޑިއޯ ބަލާ ނިންމާލިއިރު ޒަކްޔަންގެ ނިތަށް ރޫތަށް ގިނަވެގެންދިޔައެވެ.”ސާރ. ހައިރާގެ ފެމެލީ އެބަތިބި. އެންމެ ފުރަތަމަ އެތެރެއަށް މިގެންދަނީ ހައިރާގެ ކޮއްކޮ، ހައިލިޔާ”ޒަކްޔަންގެ ބޮލުގައި ރިއްސާލިއެވެ. އެއްވެސް ހާލެއްގައި އޭނާ ހައިލިޔާއާ އެގޮތަށް ސުވާލު ކުރާކަށް ބޭނުމެއް ނޫނެވެ. ނަމަވެސް ވަޒީފާގެ ގޮތުންނާ އޭނާގެ އެކުވެރިޔާގެ ހައްގުގައި ހަގީގަތް ހޯދަން ވަނީ މަޖުބޫރުވެފައެވެ.

ޒަކްޔަން އިންޓެރޮގޭޝަން ރޫމަށްވަތް އިރު އިން ހައިލިޔާފެނި މަޑުޖެހިލެވުނެވެ. އެތަނުގެ ފިނިކަމުން އޭނާ އިނީ ފިނިވެފައެވެ. ދެއަތް ދެއަތާ މޮޑެމުން ދިޔައިރު އިނީ ބިރުންކަން އިނގެއެވެ. ޒަކްޔަން ފުންނޭވާއެއްލަމުން އެތެރެއަށްވަނެވެ. ޒަކްޔަން ފެނުމާއެކު ހައިލިޔާއަށް ތެދުވެވުނެވެ.”ޔަން..އަ”

“ހައިލިޔާ ހަޝީމް. އިނގިލައްވާ ދެއްތޯ މިއީ އިންޓެރޮގޭޝަން ރޫމްކަން؟ މިތަނުގައި ދެކެވޭ ހުރިހާ ވާހަކަތަކާ މަންޒަރުތައް ރިކޯޑު ކުރެވޭނެ. އަޅުގަނޑުމެން ހައިލިޔާ މިކޮޅަށް މި ގެނައީ ރޭގެ ވަގުތެއްގައި މި ދުނިޔެ ދޫކޮށްފައިވާ ހައިރާގެ މަރާ ބެހޭ ތަހުގީގު ކުރުމަށް.” އަތުގެ އިށާރާތުން އިށީންނަން ބުނަމުން ޒަކްޔަން ހައިލިޔާގެ ވާހަކަ މެދުކަނޑާލިއެވެ. ބޭނުން ނުވިއަށް އެތަނުގައި ވާހަކަދައްކަންޖެހޭ ގޮތަކީ އެއީއެވެ. “ކިތައްދުވަސް ވެއްޖެ ސިޑީގަ ހަރުކޮށްފަ ހުންނަ ކެމެރާތައް ހަލާކުވެފަ ހުންނަތާ؟” ހައިލިޔާ ދިޔައީ ސިހިގެންނެވެ. އަދި މަޑުމަޑުން ނޭންގޭ ކަމަށް ބުނެލިއެވެ. “އެންމެ ރަނގަޅު. އަޅުގަނޑުގެ މައުލޫމާތު ދޮގު ނޫންނަމަ ހައިލިޔާ އުޅެނީ އަށްވަނަ ބައިގަ. އެހެންނު؟” ހައިލިޔާ މަޑުމަޑުން ބޯޖަހާލިއެވެ.

“މިއަދު ސިޑިން ފައިބަން ނިންމީ ކީއްވެގެން ތޯ؟ މިބުނީ ފަސޭހަ ލިފްޓެއް އިންދާ ކުއްލިއަކަށް މިއަދު ސިޑިން ފޭބީމަ.” އެފިނީގައިވެސް ހައިލިޔާގެ މޫނުން ދާހިއްލައިލިއެވެ. “އަ…އެއީ..މި..ފޯނެއްގަ ހުރެގެން..އއަނެއް..ފޭބުނީ..” މޫނު ފުހެލަމުން ހައިލިޔާ ޖަވާބުދިނެވެ. ޒަކްޔަން އަނެއްކާވެސް އެއްޗެކޭ ބުނަން އަނގަ ހުޅުވާލިއެވެ.”ފެންފޮދެއް ލިބިދާނެތޯ؟”ހައިލިޔާ އަހާލިއެވެ. ޒަކްޔަން ފެން ގެނަސްދިނުމަށްފަހު އެތަނުން ނިކުތެވެ. އޭރު އޭނާގެ ސިކުނޑި ހީވަނީ ފަޅައިގެން ގޮސްދާނެ ހެންނެވެ. ހައިލިޔާ އެހަދަނީ ދޮގުކަން އޭނާއަށް އިނގެއެވެ. ނަމަވެސް އެ ދޮގު ހަދާ ސަބަބެއް ނޭންގެއެވެ. އަނެއްކާ މިގޮތަށް ހައިލިޔާއާ ވާހަކަ ދައްކާކަށް ޒަކްޔަން އެއްވެސްވަރަކަށް ބޭނުމެއްނުވެއެވެ. އައި ރުޅީގައި ފާރުގައި ގޮށްމުށުން ޖަހާލެވުނެވެ. އަދި އިރުކޮޅެއްފަހުން މީހާ ހަމައަކަށް އަޅުވާލަމުން އަނެއްކާވެސް އެތަނަށްވަނެވެ.

“ހައިރާގެ ގެއަށް ރޭގަ ދިޔައީ ކޮންކަމަކު؟”ޒަކްޔަންގެ ސުވާލުތައް ހުސްނުވެއެވެ. “ދޮންތަ ގުޅީމަ.” ހައިލިޔާގެ ޖަވާބު ކުރެވެ. “ދޮންތަ ގުޅީ ކޮންކަމަކު؟” ޒަކްޔަން ލޯ ހަނިކޮށްލިއެވެ. “އަހަރެމެން ދެމީހުންގެ ދޭތެރޭގަ ކުރިން އޮތް މައްސަލައެއް. އެކަމާ މައާފަށް އެދެންވެގެން. ދެން ބުނީ މިއަދު ދެމީހުން އޮފީހަށް ދާނީ އެއްކޮށް ދޯ އޭ.” ޒަކްޔަން ހީލިއެވެ. “ދެން އޮފީހަށް ދިޔަ ގަޑީގަ އެހެންވެ ދޯ ސިޑިން ދިޔައީ..ހައިރާއަށް ގޮވަން..ދޮރު ނުހުޅުވި ދޯ؟ ހުޅުވާކަށް ނޫޅެން ތަ؟ ނޫނީ ފޯނުގަ ހުރީމަ ފޯނުގަ ހުރީމަ ދޮންތައަށް ގޮވަން ހަނދާން ނުވީތަ؟”

ނުނިމޭ..