ހަޔާތުގެ ރަން ސޮފްހާ

ރޭގަނޑުގެ ބާރަޖަހައި ބޮޑުވީއިރުވެސް، އީޝަލްގެ ކޮޓަރީގެ ބޮކީގެ އަލި ކެނޑިގެންނެއް ނުދެއެވެ. މޭޒުމަތީގައި ހުރި ބޯ ފޮތްތަކާއި، ނޯޓްތަކާއި، ހުސްވެފައިވާ ކޮފީތަށިތައް ފެނުމުން އޭނާ އުފުލަމުންދިޔައީ ކިހާ ބުރަ ޒިންމާއެއްކަން ސާފުކޮށް އެނގެއެވެ. މިއީ ޔުނިވަރސިޓީގެ ފައިނަލް އިމްތިހާނާ ދިމާކޮށް އީޝަލް ހޭދަކުރަމުންދިޔަ ނިދިނެތް ރޭތަކުގެ ތެރެއިން ރެއެކެވެ. އޭނާގެ ހަށިގަނޑު ވަރުބަލިވެ، ދެލޯ ބަރުވަމުންދިޔަ ނަމަވެސް، އޭނާގެ އަޒުމަކަށް ބަދަލެއް ނާދެއެވެ. އޭނާ ބޭނުންވަނީ އަމިއްލަ މައިންބަފައިން ފަޚުރުވެރިވާ ފަދަ ރަން ނަތީޖާއެއް ހޯދާށެވެ. ކިޔެވުމަކީ ހަމައެކަނި ފޮތް ކިޔުމެއް ނޫންކަމާއި، އެއީ އަމިއްލަ މުސްތަގުބަލު ބިނާކުރުމަށްޓަކައި އުފުލަންޖެހޭ ބޮޑު އަމާނާތެއްކަން އީޝަލްއަށް ވިސްނެއެވެ.

އީޝަލްއާ އެއް ކުލާހެއްގައި ކިޔަވަމުންދިޔަ ނޯޔާ އިނީ އޭނާގެ ކޮޓަރީގައި ހަމަ މިފަދަ ބުރަ މަސައްކަތެއްގައެވެ. ނޯޔާއަށް ބައެއް ފިލާވަޅުތައް ވިސްނައިގަންނަން އުނދަގޫވުމުން، އޭނާ އިނީ ވަރަށް ބޮޑަށް މާޔޫސްވެ، އުއްމީދު ގެއްލޭ ގޮތްވެފައެވެ. ކިޔެވުމުގެ މި ބުރަ ޒިންމާއަކީ ބައެއް ފަހަރު އަމިއްލަ ނަފްސަށް އޮންނަ އިތުބާރު ކުޑަކޮށްލާ ކަމެކެވެ. ނޯޔާ ފޯނު ނަގައި، އެމީހުންގެ ގްރޫޕަށް މެސެޖެއް ކޮށްލިއެވެ. “އަހަންނަކަށް ހިއެއްނުވޭ މިފަހަރު މިކަން ވާނެހެން. މާ ބޮޑަށް ބުރަވެއްޖެ. ހިތަށްއަރަނީ ކިޔެވުން ހުއްޓާލަންވީއޭ.”

މެސެޖު ފެނުމާއެކު، އިޒާން އާއި ނާހިލް ވަގުތުން ދެކުދިންނަށް ގޮވާލައި ވީޑިއޯ ކޯލެއްކޮއްލިއެވެ. އިޒާންއަކީ އަބަދުވެސް ކަންކަމުގައި ހިތްވަރުދޭ، ހަރުދަނާ ޒުވާނެކެވެ. އަދި ނާހިލްއަކީ ފިލާވަޅުތައް ފަސޭހައިން ވިސްނައިދޭން ދަންނަ އެކުވެރިޔާއެވެ. އެމީހުން ތިބީ ދެކުދިން މާޔޫސްވިޔަނުދީ ހިފަހައްޓާށެވެ.

“ނޯޔާ، އީޝަލް! ތިހެން އުއްމީދު ދޫކޮށްނުލާ،” އިޒާން ބުންޏެވެ. “ކިޔެވުމުގެ ޒިންމާއަކީ ބުރަ އެއްޗެއްކަން އަހަރެމެންނަށް އެނގޭ. އެކަމަކު ހަނދާންކުރޭ، މިއަދު ތިވާ ގުރުބާނީގެ ފޮނި މޭވާ މާދަމާ ލިބޭނެ. ތިޔައީ ދުވަހަކުވެސް ބަލިގަބޫލުކުރި ކުދިންނެއް ނޫން. އަހަރެމެން މިތިބީ ތިޔަ ދެކުދިންނާ އެކު.”

ނާހިލް ވަގުތުން ނޯޔާއަށް އުނގޫވި ބައިތައް ސްކްރީން މެދުވެރިކޮށް ކިޔަވައިދޭން ފެށިއެވެ. އީޝަލްވެސް އޭނާގެ ވަރުބަލިކަން ހަނދާންނައްތާލުމަށްފަހު، ނޯޔާއަށް ހިތްވަރުދީ އެހީތެރިވިއެވެ. އެރޭ ފަތިސްވަންދެން އެ ހަތަރު އެކުވެރިން އެކުގައި މަސައްކަތް ކުރިއެވެ. ކިޔެވުމުގެ ބުރަ ޒިންމާ، އެކުވެރިކަމުގެ އެހީތެރިކަމާއެކު ލުއިވެގެންދިޔައެވެ. އެމީހުން ޕްލޭނެއް ހަދައި، ކޮންމެ ދުވަހަކު ވަކިވަގުތެއް ކިޔެވުމަށް ހުސްކުރަން ނިންމިއެވެ. އިޒާން އާއި ނާހިލް ވެގެން ދެކުދިންނަށް ބޭނުންވާ ނޯޓްތައް ތަރުތީބުކޮށްދިނެވެ.

އިމްތިހާނުގެ ދުވަސްތައް އައިސް ބޯމަތިވިއެވެ. ކޮންމެ ކުއްޖަކުވެސް އިމްތިހާނު ހޯލަށް ވަނީ ބިރުން ހުރެ ނަމަވެސް، ހިތުގައި ބޮޑު އަޒުމެއް އޮވެގެންނެވެ. އެތައް ދުވަހެއްގެ ބުރަ މަސައްކަތާއި، ނިދިނެތް ރޭތަކުގެ ހެކިވެރިއަކަށް އެމީހުންގެ ގަލަންތައް ވިއެވެ. އިމްތިހާނު ނިމުނު ދުވަހު އެންމެންގެ ހިތްތަކަށް ބޮޑު ލުޔެއް ލިބުނެވެ. ނަމަވެސް ހަގީގީ އިންތިޒާރަކީ ނަތީޖާއެވެ.

މަސްތަކެއް ފަހުން ނަތީޖާ ފާޅުކުރި ދުވަހެވެ. ޔުނިވަރސިޓީގެ ބޮޑު ހޯލުގެ ތެރޭގައި އެންމެން ތިބީ ނޭވާ ހިފަހައްޓާލައިގެންނެވެ. ނަތީޖާ ބޯޑަށް އެރުވުނު ވަގުތު، އީޝަލް އާއި ނޯޔާގެ ނަން އޮތީ މުޅި ކޯހުން އެންމެ މަތީ ނަތީޖާ ހޯދައިގެން ‘ފަޚުރުގެ ލިސްޓު’ގެ އެންމެ ކުރީގައެވެ. ދެކުދިންނަށް އުފަލުން ރޮއެގަނެވި، ބައްދާލެވުނެވެ. ފަހަތުގައި ބަލަން ތިބި އިޒާން އާއި ނާހިލްގެ ދެލޮލުން ފަޚުރުވެރިކަމުގެ ކަރުނަ ހިލުނެވެ. އެމީހުން ކުރި ބުރަ މަސައްކަތުގެ އަގު މިއަދު ފެނިގެން ހިނގައްޖެއެވެ.

އޭގެ އަހަރުތަކެއް ފަހުން، އެމީހުންގެ ދަރިފުޅު އިޔާން ބޮޑުވެ، ގްރޭޑް 10 ނިންމައި އޯ-ލެވެލް އިމްތިހާނާ ކުރިމަތިލިއިރު، އީޝަލް އާއި އިޒާން އިޔާންއަށް ދަސްކޮށްދިނީ ހަމަ މި ޒިންމާދާރުކަމެވެ. އިޔާން ކިޔަވަން ފޫހިވާ ކޮންމެ ފަހަރަކު، އީޝަލް އޭނާގެ ޔުނިވަރސިޓީ ދުވަސްވަރުގެ ވާހަކަތައް ކިޔައިދެއެވެ. ކިޔެވުމުގެ ބުރަކަމަކީ ވަގުތީ އެއްޗެއްކަމާއި، އޭގެއިން ލިބޭ ކާމިޔާބީއަކީ ދާއިމީ އެއްޗެއްކަން ވިސްނައިދެއެވެ. އިޔާންވެސް މައިންބަފައިންގެ ނަސޭހަތް ގަބޫލުކޮށް، ރޭދުވާލު ބުރަ މަސައްކަތް ކުރިއެވެ.

އިޔާންގެ އޯ-ލެވެލް ނަތީޖާ ލިބުނު ދުވަހަކީ މުޅި އާއިލާއަށް އައި އެންމެ އުފާވެރި ދުވަހެވެ. އިޔާން މުޅި ރާއްޖޭގެ ގަދަ 10ގެ އެއްވަނައިގައި ހިމެނުނެވެ. އީޝަލް އާއި އިޒާންގެ ދެލޮލުން އޮހޮރިގެންދިޔައީ ފަޚުރުވެރިކަމުގެ ކަރުނައެވެ. ނޯޔާ އާއި ނާހިލްވެސް އިޔާންގެ މި ބޮޑު ކާމިޔާބީގައި ބައިވެރިވެ، އޭނާއަށް ބޮޑު ޕާޓީއެއް ބޭއްވިއެވެ.

ކިޔެވުމުގެ ޒިންމާއަކީ ބުރަ އަދި އުނދަގޫ މަގަކަށް ވިޔަސް، ސާބިތުކަމާއެކު ކުރާ މަސައްކަތުން ކޮންމެ ފަރުބަދައެއްވެސް ގިރާކުރެވޭނެކަން އެމީހުންގެ ހަޔާތުން ސާބިތުވިއެވެ. އެރޭ ހަތަރު އެކުވެރިންނާއި އިޔާން އެކުގައި ތިބެ އުފާ ފާހަގަކުރިއިރު، އެމީހުންގެ ހިތްތަކުގައި ވަނީ އަމިއްލަ ނަފްސަށް އޮތް އިތުބާރާއި، ކުރިމަގުގެ އުއްމީދީ އަލިގަދަ ކުލަވަރެވެ. އީޝަލް އާއި އިޒާން، އަދި ނޯޔާ އާއި ނާހިލްގެ ތެދުވެރި އެކުވެރިކަމުގެ ބާރުގައި، ކިޔެވުމުގެ ބުރަ ޒިންމާ ބަދަލުވެގެންދިޔައީ މުޅި ހަޔާތް އަލިކޮށްލި އުފާވެރި ދަތުރަކަށެވެ.

ނިމުނީ!