ދަޅައެއް ފަދަ ލޯބި

އަހަރެންނަށް އެ މަންޒަރު ފެނުނު ވަގުތު ހީވީ ފައިދަށުން ބިންގަނޑު ދެމިގަތްހެންނެވެ. މުޅި ދުނިޔެ އެނބުރެން ފެށި ކަހަލައެވެ. ލޮލުން ކަރުނަ ހިލިގަތީ ކޮން އިރަކު ކަމެއްވެސް ނޭނގުނެވެ. އަހަރެންގެ ދިރިއުޅުމުގެ ހުރިހާ އުއްމީދެއް، އެންމެ ސިކުންތުކޮޅެއްގެ ތެރޭގައި އަޅިއަށް ވެގެން ހިނގައްޖެއެވެ. ޔޫހާންގެ އަތުގައި ހިފައިގެން، އުފާވެރި ހިނިތުންވުމަކާއެކު ހިނގާފައި ދިޔަ އެ އަންހެން ކުއްޖާގެ ސޫރަ ފެނުމުން އަހަރެންގެ މުޅި ހަށިގަނޑު ގަނޑުވިއެވެ. އެއީ އަހަރެންގެ އެންމެ ގާތް އެކުވެރިޔާ، އާލާ އެވެ.

ޔޫހާން އަކީ އަހަރެންގެ ފުރާނަ ފަދައިން ލޯބިވި، އަހަރެންގެ މުޅި ދިރިއުޅުން އޭނާއަށްޓަކައި ގުރުބާންކުރި ހަޔާތުގެ ބައިވެރިޔާއެވެ. އަހަރެމެން ދެމެދުގައި އޮތީ ހަތަރު އަހަރުގެ ދިގު، ވަރުގަދަ ލޯބީގެ ގުޅުމެކެވެ. ކައިވެނީގެ ހުވަފެންތައް ދެކެމުން، އާ ދިރިއުޅުމަކަށް ތައްޔާރުވަމުން ދިޔަ ވަގުތެވެ. ނަމަވެސް، ފަހަކަށް އައިސް ޔޫހާންގެ އުޅުމަށް އައި ބަދަލުތަކުން އަހަރެންގެ ހިތުގައި ސުވާލުތައް އުފެދުނެވެ. ފޯނު ނުނެގުމާއި، ބައްދަލުކުރަން ވަގުތު ނުވުން އާދައަކަށް ވިއެވެ. އެ ހުރިހާ ހިތްދަތި ވަގުތުތަކެއްގައި އަހަރެންގެ ކަރުނަ ފޮހެދީ، ހިތްވަރުދޭން ހުރީ އާލާ އެވެ.

ޔޫހާން ކަލެއަށް ޝައްކު ކުރަނީ. އޭނާ މާ ބިޒީކޮށް އުޅޭތީ ،” އާލާ އަބަދުވެސް އަހަރެންގެ ގާތުގައި ބުނެއެވެ. ނަމަވެސް ހަގީގަތަކީ، އަހަރެންގެ ފުރަގަހުގައި އާލާ ދިޔައީ ޔޫހާންގެ ހިތް އަތުލަމުންނެވެ.

އެ ދުވަހު އަހަރެން ކެފޭއަށް ދިޔައީ ޔޫހާންއަށް ސަޕްރައިޒެއް ދޭށެވެ. ނަމަވެސް ސަޕްރައިޒް ލިބުނީ އަހަރެންނަށެވެ. އެދެމީހުން ތިބީ އެކަކު އަނެކަކުގެ އަތުގައި ހިފައިގެން، މުސްތަގުބަލުގެ އުފާވެރި ވާހަކަތަކެއްގައެވެ. ޔޫހާންގެ ލޮލުން އަހަރެންނަށް ދުވަހަކުވެސް ނުފެންނަ ފަދަ އާދަޔާޚިލާފު ލޯތްބެއް އާލާއަށްޓަކައި ފާޅުވަމުންދިޔައެވެ.

“ޔޫހާން… އާލާ…” އަހަރެންގެ އަޑު ނިކުތީ ކިރިޔާއެވެ.

ދެމީހުން ސިހިފައި އެނބުރި ބަލާލިއެވެ. އާލާގެ މޫނުމަތިން ކުށްވެރިކަމުގެ އަސަރު ފެނުނު ނަމަވެސް، ޔޫހާން އިސްދަށަށް ޖަހާލިއެވެ.

މާފުކުރޭ، ޝަބާ،” ޔޫހާން މަޑުމައިތިރިކަމާއެކު ބުންޏެވެ.”އަހަރެންނަށް އާލާ ދެކެ ލޯބިވެ ވެއްޖެ ކަލެއާއެކު އުޅުނުއިރު އަހަރެންނަށް އެ އިހުސާސެއް ނުކުރެވޭ. އަހަރެމެންގެ ގުޅުން މިހިސާބުން ނިމުނީ.”

އެ ބަސްތައް ހިތަށް ހެރުނު ތީރުތަކެއް ފަދައެވެ. އަހަރެން އެއްވެސް އެއްޗެކޭ ނުބުނަމެވެ. ހަޅޭއްލަވައި، ރޮއެ ހަދާކަށް ބޭނުމެއް ނުވިއެވެ. ލޮލުން އޮހޮރެމުންދިޔަ ކަރުނަތަކާއެކު އަހަރެން އެތަނުން ދުވެފައި ނިކުތީމެވެ. ބޯކޮށް ވާރޭ ވެހެމުންދިޔަ އެ ރޭ، އަހަރެންގެ ކަރުނަތައް ވާރޭގެ ތިކިތަކާ ތަފާތެއް ނުވެއެވެ. މުޅި ދުނިޔެ އަހަރެންނަށްޓަކައި ފަޅުވިއެވެ.

މި ހިތްދަތި ހާދިސާއަށްފަހު ތިން މަސް ފާއިތުވެގެން ދިޔައެވެ. އަހަރެންގެ ދިރިއުޅުން މުޅިން ބަދަލުވިއެވެ. ކަރުނައިގެ ދުވަސްތައް ނިންމާލުމަށްފަހު، އަހަރެން އަމިއްލަ ނަފްސަށް އިސްކަންދޭން ފެށީމެވެ. ވަޒީފާގައި ކުރިއެރުން ހޯދައި، އާ ރައްޓެހިންނާއެކު ވަގުތު ހޭދަކުރަން ފެށީމެވެ. ހިތުގެ ޒަހަމްތައް ފަސޭހަވަމުން ދިޔައީ މަޑުމަޑުންނެވެ.

އެއްދުވަހަކު، އޮފީހުގެ ބޮޑު މަޝްރޫއެއްގެ ބައްދަލުވުމަކަށް އަހަރެން ދާންޖެހުނެވެ. އެ ބައްދަލުވުމުން އަހަރެންނަށް ދިމާވީ ކުންފުނީގެ އާ ޑިރެކްޓަރު، ޒިޔާން އެވެ. ޒިޔާން އަކީ ހިތްހެޔޮ، މީހުންނަށް އިހުތިރާމްކުރާ، ބަލާލަން ރީތި ޒުވާނެކެވެ. މަސައްކަތުގެ ތެރެއިން އަހަރެމެންގެ މެދުގައި ގާތްކަމެއް އުފެދުނެވެ. އަހަރެންގެ މާޒީގެ ވާހަކަތައް އެނގުމުންވެސް، ޒިޔާން އަހަރެންނަށް ކުރާ އިހުތިރާމް ކުޑައެއް ނުވިއެވެ. ބަދަލުގައި އޭނާ އަހަރެންގެ ހިތަށް އާ ދިރުމެއް ދިނެވެ.

“ޝަބާ، މާޒީއަކީ ބަދަލުކުރެވޭނެ އެއްޗެއް ނޫން،” އެއްދުވަހަކު ހަވީރު އަތިރިމަތީގައި ހިނގާލަން އުޅެމުން ޒިޔާން ބުންޏެވެ. “އެކަމަކު މުސްތަގުބަލު އޮތީ ޝަބާގެ އަތްމަތީގައި. އަހަރެން ބޭނުން ޝަބާގެ މުސްތަގުބަލުގެ ބައިވެރިއަކަށްވާން. އަހަރެން ޝަބާއަށް އަށް ދުވަހަކުވެސް ދެރައެއް ނުދޭނަން.”

ޒިޔާންގެ ލޮލުން ފެނުނު ތެދުވެރިކަމުން އަހަރެންގެ ބަންދުވެފައިވާ ހިތުގެ ދޮރު ހުޅުވުނެވެ. ހަގީގީ ލޯތްބަކީ ކޮބައިކަން އަހަރެންނަށް ވިސްނުނީ ޒިޔާންގެ ފަރާތުންނެވެ.

އޭގެ އަހަރެއްހާ ދުވަސް ފަހެވެ. އަހަރެންނާއި ޒިޔާންގެ ކައިވެނީގެ ތައްޔާރީތައް ވަމުންދިޔަ ދުވަސްވަރެކެވެ. ކުއްލިއަކަށް އަހަރެންގެ ފޯނަށް ނުދަންނަ ނަންބަރަކުން މެސެޖެއް އައެވެ. އެއީ ޔޫހާން އެވެ. އޭނާ ބޭނުންވީ އަހަރެންނާ ބައްދަލުކުރާށެވެ. ހިތް ބިރުގަތް ނަމަވެސް، މާޒީގެ ސަފުހާ އެއްކޮށް ލައްޕާލުމުގެ ގޮތުން އަހަރެން ބައްދަލުކުރަން އެއްބަސްވީމެވެ.

ރެސްޓޯރެންޓުން ޔޫހާން ފެނުމުން އަހަރެން ހައިރާންވިއެވެ. އޭނާގެ މޫނުމަތިން އުފާވެރިކަމެއް ނެތެވެ. ވަރަށް ދެރަވެފައި ހުރިހެން ހީވެއެވެ.

“ޝަބާ… އަހަރެންނަށް މާފުކުރޭ،” ޔޫހާން ރޮމުން ބުންޏެވެ. “އާލާ އަހަރެންނަށް ބޭވަފާތެރިވެއްޖެ. އޭނާ އަހަރެންގެ ހުރިހާ ފައިސާއެއް ހިފައިގެން އެހެން މީހަކާއެކު ފިލައިފި. އަހަރެންނަށް ވިސްނުނީ ޝަބާގެ ތެދުވެރި ލޯބީގެ އަގު. އަހަރެން ބޭނުން އަލުން ޝަބާ އާއެކު ދިރިއުޅުން ފަށަން.”

އަހަރެން ޔޫހާންއާ ދިމާއަށް ބަލާލީމެވެ. ހިތުގައި އެއްވެސް ކަހަލަ ރިހުމެއް ނުވަތަ ރުޅިވެރިކަމެއް ނެތެވެ. ހަމައެކަނި އޮތީ ހަމްދަރުދީއެވެ.

“ޔޫހާން، އަހަރެން ޔޫހާންއަށް މާފުކޮށްފިން،” އަހަރެން މަޑުމައިތިރިކަމާއެކު ބުނީމެވެ. “އެކަމަކު ކަނޑުވިލާގަނޑެއް ފަދައިން މާޒީވެދިޔަ ދުވަސްތައް އަނބުރައެއް ނާންނާނެ. އަހަރެންގެ ހަޔާތަށް މިހާރު ވަނީ މާ ފުރިހަމަ، ތެދުވެރި ލޯބީގެ އަގު ލިބިފައި. ޒިޔާން އަކީ އަހަރެންގެ މުޅި ދިރިއުޅުން. ޔޫހާން އަށްވެސް ރަނގަޅު ގޮތްތަކެއް މެދުވެރިވުމަށް އަދިވެސް އަހަރެން އެދެން.”

އަހަރެން ތެދުވެގެން ހިނގައިގަތީމެވެ. ރެސްޓޯރެންޓްގެ ބޭރުގައި ޒިޔާން އަހަރެންގެ އިންތިޒާރުގައި ކާރުގައި އިނދެ ހިނިތުންވެލިއެވެ. އޭނާގެ އަތުގައި ހިފާލި ވަގުތު އަހަރެންނަށް އިހުސާސްވީ، ބައެއް ފަހަރު ފައިދަށުން ބިންގަނޑު ދެމިގަތްހެން ހީވާ ވަގުތަކީ، ހަގީގަތުގައި މިއަށްވުރެ މާ އުފާވެރި، މާ ސާބިތު ބިންގަލެއްގެ މަތީގައި އާ ދިރިއުޅުމެއް ބިނާކުރުމަށް ދެއްވާ ފުރުސަތެއް ކަމެވެ. ހަގީގީ ލޯތްބަކީ ކެހިވެރިކަމެއް ނެތް، އިތުބާރުގެ މަތީގައި ބިނާވެފައިވާ މާތް ގުޅުމެކެވެ.

ނިމުނީ
މިވާހަކަ ވެސް ކިޔުންތެރިންނަށް ކަމުދާނެ ކަމަށް އުންމީދުކުރަން 😀💗