ލޯބީގެ ހިތިކަން…1

އައިލީން އާއި އޭނާގެ މަންމަ، ފާތުމަ، ތިބީ ބަދިގޭގައި މެންދުރުގެ ކެއުން ތައްޔާރުކުރާށެވެ. ބަދިގެތެރޭގައި ހިފާލާފައިވަނީ މީރުވަސްދުވާ ކުކުޅު ރިހައެއްގެ ވަހެވެ. އައިލީން ފިޔާ ކޮށަން ހުއްޓާ، މަންމަ ކުއްލިއަކަށް ފުން ނޭވާއެއްލުމަށްފަހު ވާހަކަދައްކަން ފެށިއެވެ. “އައިލީން، ދަރިފުޅު ބަލާބަލަ ތިހިރަ އައިރީންގެ އުޅުމަށް. އޭނާއަކީ ދަރިފުޅާ އެއްބަނޑު އެއްގުނަ އެއްކަހަލަ ސިފައެއް ލިބިފައި ހުރި ކުއްޖަކަށް ވިޔަސް، އޭނާގެ ހިތަކީ ހާދަ ނުބައި ހިތެކެވެ. ކޮންމެ ކަމެއްގައިވެސް އޭނާ ބަލަނީ އަނެކުންނަށް ދެރައެއް ދެވޭތޯއެވެ. މަންމަ ބިރުގަނޭ އޭނާގެ ސަބަބުން މި އާއިލާއަށް ލިބިދާނެ ދެރައަކާމެދު،” މަންމަގެ އަޑުގައިވަނީ މާޔޫސްކަމާއި ނުރުހުމެވެ.

ކެއްކުމުގެ މަސައްކަތް ނިންމާލުމަށްފަހު، އައިލީން ކޮޓަރިއަށް ދިޔައީ އޭނާގެ އެކުވެރިޔާ ޝައިނާ އާއެކު ބޭރަށް ދާން ތައްޔާރުވާށެވެ. އައިލީން އޭނާގެ ދިގު ބުރުގާ ރީތިކުރަން ހުއްޓާ، އައިރީން ކޮޓަރިއަށް ވަދެގެން އައީ ވަރަށް ބާރަށް ހަށިގަނޑަށް ބާރު ޓޮޕެއް ލައިގެންނެވެ. އެ މަންޒަރު ފެނުމުން އައިލީންގެ ހިތަށް އުނދަގޫވެ، އައިރީންގެ ގާތުގައި އެ ހެދުން ބަދަލުކުރުމަށް އެދުނެވެ. ނަމަވެސް، އެއާއެކު އައިރީންގެ މޫނުމަތިން ފެނުނީ ގަދަ ރުޅިވެރިކަމެވެ. އޭނާ މަލާމާތުގެ ރާގަކަށް ބުންޏެވެ. “އައިލީން، ދަރިފުޅު ތިލާ ބޮޑެތި ބުރުގާތަކަށް ފިރިހެން ކުދިންގެ ޝައުގުވެރިކަމެއް ނުހުންނާނެއެވެ. އެމީހުން ބޭނުންވަނީ އަހަރެން ކަހަލަ ޒަމާނީ ކުދިންނެވެ.” އައިރީންގެ މި ބަސްތަކުން އައިލީންގެ ހިތުގައި ޖެހުނު ނަމަވެސް، އޭނާ ހަނުހުއްޓެވެ.

އައިލީން އާއި އައިރީން އަދި ޝައިނާ އަތިރިމަތީގައި ހިނގާލަން ދިޔައީ ވަރަށް އުފަލުން ތިބެގެންނެވެ. ހުދު ދޮންވެއްޔާއި މޫދުގެ ހިތްގައިމު މަންޒަރު ފެނުމުން އައިލީން ހުރީ ވަރަށް ހިތްހަމަޖެހިފައެވެ. ނަމަވެސް، ކުއްލިއަކަށް ޝާއިން އެހެން އަންހެން ކުއްޖަކާއެކު ހީނސަމާސާ ކުރަނިކޮށް ފެނުމުން އައިލީންގެ މޫޑު މުޅިން ބަދަލުވިއެވެ. އެއީ ނީމް ނަމަކަށް ކިޔާ ކުއްޖެކެވެ. އައިލީންގެ މޫނުމަތިން ފެނުނު ނުތަނަވަސްކަން ޝައިނާއަށް ފާހަގަވެގެން، ކިހިނެއްވީތޯ ސުވާލުކުރިއެވެ. އައިލީން ހިތުގައި އުފެދުނު ނުރުހުން ފޮރުވަމުން “ކަމެއްނުވޭ” އޭ ބުނި ނަމަވެސް، އެވަގުތުން ފެށިގެން އޭނާގެ ހިތުގައި ނީމްއަށްޓަކައި ނަފްރަތު އުފެދެން ފެށިއެވެ. ޝާއިން ސަމާލުކަން ނީމްއަށް ލިބޭތީ އައިލީން ހުރީ ވަރަށް ބޮޑަށް ހަސަދަވެރިވެފައެވެ.އެ

ދުވަހުގެ ހަވީރު 4:15 ގައި ބަލާ އަންނާނެ ކަމަށް ޝައިން ބުނުމުން، ނީމް ހުރީ ވަރަށް އުފަލުން ތައްޔާރުވާށެވެ. ޝައިންއާ ބައްދަލުވާނެތީ އޭނާގެ ހިތް އޮތީ އަވަސްވެފައެވެ. ތައްޔާރުވެގެން ހުއްޓާ، ގޭގެ ބޭރުގައި މަޑުކޮށްލައިގެން ހުރިކަމަށް ބުނެ ޝައިން މެސެޖު ކުރުމުން، ނީމް ވަރަށް އަވަހަށް ބޭރަށް ނުކުތެވެ. ޝައިން ފެނުމާއެކު ހިނިތުންވެލަމުން ގޮސް، އޭނާގެ ސައިކަލު ފަހަތަށް އަރާ އިށީނެވެ. ދެމީހުން އެކުގައި އަތިރިމައްޗަށް ދިޔަ މަގުމަތީގައި، ޝައިން އެކި ކަހަލަ ލޯބި ވާހަކަތައް ދައްކައި، ނީމްއާ ފޮާޅުކަން ބޮޑު ގޮތެއްގައި ފްލާޓް ކުރަން ފެށިއެވެ. ޝައިންގެ އެ ބަސްތަކުން ނީމް އިނީ ލަދުން ރަތްވެފައެވެ.

ނީމް އާއި ޝައިން އަތިރިމަތީގައި ވަރަށް އުފަލުގައި ވަގުތު ހޭދަކުރަމުން ދިޔައިރު، އެމީހުންނަށް ނޭނގޭ ބިރުވެރި ކަމެއް އެތަނުގައި އޮތެވެ. އެ ދެމީހުން އެކުގައި ހީނސަމާސާކޮށް، މަޖާކުރަމުން ދިޔައިރު، މާ ދުރު ނޫން ހިސާބެއްގައި ހުރި މީހެއްގެ ވިހަގަދަ ދެލޯ ވަނީ އެމީހުންނަށް ހުއްޓިފައެވެ. އެއީ ކާކުކަން އެމީހުންނަށް ނޭނގުނު ނަމަވެސް، އެމީހާ ހުރީ ނަފްރަތުން ފުރިގެންވާ ނަޒަރަކުން އެމީހުންގެ ކޮންމެ ހަރަކާތަކަށް ބަލާށެވެ. ޝައިން އާއި ނީމްގެ އުފާވެރިކަން ފެނި، އެމީހާގެ ހިތުގައި އުފެދުނީ ބަދަލުހިފުމުގެ ރޫހެކެވެ. ކުރިމަގުގައި އެ ދެމީހުންގެ ދިރިއުޅުން ބަރުބާދުކޮށްލާނެ އެ ނުބައި އިންސާނާގެ ވަކިތަކުން ސަލާމަތްވާނެ ގޮތެއް އެމީހުންނަކަށް ނޭނގެއެވެ.

އރު އޮއްސެމުން ދިޔައިރު، އައިލީން ގަހެއްގެ ނިވާގަނޑުގައި ހުރެ ޝައިން އާއި ނީމްއަށް ބަލަމުން ދިޔައީ ފުރާނައަށް ތަދުވާ ފަދަ ހަސަދަވެރިކަމަކާއެކުއެވެ. އައިލީންގެ އެކުވެރިޔާ ޝައިނާއަށް ޝައިންގެ މައްޗަށް އެއްވެސް ޝައުގުވެރިކަމެއް ނެތް ނަމަވެސް، އައިލީން ވަނީ ސިއްރިއްޔާތުގައި ޝައިންއަށް އިންތިހާއަށް ލޯބިވެފައެވެ. ޝައިން ނީމްގެ އަތުގައި ހިފާލައިގެން ހީނލި މަންޒަރު ފެނުމުން އައިލީންގެ ލޮލުން ކަރުނަ ހިލުނެވެ. އޭނާ ފޯނު ނަގައި އެ ދެމީހުންގެ ފޮޓޯއެއް ނަގަމުން ދަތްކުޑިވިކާލިއެވެ. “ޝައިންއަކީ ހަމައެކަނި އަހަރެންގެ މީހަކަށް ވާންޖެހޭނެ މީހެއް. ނީމް، ކަލޭ ތިހުރީ އަހަރެންގެ މަގަށް ހުރަސް އަޅައިގެން،” އައިލީން މަޑުމަޑުން ބުންޏެވެ. އައިލީންގެ މަންމައަށް އޭނާއަކީ ރަނގަޅު ކުއްޖެއް ކަމަށް ހީވިޔަސް، ޝައިންއަށްޓަކައި އޭނާ ހުރީ ކޮންމެފަދަ ނުބައިކަމެއްވެސް ކުރަން ތައްޔާރަށެވެ. ޝައިން އާއި ނީމްގެ ދިރިއުޅުން ނަރަކައަކަށް ހަދާލުމަށް އައިލީން ރާވަމުންދިޔަ ރޭވުންތަކުގެ ބިރުވެރިކަން އެ ދެމީހުންނަށް ކުޑަކޮށްވެސް އިހުސާސެއް ނުވެއެވެ.

އެރޭ ގެއަށް ގޮސް އައިލީން ކޮޓަރީގައި ދޮރު ތަޅުލައިގެން އިނީ އޭނާ ނެގި ފޮޓޯތަކަށް ބަލާށެވެ. އޭނާގެ ހިތުގައި އުފެދިފައިވާ ނަފްރަތުގެ އަލިފާންގަނޑު ދިޔައީ އިތުރަށް ގަދަވަމުންނެވެ. އޭނާ ފުރަތަމަ ކުރި ކަމަކީ ނުދަންނަ ނަންބަރަކުން ޝައިންއަށް މެސެޖެއް ފޮނުވުމެވެ. އެ މެސެޖުގައި އޮތީ ނީމްގެ އަގުވެއްޓޭ ފަދަ ދޮގު ވާހަކަތަކެކެވެ. “ޝައިން، ކަލެއަށް ހީވަނީ ނީމްއަކީ ވަފާތެރި ކުއްޖެއް ކަމަށްތަ؟ އޭނާގެ އަސްލު ސޫރަ ބަލަން ބޭނުންނަމަ މި ފޮޓޯތަކަށް ބަލާބަލަ،” މިހެން ލިޔެ، އައިލީން ވަނީ އެޑިޓްކޮށްފައިވާ ބައެއް ފޮޓޯތައް ޝައިންއަށް ފޮނުވާފައެވެ. އައިލީން އެނދުމަތީގައި އޮށޯވެލައިގެން އިނީ ޝައިންގެ ރެިއެކްޝަން އަންނާނެ ވަގުތަކަށް އިންތިޒާރު ކުރަމުންނެވެ. އޭނާގެ މޫނުމަތީގައިވަނީ ކާމިޔާބީގެ ހިނިތުންވުމެކެވެ. ޝައިން އާއި ނީމްގެ ދެމެދުގައި އޮތް އިތުބާރު ފުނޑުފުނޑުކޮށްލުމަކީ އައިލީންގެ “ނަރަކަ” ރޭވުމުގެ ފުރަތަމަ ފިޔަވަޅެވެ.

ޝައިން އޭނާގެ ފޯނަށް އައި މެސެޖުތަކާއި ފޮޓޯތައް ބަލައިލުމާއެކު، އޭނާގެ މުޅި ދުނިޔެ އެނބުރިގަތް ކަހަލައެވެ. ނީމްއާ މެދު އޭނާގެ ހިތުގައި އޮތް ބޮޑު އިތުބާރަށް ކުއްލިއަކަށް ބިރުވެރި ހިޔަންޏެއް އެޅިއްޖެއެވެ. އެ ފޮޓޯތަކަކީ އައިލީން ވަރަށް މޮޅަށް އެޑިޓްކޮށްފައިވާ ފޮޓޯތަކަކަށް ވީތީ، ޝައިންއަށް އެއީ ދޮގެއްކަން ދެނެގަންނާކަށް ނޭނގުނެވެ. އެރޭގެ ފަހުން ޝައިން، ނީމްގެ ފޯނު ކޯލްތަކަށް ޖަވާބެއް ނުދީ، އޭނާއާ ދުރުވާން ފެށިއެވެ. ނީމް ހުރީ ވީގޮތެއް ނޭނގި، ކުއްލިއަކަށް ޝައިންގެ އުޅުމަށް އައި ބަދަލުން ދެރަވެ، ރޮއިރޮއި ހަލާކުވާވަރު ވެފައެވެ. އައިލީން ކޮޓަރީގައި ހުރެ މި މަންޒަރުތައް ސޯޝަލް މީޑިއާގެ ޒަރީއާއިން ބަލަމުން ދިޔައިރު، އޭނާގެ ހިތަށް ލިބެމުންދިޔައީ ބަޔާންކުރަން ނޭނގޭ ފަދަ ނުބައި އުފަލެކެވެ. އޭނާގެ ރޭވުން ދަނީ އޭނާ ބޭނުންވި ގޮތަށް، ޝައިން އާއި ނީމްގެ ގުޅުން ފުނޑުފުނޑުވަމުންނެވެ.

ނީމް އާއި ޝައިންގެ ގުޅުމުގައި ރެނދުލާފައިވާކަން ޔަގީންވުމާއެކު، އައިލީން އޭނާގެ ދެވަނަ ފިޔަވަޅު އެޅިއެވެ. އޭނާ ވަރަށް “މަޑުމައިތިރި” އެކުވެރިއެއްގެ ސިފައިގައި ޝައިންއާ ބައްދަލުކުރިއެވެ. ޝައިން ހުރީ ނީމްގެ ކިބައިން ފެނުނު (ދޮގު) މަންޒަރުތަކުގެ ސަބަބުން ހިތްކުދިކުދިވެ، އަޅާލާނެ މީހަކަށް ބޭނުންވެފައެވެ. އައިލީން ޝައިންގެ ގާތުގައި އިށީނދެ، ހަމްދަރުދީވާކަމަށް ހަދާފައި ބުންޏެވެ. “ޝައިން، އަހަރެން ކުރިންވެސް ބުނަން އުޅުނީމެވެ. ނީމްއަކީ ކަލޭގެ ލޯތްބަށް ހައްގުވާ ކުއްޖެއް ނޫނެވެ. ކަލެއަށްޓަކައި އަބަދުވެސް ހުންނާނީ އަހަރެންނެވެ.” ޝައިންއަށް އައިލީންގެ ނުބައި ރޭވުން ނޭނގޭތީ، އޭނާއަށް ހީވީ އައިލީންއަކީ އޭނާގެ ހަމައެކަނި ސަލާމަތްތެރިޔާ ކަމަށެވެ. ނަމަވެސް، އައިލީންގެ ހިތުގައި އޮތީ ޝައިންއަށް ލޯބި ދިނުމެއް ނޫނެވެ؛ އޭނާ ބޭނުންވީ ޝައިން އޭނާގެ ބާރުގެ ދަށަށް ގެނެސް، ނީމްގެ ދިރިއުޅުމުން ޝައިން މުޅިން ފޮހެލާށެވެ. ޝައިން އާއި ނީމްގެ ދިރިއުޅުން ނަރަކައަކަށް ބަދަލުވަމުން ދިޔައިރު، އައިލީން ހުރީ އޭނާގެ ކާމިޔާބީއަށްޓަކައި އުފަލުން ފޮޅިފައެވެ.

ދުވަސްތައް ފާއިތުވަމުން ދިޔަވަރަކަށް އައިލީންގެ ރޭވުންތައް ދިޔައީ ކާމިޔާބުވަމުންނެވެ. ޝައިން އާއި ނީމްގެ ދެމެދުގައި އޮތް ލޯބި ނަފްރަތަށް ބަދަލުވެ، ދެމީހުންގެ ދިރިއުޅުން މުޅިން ބަރުބާދުވިއެވެ. ނީމް އަމިއްލަ ނަފްސަށް އޮތް އިތުބާރު ގެއްލި، މީހުންގެ މަލާމާތާއި ކުރިމަތިލާން ޖެހުމުން ކޮޓަރިން ބޭރަށް ނުކުންނަންވެސް ބިރުގަތެވެ. އަނެއްކޮޅުން ޝައިން ހުރީ އައިލީންގެ “ބާރުގެ” ދަށުގައެވެ. އައިލީން ބޭނުންވި ގޮތަށް، އެ ދެމީހުންގެ ދިރިއުޅުމަކީ ހަގީގީ ނަރަކައަކަށް ވެގެން ދިޔައެވެ. އައިލީންގެ މަންމައަށް އަދިވެސް ހީވަނީ އައިލީންއަކީ ވަރަށް ރަނގަޅު، މަޑުމައިތިރި ކުއްޖެއް ކަމަށެވެ. ނަމަވެސް އެ ސާފު ބުރުގާގެ ފަހަތުގައި ފޮރުވިފައިވަނީ ދެމީހެއްގެ މުޅި ދިރިއުޅުން ދުއްވާލި ނުބައި ސޫރައެއްކަން އެކަކަށްވެސް ނޭނގެއެވެ. އައިލީން އޭނާގެ ކޮޓަރީގައި ހުރެ، ލޯގަނޑުން އަމިއްލަ ސޫރައަށް ބަލާލުމަށްފަހު ހިނިތުންވެލިއެވެ. އޭނާ ބޭނުންވި ބަދަލު ހިފިއްޖެއެވެ.

އައިލީން އުފަލުން އުޅުނު ނަމަވެސް، އޭނާގެ ހަރަކާތްތަކަށް ވަރަށް ފަރުވާތެރިކަމާއެކު ބަލަމުންދިޔަ މީހަކު ހުއްޓެވެ. އެއީ އޭނާގެ އެއްބަނޑު އެއްގުނަ ކޮއްކޮ އައިރީންއެވެ. އައިރީންއަކީ މަންމަގެ ކުރިމަތީގައި “ނުބައި” ކުއްޖެއް ކަމަށް ބެލެވުނަސް، އޭނާއަކީ މީހުންގެ މޫނުމަތިން ކަންކަން ދެނެގަންނަން މާ މޮޅު ކުއްޖެކެވެ. އެއްދުވަހަކު އައިލީން ފެންވަރަން ވަދެ ހުއްޓާ، އޭނާގެ ފޯނަށް އައި މެސެޖުތަކެއް އައިރީންއަށް ފެނުނެވެ. އެއީ ޝައިންއަށް ފޮނުވި ފޮޓޯތަކާއި، ނީމްގެ އަގުވެއްޓޭ ގޮތަށް ރާވާފައިވާ ރޭވުންތަކުގެ ހެކިތަކެވެ. އައިރީންގެ ދެލޯ ބޮޑުވެގެން ދިޔައެވެ. މަންމަގެ ކުރިމަތީގައި “މަލާއިކަތެއް” ފަދައިން އުޅޭ އޭނާގެ ދައްތަގެ އަސްލު ސޫރަ ފެނުމުން އޭނާ ހައިރާންވިއެވެ. “އައިލީން… ކަލޭ ތިއީ އަހަރެން ހީކުރި ވަރަށްވުރެ މާ ނުބައި މީހެއް ދޯ؟” އައިރީން މަޑުމަޑުން ބުންޏެވެ. މިހާރު އައިލީންގެ ބިރުވެރި ސިއްރު އޮތީ އައިރީންގެ އަތްމަތީގައެވެ.

އއިލީން ފެންވަރައިގެން ނުކުތްއިރު، އޭނާގެ އެނދުމަތީގައި ފޯނު ހިފައިގެން އައިރީން އިށީނދެގެން އިނެވެ. އައިލީންގެ މޫނުމަތިން ކުއްލިއަކަށް ކުލަވަރު ބަދަލުވެ، ބިރުވެރިކަން އުފެދުނެވެ. “ތީގެން ކަލޭ ތިބަލަނީ ކޮން އެއްޗެއް؟” އައިލީން ހަޅޭއްލަވައިގަންނަމުން ފޯނު އަތުލަން މަސައްކަތްކުރިއެވެ. ނަމަވެސް އައިރީން ތެދުވެ، މަލާމާތުގެ ހިނިތުންވުމަކާއެކު އައިލީންއަށް ބަލާލިއެވެ. “މަންމަގެ ރަން ދަރިފުޅުގެ އަސްލު ސޫރަ ފެނިއްޖެ. ޝައިން އާއި ނީމްގެ ދިރިއުޅުން ކަލޭ ތި ހަލާކުކޮށްލީ ވަރަށް ރޭވުންތެރިކަމާއެކު ދޯ؟” އައިރީން ބުންޏެވެ. އައިލީންގެ މޫނުމަތީގައި އޮތް މަޑުމައިތިރިކަން ކެނޑި، އޭނާގެ އަސްލު ނުބައިކަން ދެލޮލުން ފާޅުވާން ފެށިއެވެ. އޭނާ އައިރީންގެ ކައިރިއަށް ޖެހިލާފައި މަޑުމަޑުން ބުންޏެވެ. “ކަލޭ ތި ވާހަކަ އެއްވެސް މީހަކަށް ކިޔައިދީފިނަމަ، ނީމްއަށް ވީވަރަށްވުރެ މާ ދެރަ ގޮތެއް ކަލެއަށް ހަދާލާނަން”

**ނުނިމޭ**