ފޮތް

ރީއްޗެވެ. ހާދަހައި ރީއްޗެވެ. ހާދަ ފުރިހަމައެވެ. އެ ލަދުރަކި ހީލުމެވެ. ހިތިފަތު ބުމައެވެ. ކުރަނގި ދެލޮލެވެ. ދިގު އެސްފިޔަތަކެވެ. މާ ދޮން ނުވިޔަސް އޮމާން މޫނެވެ. މޭކަޕެއްގެ އެހީއާ ނުލައި ވެސް އެއީ ހަމަ އެންމެ ފުރިހަމަ ފަތްމިންޏެކެވެ. އަބަދު ވެސް ލާފައި ހުންނަ ދޫ ހެދުންތަކާއި، އަޅާފައި ހުންނަ ބޮޑު ބުރުގާތަކުގެ ސަބަބުން ހަށިގަނޑުގެ ވަނާތައް ވަންހަނާ ކުރެވިފައި ވުމަކީ އަހަރެންގެ ސަމާލުކަން އިތުރަށް އޭނާއަށް ހުއްޓުނު ކަމެކެވެ.

ފުރަތަމަ އަހަންނަށް އޭނާ ފެނުނީ އޭނާ ދާ ކޮލެޖު ކައިރިންނެވެ. އަހަރެންގެ އެކުވެރީންނާ އެކީ އެތާ ކައިރީގައި ލާޗާރުބިޗާރަށް އެނބުރެނިކޮށެވެ. އަތުގައި ހުރި ފޮތްތައް މޭމަތީގައި ޖައްސާލައިގެން އޭނާ ހިނގާފައި ދިޔައީ ސީދާ އަހަރެމެންގެ ކުރިމަތިން ލާފައެވެ. ކިރިޔަ ކިރިޔާ ނޭފަތަށް އެނގުން ވެލައިގެން ދިޔަ އެ ލުއިލުއި، މީރު ސެންޓުގެ ވަހާ އެކީ އެދިމާއަށް ދެވުނީ އަހަރެންގެ ނަޒަރެވެ. އެންމެ ފަހަރަކު ވެސް އިސްއުފުލައި ނުލައި ހުރި އިރު، އެ އޮމާން މޫނުމަތީގައިވީ ލަދުރަކި ކަމުން ފިދާވާހައި ވިއެވެ.

ހިނދުކޮޅަކަށް ވެސް މަޑެއް ނުވަމެވެ. ތުމުން ފުމެލީމެވެ. އޭނާ ބަލައެއް ނުލިއެވެ. ވަގުތުން އަހަރެންގެ އެކުވެރީންގެ މަލާމަތާއި ފުރައްސާރަ ކުރިމަތިވިއެވެ. ރުޅި އައީ އެހިސާބުންނެވެ. މީގެ ކުރިން އަހަރެންގެ އެފަދަ އިޝާރާތަކަށް ނޫނެކޭ ބުނާ އެއްވެސް އަންހެން ކުއްޖަކާ ދިމާވެފައި ނުވާ އިރު، މި އަންހެން ކުއްޖާއަށް އަހަރެންގެ އެދުމުގައި ކޮޅުފައިން ޖެހުމަށް އޮތީ ކޮން ޙައްޤެއް ހެއްޔެވެ؟

އަތުގައި އޮތް ސިނގިރޭޓު ބިންމައްޗަށް އެއްލައިލާފައި އޭގެ މައްޗަށް ފައިން އަރާފައި ޗިސްޗިސް ކޮށްލީމެވެ. “ބަލަން ހުންނާށޭ، އަހަންނަށް ކާމިޔާބު ވާނޭ” ކިޔައި ރައްޓެހިން ކުރިމަތީ ފޮނި ކެނޑުމަށް ފަހު އަހަރެން ގޮސް އެ އަންހެން ކުއްޖާއާ އަރައި ހަމަ ކުރީމެވެ.

“ހެއި.. އަހަންނަށް ކިޔަނީ ޒެއިން.. ތީ ކޮން ކުއްޖެއް..؟” އަހަރެން ތަޢާރަފްވީ ނަމަވެސް، އެ އަންހެން ކުއްޖާ ކަހައި ތަން ހިރުވައި ވެސް ނުލިއެވެ.

“ދޫންޏާ.. ކޮން ނަމެއްތަ ކިޔަނީ..؟” ދެން ވެސް ޚަބަރެއް ނުވިއެވެ. ކުޑަ ނަމަވެސް ޢިޝާރާތެއް ނުވިއެވެ. އިސްއުފުލައި ބަލައިނުލިތާ، މަޑެއް ވެސް ނުވިއެވެ. އެކަމުން އަހަރެންގެ ހިތުގައި އޮތް ޢަޒުމު ވީ ވަރުގަދައެވެ. މި އަންހެން ކުއްޖާ ޙާސިލް ކުރާނަމެވެ.

“ބަލައި ވެސް ނުލާނަންތަ..؟” ލަދުވެތިކަމުގެ ކަންފުޅެއް ވެސް ނެތި، އިސްލާމީ ރިވެތި ފޭރާމުން ނިވާވެގެން ހުރި، މި ލަދުރަކި، މަޑުމައިތިރި އަންހެން ކުއްޖާއާ އަހަރެން ފޮށެމުން ދިޔައީ މި ކުރެވެނީ ކިހައި ވަރެއްގެ ފާފައެއް ކަން ނޭނގޭ ޙާލުގައެވެ.

އެ އަންހެން ކުއްޖާގެ އެއްވެސް ޢިޝާރާތެއް ނުވުމުން އަހަރެން އިތުރަށް ރުޅިގަދަވާން ފެށިއެވެ. މީގެ އިރުކޮޅެއް ކުރިން ބޭނުން ކުރި ތަކެތީގެ އަސަރު ސިކުނޑިއަށް ވާޞިލްވާން ފެށީ އޭގެ އެންމެ ނުރައްކާތެރި ގޮތުުގައެވެ. އިތުރަށް ކެތް ނުވެގެން އަހަރެން އޭނާގެ ކޮނޑުގައި ހިފައި އަހަންނާ ދިމާއަށް އަނބުރައިލީމެވެ. އެވަގުތު ލިބުނު ސިހުމުގައި އޭނާގެ ދެލޯ ބޮޑުވި އިރު އަތުގައިހުރި ފޮތްތައް ބިންމައްޗަށް ވެރުނެވެ. އަވަސްއަވަހަށް އަހަރެންގެ އަތް ފޮޅުވައިލާފައި އަހަންނާ ދުރަށް ޖެހުނު އިރު، އެ ބޮޑުބޮޑު ދެލޮލުން ފެނުނު ބިރާއި ސިހުމުން އަހަރެންގެ ހިތަށް ވާންވެލީ ކީއްވެގެން ކަމެއް ނޭނގުނެވެ. އިތުރަށް އޭނާއާ ގާތްވާކަށް ނުކެރުނެވެ. އެ ސާފު، ސާދާ ހިތުގައި ކޫރުމެއް އަޅުވައިލަން ނުރުހުނެވެ.

ދެން ވެސް އެއްޗެކޭ ނުބުނެ އެކުއްޖާ އަވަސްއަވަހަށް ގުދުވެފައި ފޮތްތައް ނަގަން ފެށިއެވެ. އަތުޖެހުނު ހުރިހައި ފޮޮތެއް ނަގައިގެން އަވަސް ފިޔަވަޅުތަކެއްގައި އޭނާ ހިނގައިގަތް ނަަވެސް، މިފަހަރު އަހަންނަށް ފަހަތުން ދާކަށް ނުކެރުނެވެ. އަހަރެންގެ ކުޑަކުޑަ ޢަމަލަކުން ވެސް އެ މުށިކުލައިގެ ކަޅީގެ ތެރެއިން ފެނުނު ބިރުވެރި ކަމުގެ އަސަރުތައް ދެވަނަ ފަހަރަށް ދެކޭނެހައި ހިތްވަރެއް އަހަރެންގެ ނެތީއެވެ.

ކަރުއެލުވައިލަމުން ހިނގައިގަންނަން އުޅުނު ތަނާ އަހަރެންގެ ފިޔަވަޅުތައް މަޑުޖެހުނީ ވެއްޓިފައި އޮތް ފޮތެއް ފެނުމުންނެވެ. ގުދުވެލާފައި، އެ ފޮތް ނަގާފައި އޭނާއަށް ދޭން ވެގެން ބަލައިލި އިރު އެ އަންހެން ކުއްޖާ ޖެހުނުތާ ލަކުނެއް ވެސް ނެތެވެ. އަނެއްކައި ވެސް އެ ފޮތަށް ބަލައިލެވުނެވެ. ބޭރު ގަނޑުގައި “ދިރިއުޅުމަށް އިސްލާމީ ނަޒަރަކުން” ޖަހާފައި އޮތް ތަން ފެނުމުން އެއީ އިސްލާމީ ފޮތެއް ކަން އެނގުނެވެ. އަހަރެން ހައިރާނެއް ނުވަމެވެ. އެ ފަތްމިންޏަށް އެންމެ ނަޒަރެއް ދީފައި ވެސް އެއީ ދީނަށް ލޯބިކުރާ ޒުވާނެއް ކަން ކޮންމެ މީހަކަށް ވެސް އެނގޭނެއެވެ.

ފޮތުގެ ނަން ކިޔައިލާފައި އަހަރެން ވަގުތުން ފޫހިވިއެވެ. އެހެނަސް، ފޮތް ހުޅުވައިލި އިރު ފުރަތަމަ ގަނޑުގައި ޖަހާފައި އޮތް ނަން ފެނުމުން އަހަރެންގެ ތުންފަތަށް ހިނިތުންވުމެއް ވެރިވިއެވެ.

“އިންޝާ…” އެ ނަން އަހަރެންގެ ދޫމަތީގައި ފުރޮޅިލީ އިރު އަހަރެންގެ ހިތުގެ ތެޅުމަށް ބަދަލު އައިކަން އަމިއްލައަށް ވެސް އިހުސާސް ކުރެވުނެވެ. ކުއްޖާއާ އެއްވަރަށް ނަން ވެސް ރީއްޗެވެ. ދުލަށް ފަސޭހައެވެ. ހިތަށް ފިންޏެވެ.

“ސާބަހޭ ޒެއިން.. ތިވަރު ވާކަށް ނުވާނެ.. ދެން މާ ރީތި މަންޖެއެއް ވެސް ނޫނޭ އޭނަ ފަހަތުން ތި ދުވަނީ..” އެވަގުތު ފަހަތުން އިވުނު އެކުވެރި ނާޒިލްގެ އަޑަށް އަހަންނަށް ހަމަބިމަށް އާދެވުނެވެ.

“ތެދެއް.. ދެން ކައެގެ ޓައިޕެއް ވެސް ނޫނެއްނު.. ހީވަނީ ބޮޑު ފޮތި މާއްޔަކަށް އެރިގެން ހުރިހެން.. އެއްޗެއް ފެންނަނީކީ ވެސް ނޫނެއްނު.. ޒެއިންއަށް މާ ރީތި ކުދިން ވާނެ..” ރާއިދުގެ ވާހަކައިން އަހަންނަށް ރުޅި އާދެވުނީ އިޚްތިޔާރަކައި ނުލައެވެ. ކީއްވެ ކަމެއް ނޭނގުނެވެ. އަހަންނަށް ނުރުހުހެވެނީއެވެ. ހިތްހަމަނުޖެހެނީއެވެ. އިންޝާގެ ނަމާ ގުޅުވައިގެން އެފަދަ އެެއްވެސް ބަހެއް މީހެއްގެ ދުލުން ބޭރުވާން ނޭދެވެނީއެވެ. އެހެނަސް އެހެން ބުނާނެހައި ހިތްވަރެއް ނުކުރެވުނެވެ. އެމީހުން ދިމާކުރާނެތީއެވެ. މަލާމަތް ކުރާނެތީއެވެ.

“މިރޭ ޕާޓީން ފެންނާނެ ހެއްސަ ސަޅި ކުދިން.. މި ނުވާނެ ކުނޑިފުށަކަށް ވެސް.. ދެން މިތާ ކަޑަވެފަ ނުހުރެ ހިނގާ ދާން..” އަހަރެންގެ ކޮނޑުގައި އަތް އަޅުވައިލަމުން ކިޔާން ބުނެލުމާ އެކު އަހަރެން ވެސް ދެކޮޅު ހެދުމަކައި ނުލައި އެމީހުންނާ އެކީ ހިނގައިގަތީމެވެ. ސައިކަލާ އަރާ ހަމަވެފައި އިތުރު މީހަކަށް ފެނުމުގެ ކުރިން އަތުގައި އޮތް ފޮތް ސައިކަލުގެ މަޑި ދަށަށް ލީމެވެ. ކީއްވެ ކަމެއް ނޭނގެއެވެ. އެ ފޮތް އަހަރެންގެ އަތުގައި ބާއްވަން އެދުނީއެވެ. އަލުން އިންޝާއާ ދިމާވެދާނެ ކަމުގެ އުއްމީދުގައެވެ.

*** ** ***

އެރޭގެ ޕާޓީގައި އަހަންނަށް ހުރެވުނީ ނެގިމަޑުވެފައެވެ. އަހަރެންގެ އެކުވެރީންނާއި، ދަންނަ މީހުންނާއި، ނުދަންނަ މީހުން ހީހީފައި މަޖާ ނަގަމުން ދިޔަ އިރު ވެސް، އަހަންނަށް ހުރެވުނީއެވެ. އެކި އެއްޗެހި ބޮއެބޮއެފައި، މަސްތުގެ ޙާލުގައި ތިބެ މިޔުޒިކާ އެއްވަރަށް ފައިހަމަކުރަމުން ދިޔަ މީހުން ތެރޭގައި އަހަންނަށް ބުދެއް ފަދައިން އިނދެވުނީއެވެ. ހަށިގަނޑުގެ ވަނާތައް ފައުޅުވާ ފަދަ ބާރު، ކުރު އެއްޗެހި ލައިގެން ތިބި އަންހެން ކުދީން ފެނިފައި ވެސް އަހަންނަށް މިރޭ އެއްވެސް އަސަރެއް ނުކުރިއެވެ.

“ޒެއިން.. އޭނދަ މަންޖެ އެބަ އަހާ ކައެ ވާހަކަ..” އަހަރެންގެ ގާތަށް އައިސް ރާއިދު ބުނެލުމާއެކީ އަހަންނަށް އެދިމާ ބަލައިލެވުނެވެ. ކިރިޔާ ފޫކޮޅު ފޮރުވޭ ވަރުގެ ކުރު ހެދުންކޮޅެއްގައި އިން އަންހެން ކުއްޖާ ހީލާފައި ހަނާ އަޅައިލި ނަމަވެސް އަހަންނަށް ސަމާލުކަމެއް ނުދެވުނެވެ. އެ ކުއްޖާ ވެސް ރީއްޗެވެ. ދޮނެވެ. ލޫޅާފައްޗެވެ. އެހެނަސް ހިތެއް ނޭދުނެވެ. ހިތަށް ވެރިވީ އިންޝާއެވެ. އެ ލަދުރަކިކަމެވެ. އެ މަޑުމައިތިރިކަމެވެ.

“ބުނޭ އަހަރެން ބޭނުމެއް ނުުވެޔޭ..” އަހަރެންގެ ޖަވާބުން ރާއިދު ހައިރާންވީ އަހަންނަކީ ލިބޭހައި ފުރުސަތެއްގައި އަންހެން ކުދީންނާ ދޯޅަވާ މީހެއްކަން އޭނާއަށް އެނގޭތީއެވެ.

“ކިހިނެއް ވެގެންތަ ކައެ ތި އުޅެނީ..؟ މިއަދު ހެނދުނު އެ މަންޖެ ފެނުނު ފަހުން މިއަދު އެއްކޮޮށް ކައެ ތި ހުންނަނީ ތިހެން.. ޒެއިން ތީ ކައެ ކުރިން އުޅުނު ގޮތެއް ނޫން ގައިމު.. އެ މަންޖެއާ ހަދައިތަ ތިވަރެއް ތި ވަނީ ކައެއަށް..؟ އެއީ ދެން ތާކު ހުރި-” އަނގައި ބަސް އޮއްވައި އަހަރެން ރާއިދުގެ ގިރުވާނުގައި ހިފައިފައި، އަލިފާނުން ފިއްސައިލާ ވަރުުގެ ނަޒަރެއް ދިނީމެވެ.

“ދެން އޭނައޭ ކިޔައިގެން ތި ދުލުން އެންމެ އެއްޗެއް ބުންޏަސް ނިމުނީ!” އަހަރެންގެ އިންޒާރުން ރާއިދު ވަގުތު މައިތިރިވެއްޖެއެވެ. ޚަރާބުވި މޫޑާ އެކީ އިތުރަށް އެތަނުުގައި ހުންނާކަށް އަހަރެން ބޭނުމެއް ނުވިއެވެ. ވަގުތުން އެތަނުން ނުކުމެ، ސައިކަލަށް އަރައިގެން ގެއަށް ދިޔުމަށް މިސްރާބު ޖެހީ. ބަދަލުވަމުން ދިޔަ އަހަރެންގެ ޠަބީޢަތާ މެދު އަމިއްލައަށް ވެސް ސުވާލު އުފެދިފައި ހުރެއެވެ.

ގެއަށް ދިޔަ ގޮތަށް ގޮސް އަހަރެން އެނދުމައްޗަށް ވެއްޓިގަތީމެވެ. ބޮލުގެ ރިހުމަށް ކެތް ނުވެގެން ދެލޯ މަރައިލި އިރަށް ހަމަ އެ ސޫރަ ފެނިއްޖެއެވެ.އެ އޮމާން މޫނެވެ. ބޮޑުބޮޑު، މައުސޫމު ދެލޮލެވެ. އިސްޖަހައިގެން ހުރި އިރު އެ ފިޔާތޮށި ތުންފަތުގައިވީ ލަދުރަކި ހިނިތުންވުމެވެ. އިޚްތިޔާރަކައި ނުލައި އަހަރެންގެ ތުންފަތަށް ހިނިތުންވުމެއް ވެރިވިއެވެ. ނޭނގޭ ބާރަކުން ހިތަށް ހަމަޖެހުން ލިއްބައިދީފިއެވެ.

ކުއްލިއަކަށް އަހަރެން އެނދުން ތެދުވެ ގޮސް ޑްރެސިން ޓޭބަލް ކުރިމަތީގައި ހުއްޓުނީމެވެ. ވަތްގަނޑު ހުޅުވައިލާފައި އޭގެ ތެރޭގައި އޮތް ފޮތް ނެގީމެވެ. ފޮތް ހިފައިގެން ގޮސް އެނދުމަތީގައި އިށީނދެފައި، ފޮތް ހުޅުވައިލީމެވެ. ފުރަތަމަ ގަނޑުގައި ލިޔެފައި އޮތް އިންޝާގެ ނަމުގައި ފިރުމައިލި އިރު، އަހަރެންގެ ތުންފަތަށް ހިނިތުންވުމެއް ވެރިވިއެވެ. ހިތަށް ހަމަޖެހުން ލިއްބައިދިނެވެ.

ޚުދު އަހަންނަށް ވެސް އަހަންނަށް މި ކުރެވޭ ކަމެއް ނޭނގުނެވެ. އަހަންނަކީ ދުވަހަކު ދީނީ ފޮތެއްގައި އަތްލި މީހެއް ނޫނެވެ. އެންމެ ފަހުން ޤުރުއާން އަކުރެއް ވެސް ކިޔަވައިލީ ސްކޫލުގައި އުޅުނު އިރުއެވެ. އަމުދުން ނަމާދެއް ކޮށްލަން ހިތަށް އެރި ދުވަހެއް ވެސް ހަނދާނެއް ނުވެއެވެ. ރަލާއި މަސްތުގެ ދުނިޔޭގައި، މާތްﷲ ޙަރާމް ކުރެއްވިހައި ފާފައަކަށް އަރައިގަންނަމުން ދިޔައީ އޮތް ހަމައެކަނި ދުނިޔެއަކީ މިއީ ނޫން ކަން ހަނދާން ނައްތައިލާފައެވެ. ލިބުނު ނުބައި އެކުވެރީންނާ އެކުގައި މި ޙަޔާތް ވެއަތުކުރަމުން ދިޔައީ ޢަމަލުތަކުގެ ހިސާބު ބެއްލެވޭނެ ދުވަހެއް އޮތް ކަން ހަނދާން ނައްތައިލާފައެވެ. އެހެނަސް މިއަދު…

މިއަދު އަހަރެން މި އިނީ ދީނީ ފޮތެއް ކިޔާށެވެ. އެ ފޮތުގައި މުސްލިމުންގެ ދުވަހީ ދިރިއުޅުމެއް އިސްލާމީ ނަޒަރަކުން އޮންނަން ވާނެ ގޮތް ލިޔެފައި އޮތް އިރު، ކިޔަމުން ދިޔަ ލަފްޒަކުން އަހަރެންގެ ހިތަށް ލިބެމުން ދިޔައީ ބަޔާން ކުރަން ދަތި އުނދަގޫ ކަމެކެވެ. ފޮތުގައި އޮތް އެއްވެސް ކަމަކާ އަހަރެންގެ ދިރިއުޅުމާ އެއްވެސް ގުޅުމެއް ނެތެވެ. އަހަންނަކީ ހެނދުނު އޮފީހަށް ގޮސް، ހަވީރު ރައްޓެހިންނާ އެކީ މަގުމައްޗަށް ނުކުމެ މީހުންނަށް ފުރައްސާރަ ކޮށް، ރީތި އަންހެން ކުދީންނާ ފޮށެ، ރޭގަނޑުގެ މަސްތުގެ ކަނޑުގައި ޣަރަޤުވަމުން ދާ މީހެކެވެ. ނަމާދު ކުރުމެއް، ޤުރުއާން ކިޔެވުމެއް، ޛިކުރު ކުރުމެއް އަހަންނަކަށް ނެތެވެ. އެކަންތައްތައް އަހަންނަށް ވެފައި ވަނީ ނުހަނު ބީރައްޓެހި ކަމަކަށެވެ.

ފޮތުގެ ވަކި ހިސާބަކަށް ކިޔުމަށް ފަހު އަހަރެން ފޮތް ލައްޕައިލާފައި މޫނުގައި އަތް އުނގުޅައިލީމެވެ. ކިޔުނު ބަސްތަކުގެ ސަބަބުން އަހަރެންގެ ހިތަށް ބަދަލު އައިސްފިއެވެ. ނުހަނު ބޮޑަށެވެ. ކީއްވެ ކަމެއް ނޭނގުނެވެ. މީގެ ކުރިން ވެސް އެތައް ބަޔަކު ނަސޭޙަތް ދިން އިރު ބަދަލު ނުވި ހިތެއް، އަންހެން ކުއްޖަކު މެދުވެރިވެގެން ލިބުނު ފޮތެއްގެ ސަބަބުން ބަދަލުވުމަށް މެދުވެރިގެން ހިނގައްޖެއެވެ. ނޭނގޭ ހައިޖާނުގަނޑެއް ސިކުނޑީގައި އުފެދި، އުޅެވޭ ގޮތާއި މެދު، ފުރަތަމަ ފަހަރަށް ހިތުގައި ސުވާލު އުފެދިއްޖެއެވެ.

*** ** ***

ޖެހިގެން އައި ދުވަހު އަހަރެން އިއްޔެ ވެސް އިންޝާއާ ދިމާވި ވަގުތަށް އޭނާގެ ކޮލެޖު ކައިރިޔަށް ދިޔައީމެވެ. މާ ގިނަ އިރަކު އިންތިޒާރު ކުރާކަށް ނުޖެހުނެވެ. އެ ރީތި، ސާފު، ސާދާ ސޫރަ ފެނުމާ އެކީ އަހަރެން އެ ނަމުން ގޮވައިލީމެވެ. ވަގުތުން އިންޝާ އޭނާގެ ފިޔަވަޅުތައް އަވަސްކޮށްލާފައި ހިނގައިގަތުމުން އަހަންނާ ދުރަށް ދާން އުޅެނީކަން އަހަންނަށް އެނގުނެވެ. އެކަމުން ހިތަށް ތަދުވީ ނަމަވެސް ފަހަތުން ދާކަށް ނުކެރުނެވެ. އިއްޔެ ކަންތައް ކުރެވުނު ގޮތުން ލަދު ގަތީއެވެ. ނުކެރުނީއެވެ.

ލޯކުރިމަތިން އިންޝާގެ ސޫރަ ގެއްލުމާ އެކީ އަހަރެން ފުން ނޭވާއެއް ދޫކޮށްލާފައި އަތުގައި އޮތް ފޮތަށް ބަލައިލީމެވެ. މިއަދު އަހަރެން މިތަނަށް އައީ އެ ފޮތް ރައްދުކުރަން ކަމުގައިވީ ނަމަވެސް، އެކަން ނުކުރެވުނީއެވެ.

އެނބުރި އަހަރެން ގެއަށް ދިޔައީ އެ ފޮތް ހިފައިގެންނެވެ. ގެއަށް ގޮސް، ރޭގައި ހުއްޓައިލި ހިސާބުން ފެށިގެން އަނެއްކައި ވެސް ކިޔަން ފެށީމެވެ. އެ ބޯ ފޮތުގެ ދެތިން ޞަފްޙާ ކިޔައިލާފައި، ހިތަށް އުނދަގޫ ވެގެން ކެތް ނުވާ ވަރު ވުމުން އަނެއްކައި ވެސް ހުއްޓައިލާފައި ފޮތް ބޭއްވީމެވެ. މާދަމާ ހަމަ ޔަގީނުން ވެސް އިންޝާއަށް އެ ފޮތް ރައްދު ކުރާނަމޭ ބުނެ އަމިއްލަ ނަފްސަށް ވަޢުދު ވީމެވެ.

އެހެނަސް، ޖެހިގެން އައި ދުވަހު ވެސް ކަންތައް ވީ ހަމަ އެހެންނެވެ. އަހަންނަށް އިންޝާއާ ހަމައަށް ދެވުމުގެ ކުރިން ހަލުވި ފިޔަވަޅުތަކެއްގައި އިންޝާ ގޮސް އަހަރެންގެ ލޯކުރިމަތިން ގެއްލެއެވެ. ފަހަތުން ދާން އަހަންނަށް ނުކެރެނީ ފުރަތަމަ ދިމާވި ދުވަހު ކަންތައް ކުރެވުނު ގޮތުން ދެރަވެ، ލަދުގަންނާތީއެވެ.

މިގޮތުގައި ތިން ހަފްތާ ވެއަތުވެގެން ދިޔަ އިރު ވެސް، ކަންތައް އޮތީ ހަމަ އޮތް ގޮތަށެވެ. ކޮންމެ ދުވަހަކު ވެސް އަހަރެން އިންޝާ ކޮލެޖަށް ދާ ވަގުތު އެ ކޮލެޖު ކައިރިއަށް ދަމެވެ. އެހެނަސް އިންޝާއަށް ފޮތް ރައްދުކޮށްލާނެ ފުރުސަތެއް ނުލިބެނީސް، އިންޝާ ލޯމަތިން ގެއްލެއެވެ. ދެން ގެއަށް އައިސް އެ ފޮތުގެ އެހެން ޞަފްޙާއެއް ކިޔައިލަމެވެ. އަމިއްލަ ޢަމަލުތަކުން ދެރަވެ، ލަދުގަންނަ ވަރު ވުމުން ފޮތް ލައްޕައިލަމެވެ. އަނެއްކައި ވެސް ހަމަ އެކަން އޭގެ އަނެއް ދުވަހު ތަކުރާރު ވެއެވެ. އެގޮތުގައި ތިން މަސް ވެއަތުވެގެން ދިޔަ ދުވަހަކީ އަހަރެން އެ ފޮތް އެކުގައި ކިޔައި ނިމުނު ދުވަހެވެ.

ފޮތް އެއްކޮށް ކިޔައި ނިމުނު އިރު އަހަރެންގެ ދިރިއުޅުމަށް އަންނަމުން ދިޔަ ބަދަލުތައް އަހަންނަށް ވުރެ ވެސް ކުރިން ފާހަގަ ކުރެވުނީ މަންމައާއި ބައްޕަގެ އިތުރުން ހެޔޮއެދޭ ޢާއިލާ މެންބަރުންނަށާއި ރައްޓެހިންނަށެވެ. ޚުދު އަހަންނަށް ވެސް އެކަން ފާހަގަ ކުރެވުނީ އެމީހުން އުފާވެފައި އެވާހަކަ ދައްކަން ފެށުމުންނެވެ.

އަހަންނަށް މިހާރު ފަރުޟު ނަމާދުތައް ބަރާބަރަށް ކުރެވެއެވެ. ކޮންމެ ދުވަހަކު މަދުވެގެން ޞަފްޙާއެއް ނަމަވެސް ޤުރުއާނުން ކިޔެވެއެވެ. ކުރިން އުޅުނު ގޯސް އެކުވެރީންނާ އެކީ އުޅުން ހުއްޓައިލެވިއްޖެއެވެ. އަތްފަޔާއި ކަރުގައި އަޅާ ޗެންޗޭނުތައް ގެއްލި، ދިގުކޮށްފައި އޮތް އިސްތަށިގަނޑު ވެސް ބަދަލުވގެން ހިނގައްޖެއެވެ. ލާޗާރުބިޗާރަށް މަގުމަތީގައި އުޅުން ހުއްޓައިލެވިއްޖެއެވެ. ކުރިން އަންހެނަކު ފެންނަ އިރަށް ފޮށެ އުޅުނަސް، މިހާރު ބެލުން ތިރިކުރެވެއެވެ. އުނދަގޫވީ ނަމަވެސް ވަރަށް ބޮޑުތަނުން މަސްތުވާ ތަކެތީގެ ވަބާއިން ވެސް ސަލާމަތް ވެވިއްޖެއެވެ. ސިނގިރޭޓު ބުއިން ވެސް ހުއްޓައިލެވިއްޖެއެވެ. ފުރަތަމަ މި ބަދަލަށް މަސައްކަތް ކުރަން ފެށި އިރު އިންތިހާއަށް އުނދަގޫވީ ނަމަވެސް، މި ހުރިހައި ކަމެއް ވެސް މިހާރު ކުރެވެނީ ޚުދު އަހަންނަށް ވެސް ނޭނގިއެވެ.

ހެޔޮ މަގުގެ މަތީގައި ސާބިތުވެ ހުންނަން އުނދަގޫވާ ކޮންމެ ފަހަރަކު އަހަރެންގެ ހިތަށް އަންނަނީ އިންޝާއެވެ. އެ ރީތި ސޫރައެވެ. އެ ލަދުރަކި ހިނިތުންވުމެވެ. އެ މަޑުމައިތިރިކަމެވެ. އެ ސޫރައިން އަހަންނަށް ހިތްވަރު ލިބެނީ ޚުދު އަހަރެން ވެސް ހައިރާން ކޮށްލަމުންނެވެ.

ހަތަރު ވަނަ މަސް ފެށުނު ދުވަހެވެ. އެދުވަހު ވެސް އަހަރެން އިންޝާގެ ކޮލެޖު ކައިރިޔަށް ދިޔައީމެވެ. އިންޝާ ފެނުމާ އެކީ ގޮވައިލީ މިފަހަރު ވެސް އެނބުރި އަހަންނަށް ބަލައިލާނެ ކަމުގެ އުއްމީދެއް ނެތިއެވެ. އެހެނަސް…

އެހެނަސް، އިންޝާ އެނބުރި އަހަންނާ ދިމާއަށް ބަލައިލާފައި، ހީލަމުން އިސްދަށަށް ޖަހައިލި މަންޒަރު ފެނުމާ އެކީ އަހަރެންގެ ދެލޯ ދިޔައީ ބޮޑުވެގެންނެވެ. މިއީ ހުވަފެނެއް ނޫން ބާވައޭ ހިތަށް އެރި އިރު އަހަރެންގެ ހިތުގެ ވިންދު އެތައް ގުނައެއް އަވަސްވެގެން ދިޔައެވެ. ދެން ގެންނަންވީ ޙަރަކާތެއް ނޭނގިފައި، އަހަންނަށް ހުރި ފިޔަވަޅު މަތީގައި ހުރެވުނީއެވެ.

އަހަންނަށް ހަމަބިމަށް އާދެވުނީ އިންޝާ އައިސް އަހަރެންގެ ކުރިމަތީގައި ހުއްޓުމުންނެވެ. އަހަންނާ ދެތިން ފިޔަވަޅު ދުރުގައި ހުރެފައި އަތް ދިއްކޮށްލުމާ އެކީ އަހަރެން ކަރުކެހިލީ އަމިއްލަ ނަފްސު ހަމައަކަށް އަޅުވައިލުމަށެވެ. އިންޝާގެ ދިއްކޮށްލެވިފައިވީ އަތަށް ބަލައިލާފައި އަހަރެން ބުމަ އަރުވައިލީ އެއިން ނަގަންވީ މާނައެއް ނޭނގިފައެވެ. އެއާއެކީ އިންޝާ އަހަރެންގެ އަތުގައި އޮތް ފޮތަށް ބަލައިލުމުން އަހަންނަށް އިންޝާ ބުނަން އުޅުނު އެއްޗެއް ދޭހަވެއްޖެއެވެ.

“މި ފޮތް އަހަރެންގެ އަތުގަ އޮތް ކަން އިންޝާއަށް މި ހުރިހައި ދުވަހަކު އެނގޭތަ..؟” އިންޝާގެ އަތަށް ފޮތް ދެމުން އަހަރެން އަހައިލުމާ އެކީ އިންޝާ ބޯޖަހައިލިއެވެ.

“މި ހުރިހައި ދުވަހަކު ޒެއިން މިތަނަށް އައީ އަހަންނަށް މި ފޮތް އަނބުރައި ދޭން ކަން ވެސް އަހަންނަށް އެނގޭ..” އެއީ އިންޝާގެ އަޑު އަހަންނަށް އިވުނު ފުރަތަމަ ފަހަރެވެ. މާޝާﷲ އެވެ. އެ އަޑުގައި އެހުރި އޮމާން ކަމާ ރީތިކަމާއެވެ. އަހަރެން މޮޔަވެދާނެއެވެ. އިތުރަށް އިންޝާ ދެކެ ލޯބިވެވުނު ސަބަބެއް ކަމުގައި އެ އަޑު ވެއްޖެކަން ގައިމެވެ.

“ދެން.. ކީއްވެ.. މި ހުރިހައި ދުވަހަކު.. އަހަރެން ގޮވީމަ ދަނީ..؟ އަހަރެން މި އުޅެނީ ފޮތް އަނބުރައި ދޭން ކަން އެނގޭ އިރު…” އަހަންނަށް އަހައިލެވުނީ ޤަބޫލު ނުކުރެވިފައެވެ.

“އެއީ އަހަންނަށް ވުރެ ބޮޑަށް ޒެއިންއަށް ތި ފޮތް ބޭނުންވާކަން އެނގޭތީ..” އިންޝާ ޖަވާބު ދިނީ އެ ހުރި ގޮތަށް އިސްޖަހާލައިގެން ހުރެއެވެ. އެކަމުން އަހަރެންގެ ހިތުގައި އިންޝާއަށް ދެވިފައިވީ ދަރަޖަ އެތައް ގުނައެއް އިތުރުވީހެން ހީވެއެވެ.

“ދެން.. ކީއްވެ މިއަދު ފޮތް އަތުލަން މަޑުކުރީ..؟” އަހަރެން ވެސް މިފަހަރު ސުވާލު ކުރީ އިސްޖަހައިލަމުންނެވެ. ކިތަންމެ ވަރަކަށް އެ ރީތި ސޫރަ ދެކެން ބޭނުންވި ނަމަވެސް، އެގޮތަށް ހިލޭ އަންހެނަކަށް ބަލަން ހުރުމަކީ ރަނގަޅު ކަމަކަށް ނުވާނެތީއެވެ.

“މިއަދު އަހަންނަށް ޔަގީންވެއްޖެ މި ފޮތުގެ ބޭނުން ޒެއިންއަށް ހާސިލްވެއްޖެކަން.. ޒެއިންއަށް ބަލައިލާފަ އެކަނި ވެސް ޒެއިންއަށް އައިސްފަ ހުރި ބަދަލު އަހަންނަށް އެނގިއްޖެ.. މި ފޮތުން ލިބުނު ނަސޭޙަތުގަ ހިފައިގެން، އަބަދު ވެސް ތިގޮތުގަ ހުންނަން މަސައްކަތް ކުރާނެ ކަމަށް އަހަރެން އުއްމީދު ކުރަން.. މާތްﷲ ޒެއިންއަށް ތެދު މަގު ދެއްކެވީތީ އަހަރެން އުފާކުރަން..” އިންޝާގެ ވާހަކަތަކުން އަހަރެންގެ ހިތަށް ވެރިވީ ބުނެދޭން ނޭނގޭ އިޙުސާސްތަކެކެވެ.

“ކީއްވެ.. ކީއްވެ އިންޝާ.. އަހަންނަށް..” ހިތުގައި އޮތް ސުވާލު ދުލާ ހަމައަށް ގެންނަން އަހަންނަށް އުނދަގޫވިއެވެ.

“ދެވަނަ ދުވަހު މި ފޮތް ރައްދު ކުރަން ޒެއިން އައި ދުވަހު އަހަންނަށް އެނގިއްޖެ ޒެއިންއަށް އައިސްފައި ހުރި ބަދަލު.. މީ އަސްލު ވަރަށް އަސަރުގަދަ، ޢިބްރަތްތެރި ފޮތެއް.. އެދުވަހު އަހަންނަށް އެނގިއްޖެ މި ފޮތް އެކުގައި ކިޔައިފި ނަމަ ޒެއިން ތައުބާވެ، ރަނގަޅުވާނެކަން.. އެހެންވެ އޭގެ ފަހުން ކޮންމެ ދުވަހަކު ވެސް އަހަރެން ޒެއިން ގޮވާ އިރަށް ދަނީ.. މި ފޮތް ކިޔަން ޒެއިންއަށް ފުރުސަތު ދޭން ވެގެން..” ކޮން ފަދަ މާތް، މަތިވެރި އަންހެން ކުއްޖެއް ހެއްޔެވެ؟ އަހަރެންގެ ހިތުން މިވަރަށް މީހަކަށް އިޙްތިރާމް ކޮށް، ލޯބިވެވޭނެ ކަމަކަށް ދުވަހަކު ވެސް އަހަރެން ހިއެއް ނުކުރަމެވެ. އެހެނަސް އިންޝާ އެ ހުރިހައި ކަމެއް ބަދަލު ކޮށްލައިފިއެވެ.

“އަހަރެން.. އަހަންނަކަށް ނޭނގެ ޝުކުރު އަދާކުރާނެ ގޮތެއް ވެސް.. އިންޝާ ތި ކޮށްދިނީ ވަރަށް ބޮޑު ހެޔޮކަމެއް.. އަހަރެން ޢުމުރު ދުވަހު ޝުކުރުވެރި ވާނަން..” އަހަންނަށް ބުނެވުނީ އިޚްތިޔާރެއް ނެތިއެވެ.

“ޝުކުރު އަދާކުރާނެ ގޮތް ވަރަށް ފަސޭހަ.. އަބަދު ވެސް ތިގޮތަށް ހެޔޮލަފާ ރަނގަޅު މުސްލިމެއްގެ ގޮތުގަ ދެމިހުރޭ.. އެވަރު އަހަންނަށް ފުދޭނެ..” އިންޝާގެ ކޮންމެ ބަހަކުން އަހަރެންގެ ހިތުގައި އިންޝާއަށް ދެވިފައިވީ މަޤާމު މަތިވަމުން ދިޔައެވެ.

“ފުރަތަމަ އިންޝާއާ ދިމާވި ދުވަހު.. ކަންތައް ކުރެވުނު ގޮތަށް މަޢާފަށް އެދެން.. އަހަރެން އަސްލު ވެސް މިއަދު ވަރަށް ލަދުގަނޭ އެދުވަހު އުޅެވުނު ގޮތުން..” އަހަރެން ހަމަ އެހެން ބުނުމާ އެކީ އިންޝާ ބޯހޫރުވައިލިއެވެ.

“ޒެއިން ތައުބާވީ ދުވަހު އަހަރެންގެ މަޢާފު ޒެއިންއަށް ލިބިއްޖެ.. އުއްމީދު ކުރަން ޒެއިން އަބަދު ވެސް ތިގޮތުގަ ހުންނާނެ ކަމަށް..” އެހެން ބުނެފައި އިންޝާ އަހަންނަށް ފަސްދީފައި ހިނގައިގަތުމާ އެކީ އަހަރެންގެ ހިތަށް ވާންވެލައިގެން ދިިޔައެވެ. އަހަރެންގެ ދިރިއުޅުން އެކުގައި ބަދަލު ކޮށްލި، އަހަރެންގެ ހިތް އެކުގައި ފަތަޙަ ކުރި އަންހެން ކުއްޖާ ލޯކުރިމަތިން ގެއްލޭތަން ބަލަން އަހަންނަށް ކެތްވާނީ ކިހިނަކުން ހެއްޔެވެ؟

“އިންޝާ..” ބޭއިޚްތިޔާރުގައި އަހަންނަށް ގޮވައިލެވުނު އިރު އިންޝާގެ ފިޔަވަޅުތައް މަޑުޖެހިއްޖެއެވެ. ލަސްލަހުން އެނބުރި ބަލައިލި އިރު އެ ރީތި މޫނުމަތީގައިވީ ސާދާކަމުން އަނެއްކައި ވެސް އަހަރެންގެ ހިތް ކަތިލެވިގެން ހިނގައްޖެއެވެ.

“އަހަރެން ބޭނުން އިންޝާއާ ކައިވެނި ކުރަން..” ހިތްވަރުކޮށްލާފައި އަހަރެންގެ އެދުން ފައުޅުކޮށްލުމާ އެކީ އިންޝާގެ ދެލޯ ބޮޑުވެގެން ދިޔައެވެ.

“އަހަރެން ބޭނުން އިންޝާ ކަހަލަ ހެޔޮލަފާ ރަނގަޅު އަތންބެއް އަހަރެންގެ ޙަޔާތަށް ގެންނަން.. އިންޝާ ފުރަތަމަ ފެނުނު ދުވަހުން ފެށިގެން ވެސް އަހަންނަށް އިންޝާ ދެކެ ލޯބިވެވިއްޖެ.. އިންޝާގެ ފިރިމީހާގެ މަޤާމު ފުރައިލަން ލިބިއްޖެ ނަމަ އިންޝާﷲ އަބަދު ވެސް އިންޝާ އުފަލުގަ ބަހައްޓާނަން.. އަހަރެން ބޭނުން ވަނީ ޙަލާލު ގޮތުގައި އިންޝާއާ ގުޅި، މާތްﷲގެ ބަރަކާތުން ކައިވެނީގެ ޙަޔާތް ފަށަން..” އިރުކޮޅަކު އަހަރެންގެ ވާހަކަ ޤަބޫލު ނުކުރެވިފައި ހުރި ކަހަލަ ގޮތަކަށް ހުރެފައި، އިރުކޮޅަކުން ފެނުނީ އެ ތުންފަތް ހިނިތުންވުމަކުން ދެމިލި ތަނެވެ. އެއަށްފަހު ދަބަހުން ކަރުދާސްކޮޅަކާ ގަލަމެއް ނަގާފައި އޭގައި އެއްޗެއް ލިޔެލުމަށް ފަހު އަހަންނަށް ދިއްކޮށްލިއެވެ.

“މިއީ.. އިންޝާގެ ނަމްބަރުތަ..؟” ޤަބޫލު ނުކުރެވިފައި އަހަންނަށް އަހައިލެވުނީ އޭގައި ނަމްބަރެއް ލިޔެފައި އޮތީމައެވެ. އިންޝާ ފަދަ ކުއްޖަކު ހިލޭ ފިރިހެނަކަށް ނަމްބަރު ދީފާނެ ކަމަށް ހީނުވާތީއެވެ. އަހަރެމެން ދެމީހުންގެ މެދުގައި އެތައް ކަންތައްތަކެއް ހިނގައި ދިޔަ ނަމަވެސް، އަދި ވެސް އަހަންނަކީ އިންޝާއަށް ހިލޭ ފިރިހެނަކަށް ވާތީއެވެ.

“ނޫން.. ބައްޕަގެ..” އިންޝާގެ ޖަވާބުން އަހަރެންގެ ހިތް އުފަލުން ފުރުނު އިރު، އެ އުފާވެރިކަން އަހަރެންގެ ތުންފަތާ ހަމައަށް ވެސް ވާޞިލް ވެއްޖެއެވެ. އިންޝާގެ އެ ޢަމަލުން އިންޝާ ވެސް އަހަންނާ ގުޅެން ބޭނުންވާކަން އެނގުމުންނެވެ. ވަގުތުން އަހަރެން ބޯޖަހައިލާފައި ބައްޕައަށް ގުޅާނެ ކަމުގެ ޔަޤީންކަން ދިނުމުން އިންޝާ އަނެއްކައި ވެސް ހިނިތުންވެލާފައި ފަސްއެނބުރި ދިޔަ މަންޒަރު ބަލަން އަހަންނަށް ހުރެވުނީ ދީވާނާއެއް ފަދައިންނެެވެ.

*** ** ***

މިއަދުު އިންޝާއަކީ އަހަރެންގެ ލޯބިވާ އަނބިމީހާއެވެ. ކައިވެންޏަށް ދެ އަހަރުގައި އަހަރެމެންނަށް ލިބުނު ލޯބިލޯބި ޒީޝާގެ މަންމައެވެ. އިންޝާ ފަދަ ހެޔޮލަފާ އަތންބެއް ދެއްވުމުގެ ނަޞީބު އަހަންނަށް މިންވަރު ކުރެއްވި ކަމަށް ޓަކައި އަހަރެން ކޮންމެ ދުވަހަކު ﷲއަށް ޙަމްދު ކުރަމެވެ. އަހަރެމެންގެ ކައިވެނީގެ ޙަޔާތް އިތުރަށް ބާއްޖަވެރިކޮށްދިން އެހައި ލޯބިލޯބި ދަރިޔަކު ދެއްވިކަމަށް ޓަކައި ޝުކުރު ކުރަމެވެ.

ދަމުނަމާދު ކޮށް ނިމިގެން، ވިތުރި ކޮށްލާފައި އަހަރެން ސަލާމް ދިނުމާ އެކީ ފަހަތުގައި އިން އިންޝާ ވެސް ސަލާމް ދިނެވެ. ދުޢާކޮށް ނިމިގެން އަހަރެން އިންޝާއަށް ބަލައިލުމާ އެކީ އިންޝާ ހިނިތުންވެލާފައި އައިސް އަހަރެންގެ ކޮނޑުގައި ބޯއަޅައިލިއެވެ. އަހަރެންގެ ތުންފަތަށް ވަގުތުން ހިނިތުންވުމެއް ވެރިވި އިރު، އިންޝާގެ ކޮނޑުގައި އަތް ވަށައިލާފައި، އެ ނިތަށް ބޮސްދިނީމެވެ. އެވަގުތު ވެސް އެ ރީތި މޫނުމަތިން ލަދުރަކިކަން ފެނުނީ އެންމެ ފުރަތަމަ އަހަންނަށް އިންޝާ ފެނުނު ދުވަހެކޭ ވެސް އެއްފަދައިންނެވެ.

ކައިރީގައި ހުރި އެނދުގައި ލޯބިކޮށް ނިދައިލާފައި އޮތް އަހަރެމެން ދެމީހުންގެ ލޯބީގެ ނިޝާނަށް ނަޒަރެއް ދިނުމަށް ފަހު އަހަރެން އިންޝާ އިތުރަށް ގަޔާ ކައިރިކޮށްލީމެވެ. އެއީ އަހަރެންގެ ޙައްޤެކެވެ. އަހަރެންނަށް ތެދު މަގު ދެއްކުމުގެ މެދުވެރިޔަކަށް ވުމަށް މާތްﷲ މިންވަރުކުރެއްވި އަހަރެންގެ ލޯބިވާ އަނބިމީހާއެވެ. އަހަރެންގެ ލޯބިވާ ދަރިފުޅުގެ މަންމައެވެ. ފާފައިގެ ކަނޑުގައި އޮޔާ ބެހެމުން ދަނިކޮޮށް ސަލާމަތުގެ އައްސޭރިއަކަށް ގެނެސްދިން، އަހަރެންގެ މައުޝޫގާއެވެ. އެދުވަހު އަހަންނަށް އެ ޚާއްސަ ފޮތް ދިއްކޮށްލި ލަދުރަކި އަންހެންކުއްޖާއެވެ. އަހަރެންގެ ކަޅު، އަނދިރި މާޒީއަށް ބެލުމެއް ނެތި، އަހަރެންގެ މުސްތަޤުބަލު އުޖާލާ ކޮށްދީ، ހެޔޮމަގުގައި ސާބިތުވެ ހުރުމަށް މެދުކެނޑުމެއް ނެތި ހިތްވަރު ދޭ، އަހަރެންގެ ލޯބިވާއެވެ. އަހަރެންގެ އިންޝާއެވެ.

ނިމުނީ