ލޯބީގެ ހިތިކަން..3&2

އއިލީން ފެންވަރައިގެން ނުކުތްއިރު، އޭނާގެ އެނދުމަތީގައި ފޯނު ހިފައިގެން އައިރީން އިށީނދެގެން އިނެވެ. އައިލީންގެ މޫނުމަތިން ކުއްލިއަކަށް ކުލަވަރު ބަދަލުވެ، ބިރުވެރިކަން އުފެދުނެވެ. “ތީގެން ކަލޭ ތިބަލަނީ ކޮން އެއްޗެއް؟” އައިލީން ހަޅޭއްލަވައިގަންނަމުން ފޯނު އަތުލަން މަސައްކަތްކުރިއެވެ. ނަމަވެސް އައިރީން ތެދުވެ، މަލާމާތުގެ ހިނިތުންވުމަކާއެކު އައިލީންއަށް ބަލާލިއެވެ. “މަންމަގެ ރަން ދަރިފުޅުގެ އަސްލު ސޫރަ ފެނިއްޖެ. ޝައިން އާއި ނީމްގެ ދިރިއުޅުން ކަލޭ ތި ހަލާކުކޮށްލީ ވަރަށް ރޭވުންތެރިކަމާއެކު ދޯ؟” އައިރީން ބުންޏެވެ. އައިލީންގެ މޫނުމަތީގައި އޮތް މަޑުމައިތިރިކަން ކެނޑި، އޭނާގެ އަސްލު ނުބައިކަން ދެލޮލުން ފާޅުވާން ފެށިއެވެ. އޭނާ އައިރީންގެ ކައިރިއަށް ޖެހިލާފައި މަޑުމަޑުން ބުންޏެވެ. “ކަލޭ ތި ވާހަކަ އެއްވެސް މީހަކަށް ކިޔައިދީފިނަމަ، ނީމްއަށް ވީވަރަށްވުރެ މާ ދެރަ ގޮތެއް ކަލެއަށް ހަދާލާނަން”

**2ވަނަބައި**

އައިލީންގެ އިންޒާރަށްފަހު، އައިރީން އެރޭ ނިދީ ވަރަށް ބޮޑު ފިކުރެއްގައި އޮވެއެވެ. އޭނާގެ ދައްތަގެ އެހާ ބިރުވެރި ފަރާތެއް ފެނިދާނެ ކަމަކަށް އޭނާ ދުވަހަކުވެސް ހިއެއް ނުކުރެއެވެ. އަނެއްދުވަހު ހެނދުނު ސައިބޯން ތިބިއިރު، މަންމަ އާދައިގެ މަތިން އައިލީންއަށް ތައުރީފު ކުރަމުން ދިޔައެވެ. “ބަލާބަލަ އައިލީން، ދަރިފުޅު ހާދަ ރަނގަޅެވެ. ހެނދުނު ތެދުވެ މަންމައަށް އެހީވެސް ވެދީފީމެއްނު. އައިރީންވެސް ކޮންމެވެސް ކަމެއް ދަސްކޮށްބަލަ،” މަންމަ ބުންޏެވެ. އައިލީން އައިރީންއަށް ބަލާލާފައި އެއްލި ކާމިޔާބީގެ ހިނިތުންވުމުން، އައިރީންގެ ލޭ ކެކިގެން ދިޔައެވެ. އައިލީންގެ އެ މައުސޫމް ސޫރައިގެ ފަހަތުގައިވަނީ ކިހާ ނުބައި ރޫހެއްކަން މަންމައަށް ކިޔައިދޭން އޭނާ ބޭނުންވިއެވެ

ސައިބޮއެ ނިމިގެން ސްކޫލަށް ދިޔަ މަގުމަތީގައި، އައިލީން އޭނާގެ ދެވަނަ ރޭވުން ފެށިއެވެ. އޭނާގެ އަމާޒަކީ ޝައިންގެ ހިތުން ނީމް ބޭރުކޮށް، ނީމް ބާކީކޮށްލުމެވެ. އައިލީން ގަސްތުގައި ޝައިނާގެ ފަހަތުން ގޮސް، އޭނާގެ “ހެޔޮއެދޭ” ރާގުގައި ވާހަކަ ދައްކަން ފެށިއެވެ. ޝައިނާއަކީ ވެސް ނީމް އެންމެ ގާތް އެކުވެރިޔާއަށް ވީތީ، އޭނާގެ ހިތް ބަދަލުކޮށްލުމަކީ ނީމް އެކަހެރިކޮށްލަން އޮތް އެންމެ ފަސޭހަ މަގުކަން އައިލީންއަށް އެނގެއެވެ.

“ޝައިނާ، އަހަރެން މި ވާހަކަ ބުނަން ވަރަށް ޖެހިލުންވޭ، އެކަމަކު ނީމް ދައްކާ ވާހަކަތައް އަޑުއަހާފައި ކެތެއް ނުކުރެވުނު،” އައިލީން މަޑުމަޑުން ބުންޏެވެ. އޭނާގެ ދެލޯ ވަނީ ކަރުނުން ފުރިފައެވެ. ޝައިނާ ހައިރާންވެފައި ނީމް ބުނީ ކީކޭތޯ އެހިއެވެ. އައިލީން ވަރަށް މޮޅަށް ދޮގުތަކެއް އަތުރާލިއެވެ. ނީމްއަކީ ޝައިނާގެ ކުރިމަތީގައި ރަނގަޅުވެގެން އުޅޭ، ނަމަވެސް ފުރަގަހުގައި ޝައިނާގެ އާއިލާއަށް މަލާމާތްކުރާ ކުއްޖެއް ކަމަށް އައިލީން ސިފަކޮށްދިނެވެ.

އައިލީން ދެއްކި ވާހަކަތައް ގަބޫލުކުރަން ޝައިނާއަށް ފުރަތަމަ އުނދަގޫވިއެވެ. ނަމަވެސް އައިލީންގެ “ގުޑް ގާލް” އިމޭޖާއި، އޭނާގެ ލޮލުން އޮހެމުންދިޔަ ކަރުނަތަކުގެ ސަބަބުން ޝައިނާގެ ހިތުގައި ޝައްކު އުފެދުނެވެ. “އަސްލުވެސްތަ؟ ނީމް އަހަރެންގެ ފުރަގަހުގައި އެހާ އިތުބާރު ނެތް ވާހަކަ ދެއްކިތަ؟” ޝައިނާގެ އަޑުގައިވަނީ މާޔޫސްކަމެވެ. އައިލީން ބޯޖަހާލަމުން، ނީމް ދުރުވުމަށް ޝައިނާއަށް ނަސޭހަތްތެރިވިއެވެ.

މި މަންޒަރު ދުރުގައި ހުރި އައިރީންއަށް ފެނުނެވެ. އޭނާއަށް އެނގެއެވެ، އައިލީން އެ ކުރަނީ ކީއްކަން. ނަމަވެސް އޭނާގެ އަނގަ ވަނީ ބަންދުވެފައެވެ. ރޭގައި އައިލީން ދިން އިންޒާރު އޭނާގެ ކަންފަތުގައި ގުގުމަމުން ދިޔައެވެ. އައިލީންއަކީ އޭނާ ހީކުރި ވަރަށްވުރެ ނުރައްކާތެރި ކުޅަދާނަ އެކްޓަރެކެވެ.

ސްކޫލްގެ ހުސްވަގުތެއްގައި ނީމް އައިސް ޝައިނާއާ ވާހަކަދައްކަން އުޅުނެވެ. ނަމަވެސް ޝައިނާގެ ފަރާތުން ފެނުނީ މުޅިން ތަފާތު ސިފައެކެވެ. އޭނާ ނީމްއާ ދިމާލަށް ބަލާލީ ނަފުރަތުން ފުރިގެންވާ ގޮތަކަށެވެ. “ދެން އަހަރެން ކައިރިއަށް ނާންނާތި، ނީމް. ކަލޭގެ ހަގީގަތް އަހަންނަށް އެނގިއްޖެ،” ޝައިނާ ހަރުކަށިކޮށް ބުނެފައި އެތަނުން ހިނގައިގަތެވެ.

ނީމް ހުރީ ބުނާނެ އެއްޗެއް ނޭނގި އަންތަރީސްވެފައެވެ. އޭނާ ކުރި ކުށެއް، ބުނި ބަހެއް އޭނާއަކަށް ނުވިސްނުނެވެ. އޭނާގެ އެންމެ ގާތް އެކުވެރިޔާ ކުއްލިއަކަށް ބަދަލުވީ ކީއްވެގެން ބާވައެވެ؟ ނީމްގެ ލޮލުން ކަރުނަ ފާޅުވާން ފެށިއެވެ. އޭނާއަށް އިހުސާސްވީ އޭނާގެ ދުނިޔެ ބަންދުވަމުންދާ ކަމެވެ.

އެއްފަރާތެއްގައި ހުރި އައިލީންގެ ތުންފަތްމައްޗަށް ވެރިވީ ކާމިޔާބީގެ ހިނިތުންވުމެކެވެ. އޭނާގެ ފުރަތަމަ ފިޔަވަޅު ކާމިޔާބުވީއެވެ. ޝައިނާ އާއި ނީމްގެ ގުޅުން ކަނޑާލެވިއްޖެއެވެ. ދެން އޮތީ ނީމް އެކަނިވެރިކޮށްލުމެވެ. އައިލީން ވަރަށް ފަރުވާތެރިކަމާއެކު ޝައިނާގެ ގާތަށް ގޮސް، އޭނާއަށް ހިތްވަރުދޭން ފެށިއެވެ.

“ދެރަނުވޭ ޝައިނާ، އަހަރެން ހުންނާނަން ޝައިނާ އެކުވެރިއެއްގެ ގޮތުގައި،” އައިލީން މަޑުމަޑުން ބުންޏެވެ. ޝައިނާ އައިލީންގެ އަތުގައި ހިފާލީ އިތުބާރާއެކުގައެވެ. އޭނާއަށް ނޭނގޭ ކަމަކީ އޭނާ އެ ހިފީ އޭނާގެ ހަލާކުގެ އަތުގައި ކަމެވެ. އައިލީން ވަނީ ވަރަށް ރީތިކޮށް ޝައިނާގެ ސިކުނޑި ކޮންޓްރޯލް ކުރަން ފަށާފައެވެ.

އައިރީން މި ހުރިހާ މަންޒަރެއް ބަލަމުން ދިޔައީ ހިތްދަތިކަމާއެކުގައެވެ. އޭނާގެ އަމިއްލަ ދައްތަ ކުރަމުންދާ މި ނުބައި މަސައްކަތް ހުއްޓުވަން އޭނާ ބޭނުންވިއެވެ. ނަމަވެސް އޭނާގެ އަތުގައި އެއްވެސް ބާރެއް ނެތެވެ. އައިލީން ވަނީ މަންމަގެ ލޯބިވެސް އަތުލާފައެވެ. އައިރީންއަކީ މިހާރު ހަމައެކަނި “ބަސްނާހާ” ކުއްޖާއެވެ.

**3ވަނަބައި**

އައިލީންގެ ރޭވުންތައް ދިޔައީ ދުވަހެއް ދުވަހަކަށް ވަރުގަދަވަމުންނެވެ. އޭނާ ޝައިނާ ގާތު ދައްކަމުންދިޔަ ދޮގު ވާހަކަތަކުގެ ސަބަބުން، ޝައިނާގެ ހިތުގައި ނީމްއާ މެދު އޮތް އިތުބާރު މުޅިން ކުޑަވާން ފެށިއެވެ. އައިލީން ދައްކަމުންދިޔައީ ނީމްއަކީ އެހެން މީހުންނާ ގުޅުން ބާއްވާ، ޝައިނާއަށް ވަފާތެރި ނޫން ކުއްޖެއްގެ ގޮތުގައެވެ. މި ހުރިހާ ކަމެއް އޭނާ ކުރަމުންދިޔައީ ވަރަށް އަމާން، މައުސޫމް ސިފައެއްގައެވެ.

ޝައިނާ ދެން ފެނުނީ ނީމްއާ ދުރުވާން މަސައްކަތް ކުރާތަނެވެ. ނީމް ގުޅުމުން ފޯނު ނުނެގުމާއި، މަގުމަތިން ފެނުމުން އަޅާނުލާ ދިއުމަކީ ނީމްގެ ހިތަށް ކެތްކުރަން ދަތި ކަންތައްތަކަކަށް ވިއެވެ. ނީމްއަށް ކުރެވެނީ ކޮން ކުށެއްކަން އޭނާއަށް ނޭނގެއެވެ. އޭނާގެ ހަމައެކަނި ކުށަކީ އައިލީންގެ ދޮގުވެރިކަމަށް ހެއްލުނު ޝައިނާއަށް އިތުބާރު ކުރުމެވެ.

އައިލީންގެ މި ނުބައިކަން ދެނެހުރި ހަމައެކަނި މީހަކީ އައިރީންއެވެ. އޭނާ ބޭނުންވީ ޝައިނާއަށް ހަގީގަތް ކިޔައިދޭށެވެ. ނަމަވެސް އައިލީން ވަނީ އައިރީންގެ އަނގަ ބަންދުކޮށްފައެވެ. “ނީ ތިޔަ ހަގީގަތް ކިޔައިދީފިނަމަ، މަންމަ ކައިރީ ބުނާނަން އައިރީންއަކީ މަސްތުވާތަކެތި ބޭނުންކުރާ ކުއްޖެއް ކަމަށް،” އައިލީން އިންޒާރު ދިނެވެ. އައިރީންއަށް މަޖުބޫރުވީ ހިމޭނުން ހުންނާށެވެ.

ނީމްގެ އެކުވެރިންވެސް މަޑުމަޑުން އޭނާއާ ވަކިވާން ފެށިއެވެ. އައިލީން ވަނީ ރަށު ތެރޭގައި ނީމްގެ އަގު ވައްޓާލުމަށްޓަކައި އެކި ކަހަލަ ފޮޓޯތަކެއް އެޑިޓްކޮށްގެން ފަތުރާފައެވެ. މި ފޮޓޯތަކުން ފެންނަނީ ނީމް ބައެއް ބިދޭސީންނާ އެކު އުޅޭ މަންޒަރެވެ. މިއީ މުޅިންވެސް އައިލީން އުފައްދާފައިވާ ދޮގު ފޮޓޯތަކެކެވެ.

ނީމްގެ ހިތް ކުދިކުދިވެގެން ދިޔައީ އޭނާގެ އެންމެ ގާތް އެކުވެރިޔާ ޝައިނާވެސް އޭނާއަށް ނަފުރަތު ކުރަން ފެށުމުންނެވެ. “ނީމް، އަހަރެން ދެން ދުވަހަކުވެސް ނީމްގެ މޫނު ބަލަން ބޭނުމެއް ނޫން،” ޝައިނާ ބުނި ބަސްތައް ނީމްގެ ކަންފަތުގައި ގުގުމަމުން ދިޔައެވެ. ނީމްއަށް ކުރެވުނު އިހުސާސަކީ އޭނާ މުޅި ދުނިޔެއަށް އެކަނިވެފައިވާ ކަމުގެ އިހުސާސެވެ.

ރަށުގެ މީހުންގެ މަލާމާތާއި ފާޑުކިޔުންތައް ނީމްއަށް އަމާޒުވާން ފެށިއެވެ. އޭނާ ގެއިން ބޭރަށް ނިކުންނަންވެސް ބިރުގަތެވެ. ކޮންމެ މީހަކުވެސް ބަލަނީ ފަކުރުގަނެފައިވާ ކަހަލަ ގޮތަކަށެވެ. އައިލީން ބޭނުންވީވެސް މިއެވެ. ނީމްއަކީ މުޅި މުޖުތަމައުން ބާކީވެފައިވާ މީހަކަށް ހެދުމެވެ.

އައިރީންއަށް މި މަންޒަރުތައް ބަލަން ހުރުން ވީ ބޮޑު ތަދަކަށެވެ. އޭނާ އެކަނި އިނދެ ރޮއެވެ. “އަހަރެންގެ އަމިއްލަ ދައްތަ މިހާ ނުބައި ވާނީ ކިހިނެއް؟” އޭނާގެ ހިތާ ސުވާލު ކުރިއެވެ. ނަމަވެސް އައިލީންގެ ރޭވުންތައް ހުރީ އެއްވެސް މީހަކަށް ހުރަސް ނޭޅޭ ފަދަ ވަރުގަދަ ގޮތަކަށެވެ.

ޝައިނާގެ ހިތުގައި ނީމްއަށްޓަކައި އޮތް ލޯބި ނަފުރަތަށް ބަދަލުވީ އައިލީން ދައްކައިދިން “ހެކިތަކުގެ” ސަބަބުންނެވެ. އޭނާ ގަބޫލުކުރީ ނީމްއަކީ މަކަރުވެރިއެއް ކަމަށެވެ. މި ފުރުސަތުގެ ބޭނުން ހިފައި އައިލީން ދިޔައީ ޝައިނާގެ ހިތާ ގާތްވަމުންނެވެ. އޭނާ ޝައިނާއަށް ހަމްދަރުދީވާ ކަމަށް ދައްކައިގެން އޭނާގެ އެންމެ ގާތް އެކުވެރިޔާއަށް ވިއެވެ.

ނީމްގެ މަންމައާއި ބައްޕަވެސް ރަށު ތެރޭގައި ފެތުރިފައިވާ ވާހަކަތަކުގެ ސަބަބުން ލަދުގަތެވެ. އެމީހުން ނީމްއަށް އަދަބު ދިނެވެ. “ނީމް، ތިއީ އަހަރެމެންގެ އަގު ވައްޓާލި ކުއްޖެއް،” ބައްޕަ ބުންޏެވެ. ނީމްގެ އަމިއްލަ ލޭގެ ގުޅުން ހުރި މީހުންވެސް އޭނާއަށް އިތުބާރު ނުކުރުމުން، އޭނާ މުޅިން މާޔޫސްވިއެވެ.

އައިލީން މި ހުރިހާ ކަމެއް ކުރަމުން ދިޔައީ ވަރަށް ހަމަޖެހިލައިގެން އިނދެއެވެ. އޭނާގެ މަގްސަދަކީ ޝައިނާ ހާސިލްކުރުމެވެ. އެކަމަށްޓަކައި ކޮންމެފަދަ ގުރުބާނީއެއް ވާންވެސް އޭނާ ހުރީ ތައްޔާރަށެވެ. އޭނާގެ ހިތުގައި ނީމްއަށްޓަކައި އެއްވެސް ކުލުނެއް ނެތެވެ. އޭނާ ދެކޭ ގޮތުގައި ނީމްއަކީ އޭނާގެ އުފާވެރިކަމަށް އޮތް ހުރަހެކެވެ.

އައިރީންއަށް އެނގޭ ގޮތުގައި އައިލީންގެ މި ނުބައިކަން ހުއްޓުވޭނީ ހަމައެކަނި ހަރުދަނާ ހެއްކެއް ލިބިގެންނެވެ. ނަމަވެސް އައިލީން ހުރީ ހުރިހާ ހެއްކެއް ނައްތާލާފައެވެ. އޭނާގެ ފޯނާއި ލެޕްޓޮޕް ހުންނަނީ ޕާސްވޯޑް ޖަހާފައެވެ. އައިރީންއަށް އޮތީ ހަމައެކަނި އިންތިޒާރު ކުރުމެވެ.

 ނީމް އޭނާގެ ކޮޓަރީގައި އެކަނި އިނދެ ގިސްލާ ރޮމުން ދަނިކޮށެވެ. އޭނާގެ މުޅި ދުނިޔެ ބަދަލުވެއްޖެއެވެ. އެކުވެރިންނެއް ނެތެވެ. ލޯބިވެރިއެއް ނެތެވެ. އާއިލާގެ އިތުބާރެއް ނެތެވެ. އޭނާ މިހާރު އެ ހުރީ އައިލީން އުފެއްދި ނަރަކައިގެ ތެރޭގައި ބަންދުވެފައެވެ. އައިރީން ދުރުގައި ހުރެ މި މަންޒަރު ބަލަމުން ދިޔައީ އިންތިހާއަށް ދެރަވެފައިވާ ހާލުގައެވެ.

**ނުނިމޭ**