ކަނބިލި

އެއްފަހަރެއްގެ ބޮޑު ޗުއްޓީގައި އިފްހާމް އޭނާގެ ބައްޕަ އަދި މަންމަ އާއި އެކު ކާށިދޫއަށް ދިޔައެވެ. އެއީ އިފްހާމްގެ މާމަ އާއި ކާފަގެ އިތުރުން އާއިލާގެ ބައެއްކުދިން އެރަށުގައި އުޅޭތީއެވެ. އުފާވެރި މަޖާ ދުވަސްތަކެއް އެރަށުގައި ހޭދަކޮށްލުމަކީ އިފްހާމް ވަރަށް ބޭނުންވާ ކަމެކެވެ.

އެއްދުވަހަކު އިފްހާމްއަށް ވަރަށް ފަތިހު ހޭލެވުނެވެ. އޭރު އިފްހާމްގެ ބައްޕަ އިނީ ގޯތިތެރޭގައި ހުރި ޖޯލިފަތިން ޖޯއްޔެއްގައި އިށީންދެލައިންނެވެ. އިފްހާމް އަށް ބައްޕަ ފެނުމާއި އެކު ވަރަށް ބާރަށް ދުވެފައި ގޮސް ބައްޕަގެ އުނގަށް އަރާ އިށީންދެލިއެވެ. އެވަގުތު
ގޯތިތެރެއަށް ވަދެގެން އައީ ވަރަށް ރީތި ދޫންޏެކެވެ. އިފްހާމް އެ ދޫންޏަށް ބަލަން އިނދެފައި ބައްޕަ އާއީ ސުވާލު ކުރިއެވެ.
“ބައްޕާ! އެއީ ކޮން ދޫންޏެއްތަ؟”

“ދަރިފުޅާ! އެ ދޫނީގެ ނަމަކީ ކަނބިލި.” ބައްޕަ އިފްހާމްއަށް ކިޔައިދިނެވެ.

“ކީއްވެތަ ކަނބިލި އެހާ މަޑުން އެއަންނަނީ؟” އަނެއްކާވެސް އިފްހާމް ސުވާލު ކުރިއެވެ.

“އެއީ މިތާނގަ ބައްޕަ އާއި އިފްހާމް ބަލަން ތިބީމަ.” ބައްޕަ އިފްހާމްއަށް ބުނެދިނެވެ.

“ދެން ކީއްވެ. މީހުންތިއްބަ މިގެއަށް ކަނބިލި އެއައީ؟” އަނެއްކާވެސް އިފްހާމް ސުވާލެއް ކޮށްލިއެވެ.

“ދަރިފުޅާ! އެއީ ކަނބިލި ބޭނުންވަނީ ކާއެއްޗެއް ހޯދަން. އެހެންވެ ކަނބިއްޔަށް މީރު ކޮންމެސް ކާއެއްޗެއް މިގޭ ގޯތިން ފެންނާތީވެ އެއަންނަނީ. އިފްހާމްއަށް އިނގޭތަ؟ ވަރަށް ގިނައިން އެކަނބިލި ފަތިހު މިގެއަށް އާދޭ.” ބައްޕަ އަނެއްކާވެސް އިފްހާމްއަށް ކިޔައިދިނެވެ.

“ބައްޕާ! އިފްހާމް ބޭނުން އެ ކަނބިލި ކޮއްޓެއްގަ ގެންގުޅެން. ބައްޕައަށް އެކަނބިލި ހިފޭނެތަ؟”

އިފްހާމް ބޭނުންވީ ކަނބިލި ހިފާފައި ކޮއްޓަކަށް ލާށެވެ. އެއީ އިފްހާމް ވަރަށް ލޯބިން އެކަނބިލި ބަލަން ބޭނުން ވާތީއެވެ. އެހެންވެ އިފްހާމްގެ ބައްޕަ ނިންމީ އިފްހާމްއަށް އެކަނބިލި ހިފާދޭށެވެ.

އަނެއް ދުވަހުގެ ފަތިހެވެ. އިފްހާމްގެ ބައްޕަ ފަތިސް ނަމާދު ކޮށްގެން އައިސް ޖޯލީގައި އިނެވެ. އޭރު އިފްހާމްގެ ބައްޕަ އަތުގައި ކަނބިލި ހިފަން ޖަހާފައިވާ މަޅީގެ ކަންވާރު އޮތެވެ. އަނބު ގަސް ކައިރީގައި ކަންވާރުން މަޅިއެއް ހަދާފައި އެމަޅީގެ ތެރެއަށް ބަތް އަޅާފައި އިފްހާމްގެ ބައްޕަ ހުރީ ބަހައްޓާފައެވެ. އެހެން ހެދީ ކަނބިލި ބަތްކާން ތުން ހަރާލާވަގުތު ރަނގަޅަށް މަޅީގައި ޖައްސަން ފަސޭހަ ވާނެތީއެވެ.

ކޮންމެޔަކަސް އެއްކަލަ ކަނބިލި ވަރަށް މަޑުމަޑުން ބޯހޫރަމުން ލޯހޫރަމުން އައިސް އަނބުގަސް ކައިރި ހުރި ބަތްތައް ކާން ފަށައިފިއެވެ. ހަމަ އެވަގުތު އިފްހާމްގެ ބައްޕަ ކުއްލިޔަކަށް ކަނބިލި މަޅީގައި ޖައްސާ ހައްޔަރުކޮށްލައިފިއެވެ. އަދި އިފްހާމް ހޭލަންވާއިރަށް ކޮއްޓެއްގެ ތެރެއަށް ކަނބިލި ލާފަ ބަންދުކޮށްލިއެވެ.

އެދުވަހު އިފްހާމްއަށް ހޭލެވުނީ ތަންކޮޅެއް ލަހުންނެވެ. އޭރު ކަނބިލި ކޮށީގައި އިންނަތާ ކުޑަކޮށް ގިނައިރު ވެއްޖެއެވެ. ކަނބިލި އިނީ ކޮށިން ނުނިކުމެވިގެން ދެކޮޅަށް ހިނގާލަ ހިނގާލައެވެ.

ރީތިވެ، ސައި ބޮއެގެން އިފްހާމް އޭނާގެ މަންމަ އާއީ އެކު ކަނބިލި އިން ކޮށި ކައިރިއަށް އައިސް ހުއްޓިލިއެވެ. ބޭނުންވެގެން އުޅުނު ކަނބިލި އިފްހާމްއަށް ލިބުމުން އިފްހާމް ހުރީ ވަރަށް އުފާވެފައެވެ.

“ދަރިފުޅާ! އިފްހާމް މިހާރު ތިހުރީ ކަނބިލި ލިބުނީމަ ވަރަށް އުފަލުންތަ؟” އިފްހާމްގެ ބައްޕަ އަހާލިއެވެ.

“ވަރަށް އުފާވެއްޖެ. އިފްހާމް އެއަށް ބަތް ކާންދޭނަން. އަދި ފެންވެސް ބޯންދޭނަން.” އިފްހާމް މަންމަ އާއި ބައްޕަ ގާތު ބުނެލިއެވެ.

“ދަރިފުޅާ! މިހާރު ކަނބިލި ކޮށީގަ އިންނަތާ ވަރަށް ގިނައިރު ވެއްޖެ. ކަނބިލި މިގެއަށް އައީ އެކަނި. މަންމައަށް ހީވަނީ މިހާރު ކަނބިލީގެ މަންމަމެން ކަނބިލި ހޯދާނެހެން. ކަނބިލި ގެއްލިގެން މިހާރު ކަނބިލީގެ މަންމަ އާއި ބައްޕަ އިންނާނީ ވަރަށް ދެރަވެފަ ކަންނޭނގެ. ބަލާބަލަ! ކަނބިލި ވެސް އެއިނީ އެކަނި ވީމަ ކިހާ ދެރަވެފަ.” މަންމަ އިފްހާމް ގާތު ބުނެލިއެވެ.

“ދެން ކިހިނެއް ހަދާނީ؟” ވިސްނާލަމުން އިފްހާމް ބުނެލިއެވެ.

“އިފްހާމްއަށް ހީވާގޮތަށް ބުނެބަލަ! ކަނބިއްޔާއި ކަނބިލިގެ މަންމަމެން ދެން އުފާވަނީ ކިހިނެއް ހެދީމަ؟” އިފްހާމް ވިސްނާލަން މަންމަ ވަގުތު ދިނެވެ.

އިފްހާމް އިރުކޮޅަކު ވިސްނާލަން ހުއްޓެވެ. އިފްހާމްގެ ބައްޕަވެސް ހުރީ އިފްހާމް ވިސްނާލަންދެން މަޑުކޮށްލައިންނެވެ. އިފްހާމް ވިސްނަމުން ދިޔައިރު އިފްހާމްގެ މަންމަ އިފްހާމްގެ ބޮލުގައި މަޑުމަޑުން ފިރުމަމުން ދިޔައެވެ.

“ވިސްނިއްޖެ.. އަސްލު އިފްހާމް ވަރަށް ވަރަށް ބޭނުން މި ދޫނި. އެކަމު މި ދޫނީގެ ފެމިލީ އުފާކުރަން ބޭނުމިއްޔާ ޖެހޭނީ ދޫނި ކޮށިން ނެރެން. އެކަމު އަދި އޯކޭތަ އިރުކޮޅަކު ބަލައިލަން ބޭންދިޔަސް” އިފްހާމް ވަރަށް މަޑުމަޑުން ބުނެލިއެވެ.

“އިފްހާމްގެ ވިސްނުން ވަރަށް ރަނގަޅު މާޝާ ﷲ. އެހެންވީމަ ހިނގާ އަދި އިރުކޮޅަކު ބައިންދާލާފަ މިދޫނި ނެރެމާ.. އޭރުން އިފްހާމްއަށް މިދޫނި ސަލާމަތް ކޮށްދެވުނީނު. އެހެންވީމަ ދެން ކޮންމެ ފަތިހަކު މިދޫނި މިގެއަށް އަންނާނެ. ދޫނި މިގެއަށް އައީމަ އިފްހާމް ކޮންމެ ދުވަހަކު ބަތް ކާންދޭނީދޯ؟” އިފްހާމްގެ ބައްޕަ ވަރަށް ލޯބިން ބުނެލިއެވެ.

“ހޫމް.. އޭރުން ކަނބިއްޔާ ކަނބިލީގެ ފެމިލީވެސް ވަރަށް އުފާވާނެ. އަދި ކޮންމެ ދުވަހަކު ކަނބިލި މިގެއަށް އަންނަންޏާ އިފްހާމްވެސް ކިހާ އުފާވާނެ ދޯ؟” އިފްހާމްގެ މަންމަ ވަރަށް އުފާވެފައި ބުނެލިއެވެ.

އިފްހާމްގެ ބައްޕަ ކޮށި ހުޅުވާލުމާ އެކު ވަގުތުން ކަނބިލި ކޮށިން ނުކުމެގެން ދުވަމުން އުދުހެމުން ގެއިން ނުކުމެގެން ހިނގައްޖެއެވެ.

-ނިމުނީ-

މި ވާހަކައިން ހާސިލްވި ބައެއް ކަންކަން:-
* ދިރޭ އެއްޗެހި ދެކެ ލޯބިވުމާއި އޯގާތެރިވުން.
* މަޢުލޫމާތު މުއްސަނދި ކުރުމަށްޓަކައި ގިނަގިނައިން ސުވާލު ކުރުމާއި އެކަށީގެންވާ ޖަވާބެއް ދިނުން.
* ކުދިންނަށް ކަންކަން ވިސްނަން ފުރުސަތުދިނުން.