ތޫފާނަށްފަހު ފޮޅުނު މާ

އައިނީ އާއި ލީވާން އަކީ މާލޭގެ ކޮލެޖް ދައުރުއްސުރެ އެކަކު އަނެކަކަށްޓަކައި ހިތް ހަދިޔާކޮށްގެން އުޅުނު، ނުހަނު ލޯބިވާ ދެމަފިރިންނެވެ. ލީވާންގެ އޯގާތެރިކަމާއި އަޅާލުމަކީ އައިނީގެ މުޅި ދިރިއުޅުމުގެ އުފާވެރިކަމެވެ. އައިނީއަކީ ސާދާ މިޒާޖެއްގެ ހިތްހެޔޮ އަންހެން ކުއްޖެކެވެ. ކައިވެންޏަށް ދެ އަހަރު ފުރުނުތަނާހެން، އެމީހުންގެ ކުޑަކުޑަ އާއިލާއަށް އިތުރު ފުރިހަމަކަމެއް ލިބުނީ އައިނީ ބަނޑުބޮޑުވި އުފާވެރި ޚަބަރާއެކުގައެވެ. ލީވާން ހުރީ އޭނާގެ ހަޔާތުގެ ބައިވެރިޔާއަށް ލިބުނު އާ ދިރުމާއެކު، ބައްޕައަކަށް ވާން ފުރުސަތު ލިބޭތީ ކެތްމަދުވެފައެވެ.

ލީވާންގެ އެންމެ ގާތް އެކުވެރިޔާ ނައުފް އާއި އައިނީގެ ހަގަށް ހުންނަ އޯގާތެރި ކޮއްކޮ އަޝްފާ ވެސް ތިބީ މި އާއިލާއަށް އަލަށް އަންނަން އުޅޭ މެހެމާނަށް މަރުހަބާ ކިޔުމަށް ފޮނި އުންމީދުތަކެއް ކޮށްގެންނެވެ. ނައުފަކީ ލީވާންގެ ކޮންމެ ކަމެއްގައި އެހީތެރިވާ، އެއްބަނޑު އެއްބަފާ މީހެއް ފަދަ އެކުވެރިއެކެވެ. އަޝްފާ ކޮންމެ ދުވަހަކު ހެން އައިނީގެ ހާލު ބަލައި، އޭނާއަށް ބޭނުންވާނެ އެއްޗެހި ތައްޔާރުކޮށްދިނުމުގައި އަވަދިނެތި އުޅެއެވެ. ގޭގެ ހުރިހާ އެންމެން އެކުގައި ކޮޓަރި ޒީނަތްތެރިކޮށް، ކުޑަކުއްޖާގެ ސާމާނުތައް ހޯދަމުން ދިޔައީ އުފާވެރި ހިނިތުންވުމަކާއެކުގައެވެ. ދުވަސްތައް ގުނަމުން ދިޔައީ ނުހަނު ފޮނި އުންމީދުތަކަކާ އެކުގައެވެ.

ދެމަފިރިން އެކުގައި ހޭދކުރާ ކޮންމެ ރެއަކީ ކުރިމަތިލާން އޮތް އުފާވެރި މުސްތަގުބަލާ ބެހޭގޮތުން ދެކެވޭ ފޮނި ވާހަކަތަކުން ފުރިގެންވީ ރޭތަކެކެވެ. ދަރިފުޅަށް ކިޔާނެ ރީތި ނަންނަމާއި، އެ ދަރިފުޅު ގޮވައިގެން ހިނގާލަންދާނެ ރީތި ބީޗުތަކުގެ ވާހަކަ ދައްކައި، ދެމީހުން ތިބެނީ އުފަލުން ފޮޅިފައެވެ. ލީވާން ކޮންމެ ދުވަހަކު އޮފީހުން އަންނަނީ ދަރިފުޅަށް ޚާއްޞަކޮށްގެން ކުޑަކުޑަ ހަދިޔާއެއް ހިފައިގެންނެވެ. މުޅި ގޭތެރެއިން ދުވަނީ އުންމީދާއި ލޯބީގެ މީރުވަހެވެ.

އައިނީގެ ބަނޑަށް އަށް މަސް ފުރުނު ދުވަހެވެ. މުޅި ގެއަށް ވެރިވެފައިވަނީ އާދައިގެ ހޫނު މާހައުލެކެވެ. ލީވާން އޮފީސް ނިންމާލާފައި ބާރަށް ގެއަށް އައިއިރު، ގޭގެ ދޮރު ހުރީ ހުޅުވާފައެވެ. އެތެރެއަށް ވަތްއިރު އައިނީ އިނީ ބޮޑު ކޮޓަރީގެ ސޯފާގައި ބަނޑުގައި ހިފަހައްޓައިގެން ބާރަށް ރޯށެވެ. އޭނާގެ މޫނުމަތިން ފެންނަމުންދިޔައީ އިންތިހާ ދަރަޖައިގެ ވޭނާއި ކެކުޅުމެވެ. ކައިރީގައި ހުރި އަޝްފާ ވެސް ހުރީ ހަދާނެގޮތެއް ނޭނގިގެން، ބިރުން ރޮވިރޮވިއެވެ. ލީވާންގެ ހިތް ތެޅިގަތެވެ. އޭނާާ ވަގުތުން ދުވެފައި ގޮސް ނައުފްއަށް ގުޅިއެވެ. ނައުފް އޭނާގެ ކާރުގައި ސިކުންތުކޮޅެއްގެ ތެރޭގައި އެގެއަށް އައެވެ. އެންމެން އެކުގައި އައިނީ ގޮވައިގެން ހޮސްޕިޓަލުގެ ކުއްލި ފަރުވާދޭ ބަޔަށް ދިޔައެވެ.

ޑޮކްޓަރުން ކުއްލި އިމަޖެންސީއެއްގެ ގޮތުގައި އައިނީ ވަގުތުން ތިއޭޓަރަށް ވެއްދިއެވެ. ތިއޭޓަރުގެ ބޭރުގައި ހުރި ރަތް ބޮކި ދިއްލުނު ވަގުތަކީ ލީވާންގެ ހަޔާތުގައި އައި އެންމެ ދިގު، އެންމެ ބިރުވެރި ވަގުތެވެ. ނައުފް އާއި އަޝްފާ ތިބީ ލީވާނަށް ހިތްވަރުދޭށެވެ. އެތައް ގަޑިއިރެއްގެ އިންތިޒާރަށްފަހު، ތިއޭޓަރުގެ ދޮރު ހުޅުވާލާފައި ޑޮކްޓަރު ނިކުތީ ހިތާމަވެރި، މާޔޫސް މޫނަކާއެކުގައެވެ.

“ލީވާން.. ވަރަށް ހިތްވަރުކުރަންޖެހޭނެ. އައިނީގެ ފުރާނަ ސަލާމަތްކުރެވުނު ނަމަވެސް، ބަނޑުގައި އޮތް ކުޑަކުއްޖާ ސަލާމަތެއް ނުކުރެވުނު،” ޑޮކްޓަރުގެ މި ޖުމްލައިން ލީވާންގެ މުޅި ދުނިޔެ އެފުށް މިފުށްޖެހުނު ކަހަލައެވެ. އޭނާގެ ފައިދަށުން ބިންގަނޑު ކަނޑައިގެން ދިޔަ ކަހަލަ އިހުސާސެއް ކުރެވުނެވެ. އެމީހުން އެތައް ދުވަހެއް ވަންދެން ދެކެމުން އައި ފޮނި ހުވަފެންތައް ސިކުންތުކޮޅެއްގެ ތެރޭގައި ވިއްސިވިހާލިވިއެވެ. ހޭއެރުމަށްފަހު ދަރިފުޅު ވަކިވި ޚަބަރު ލިބުމުން އައިނީ މުޅިން މާޔޫސްވެ، ރޯން ފެށިއެވެ.
ގޭގައި ތައްޔާރުކޮށްފައި ހުރި ކުޑަކުއްޖާގެ ސާމާނުތައް ފެނި، ދެމަފިރިންގެ ހިތް ކުދިކުދިވެ، ދިރިއުޅުމުގެ ހުރިހާ ދިރުމެއް ގެއްލުނެވެ.

މި ހިތްދަތި ދުވަސްތަކުގައި އައިނީ ކޮޓަރިން ބޭރަށް ނިކުތުން މުޅިން ހުއްޓާލިއެވެ. ދަރިފުޅަށްޓަކައި ގަނެފައި ހުރި ކުޑަކުޑަ ހެދުންތަކުގައި ބާރަށް ބައްދާލައިގެން އޭނާ ދުވާލާއި ރޭގަނޑު ކަރުނަ އޮއްސައެވެ. ކާ އެއްޗެއްގައި އަތްލާންވެސް އޭނާ ބޭނުމެއް ނުވެއެވެ. އައިނީގެ މި ހާލަތު ފެނިފައި ލީވާންގެ ހިތް ކަރުނުން ފުރުނު ނަމަވެސް، އޭނާާ އަމިއްލަ ހިތާމަ ބޭރަށް ނުދައްކާ ހިފަހައްޓައިގެން ހުރީ އައިނީއަށްޓަކައެވެ.

މި ބޮޑު ހިތާމައިގެ ތެރޭގައި މާޔޫސްކަމާއެކު އެއް އަހަރު ފާއިތުވެގެން ދިޔައެވެ. ލީވާން އޭނާގެ އަމިއްލަ ހިތުގެ ފުން ހިތާމަ ފޮރުވައިގެން ހުރެ، އައިނީއަށް ހިތްވަރުދީ، އޭނާގެ ހިތުގެ ފާރުތައް ފަސޭހަކޮށްދޭން ރެޔާއި ދުވާލު ކެތްތެރިކަމާއެކު މަސައްކަތް ކުރިއެވެ. ނައުފް އާއި އަޝްފާ ވެސް ކޮންމެ ދުވަހަކު އެގެއަށް ގޮސް ދެމަފިރިންގެ ފޫހިފިލުވައިދީ، އެކި ކަހަލަ ވާހަކަތައް ދައްކައި ހިތްވަރުދިނުމުގައި ބައިވެރިވިއެވެ. ލީވާންގެ ތެދުވެރި ލޯތްބާއި އެންމެންގެ ހޫނު އަޅާލުމުގެ ސަބަބުން، މަޑުމަޑުން އައިނީގެ މޫނުމައްޗަށް އަލުން ހިނިތުންވުން އެނބުރި އަންނަން ފެށިއެވެ. އޭނާ އަލުން ދިރިއުޅުމުގެ އުންމީދުތައް އާކުރިއެވެ.

އެއްދުވަހަކު އައިނީ އާދައިގެ މަތިން ދައްކަންޖެހޭ ދެއްކުމަކަށް ޑޮކްޓަރަށް ދެއްކުމަށްފަހު ގެއަށް އައީ، އުފާވެރިކަމުގެ ކަރުނުން ދެލޯ ފުރިފައި ހުރެއެވެ. އޭނާާ އުފަލުން ގޮސް ދުވެފައިގޮސް ބޮޑުކޮޓަރީގައި އިން ލީވާންގެ ގައިގައި ބާރަށް ބައްދާލިއެވެ.

“ލީވާން! އަހަރެމެންގެ ހަޔާތަށް އަލުން އުފާވެރިކަން އެނބުރި އަތުވެއްޖެ. އަހަރެން އަނެއްކާވެސް ބަނޑުބޮޑު!” އައިނީ ގިސްލަމުން ބުންޏެވެ. އެއީ އުފާވެރިކަމުގެ ގިސްލުމެކެވެ.

މިފަހަރު ލީވާން، ނައުފް އަދި އަޝްފާ ވެސް ނުހަނު ފަރުވާތެރިކަމާއެކު ދުވަސްތައް ގުނަމުން ދިޔައެވެ. އައިނީގެ ސިއްހަތަށް ޚާއްޞަ ސަމާލުކަމެއް ދެވުނެވެ. އޭނާއަށް އެއްވެސް ބުރަ މަސައްކަތެއް ކުރިޔަނުދީ، އަޝްފާ ގޭގެ ހުރިހާ ކަމެއް ބަލަހައްޓަމުން ދިޔައެވެ. ނައުފް އަބަދުވެސް އައިނީއަށް ބޭނުންވާނެ މޭވާއާއި ސިއްހަތަށް ފައިދާހުރި ތަކެތި ހޮސްޕިޓަލުން އޮޅުންފިލުވައިގެން ގެނެސްދެއެވެ.

މަސްތައް ފާއިތުވެ، އެންމެން އިންތިޒާރުކުރި އުފާވެރި ދުވަސް ބޯމަތިވިއެވެ. ހޮސްޕިޓަލުގެ ވިހާ ކޮޓަރިން އިވުނު ލޯބިލޯބި ތުއްތު ކުއްޖެއްގެ ބާރު ރުއިމުގެ އަޑާއެކު، ލީވާން އާއި އައިނީގެ ހިތުގައި އޮތް ހުރިހާ ހިތާމައެއް ވަގުތުން ފިލައިގެން ދިޔައެވެ. ބޭރުގައި އިންތިޒާރުގައި ތިބި ނައުފް އާއި އަޝްފާ ވެސް އުފަލުން ގޮސް ރޮއިގަނެ، އެކަކު އަނެކަކަށް މަރުހަބާ ކިޔެވެ. ލީވާން އޭނާގެ ލޯބިލޯބި ދަރިފުޅު އަތްމައްޗަށް ނަގައި، އައިނީގެ ނިތްކުރީގައި އޯގާތެރިކަމާއެކު ބޮސްދިނެވެ.

ހަޔާތަށް އައި ބޮޑު ހިތާމައިގެ ތޫފާނަށްފަހު، އެމީހުންގެ ލޯބީގެ ބަގީޗާގައި އަލުން އުފާވެރިކަމުގެ ބާއްޖަވެރި މާ ފޮޅި، ދިރިއުޅުން އަލިވެއްޖެއެވެ. އެމީހުން ސާބިތުކޮށްދިނީ ކިތަންމެ ބޮޑު ހިތާމައެއް ކުރިމަތިވިޔަސް، ކެތްތެރިކަމާއި ތެދުވެރި ލޯބީގެ އެހީގައި ކާމިޔާބީގެ އައްސޭރިއަކަށް ވާސިލުވެވޭނެ ކަމެވެ.

ނިމުނީ…
މިވާހަކަ ވެސް ކިޔުންތެރިންނަށް ކަމުދާނެ ކަމަށް އުންމީދުކުރަން 😀💗