އުންމީދުގެ ފޮނި މޭވާ

ޒިދާން އާއި ލައިރާގެ ކައިވެންޏަށް ހަތް އަހަރު ފުރިގެން ދިޔައިރު، އެމީހުންގެ ދިރިއުޅުމުގައި ހުރިހާ ނިއުމަތެއްވިއެވެ. ތަނަވަސްކަމާއި، ރީތި ގެއަކާއި، ދެމީހުންގެ މެދުގައި އޮތް ވަފާތެރި ލޯތްބެވެ. ނަމަވެސް، އެ އުފާވެރި ގޭތެރެއިން އަބަދުވެސް ފެންނަނީ ފަޅުކަމެވެ. އެއީ ދަރިއަކު ނެތުމުގެ ފަޅުކަމެވެ. ކުޑަކުދިންގެ ޑޮކްޓަރެއްގެ ގޮތުގައި މަސައްކަތްކުރާ ލައިރާ، ކޮންމެ ދުވަހަކު އެހެން މީހުންގެ ތުއްތު ކުދިން ބަލައި، އެކުދިންނަށް ފަރުވާދޭއިރު، އަމިއްލަ އަތްމައްޗަށް ފިރުމާލާނެ ދަރިއަކު ނެތުމުން އޭނާގެ ހިތް ކަރުނުން ފުރެއެވެ.

ޒިދާން އަބަދުވެސް ލައިރާއަށް ހިތްވަރުދެއެވެ. “ލައި… ދެރަނުވޭ. މީ އިމްތިހާނެއް. އަހަރެމެން އުންމީދު ކަނޑާލައިގެން ނުވާނެ،” ޒިދާން ލައިރާގެ އަތުގައި ހިފާލަމުން ބުނެއެވެ. ނަމަވެސް، އާއިލާގެ ބައެއް މީހުންގެ ފަރާތުންނާއި މުޖުތަމައުން ކުރިމަތިވާ ސުވާލުތަކުގެ ސަބަބުން ލައިރާގެ ހިތަށް ކުރާ އަސަރު ވަރަށް ބޮޑެވެ. އެތައް ބޭސްފަރުވާއެއްކޮށް، ރާއްޖެއިން ބޭރުގެ އެތައް ހޮސްޕިޓަލަކަށް ދެއްކި ނަމަވެސް އެދެވޭ ނަތީޖާއެއް ނުލިބެއެވެ.

އެއްދުވަހަކު، މާޔޫސްކަމުގެ ތެރޭގައި އިން ލައިރާ ގާތަށް އައިސް ޒިދާން ބުންޏެވެ. “ލައި، އަހަރެމެން ފަހު ފަހަރަށް އިތުރު ފަރުވާއަކަށް ދަމާ. އަހަރެން މިހާރު ހުރިހާ ކަމެއް ހަމަޖައްސައިފިން.” ދެމީހުން އެކުވެގެން ދިޔައީ ދަރިމައިވުމުގެ ޚާއްޞަ ފަރުވާދޭ ސެންޓަރަކަށެވެ. އެއީ އާ އުންމީދަކާއެކު އެމީހުން ފެށި ދިގު އަދި ބުރަ ދަތުރެކެވެ. އެތައް މަހެއްގެ އިންތިޒާރާއި، ގަވާއިދުން ކުރި ދުޢާތަކަށްފަހު، އެންމެ ފަހުން ޓެސްޓް ހަދާ ދުވަސް އައިސް ދިމާވިއެވެ.

ރިޕޯޓް ހިފައިގެން ޑޮކްޓަރުގެ ކޮޓަރިއަށް ވަތްއިރު ލައިރާގެ ހިތް ބާރަށް ތަޅެމުންދިޔައެވެ. ޒިދާން އިނީ ލައިރާގެ އަތުގައި ބާރަށް ހިފަހައްޓައިގެންނެވެ.

ޑޮކްޓަރު ހިނިތުންވުމަކާއެކު ރިޕޯޓަށް ބަލާލިއެވެ. “މަރުޙަބާ ޒިދާން، ލައިރާ… ލައިރާ ބަނޑުބޮޑު!”

އެ އަޑު އިވުމާއެކު ލައިރާއަށް ރޮވުނެވެ. އެއީ ހަތް އަހަރުގެ ދިގު އިންތިޒާރަކަށްފަހު ލިބުނު އުފާވެރިކަމުގެ ކަރުނައެވެ. ޒިދާން ލައިރާގެ ގައިގައި ބާރަށް ބައްދާލިއެވެ. އޭނާގެ ދެލޮލުންވެސް ކަރުނަ ފޭދިގެން އައެވެ.

ޖެހިގެން އައި މަސްތަކަކީ ޒިދާން ލައިރާއަށް ޚާއްޞަ ސަމާލުކަމެއް ދިން ދުވަސްތަކެކެވެ. ލައިރާގެ ކެއުމާއި، ބޭހާއި، އަރާމުކުރުމުގެ ކަންކަން ޒިދާން އަމިއްލައަށް ބެލިއެވެ. ދުވަސްތައް ފާއިތުވަމުން ގޮސް، ބަނޑަށް ނުވަ މަސް ފުރުނު ދުވަހެވެ. ލައިރާއަށް ވިހެއުމުގެ ރިއްސުން ލައިގަތުމުން ވަގުތުން ހޮސްޕިޓަލަށް ގެންދެވުނެވެ. ލޭބަރ ރޫމްގެ ބޭރުގައި އިންތިޒާރުގައި ހުރި ޒިދާންގެ ހިތް ނުތަނަވަސްވެފައިވާއިރު، އޭނާ ދިޔައީ ހުއްޓުމެއްނެތް ދުޢާތައް ކުރަމުންނެވެ.

ކުއްލިއަކަށް ކޮޓަރިތެރެއިން ތުއްތު ކުއްޖެއްގެ ނުހަނު ރީތި ރުއިމުގެ އަޑު އިވުނެވެ. މާ ގިނައިރެއް ނުވެ، ނަރުސް ކުއްޖާ ނުކުމެ ޒިދާނަށް ގޮވާލިއެވެ. “މަރުހަބާ އަންހެން ކުއްޖެއް މަންމަ އަދި ދަރިފުޅުގެ ހާލުވެސް ވަރަށް ރަނގަޅު.”

ޒިދާން އެތެރެއަށް ވަތްއިރު، އެނދުމަތީގައި އޮތް ލައިރާގެ އަތްމަތީގައި ރީތި ފިޔާތޮށިކުލައިގެ ފޮތިގަނޑެއްގައި އޮޅާލާފައި އޮތް މައުސޫމް ތުއްތު ދަރިފުޅު އޮތެވެ. ޒިދާން ގޮސް އެނދު ކައިރީގައި އިށީނދެ، ދަރިފުޅުގެ މޫނަށް ބަލާލިއެވެ. އޭނާގެ ހިތް އުފަލުން ނަށައިގަތެވެ. އޭނާ މަޑުމަޑުން ދަރިފުޅު އަތްމައްޗަށް ނަގައި، އޭނާގެ ކަންފަތް ކައިރީގައި ބަންގި ގޮވާލިއެވެ.

ލައިރާ ޒިދާންގެ މޫނަށް ބަލާލަމުން ހިނިތުންވެލިއެވެ. “ޒިދާން… މިއީ އަހަރެމެންގެ ހަޔާތުގެ އެންމެ ފުރިހަމަ ކުރެހުން. އަހަރެމެންގެ ހިތުގެ މަންޒިލް،” ލައިރާ މަޑުމަޑުން ބުންޏެވެ.

ގޭގެ ބޮޑުކޮޓަރީގައި ހުރި ކުޑަ އެނދުގައި ނިދާފައި އޮތް ތުއްތު ދަރިފުޅަށް ބަލަހައްޓައިގެން ތިބި ޒިދާން އާއި ލައިރާގެ މޫނުމަތިން މިއަދު ފެންނަނީ މުޅިން އާ ދިރުމެކެވެ. ހަތް އަހަރުގެ ކެތްތެރިކަމާއި، އުންމީދާއި، ލޯބީގެ ނަތީޖާއެއްގެ ގޮތުން އެމީހުންގެ ހަޔާތް ފުރިހަމަވެ، އުފާވެރި އާއިލާއެއްގެ ބިންގާ އެޅުނީއެވެ.
ދަރިފުޅު ލިބުނުތާ ފުރަތަމަ މަސް ދުވަސް ފާއިތުވެގެން ދިޔައީ ނުހަނު އަވަހަށެވެ. ގޭގެ ކޮންމެ ކަނަކުން މިހާރު އިވެނީ ތުއްތު ދަރިފުޅު، ލާރާގެ ލޯބި އަޑުތަކެވެ. ޒިދާން އޮފީސް ނިންމާލުމަށްފަހު މިހާރު އެންމެ ސިކުންތަކަށްވެސް ބޭރުގައި މަޑެއް ނުކުރެއެވެ. އޭނާގެ މުޅި ދުނިޔެއަކީ ލާރާ އާއި ލައިރާއެވެ.

ރޭގަނޑުގެ ވަގުތެވެ. ލާރާ ނިންދެވުމަށްފަހު ލައިރާ އައިސް ސިޓިންރޫމް ސޯފާގައި އިށީނދެލީ ވަރަށް ވަރުބަލިވެފައެވެ. ދަރިފުޅު ބެލުމުގެ ބުރަކަމުން ލައިރާގެ މޫނުމަތިން ވަރުބަލިކަން ފެނުނު ނަމަވެސް، އޭނާގެ ދެލޮލުން ފާޅުމަވަނީ ނިމުމެއް ނެތް އުފާވެރިކަމެވެ. ޒިދާން ހޫނު ކޮފީތަށްޓެއް ހިފައިގެން އައިސް ލައިރާގެ ގާތުގައި އިށީނދެ، އޭނާގެ ކޮނޑުގައި އަތް ބާއްވާލިއެވެ.

“ލައި… ވަރަށް ވަރުބަލިވެއްޖެ ދޯ؟” ޒިދާން އޯގާތެރިކަމާއެކު އަހާލިއެވެ.

ލައިރާ ޒިދާންގެ ކޮނޑުގައި ބޯއަޅާލިއެވެ. “ޒިދާން… މިއީ އަހަރެން ހާސް ފަހަރު އުފަލުން އުފުލަން ތައްޔާރަށް ހުރި ވަރުބަލިކަމެއް. ހަތް އަހަރު ވަންދެން އަހަރެމެން މި ދުވަހަށް ކުރި އިންތިޒާރު މިއަދު ހަގީގަތަކަށް ވީމާ، އަހަރެން ހެއްދެވި ފަރާތަށް ޝުކުރުވެރިވަން.”

ޒިދާން ލައިރާގެ ނިތްކުރީގައި ބޮސްދިނެވެ. “އަހަރެމެންގެ ކެތްތެރިކަމުގެ ފޮނި މޭވާއަކީ ލާރާ. ދެން އަހަރެމެންގެ ދިރިއުޅުމުގައި އެއްވެސް ފަޅުކަމެއް ނުވާނެ.”

ދުވަސްތައް ހަފްތާތަކަށް، އަދި ހަފްތާތައް މަސްތަކަށް ބަދަލުވަމުން ދިޔައެވެ. ލާރާއަށް އެއް އަހަރު ފުރުނު ދުވަހެވެ. ގޭގެ ބޮޑުކޮޓަރި ވަނީ ކުލަކުލައިގެ ބޮކިތަކުންނާއި ފުއްޕާހަންތަކުން ފަވައިލެވިފައެވެ. އާއިލާގެ އެންމެންނާއި ގާތް ރައްޓެހިން ތިބީ ލާރާގެ ފުރަތަމަ އުފަންދުވަސް ފާހަގަކުރުމަށް އެއްވެފައެވެ.

ލާރާ ހުރީ ކުޑަ ހުދު ހެދުމެއްލައިގެން، އޭނާގެ ކުޑަކުޑަ ފައިމައްޗަށް ތެދުވެ، މޭޒުމަތީގައި ހުރި ކޭކާ ދިމާއަށް ބަލަހައްޓައިގެންނެވެ. ޒިދާން އާއި ލައިރާ އެކުވެގެން ލާރާގެ އަތުގައި ހިފައި ކޭކު ފަޅާލި ވަގުތު، މުޅިތަނުން އިވުނީ އުފާވެރި އަތްތިލަބަޑީގެ އަޑެވެ. ލާރާ ހޭން ފެށުމުން ލައިރާގެ ދެލޮލުން އުފާވެރިކަމުގެ ކަރުނަ ފޭދިގެން އައެވެ.

ޕާޓީ ނިމި، އެންމެން ދިއުމުން ޒިދާން އާއި ލައިރާ ގޭގެ ބެލްކަންޏަށް ނުކުތެވެ. އުޑުމަތީގައި ހަނދު ފުރިހަމަވެފައިވާއިރު، ފިނިވައިރޯޅިތަކުން މާހައުލަށް ވަނީ އަމާންކަން ގެނެސްދީފައެވެ. ޒިދާން ލައިރާގެ އަތުގައި ބާރަށް ހިފާލިއެވެ.

“ލައި… އަހަރެމެންގެ ދިރިއުޅުމުގެ މި ބާބަކީ އެންމެ ރީތި ބާބު،” ޒިދާން ބުންޏެވެ.

ލައިރާ ހިނިތުންވެލަމުން ޒިދާންގެ މޫނަށް ބަލާލިއެވެ. “އާން ޒިދާން. ލޯތްބާއި، އިތުބާރާއި، ކެތްތެރިކަން އޮތިއްޔާ ކޮންމެ އަނދިރި ރެއަކަށްފަހުވެސް އުޖާލާ ހެނދުނެއް އަންނާނެކަން އަހަރެމެންގެ ދިރިއުޅުމުން ސާބިތުވެއްޖެ.”

ދެމީހުން އެކުވެގެން ގޮސް ކޮޓަރީގައި އޮތް ލާރާގެ ކުޑަ އެނދު ކައިރީގައި ހުއްޓުނެވެ. ނިދާފައި އޮތް ތުއްތު ދަރިފުޅުގެ މައުސޫމް މޫނަށް ބަލަހައްޓައިގެން ތިބިއިރު، އެ ދެމަފިރިންގެ ހިތްތައް ވަނީ ފުރިހަމަ ލޯބިން ފުރިފައެވެ. ދިގު އިންތިޒާރާއި، ގިނަ ގޮންޖެހުންތަކަށްފަހު، އެމީހުންގެ ކުޑަކުޑަ އާއިލާ މިވަނީ އުފާވެރިކަމުގެ އެންމެ މަތީ މަންޒިލަށް ވާސިލުވެފައެވެ.
ނިމުނީ!