ރަށުގެ ދުލުން

މަޝްހޫރު ދަޢުރުތައް ނިމި، ދެކަފުންވެ ބަނދެވެޔޭ
މަޝްރޫޢުތައް ނުހިންގާ، ފަސްއެޅިފަ ނިމިދެޔޭ އުޅަނދެއްގެ ބޭވަފާތެރި، ހީލަތްތެރިން އެރުވިޔޭ
ހުޅަނގުގެ ޘަޤާފަތާހެދި، ދީނަށް އަސަރު ކުރިއްޔޭ
ރަށްރަށުގެ ރީތި ގޮނޑުދޮށް، ދޮން މީހުނަށް ދިނިއްޔޭ
ރަށު މީހުނަށް ފަތާލާ، މޫދަށް އެރެން ނުކެރެޔޭ
މުޅި ރަށުތެރޭގަ ގެސްޓުން، މާހާމައަށް އުޅެލަޔޭ
މުޅި ހަށިގަނޑުގެ ވަނާތައް، މީއިޝްތިހާރު ހެއްޔޭ؟
ކުޑަކުޑަ ކުދިންގެ ކުރިމަގު، މިކަމުގެ ތެރޭގަ ވެދެޔޭ
ހުދު ނުރަވި މުސްކުޅިންވެސް، ދުރުމީ އަޅާ ހެނީޔޭ
ޤައުމަށް އެވަންނަ ޑޮލަރުން، ޖީބަށް ބަރާ ވަނިއްޔޭ
ފަރުދުންގެ މާދަމާއަށް، އެޅެމުން ހިޔަނި ދަނީޔޭ
ރަށްފުށުގެ އިސް ވެރިންނަށް، މީ ހާދަހާ އުފަލެކޭ
ރަށްފުށުގެ ރައްޔިތުންނަށް، މީ ގައިމު ދުއްތުރާލޭ
އަމުނާލިޔަސް މިޅެންތައް، އަސަރެއްމެވާ ނުކުރެޔޭ
ނަމުގާ ކިޔޭ ފަރިހިތައް، ވެރިމީހައަށް ނުފެނެޔޭ
ދައުރަށް އަލުން އަރާއިރު، އެތަކެއްމެ ވަޢުދު ވެދެޔޭ
ފަޚުރާއެކީގަ ގޮނޑިއަށް، އެރުނަސް ދެނީ ލަގާޔޭ