މަގޭ ލޯބި ބައްޕާ

އެއީ އަހަރެންގެ ބައްޕައެވެ. އަހަންނަށް އިންތިހާ އަށް ލޯބިދިން އަހަރެންގެ ބައްޕައެވެ. އަހަރެންގެ ދުލުން ބޭރުވު ކޮންމެ ކަމެއް ކޮށްދިން އަހަރެންގެ ބައްޕައެވެ. އަހަންނަށް އަތުން ލަވާ ކާންދީ އަހަންނަށް ފެންދިން އަހަރެންގެ ބައްޕައެވެ. އަހަންނަށް ވާހަކަ ކިޔައިދީ އަހަރެން ނިންދަވާ ހެދި އަހަރެންގެ ބައްޕައެވެ. އަހަންނާ އެއްކޮށް ކުޅެހަދާ ހީސަމާސަ ކުރި އަހރެންގެ ބައްޕައެވެ. އަހަރެންގެ ބައްޕަ މަތިން އަހަރެން ވަރަށް ހަނދާންވެއެވެ. އެދުވަސްތައް އަނބުރާ އަންނާނެ ނަމައޭ އަހަރެންގެ ހިތަށް އަރައެވެ. އަހަރެންގެ ބައްޕަގެ ހިތްދަތި ވަކިވުން އަހަރެން ދުވަހަކުވެސް ހަނދާން ނުނެތޭނެއެވެ.

އެއީ އެއްދުވަހެއްގެ ހެނދުނުގެ ވަގުތެވެ. އަހަރެން އޮތީ އަހަރެންގެ މާމަ ކޮޓަރީގައި ނިދާފައެވެ. ހޭލެވުނީ ވަރަށް ހާސްވެހުރެ މާމަ ގޮވާ އަޑަށެވެ. ލިބުނު ހަބަރަކުން އަހަންނަށް ހީވީ އަހަރެންގެ ފައިދަށުން ބިންގަނޑު ދެމިގެން ދިޔަހެންނެވެ. އަހަރެންގެ ބައްޕަ މާލޭގައި ހުންނަ އައި ޖީ އެމް ހޮސްޕިޓަލްގެ އައި ސީ ޔޫ ގައި އޮތް ހަބަރެވެ. ބައްޕަ އަށް ވީގޮތް ކިޔައިދޭން މާމައަކަށް ނޭނގުނެވެ. އަހަންނަކަށް ވާހަކައެއް ނުދެއްކުނެވެ. ދުވެފައި ދެވުނީ މަންމަ ކޮޓަރިއާއި ދިމާއަށެވެ. ކޮޓރިއަށް ވަދެވުމާއެކު އެނދުމަތީގައި ރޯންއިން އަހަރެންގެ މަންމަ ފެނުނެވެ. މަންމަ އެހާވަރަށް ރޮނިކޮށް ފެނުނު ފުރަތަމަ ފަހަރެވެ. އަހަންނަށް މަންމަ ހިތްހަމަ ޖައްސައިދޭން ބުނާނެ އެއްޗެއް ނޭނގުނެވެ. އެހެން ކަމުން އަހަރެން އަވަހަށް ވަނީ ފާހާނައަށެވެ. ފާހާނައަށް ވަދެވުމާއެކު އަހަރެންގެ ބަޑި ފަޅައިގެން ދިޔައެވެ. ބާރަށް ނުރޯން މަސައްކަތް ކުރި ނަމަވެސް އެކަން ކާމިޔާބެއް ނުވިއެވެ. އަވަހަށް އަނގަމަތީގައި އަތްއެޅީ މަންމައަށް އަޑި އިވިދާނެތީއެވެ. އަހަރެންގެ އަމިއްލަ ނަފްސު އަހަމައަކަށް އަޅުވާލުމަށްފަހު މޫނު ދޮވެލައިގެން އަހަރެން ފާހަނައިން ނިކުތީމެވެ. އޭރު އަހަރެން ބޮޑު ދައިތަ މަންމަ ކައިރީގައި އިންދެ މަންމައަށް ނަސޭހަތްތެރިވަމުން ދިޔައެވެ. ނުރޮއެ ހުއްޓާލުމަށް އެތައް ފަހަރަކު ބުނަމުން ދިޔައެވެ. ބޮޑު ދައިތަގެ އެތަކެއް ނަސޭހަތަކަށް ފަހު މަންމަ ހަމައަކަށް އެޅުނެވެ. ބޮޑުދައިތަ ދާން އުޅުމުން ބައްޕައަށް ވީ ކިހިނެއްތޯ އަހަރެން ސުވާލުކުރީމެވެ. ބޮޑުދައިތަ ބުނީ ބައްޕަގެ ސިކުނޑިގެ ލޭނާރެއް ފަޅައިގެން ގޮސްގެން އުޅޭ ވާހަކައެވެ. އެއަށް ވުރެ އިތުރަށް ކިޔައިދޭން ބޮޑުދައިތައަކަށްވެސް ނޭގުނެވެ.

ފަހުން ބައްޕަގެ ރައްޓެއްސެއް ކިޔައިދިން ގޮތުގައި ބައްޕަ މާލޭ މަގުމަތީގައި ރިހާކުރު ބާލިދީ ބޮލަށް ލައިގެން ރަތްދަކަ އަވީތެރޭ ކޮންމެ ދުވަހަކުހެން ރިހާކުރު ވިއްކަން އުޅެނެވެ. އެއްދުވަހަކު ރިހާކުރު ވިއްކަން އުޅުމުގެ ތެރޭގައި ބައްޕަ ބޮލަށް އެނބުރުން އަރާ ހޭނެތިގެން ވެއްޓުނީއެވެ. ހޮސްޕިޓަލަށް ގެންދިއުމުން އެނގުނު ގޮތުގައި ބައްޕަގެ ސިކުނޑީގެ ލޭނާރެއް ފަޅައިގެން ގޮސް ސިކުނޑީގައި ލޭގަނޑުވީއެވެ. އެވާހަކަ އަޑުއިވުމުން އަހަރެންގެ ހިތްފަޅައިގެން ދިޔަކަހަލައެވެ. ބައްޕަ ރިހާކުރު ވިއްކަން ބާލިދީ ބޮލަށް ލައިގެން ރަތްދަކަ އަވީތެރޭގައި ހިނގީ އަހަރުމެންނަށްޓަކައެވެ. އަހަރުމެންނަށް ރަނގަޅު ގޮތް ހޯދާ ދިނުމަށް ލާރި ހޯދުމަށެވެ. އެވަގުތު އަހަރުމެންގެ ނިކަމެތިކަން ހިތަށް އަރާ އަހަންނަށް ހިތާ ހިތުން ޝަކުވާކޮށްލެވުނެވެ. އެންމެ ދެރަވީ ބައްޕަ ދެކިލަން މާލެދެވެންވެސް ނެތުމުންނެވެ. އަހަރުމެންގެ ނިކަމެތިކަމުން މާލެ ދާނެހާ ފެންވަރުވެސް އަހަރުމެންގެ ކިބައިގަ ނެތީއެވެ.

ބައްޕަ އައި ސީޔޫ ގައި ބޭއްވިތާ ދެދުވަސް ވަރަކަށް ފަހުން ބައްޕަ ފަރާތު ބޮޑުބޭބެ ގެ ހަރަދުގައި ބައްޕަ ރާއްޖޭން ބޭރަށް ގެންދިއުމަށް ތައްޔާރުވިއެވެ. ބައްޕަ ދެކިލުމުގެ ފުރުސަތެއްވެސް ނުލިބި ބޭރަށް ގެންދާން އުޅޭތީ އަހަރެން ދެރަވިއެވެ. ހަމައެހެންމެ ބައްޕައަށް ރަނގަޅު ފަރުވާއެއް ލިބޭނެ ކަމުގެ އުއްމީދުގައި އަހަރެން އުފާވެސްވިއެވެ.

އެއްދުވަހެއްގެ މެންދުރެވެ. ސުކޫލަށް އަހަރެން ދިޔައީ ފުރަތަމަ ޓާމުގެ ފައިނަލް އެގްޒާމްގެ އިނގެރޭސި ޓެސްޓު ހެދުމަށްޓަކައެވެ. ޓެސްޓު ހަދާ ނިންމާލުމަށްފަހު އަހަރެން ގެއަށް އައި އިރު މަންމަ ކޮޓަރީ އެނދުގައި ވިސްނުމަކަށް ގެއްލިފައި އިނެވެ. ބައްޕަ އާއި މެދުގައި ވިސްނަނީ ކަން އަހަންނަށް އެނގުނެވެ. އަހަރެން ފެނުމުން މަންމަ ކާންދިއުމަށް ބުންޏެވެ. އެހެން ކަމުން އަހަރެންވެސް ޔުނިފޯމް ބަދަލުކޮށްގެން ބޮޑުދައިތަގެ ދަރި ގޮވައިގެން ބަދިގެއަށް ކާންދިޔައީމެވެ. ބަދިގެއަށް ވަދެ ކާއެއްޗެހި އަޅައިގެން ނިކުމެ އަހަންނާއި ބޮޑުދައިތަގެ ދަރި ކާން އިނީ ބަދިގޭން ބޭރިގައި ހުންނަ ބޮޑު ހިރުނދު ގަސްދޮށުގައެވެ. އެހެން އިންދާ  ދެތިން ފިރިހެނެއް ގެއަށް ވަންތަން އަހަރެން ދުށީމެވެ. އިރުކޮޅެއް ފަހުން އެމީހުން ނިކުތީ އަހަރެންގެ މަންމަ ގޮވައިގެންނެވެ. ވެގެން އުޅޭ ގޮތެއް އަހަންނަށް ނުވިސްނުނެވެ. އެމީހުން މަންމަ ގޮވައިގެން ދިޔަތަނެއް އަހަންނަކަށް ނޭގެއެވެ. އަވަސް އަވަސްކޮށް ކައިގެން އަހަރެން ދިޔައީ މަންމަ ކޮބައިތޯ ބެލުމަށެވެ. އޭރު މާމަ އާއި ބޮޑުދައިތަ ސިޓިންގރޫމުގައި ތިއްބެވެ. މޫނުމަތިން ފެންނަނީ ކަންބޮޑުވުމެވެ. މަންމަ ފެންނާކަށް ނެތެވެ. އަހަރެން ގޮސް މާމަ ކައިރިއަށް ހުއްޓުމާއެކު މާމަ ތުންފިއްތާލާފައި ބުނި އެއްޗަކުން އަހަންނަށް ހީވީ ދުނިޔެ އެނބުރިގަތް ހެންނެވެ. އަޑުން އަޑު ނަގާފައި ރޯންފެށުނީ އެއްވެސް އިޙުތިޔާރަކާއި ނުލައެވެ. އިރުކޮޅަކުން މަންމަވެސް ރޮމުން ރޮމުން އައިސް ގެއަށް ވަންތަން އަހަންނަށް ފެނުނެވެ. އަހަރެންގެ ބައްޕަ ލަންކާގެ ހޮސްޕިޓަލެއްގައި ފަރުވާދެމުން ދަނިކޮށް އަބަދުގެ އަބަދަށް މިދުނިޔެއަށް އަލްވަދާޢު ކީއެވެ. އެދުވަހަކީ އަހަރެން ދުވަހަކުވެސް ހަނދާން ނެތޭނެ ދުވަހެއް ނޫނެވެ. އަހަރެންގެ ބައްޕަ އަހަރުމެންނަށްޓަކައި ވި ގުރުބާނީ އަހަރެން ހަނދާން ނެތޭނީ ކިހިނެއް ހެއްޔެވެ. ބައްޕަ ދުނިޔޭން ނިމިގެން ދިޔައީ އަހަރުމެންގެ ހައްގަށްޓަކައެވެ.

އަހަރެންގެ ބައްޕަގެ ފާފަތައް ފުއްސަވާ ސުވަރުގޭގެ ދާއިމީ ނިއުމަތް ބައްޕައަށް ދެއްވާށިއެވެ. އާމީން!!

ނޯޓު: މިއީ ހަޤީޤީ ވާހަކައެކެވެ.