ސިންގާ

[box type=”note” align=”aligncenter” ]މިވާހަކަ އަކީ އއ. ފެރިދޫ އަފްސަލް، އެސްފިޔައިގެ އެދުމުގެމަތިން ހަދިޔާކުރައްވާފައިވާ ވާހަކައެކެވެ.[/box]

ޒައިންގެ ދެލޯ ބޮޑުވެ ، މޫނުމަތީން އޮށްދާ ހިއްލަމުން ދިޔައިރު، މުޅި ހަށިގަނޑުގައި ”ބަބުރު” ވަހޭ މިކިޔާ ވަހެއް އެކުލެވިފައިވިއެވެ. އެންމެ ސިކުންތަކަށްވެސް މަޑު ކޮއްލުމެއްނެތި ޒައިން ބާރަށް ދުވަމުން ދިޔައެވެ. ފަހަތުން ސިންގާއެއްގެ ނުބައި އަޑު އިވެމުން ދިޔައެވެ. އަނެއްކޮޅުން ރޭގަނޑުގެ ކަނު އަނދިރިކަން ވެރިވެފައިވުމުން، ކަނު މީހެއްގެ ޙާލުގައި ހުރެގެން ކުރިއަށް ދުވަމުން ދިޔައެވެ. އޭރުވެސް ހުއްޓުމެއްނެތި ޒައިންގެ ފަހަތުން ސިންގާއެއްގެ ނުބައި އަޑު އިވެމުން ދިޔައެވެ. ޖީބުގައި އޮތް ފޯނު ވައިބުރޭޓުވަމުން ދިޔަ ނަމަވެސް ފުރާނަ މަރަށް ހުށަހެޅިފައިވާއިރު ފޯނު ނަގަން އުޅޭނީ މޮޔައެއް ނޫނީ ކާކު ހެއްޔެވެ؟

ޒައިން ނެތްހިރުވަރު ލާފައި، ދުވަމުން ގޮސް ވަލުތެރޭ ގަހެއްގައި އަޅައިގަނެފާ ވެއްޓުނެވެ. ވެއްޓި ޒައިންގެ މުޅި ގައިގެ އެތަން މިތަން ކެނޑިގެން ލޭ އަންނަމުންދިޔައީ ކަށިކުނބުރު ގަސްތަކުގެ ކަށިތަކުގައި އަޅައިގަތުމުންނެވެ. ކޮޅަށްތެދުވެ އަނެއްކާވެސް ދުއްވައިގަތީ ސިންގާގެ ބަރު އަޑު އިވެން ފެށުމުންނެވެ. ލައިގެން ހުރި ޓީޝާޓު ގަހެއްގައި އެލުވިފައިވުމުން އެ ނައްޓައިލަމުން ދުވަމުން، ދުވަމުން ގޮސް ރުކެއްގައި ޖެހި ތަރަވެ، ބޮލަށް އެނބުރުން އަރާފައި އިރުކޮޅަކު ހުއްޓައި އަނެއްކާވެސް އެ ސިންގާގެ އަޑު އިވުމުން އޭނާ ޖެހުނު ރުކަށް އަރަން އުޅެފައި، ވިސްނާލިއެވެ. އޭރު ގޮނޑުދޮށުން ރާޅު ޖަހައި އަޑު އިވެމުން ދިޔައެވެ. ޒައިން ވަރަށް އުނދަގޫ ޙާލުން ރާޅުގެ އަޑު އައި ދިމާ ހޯދައިގެން ގޮންޑޯޅި މަތީ ހުރެ، މޫދަށް ފުންމާލިއެވެ.

ވަގުތުން ސިންގާގެ ނުބައި އަޑު ކެނޑުނެވެ. ގަނެފައި ހުރި ބިރު ފިލައި، އެއްކޮށް ހަމައަކަށް އެޅިއްޖެއެވެ. ޒައިން އޭނާގެ ފޯނަށް ގުޅީ ކާކުތޯ ބަލާލަން ހަނދާންވެއްޖެއެވެ. ނަމަވެސް ސެމްސަންގ ގެލެކުސީ ފޯނާއެކު މޫދަށް ފުންމާލުމުން، ގައިގާ ވެފައި ހުރި ޒަޙަމް ތަކަށްވުރެ ބޮޑެތި ޒަޙަމްތަކެއް ހިތަށްވެ، ދެރަވެއްޖެއެވެ.

ޒައިންއަށް ރަނގަޅަށް ވިސްނާލެވުނެވެ. ސިންގާގެ އަޑު އައީ ކޮންތާކުންތޯއެވެ؟ ޒައިން ހަނދާންވިއެވެ. އޭނާގެ އަންހެނުން މީޝަލް ބިރުގަންނަވަން ސިންގާއެއްގެ އަޑު ފޯނަށް އެޅި ހަނދާންވިއެވެ. އެހެންވެއްޖެކަމަށްވާނަމަ، އެ އަޑު އައީ އެރޭ ދަންވަރު ނިދަން އޮށޯންނަ ގަޑިއަށް އޭނާ ފޯނު އެލާމްކޮށްފައިވުމުން ތިރީސް މިނެޓު ވަންދެނެވެ.