ސާރާ 1

ނޯޓް: ކިޔުންތެރިންނަށް!! މިއީ އަޅުގަނޑުގެ ފުރަތަމަ ޕްރޯ ސްޓޯރީ. މި ވާހަކައިގެ ފުރަތަމަ ބައި ހިލޭ ކިޔާލެވޭނެ ވާހަކަ ދަންނަވަން. 2 ވަނަ ބައިން ފެށިގެން 18 ވަނަ ބަޔާއި ހަމަ އަށް މި ވާހަކަ ކިޔާލަން ލިބޭނީ ޕްރޯ ސްޓޯރީ ގެ ގޮތުގައި ކަމުގަ ދަންނަވަން. ވާހަކަ ލިޔުމަކީ ވަރަށް ވަގުތު ނަގައިން ކުރެވޭ ކަމަކަށް ވާތީ މި ވާހަކަ ޕްރޯ ސްޓޯރީ ގެ ގޮތުގަ ހިމަނާލަން. އުންމީދު ކުރަނީ ކިޔުންތެރިންގެ ފަރާތުން އަޅުގަނޑުގެ ލިޔުންތެރިކަމަށް ކުރިއެރުން އަންނާނެ ފަދަ ކޮމެންޓްތައް ލިބިގެން ދާނެ ކަމަށް. ކިޔުންތެރިންގެ ފައްސި އަދި ނައްސި ކޮމެންޓުތައް އުފަލާއެކު ބަލައިގަންނާނަން.

———————————–

ފިނިފިނި ފަތިހެކެވެ. ހަމަހިމޭން ކަމުގެ އިންތިހާއެވެ. ފަންކާ އިން ޖެހެމުންދާ ވައިގެ އަޑު ފިޔަވާ އިތުރު އަޑެއް ކޮޓަރީގައި ނުވެއެވެ. އަރާމު ތަންމަތިން ތެދުވެ ހަށިގަނޑު ތެދުކޮށްލީ ފަޖްރު ގަޑީގެ ފަތިސް ނަމާދު ކުރުމަށް އަވަސް ވެގަތުމަށެވެ. ހަމަ ހިމޭން ފިޔަވަޅު ތަކެއްގައި ކުޑަ ތަންކޮޅަކަށް ހިނގާލުމަށްފަހު ބުޅި ގަނޑުގައި އަޅުވާފައި އިން ތުވާލި ނަގައިން ފާޚާނާއަށް ވަނީމެވެ.

ފާހާނާއިން ނުކުމެ ތާޒާ ވެލާފައިވާ އަހަރެންގެ މޫނު ބަލާލުމުގެ ކުރިން ކޮޓަރީގެ ހުދުއަލި ދިއްލާލީމެވެ. އެެއަށްފަހު އަހަރެން ޖެހިލީ ފާރުގައި ހަރުކޮށްފައި ހުރި ލޯގަނޑުގެ ކުރިމައްޗަށެވެ. ރީތި ގޮތަކަށް ބޮލުގައިވާ ފަން އިސްތަށި ކޮޅުތައް އެކި ގޮތްގޮތަށް ތަރުތީބިކޮށްލީ އަހަރެން ދާއިމީކޮށް ކުރާ ކަމަށްވާތީއެވެ.

އަލަމާރިންނެގި ކަޅުކުލައިގެ އަތްދިގު އަބާޔާ އަވަސް އަވަހަށް ގަޔަށް މާހާލަމުން ކުޑަ ބުރުގާކޮޅެއް އަޅާލައިން ހިނގައިގަތީމެވެ. ޑްރެސިންގް ޓޭބަލް މަތީގައި ވަގުތީގޮތުން ބާއްވާލި ތެތްތުވާލި ހިފައިން ބެލްކަނީގެ ރެއިލިންގްސްގައި ތުވާލި އަޅުވާލުމުގެ މަގުސަދުގައެވެ.

“ކިހާ ދެރަކަމެއް!! އަބަދުވެސް މަބުނަންދޯ ކަލޭކައިރީ އެހެން..” ޒީލަގަދަ އަންހެނެއްގެ ހަޅޭކުގެ އަޑުން އަހަރެން ދިޔައީ ސިއްސައިންނެވެ.

“އައްދޯތް… މަށަށްވެސް ތަދުވެޔޭ.. ކޮންމެ ކޮންމެ ދުވަހަކު ތިހެން…” ދެން އިވުނީ އަނިޔާއެއް ތަހައްމަލް ކުރަމުންދާ ފިރިހެނެއްގެ ވޭނީ އަޑެވެ.

އަވަސް އަވަހަށް އަހަރެން ކޮޓަރިތެރެއަށް ވަދެ ސްމާރޓް ފޯނު ނަގައިން އަނެއްކާވެސް ބެލްކަންޏަށް ނުކުމެލީމެވެ. އެއަޑު އަންނަނީ އަހަރެން ހުރި ގެސްޓް ހައުސްގެ ފަހަތުގައިހުރި އާދައިގެ ޒަމާންވީ ގެޔަކުންނެވެ.

އަހަންނަށް އެގެޔާދިމާލަށް ބަލައިލެވުނު ވަގުތު އެގޭގެ ބޮޑު ދޮރުން ނުކުންނަން އައީ މޫނުބުރުގާ އަޅައިންހުރި އަންހެނެކެވެ. އޭނާގެ ރާޑަރަށް އަރާފާނެތީ ވަގުތުން އަހަރެން ކޮޓަރިތެރެއަށް ދެމިގަތީމެވެ. އަތުގައިވާ ފޯނަށް ބަލާލަން އިރުކޮޅަކު ހުރުމަށްފަހު ކަންފަތުގައި ޖައްސާލީމެވެ.

“ތިގުޅުއްވި ނަމްބަރުން މިވަގުތު ޖަވާބެއް ނުދޭ. ފަހުން ގުޅުއްވާލައްވާ.” ކަންފާތުގައި ޖެހުނު ނާއުންމީދީ އަޑާއެކު އަހަރެން އަނެއްކާވެސް ހިނގައިގަތީ ބެލްކަނިން ބޭރު ބަލައިލުމަށެވެ. އޭރު އެގެއިން ނުކުތް އަންހެންމީހާ މަގުމަތީ ފެންނަންވެސް ނެތެވެ.

ދެފަރާތަށް ބޯހަލުވާލުމަށްފަހު އަހަރެން ގޮސް ހޭންޑް ބޭގުން ފަތްޖަހާލާފައިވާ މުސައްލަނަގާ ޓައިލްސްތައް މަތީ އަޅާލީމެވެ. ފަސް މިނެޓްގެ ވަގުތުކޮޅެއް އަޅުކަމުގާ ހޭދަކުރުމަށްފަހު އަހަރެން ގުރްޢާން މުރާޖަޢާ ކުރަމުން ދިޔައީ ސޯފާގައި އިނދެއެވެ. އެއީ އަހަރެންގެ އާދައެވެ. ވޭތުވެ ދިޔަ 12 އަހަރުވެސް އަހަރެންވީ ކޮންމެ ތަނެއްގައި މިގޮތަށް ގުރްޢާން ކިޔެވުމުގައި ފަތިސްގަޑި ފުރާލަމެވެ.

“ހަލޯ” ރިންގް ވަމުންދިޔަ ފޯނު ނަގާ ކަންފަތުގައި ޖައްސާލަމުން އަހަރެން ބުނެލީމެވެ.
“ނިޝް!! އަހަރެން ވާހަކައެއް އަހާލަންވެގެން އަސްލު ގުޅާލީ.. އޭރު ފޯނު ނުނެގީމަ ހީކުރީ މިރޭ ފަތިސް ނުވާރެއެއް ކަމަށް.” އަނެއްކާވެސް އަހަރެން ވާހަކަ ދެއްކީމެވެ.

” ނޫނޭ.. އަހަރެން ދަންވަރު ޑިއުޓީގަ އުޅެފަ އައިސް ސައި ތައްޔާރު ކުރަނީ. ކިހިނެއްވީ؟ ތި ރޫމް ކަމުނުދަނީތަ؟” ނިޝާމާ ވާހަކަ ދެއްކިއެވެ.
“ނޫން.. ރޫމްގެ މައްސަލައެއް ނެތް. ވަރަށް ހިތްގައިމު. ބެލްކަންޏެއްވެސް އިންނާތީ އަނެއްހެން ހިތްހަމަ ޖެހޭ. ދެން އެކަމަކު..” އަހަރެން ދައްކަމުންދިޔަ ވާހަކަ މެދުކަނޑާލަމުން ކައިރީގައި ހުރި ފުޅިން ފެންފޮދެއް ބޯލީމެވެ.
” ދެން؟ ދެން ކިހިނެއްވީ؟” އަނެއްކާވެސް ނިޝް އަހާލިއެވެ.
“މަބުނީ… ބެލްކަންޏާ ދިމާލުން މި ގެސްޓްހައުސް ފަހަތުގަ ހުންނަގެ…” އަހަންނަށް ބުނެލެވުނީ އެހިސާބަށެވެ.
“އެގޭ ވާހަކަ ނުދައްކާ.. ތީ މަށަށް އިނގޭ ބަޔަކު އުޅޭ ގެއެއް ނޫން.” ނިޝް ބުނެލީ އާދައިގެ ފަރުވާކުޑަ ރާގެއްގައެވެ.
“އޯހް… އެހެންތަ.؟ އެހެންވިއްޔާ އަޅާނުލާ. ރެޑީވެލައިން އެބަދަން ސައިބޯން އިނގޭ.” އަހަރެން ބުނެލީ އިތުރު ސުވާލެއް ކުރަން ބޭނުން ނުވާތީއެވެ.
“ރެޑީ ކުރަނީ.. އަވަހަށް އާދޭ..” އެހެން ބުނުމަށްފަހު ނިޝް ފޯނު ކަނޑާލިއެވެ.

ތުނިތުނި މުސައްލަ އާއި ކުޑަކުޑަ ހަތީމް ހޭންޑް ބޭގަށް ލުމަށްފަހު އަހަރެން، ކަޅު ކުލައިގެ ބޮޑު ބުރުގާއެއް ބޮލުގައި އަޅާލީމެވެ. އެއަށްފަހު، ރީތިރީތި ފިޔާތޮށި ކުލައިގެ ލިޕްސްޓިކެއް ތުންފަތުގައި ހާކާލަމުން ލޯގަނޑު ކުރިމަތީގައި ހުރެ އަހަރެން ހިނިތުންވެލީމެވެ. އަހަރެންގެ ހިނިތުން ވުމުގައި އައިބެއް ނެތުމަކީ ރީތި ކަމުގެ ރަމްޒެކެވެ. އަހަރެންގެ ރީތި ކަމާމެދު ހިތްހަމަ ޖެހިލަމުން ކައިރީގައި އޮތް މޫނު ފޮތިކޮޅު ނެގުމަށްފަހު ހަމަ އެކަނި ދެލޯ ފެންނާނޭހެން މޫނު ފޮތިކޮޅު އަޅާލީމެވެ.

“ހަލޯ!… ކޮބާތަ؟ މިހުރީ ރެޑީވެގެން ނުކުމެ.. އާދެބަލަ ބަލާ.” ނިޝްއާ ވާހަކަ ދައްކަމުން އަހަރެން ބުނެލީމެވެ.
“ސާބަސް.. ރޭގަ ކާން އައިމެއްނު. ނޭނގުނު ދޯ މިގެޔަށް އަންނާކަށް. އޭރުވެސް މަށަށް ހީވިޔޭ. މިހާރު މިހުރީ ތިތަނާ ވަރަށް ކައިރީގަ.. އެކަމު ދެން މިފަހަރު ދަސްކުރާތި. އޭރުން މިރޭވެސް އަމިއްލައަށް އާދެވޭނީ.” ރުޅި އަންނަކަމަށް ހަދާލަމުން ނިޝާމާ ވާހަކަ ދެއްކީ ހިނިއައިސްފާ ހުރެއެވެ.
“އޯކޭ.އޯކޭ. މަގޭ އުނދަގޫ ބޮޑުވީދޯ 24 ގަޑިއިރު ނުވަނީސް.” އެހެން ބުނުމަށްފަހު ހިނިގަނޑެއް ޖަހާލަމުން އަހަރެން ފޯނު ބޭއްވީ ނިޝާމާ އަންނަތަން ފެނުމުންނެވެ.

ދިލަ ހޫނެއް ފެތުރިފައިވާ ދޮން އަވީގައި ހިނގަމުން ދިޔައިރު ގައިގައި ބީހިލާނެ ތާޒާ ވައި ރޯޅިއެއްވެސް ނެތެވެ. މޫނު ބުރުގާ އަޅައިގެން ހުރި އަހަރެންގެ އެތެރެ ހަށިން ހިއްލަމުން ދިޔަ ދާތަށް ހީވަނީ ހެދުމުގެ ސަބަބުން ބޭރު ނުވެވިގެން އުޅޭހެންނެވެ.

“ހާދަ ހޫނެކޭ މިވަނީ މިއޮށް ހެނދުނާވެސް… އެއޮތީ ހުޅަނގު ފަރާތުން ބަނަވެފަ. ހީވަނީ ވާރޭ އަންނަން އުޅޭހެން ދޯ؟” ކޮންމެސް ވާހަކައެއް ދައްކަން ބޭނުންވާތީ އަހަރެން ބުނެލީމެވެ.
“އާނ.. މިއަދު ނުތިބެވޭނެ ގޯތިތެރޭގަ ސައިބޯކަށް. އެހެންވެ މިއައީ ކާގޭގަ ސައި ތައްޔާރުކޮށްފަ.” ނިޝާމާ ބުނެލިއެވެ.
“ރަނގަޅޭ.” ކުރު ޖަވާބެއް ދެމުން އަހަރެން ކުރިޔަށް ދިޔައީމެވެ.

ލަސް ހިނގުމެއްގައި ކުރިޔަށް ހިނގަމުން ދިޔައިރު އަހަރެން ދިޔައީ މަގު މަގުގެ އެކި ފަރާތް ފަރާތަށް ސަމާލުކަން ދެމުންނެވެ. ނިޝާމާގެ ގެޔަށް އަމިއްލައަށް ގޮސް އައިސް ވާނޭ ގޮތް ދަސްކުރުމުގެ ގޮތުންނެވެ.
ވަަރަށް ރަނގަޅަށް ނަޒަރު ހިންގާ ބަލައިލުމުން އަހަންނަށް ކޮންމެސް ވަރަކަށް ފަސޭހަވިއެވެ.

“އާދޭ… އިށީނދެފަ އަވަހަށް ފަށަމާ! މާދަން އެކަމު އަހަރެންގެ އިނީ ހެނދުނު ޑިއުޓީ.. އެކަމުވެސް ސާރާއަށް ސައި ތައްޔާރު ކޮށްފަ އަހަރެން ދާނީ.” ކޮފީ ތައްޓެއް ދިއްކޮށްލަމުން ނިޝާމާ ބުނެލިއެވެ.

ގޮނޑީގައި ހަމަޖެހިލައިގެން އިށީންނަމުން އަހަރެން ދަތްދޮޅީގައި ކަނާއަތް ވިއްދާލީމެވެ. ނިޝާމާ ދައްކަމުން ދިޔަ ވާހަކަ އަހަންނަށް މާބޮޑަށް ފަހުމެއް ނުވެއޭ ބުނެވިދާނެއެވެ.

“ސާރާ!… އޭތް ސާރާ! މިހާރު ކިހިނެއްވެފަ ތިއިންނަނީ؟” ނިޝާމާ ތަންކޮޅެއް ބާރަށް ބުނެލީ އަހަރެންގެ ސަމާލުކަން ހޯދުމަށެވެ.

“އެނ… އު.. އަނެއްހެން ކަމެއް ނުވެޔޭ. ނިޝްވެސް ސައިބޯންވާނު؟.” މަޑުމައިތިރި އަޑަކުން އަހަރެން ބުނެލީމެވެ.

“އަޅޭ!! ދެން އަހަރެންވެސް ސައިބޯނެއްނު. މިކަން ނިންމާފަ ގޮސް ދެން ނިދާލަންވީ. މަ ނިދީމަ މުޅި ދުވަސް ދެން ސާރާ ވަރަށް ފޫހިވާނެދޯ؟” ނިޝާމާ ވާހަކަ ދެއްކިއެވެ.

“ނޫން.. މިހާރު އަހަރެން ކުރާނެ ރަނގަޅު ކަމެއް ހޯދައިފިން. އެހެންވީމަ ދެން ފޫއްސެއް ނުވާނެއްނު.” ފަރުވާ ކުޑަ ގޮތަކަށް އަހަރެން ބުނެލީ ދޭތެރެއަކުން ކޮފީވެސް ބޮމުންނެވެ.

“އެވަރުގެ ކޮން ކަމެއް؟ ގައިމު ރޭގަ ރަށަށް އައީ.. ދެން ނިދާފަ ތެދުވާއިރު ފޫހި ފިލުވަން ކުރާނެކަމެއް އޮންނާނެތަ؟” ނިޝާމާ ވަރަށް މަޖާ ވެލާފައި ބުނެލިއެވެ.

“ހަމަ އޮވެދާނެއްނު. ވާހަކައެއް އަހާލަންތަ؟ މިރަށުގެ އާބަދީ ވަރަށް ބޮޑުތަ؟” ކޮފީތަށި ނަގަމުން އަހަރެން އަހާލީމެވެ.

“ތިޔެއް ޔަގީންކޮށް ބުނާކަށް މަށަކަށް ނޭނގޭ. ރަށުގަ އުޅޭ މީހުންގެ ޖުމްލަޔާ، އަންހެން ފިރިހެން ހަމަހަމަ ތޯޔާ. ކީއްކުރަން ސާރާ ބަލާއެއްޗެއް؟” ނިޝާމާ ހައިރާންވެފައި އިނދެ ބުނެލިއެވެ.

“ހެހެހެ. އޯކޭ އޯކޭ. އެހެންވިއްޔާ ތިކަހަކަ ކިތައް މީހުން ބުރުގާ ނާޅާ އުޅެނީ؟” މަޖާވެލާފައި އަހަރެން ބުނެލީމެވެ.

“ތިއެއްވެސް ނޭނގެ. އެކަމު ސާރާއާ ލައިގެން މިހާރު މިރަށުގަ މޫނު ބުރުގާ އަޅާފަ ތިބޭނީ ދިހަ ވަރަކަށް މީހުން. އެވަރު މަށަށް އިނގެނީ.” ނިޝާމާވެސް ބުނެލީ ހިނިއައިސްފާ އިނދެއެވެ.

“އެހެންވިއްޔާ ތިވީ. ދެންހެޔޮ މިރަށުގެ އާބާދީ ނޭނގުނަސް. އޭތް. މަދެން ދަނީ. މިހާރު ދާން އިނގޭނެ. އެއޮއް ވާރޭކަނި ޖަހަނީ” އަހަރެން އަވަސް އަވަހަށް ހިނގައިގަތީމެވެ.

ނިޝާމާގެ ގެއަށް ދިޔަ މަގުތައް ހަނދާން ކުރަމުން އަހަރެން ގެސްޓް ހައުސްއަށް ދާން އުޅުނީމެވެ. ދެތިން މަގުން ކުރިޔަށް ދެވުނު އިރު ކުރިޔަށް ދާންވީގޮތް އަހަންނަށް މުޅިން އޮޅިއްޖެއެވެ. އެހެންނަމަވެސް އަހަރެން ބެލީ އަމިއްލަ މަސައްކަތުން ގެސްޓް ހައުސްއަށް ދިޔުމަށެވެ.

“މިރަށު ކުއްޖެއްތަ؟ މޫނު އަޅާފަ ހުރީމަ މިއަހާލީ.. އަހަންނަށް ދާދި ދެންމެ ދެ މަގަކުންވެސް ފެނުނީމަ ހީވަނީ ކޮންމެސް މީހަކު ހޯދަނީހެން. ނޫނީ ތަނަކަށް ދާން އުޅެނީހެން.. މަންޖެ މޫނު އަޅައިން ހުރިއްޔާ އޯކޭ ވާހަކަ ނުދެއްކިޔަސް.. އެކަމު އުޅޭ ގޮތުން އަހާލީ.” އަހަރެން ކައިރިޔަށް ހުއްޓި ހުރެ ފިރިހެނަކު އަހާލިއެވެ

“ކިހިނެއް އިނގެނީ ދެ މަގުންވެސް ފެނުނީ އަހަރެން ކަމެއް؟” ވިސްނާނުލާ އަހަރެން އަހާލީމެވެ.

“މޫނު އަޅާފަ ހުއްޓަސް، ތިހޭންޑް ބޭގުން ފާހަގަވީ.” ބޭގަށް ބަލައިލަމުން އެމީހާ ބުނެލިއެވެ.

“ހޫމްމ… އަސްލު މިއުޅެނީ މަރުހަބާ ގެސްޓްހައުސްއާ ދިމާ ބީޗަށް ދާން.” އަހަރެން ވާހަކަ އޮޅުވާލީ ވަރަށް ހާއްސަ މަގްސަދެއްގައެވެ.

“އެ ބީޗަށް ދަނީ ތިދިމާލުންތަ؟ މަރުހަބާ ބީޗް އިންނާނީ އެ ދިމާލުގައޭ. ރަށު ކުއްޖެއް ނޫންދޯ؟” އެމީހާ އަހާލީ ޔަގީން ކަމާއެކުގައެވެ.

“އަސްލު ވާގޮތަކީ.. ރަށު ކުއްޖަކަސް.. ރަށުން ބޭރު ކުއްޖަކަސް މައްސަލައެއް ނެތެއްނު. އަހަރެން މިދިމާލަށް ފުރަތަމަ މިދަނީ… މިއުޅެނީ ފުރަތަމަ އެހެރަ ފިހާރައަށް ވަންނަން. ބީޗަށް ގޮސް ކާލާނެ އެއްޗެއްވެސް ގެންދަން ޖެހޭނެތާ.” ވާހަކައެއް ހަނދާނެ ގޮތެއް ނޭނގިގެން އެގޮތް މިގޮތުން އަހަރެން ދޮގުތަކެއް ހަދާލީމެވެ.

“އާނ. އެކަމު ތިފިހާރައިގެ އަގުގަ މަރުހަބާ ބީޗްގަ އިންނަ ކަޑަ އިންވެސް އެއްޗެސް ލިބެއެއްނު؟ އެހެންނޫނަސް، މިހާރުވެސް ތެމޭވަރަށް ކަނި ޖަހަނީ. އެކަމު، ވާރޭ ވެހެން ފަށާއިރަށް ބީޗަށް ތިޔަ ދަނީ.. ދޭދޭ. ކީކޭ ބުނާނީދޯ؟” ދެ އަތަށް ބޯހޫރާލަމުން އެމީހާ ހިނގައިގަތެވެ.

ފިހާރައިން ހެޔޮވަރުގެ ކޮތަޅެއްގެ އެއްޗިސް ގަނެގެން އަހަރެން މިސްރާބުޖެހީ “އަތަމާ” ގެސްޓް ހައުސްއާ ދިމާލަށެވެ. ޖަހަމުންދިޔަ ވާރޭ ކަނިތަކުގެ ތެރެއިން މަޑުމަޑުން އަހަރެން ފޯވަމުން ދިޔައެވެ. ވާރޭ ވެހޭ ވަގުތަކީ އަހަރެން ވަރަށް ބިރުގަންނަ ވަގުތެކެވެ. އެ ބިރުވެރި ކަމާއި ނުތަނަވަސްކަން  ހިތުގައި އޮވެ، ހިނގަމުން ގޮސް އަހަންނަށް ލަނބާލެވުނީ ގެސްޓް ހައުސް އިންނަ މަގަށެވެ. އޭރު އަހަރެންގެ ކުރިމަތިން ކުރިޔަށް ދިޔަ ފިރިހެނާގެ ހިނގުމުގައި ވަނީ ފުދޭ ވަރެއްގެ އަވަސް ކަމެކެވެ. ކަޅު ކުލައިގެ ކޯޓެއް ލައިގެން ހުރި އެމީހާގެ އަތުގައި އަލަށް ގަނެފައިވާ ކުޑައެއް އޮތެވެ.

މަޑުމަޑުން އަހަރެން ގެސްޓް ހައުސްއަށް ވަދެ ފަސްޓް ފްލޯއަށް އަރާލީމެވެ. ހޭންޑް ބޭގް ތެރެއިން ތަޅުދަނޑި ނެގުމަށްފަހު ދޮރު ހުޅުވާލަން އުޅެނިކޮށް އަހަންނަށް އައީ ފޯނެކެވެ. އެހެން ނަމަވެސް ފޯނަށް ސަމާލުކަން ދިނުމެއްނެތި އަހަރެން ކޮޓަރިތެރެއަށް ދެމިގަތީމެވެ.

ފުރަތަމަވެސް އަހަރެންގެ ލޮލުގައި އަޅައިގަތީ ބެލްކަންޏާ ދިމާލަށް ހުރި ބޮޑު ދޮރެވެ. ބޯކޮށް ވާރޭ ވެހޭނަމަ އެދޮރު ލައްޕާލައިން ނޫނީ ހަމަ ޖެހިލައިގެން ނުހުރެވޭނެކަން އަހަންނަށް އެނގެއެވެ. މޫނު ފޮތިކޮޅު ނަގާ ސޯފާއަށް އެއްލާލަމުން އަހަރެން ޖެހިލީ ބެލްކަނީގެ ދޮރާ ދިމާލަށެވެ.

ވެހެނުން ދާ ވާރޭގެ އަޑަށް ބިރުން ހުރެ، އަހަންނަށް މަގުމައްޗަށް ބަލައިލެވުނު ވަގުތަކީ މަގުމަތިން ފެނުނު މީހާ އައިސް ކުރިމަތީ ހުރި ގެއަށް ވަތް ވަގުތެވެ. އޭރު އޭނާ ކޯޓު ބާލަން މަސައްކަތް ކުރަމުން ދޮރު ހުޅުވާލާފައި ގެއަށް ވަނެވެ. އަހަރެން ހުރި ފްލޯއަށް ވަރަށް ރީތިކޮށް އެގޭގެ ގަސް އިންދާފައިވާ ކުޑަކުޑަ ގޯތިތެރެ ފެނެއެވެ.

އެމީހާ އޭނާގެ ކޯޓު ބޭލުމަށްފަހު ގެއަށް ވަންނަ ދޮރު ކައިރި ހުރި ގަހެއްގައި ކޯޓު އަޅުވާލިއެވެ. އެއަށްފަހު އާދައިގެ ހިނގުމެއްގައި ގޭތެރެއަށް ވަދެގެން ދިޔައެވެ.

ބެލްކަނީގެ ދޮރު ރަނގަޅަށް ލައްޕާ ލުމަށްފަހު އަހަރެން ސޯފާގައި ހަމަ ޖެހިލައިގެން އިށީންދެލީމެވެ. ދަބަހުގައި އޮތް ފޯނު ނަގާ ބަލައިލީ އިރުކޮޅެއް ކުރިން އަހަންނަށް ގުޅާފައިވާ ނަމްބަރަށް ގުޅާލުމުގެ މަގްސަދުގައެވެ. ވަގުތުން އަހަރެން އެ ނަންބަރަށް ޑައިލް ކޮށްލީމެވެ

“ހަލޯ! ތިކޮޅިށް ދިޔަފަހުން ނުވެސް ގުޅަމެއްނު.؟” އެކޮޅުން ވާހަކަ ދެއްކީ ޝަނާއެވެ.

“އާނ.. އަސްލު ކުޑަކޮށް ބިޒީކޮށް އުޅޭތީ އިނގޭ އެހެންވީ. ޝަނާ! ކިހިނެއްތަ؟” އަހަރެން ފުން ނޭވާއެއްލަމުން އަހާލީމެވެ.

“ރަނގަޅު. މިއުޅެނީ މިފަހަރުވެސް މުބާރާތުގަ ވާހަކަ ދައްކަން. އެކަމު ނޭނގެ މިފަހަރުވެސް ވާނެ ގޮތެއް.” އުންމީދެއް ނެތް ރާގެއްގައި ޝަނާ ވާހަކަ ދެއްކި އެވެ.

“އާނ! ޝަނާ ތިކަމުގަ ބައިވެރި ވާނެކަމެއްނެތް. ފަހުން ތި ވާހަކަ ދައްކަންވީނު.” އަހަރެން ޝަނާ ގާތު ބުނެލީމެވެ.

“އަބަދުވެސް ބުނާނީ އެހެން… އެކަމު ވަރަށް ބޭނުން. ދެން ނޭނގެ އަބަދު ތިހެން ބުނަނީ ކީއްވެކަމެއް. މިފަހަރު ހަމަ ބައިވެރި ވާން ބޭނުންވަނީ.” ގޮތް ދޫނުކޮށް އަނެއްކާވެސް ޝަނާ ބުނެލިއެވެ.

“ޝަނާ!… ކުއްލިޔަކަށް އެ ވާހަކަ ދައްކަން ޖެހުނިއްޔާ މިފަހަރު ދެން ކިހިނެއް ހަދާނީ؟” އަހަރެން ބުނެލީމެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.