ނަން ކަލާގެ މިހިތުގެގައި ފެވިއްޖޭ…59

ލައިނީގެ ދެލޮލުން ކަރުނަ ފޮހެލި އާޔަން އަށް އަުޑާއި ދިމާލަށް ނަޒަރު ހިންގާލެވުނީ ވާރޭގެ ކަނިތައް އޭނާގެ ގަޔަށް ހަމަލާދޭން ފެށުމުންނެވެ.ވާރޭ ބޯ ކޮށްލަން ފެށުމުން ލައިނީގެ މޫނުމަތިން ހިނިތުންވުމެއް ފާޅު ވި އިރު އާޔަންގެ މޫނުމަތިން ކަންބޮޑުވުން ފާޅުވެލިއެވެ.އޭރު ވެސް އާޔަން ހުރިީ ލައިނީގެ ކޮނޑުގައި އިރުކޮޅެއް ކުރިން ހިފަހައްޓާލި ގޮތަށް ށެވެ.

****************

ވާރޭގެ ކަނިތައް ބިންމައްޗަށް ހަމަލާ ދޭން ފެށުމުން ރަޔާން ބަލައިލީ ދުރުގައި ހުރި ލައިނީ އާއި ދިމާލަށް ށެވެ.ލައިނީ ވާރޭ އާއި ތެެމެން ފޯރި ދައްކާލާ ވަރު އެންމެ ރަނގަޅަށް އެނގޭނެ މީހަކީ އޭނާ ވިއްޔާއެވެ.ލައިނީގެ ކޮނޑުގައި ހިފަހައްޓައިލައިގެން ހުރި އާޔަން ރަޔާންގެ ލޮލުގައި އަޅައިގަތުމާއި އެކު އޭނާގެ ދެލޮލުން އަލިފާން ކަނި ބުރާލިފަދަ އެވެ.ދެންމެ ކިޔާން ދެއްކި ވާހަކަ ވެސް ސިކުނޑިން ފިލާ ދިޔަ ކަހަލަ އެވެ.

“ލައި ހިނގާ ހިޔާ ލިބޭނެ ކަހަލަ ތަނަކަށް” އާޔަން ލައިނީ އަށް ގޮވާލީ އާދޭސް ކޮށްލާ ފަދަ ގޮތަކަށް ށެވެ.”ދެން އާޔަން.ލައި ބޭނުމޭ ތެމެން”ލައިނީ ބޮޑާ ހާާކާލިއެވެ.އާޔަން ފާޑަކަށް ލައިނީ އާއި ދިމާލަށް ބަލަން ހުރުމަށް ފަހު އެއްބަސް ވެލީ އިތުުރު ގޮތެއް ނެތް މީހެއް ފަދައިންނެވެ.

ވާރޭގެ ހަމަލާތައް އޭނާގެ ހަށިގަނޑަށް ދެމުން ދިޔަ އިރު ވެސް އާޔަން ގެ ނަޒަރު ހުއްޓިފައި ވަނީ އާޓިފިޝަލް ބީޗުގެ އެއްފަރާތުގައި ބެހެއްޓިފައިވާ ބެންޗުގައި އިން ރަޔާން އަށްށެވެ.ރަޔާން ގެ މޫނަށް ނަޒަރު ހިންގާލި އާޔަން އަށް އެދެލޮލުން ގޮތް ހުސްވެފައިވާ މިންވަރު ހާމެވެގެން ދިޔައެވެ.ލައިނީ އޭނާ އަަށް ހުރިހާ ތަފްސީލެއް ދީފައި ނެތް ނަމަވެސް ލައިނީ އާއި ރަޔާން ދުރުވުމަށް މެދުވެރިވި ސަބަބު އާޔަން އަށް ވެސް އެނގެއެވެ.ހަޒާނާ ފޮއްޓަކަށް ލާފައި ބިމު އަޑީގައި ވަޅުލި އަސް ހޯދަން ބޭނުންވާ މީހަކު އޭނާ ހޯދަން ބޭނުންވާ އެއްޗެއް ހޯދާނެ ތާއެވެ.

ވާރޭގެ ތެރޭގައި ދެލޯ މަރާލައިގެން ހުރި ލައިނީ މޫނުމަތީގައި ވަނީ ހިނިތުންވުމެކެވެ.އެވަގުތު ލައިނީ އަށް ހީވީ ވެހެމުން ދިޔަ ވާރޭ އާއި އެކު އޭނާގެ ސިކުނޑީގައިވާ އެންމެ ހާ ހާސް ކަމެއް ފެނާއި އެކުވެ ބިމަށް ފޭބި ހެންނެވެ.ސިކުނޑި އަށް ބަރުކުރަމުން ދިޔަ ހުރިހާ ހިޔާލަކާއި އޭނާ އަށް ދުރަށް ދެވިފައިވާ ކަހަަލަ އެވެ.

ރަޔާން ގެ ނަޒަރު އޭނާ އާއި ދިމާލަށް ހުއްޓޭހެން ހީވުމުން ރަޔާން ގެ މޫނުން ނަޒަރު ވަކި ކޮށްލަމުން އާޔަން ލައިނީ އާއި ދިމާލަށް ބަލައިލި އެވެ.އެވަގުތު ލައިނީގެ މޫނު މައްޗަށް ވެރިވެފައިވާ ހިނިތުންވުމުން އެކަނި ވެސް ލައިނީގެ ހިތަށް ހަމަޖެހުމެއް ލިބިފައިވާ ކަން އާޔަން އަށް ޔަގީންވިއެވެ.

އަނގައިން ބަސް ހުސްވެފައި ތިބި މިޝްޔާ އާއި ޒީކާން އަށް އެކަކު އަނެކަކުގެ މޫނާއި ދިމާލަށް ބަލައިލެވުނީ އެއްވެސް މީހަކަށް އަންގާލުމެއް ނެތި ވާރޭގެ ކަނިތައް ބިމަށް ހަމަލާ ދޭން ފެށުމުންނެވެ.ތެމުމުގެ ކުރިން ހިޔަލަށް ވަނުމަށް ދެމީހުންނަށް ވެސް ދުއްވައި ގަނެވުނު އިރު ވަންނާނެ ތަނެއް ނެތް ކަން ދެމީހުންނަށް ރެއެކާލެވުނު އިރު މާ ބޮޑަށް ވެސް ލަސްވެއްޖެ އެވެ.ގަދަ ވަޔާއި އެކު ވާރޭ ބޯކޮށްލީ އެއްބައި މީހުންގެ ހިތްތަކަށް ހާސްކަން ވެރިކުރުވާ އަނެއް ބައި މީހުންގެ ހިތްތަކަށް ހިތްހަމަޖެހުމާއި އުފާވެރިކަން ވެރިކުރުވަމުންނެވެ.

ދުވެފައި ކަހަލަ ގޮތަކަށް އެންމެ ކައިރީގައި ހުރި ގެސްޓް ހައުސްގެ ތެރެއަށް ޒީކާން ވަނުމާއި އެކު މިޝްޔާ ވެސް ޒީކާންގެ ފަހަތުން ދުއްވައިގަތީ މިވަގުތު އޭނާ ހުރީ ޒީކާން އާއި އެކުގައި ކަމަށް ވުމުންނެވެ.އެދެ ޒުވާނުން ގެ ނަސީބު އަތުގައި ހިފީ ގެސްޓް ހައުސް ހަދާފައި ހުރި ގޮތުން އެތަނުގެ ގޯތި ތެރެއިން ލާފައި އިމާރާތުގެ އަސްކަނި ދަށަށް ވަން ނަމަވެސް އެތަނުގައި އުޅޭ މުވައްޒަފުންނަށް ނުފެނި ވަދެވޭ ގޮތަށް ހުރުމުންނެވެ.

ވާރޭ އާއި ކުޑަކޮށް ތެމިފައި ވުމުން މިޝްޔާ ހުރީ އިންތިހާ އަށް ފިނިވެފައި އެވެ. އިމާރާތުގެ އަސްކަނި ދަށުގައި ތިބި ނަމަވެސް ވަޔާއި އެކު ފެން އެތެރެ އަށް ވިއްސަމުން ދިޔަ ގޮތުން މިޝްޔާގެ ގަޔަށް އެވަގުތު ވެސް ދިޔައީ ފެން ވިއްސަމުން ނެވެ.އޭނާގެ ނަސީބު ވެސް ދެން އެވަގުތު ނެތީ ކަންނޭނގެ އެވެ.

ބޯކޮށް ވެހެމުންދިޔަ ވާރޭ އަށް ނަޒަރު ހުއްޓާލައިގެން ހުރި ޒީކާން ގެ ދެލޮލުން މިފަހަރު ވެސް ވިދުމެއް މިޝްޔާ އަށް ފެނުނެވެ.ކުރިން ފަހަރެކޭ ވެސް އެއް ފަދައިން އިސްޖަހާލި ވަގުތު އެ ވިދުން ޒީކާން ގެ ދެލޮލުން ގެއްލިގެން ދިޔަ އެވެ.މިޝްޔާ އަށް ޒީކާން އާއި ދިމާލަށް ބަލަހައްޓައިގެން އިރު ކޮޅެއް ވަންދެން ހުރެވުނީ ޝައުގުވެރިކަމެއް ހިތުގައި އުފެދުމުން ނެވެ.

ޒީކާން ގެ ދެލޮލުން އެ ވިދުން އެ ފާޅު ވަނީ ބަނަ ވިލާތަކާއި ދިމާލަށް ބަލައިލާ ވަގުތު ކަން މިޝްޔާ އަށް ފާހަގަ ވުމުން ހިތުގައި ސުވާލު އުފެދުނެވެ.ޒީކާންގެ ހަޔާތާއި އެ ވިލާތަކާއި ގުޅުމެއް އޮތީ ބާ އެެވެ.މިޝްޔާ އަށް އިރުކޮޅެއް ވަންދެން ހުއްޓުން އަރާފައި ހުރެވުނީ ހިތުގައި އެތަށް ބައިވަރު ސުވާލުތަކެއް އެއްފަހަރާ އުފެދުމުންނެވެ.

ޒީކާން އިސްއުފުލާ މިޝްޔާ އާއި ދިމާލަށް ބަލައިލުމާއިއެކު މިޝްޔާ ގެ ހިތަށް ހީވީ ފެން އެއްޗެއް އޮއްސާލި ހެންނެވެ. ނުވިސްނާ ހުއްޓާ ޒީކާން ބަލާލުމުން މިޝްޔާ ކުއްލި އަކަށް އޭނާގެ ނަޒަރު އެހެން ދިމާލަކަށް ބަދަލުކޮށްލި އެވެ.ހީވީ ވައްކަމެއް ކުރަނިކޮށް ވަގަކު ފަޅާ އެރިހެންނެވެ.

މިޝްޔާގެ އެ ސިއްރުވެރި ހަރަކާތްތައް ކިތަންމެ އަވަސް ވެފައި ހަލުވި ނަމަވެސް ޒީކާން އަށް އެންމެ ކަމެއް ވެސް ސިއްރު ވާ ގޮތެއް ނުވިއެވެ.ވަރަށް ނުވާ ކަމަަށް ހެދެމުން ޒީކާން މިޝްޔާ ގ މޫނުން ނަޒަރު ވަކި ކޮށްލީ މިޝްޔާ ވަށް ކަޅިން އޭނާ އާއި ދިމާލަށް ބަލާކަން އެނގި ހުރެ އެވެ.

ވެހެމުން ދިޔަ ވާރޭ އަށް ނަޒަރު ހިންގާލި ޒީކާން އަށް ވާރޭ އަވަސް ރަހުމަތެއްގައި ތުނި ކޮށްލާނެހެން ހީނުވުމުން މިޝްޔާ އާއި ދިމާލަށް ބަލައިލި އެވެ.”ހިއެއް ނުވޭ ދެން މިރޭ އަވަހަށް ހުއްޓާލާނެ ހެނެއް”ޒީކާންގެ އަޑު ޖެހުމާއި އެކު މިޝްޔާ ޒީކާން އާއި ދިމާލަށް ބަލައިލި އެވެ.ދެމީހުންގެ ހަތަރު ކަޅި ބައްްދަލުވި ހިނދު މިޝްޔާގެ ގައިގައި ކަރަންޓުގެ އޮޔަވަރެއް ދަތުރު ކޮށްލިހެން މިޝްޔާ އަށް ހީވިއެވެ.އެހެން ނަމަވެސް އެކަމަށް ވުރެ ބޮޑަށް މިޝްޔާ ހައިރާން ކުރުވީ ޒީކާން ގެ ޖުމުލަ އެވެ.ޒީކާން ބުނަން ބޭނުންވި އެއްޗެއް ދެނެގަތުމަށް މިޝްޔާ މި ފަހަރު ނުކުޅެދުނެވެ.

“ވާރޭ ތުނި ކޮށް ނުލަނީސް މާލެ ދާނީ ތަ ނޫނީ މިތާ މިރޭ މަޑު ކުރާނީ ތަ؟”މިޝްޔާ ގެ މޫނުމަތިން މިޝްޔާގެ ހިތުގައި ވީ އެއްޗެއް ދިރާސާ ކޮށްލަމުން ޒީކާން ބުނެލިއެވެ.”މަޑު ކުރާނީ…”ޒީކާން ގެ މޫނާއި ދިމާލަށް ބަލަން ހުރުމަށްފަހު މިޝްޔާ އޭނާގެ ޖަވާބު އިއްވާ ލިއެވެ.މިރޭ މި އޮށް ވައި ގަދަ ވަގުތު ދަތުރު ދާން މިޝްޔާ ބޭނުން ނުވީ އޭނާ އަކީ ކަނޑަށް ބަލި މީހަކަށް ވެފައި މިރޭ މިވަގުތު ދިއުމަކީ ވަރަށް “ރިސްކު”ނަގަން ޖެހޭ ކަމަކަށް ވާތީ އެވެ.އެ ކަހަލަ “ރިސްކެއް”ނެގުމުގެ ބަދަލުގައި ފުރުޞަތު އޮށްވާ އެ “ރިސްކު”ނުނެގުން މާ ބުއްދިވެރި ކަމަށް މިޝްޔާ ގެ ހިތް ބުނެލިއެވެ.

އެހެން ނަމަވެސް މިޝްޔާ އަށް ނޭނގެނީ ހުންނާނެ ތަނެކެވެ.މިވަގުުތު ވިލިގިލީގައި މަޑުކުރެވިދާނެ އެވެ.އެހެން ނަމަވެސް ތިބޭނީ ކޮން ތާކު ހެއްޔެވެ؟ދެން މުޅި ރޭ އެއްކޮށް އެ އަސްކަނި ދަށަކު ނުތިބެވޭނެ އެއް ނޫން ހެއްޔެވެ؟

މިޝްޔާ ސިކުނޑީގައި ސުވާލު މާކެއް ޖަހަމުން ޒީކާން އެ ގެސްޓް ހައުސް ގެ އެތެރެ އަށް ވަންނަން ހިނގައިގަތެވެ.ޒީކާން އެ ދަނީ އެ ގެސްޓް ހައުސް އިން ކޮޓަރި އެއް ބުކް ކުރަން ހެން ހީވުމުން މިޝްޔާ ވެސް ޒީކާންގެ ފަހަތުން ގެސްޓް ހައުސް ގެ އެތެރެ އަަށް ވަންނަން ހިނގައިގަތެވެ.ގެސްޓް ހައުސްގެ ތެރެ އަށް ވަންނަން ހިނގައިގަތް އިރު މިޝްޔާ ގެ ކަޅި ދިޔައީ އެކި އެކި ދިމާލަށް ދަތުރު ކުރަމުން ނެވެ.

ގެސްޓް ހައުސް އަށް ވަދެވެން ހުރި ބޮޑު ބިއްލޫރި ދޮރު ހުޅުވާލަމުން އެތެރެ އަށް އާޅާލި ފުރަތަމަ ފިޔަވަޅާއި އެކު މިޝްޔާ ގެ ދެލޮލުން ހީވީ ތަރި ބުރައިގެން ދިޔަ ހެންނެވެ.ބޭރުން ކިތަންމެ އާދައިގެ ގޮތަކަށް ދެއްކި ނަމަވެސް އެތެރެ އިން ފަސް ތަރީގެ ހޮޓަލަކަށް ވެސް ދޫނުކުރާނެކަން ގައިމެވެ.ރަސްރަސް ކަލުންގެ ގަނޑުވަރެކޭ އެތަން އެއް ވަރެވެ.

މުޅި އިމާރާތުގައި އެކު އެކީގައި ހެން ހުދު ކުލަ ލާފައިވާ އިރު ވެދެގެން އަންނަ މައި ދޮރާއި ފަސް ވަރަކަށް ފޫޓު ދުރުގައި ރިސެޕްޝަން ހުރި އިރު ހަމަ އެދުމާލު ފާރުގައި ބޮޑު ގަޑި އެއް ހަރުކުރެވިފައި ހުއްޓެވެ.ޒީކާން ރިސެޕްޝަން އާއި ކައިިރި ވުމާއި އެކު މިޝްޔާ އަށް ދުރުގައި ހުރެވުނީ ޒީކާން ކުރާ ކަމެއް ބެލުމުގެ ގޮތުން ނެވެ.ރިސެޕްޝަންގައި އިން ކުއްޖާ އާއި އިރުކޮޅެއް ވަންދެން ވާހަކަ ދެއްކުމަށް ފަހު ޒީކާން މިޝްޔާ ގެ ގާތުގައި އައިސް ހުއްޓިލިއެވެ.

“ހިނގާ ދާން”ޒީކާން މިޝްޔާ ގޮވައިގެން ހިނގައިގަތީ ލިފްޓާއި ދިމާލަށް ށެވެ.ލިފްޓަށް އަރަމުން ޒީކާން ފަސްވަނަ ފިތަށް ފިއްތާލި އެވެ.އޭރު ވެސް މިޝްޔާ އަށް ހުރެވުނީ ވާ ނުވާގައި އެވެ.

ލިފްޓް ގޮސް ފަސް ވަނަ ފަންގިފިލާގައި ހުއްޓުމާއި އެކު ޒީކާން ވީ.އައި.ޕީ ޖަހާފައިވާ ރޫމެއްގެ ދޮރަށް ތަޅުދަނޑި ވައްދާލިއެވެ.ދޮރު ހުޅުވިގެން ދިއުމާއި އެކު މިޝްޔާ އާއި ދިމާލަށް ޒީކާން ބަލާލި އެވެ.ޒީކާން އެ އަންގާލީ ވަނުމަށް ކަން އެނގުމުން މިޝްޔާ އެ ކޮޓަރީގެ ތެރެ އަށް ފިޔަވަޅެއް އަޅާލިއެވެ.ރަނގަޅަށް މިޝްޔާ އަަށް އެތެރެ ފެނުނީ ދެނެވެ.

ކޮޓަރި އަކަށް ވުރެ ބޮޑަށް މިޝްޔާ އަށް އެތަން ސިފަވީ އެޕާޓްމަންޓް އެއްގެ ގޮތުގައި އެވެ. ކޮޓަރި އަށް ވަންނަ ދޮރާއި ފަސް ފޫޓެއްހައި ދުރުގައި ފަންސާސް ދެ އިންޗީގެ ބޮޑު ޓީވީ އެއް ހަރުކުރެވިފައި ހުއްޓެވެ.ޓީވީގެ ތިރީގައި ހުރި ރެކުގެ މަތީގައި ޕީ އެސްތަކެއް ބެހެއްޓި ފައި ހުއްޓެވެ.ޓީވީ އާއި މާ ދުރު ނޫން ހިސާބެއްގައި ބޭބީ ބްލޫ ކުލައިގެ ސޯފާ ސެޓެއް ހުއްޓެވެ.ސޯފާތައް ބެހެއްޓިފައިވަނީ ދެ ފަރާތުން ވަށް ވާ ގޮތަަށް ށެވެ.އަނެއްހެން ބުނާ ނަމަ “ކާވް”ކޮށެވެ.ސޯފާ ތަކުގެ މެދުގައި ބޮއްލޫރި ވަށް މޭޒެއް ބެހެއްޓިފައި ވާ އިރު އެ މޭޒުގެ މެދުގައި މަޑު ނޫކުލައިގެ ފިނިފެންމާ ތަކެއް ޖަގަކަށް ޖެހާފައި ހުއްޓެވެ.ސޯފާ ސެޓާއި ދިހަ ވަރަކަށް ފޫޓު ދުރުގައި ކަހާލެވޭ ކަހަލަ ބޮޑު ދޮރެއް ހުއްޓެވެ.އެ ދޮރުން ނިކުމެވެން ހުރީ ބެލްކަންޏަށް ށެވެ.އެއީ އެނދުގެ ވެސް ކުރިމައްޗަށް ކުޑަކޮށް ކަނާއަތަށް ހުރި ފަރާތެވެ.

ސޯފާ ސެޓުން ނަޒަރު ވަކި ކޮށްލަމުން ދެން މިޝްޔާ ގެ ނަޒަރު ހުއްޓިލީ ކޮޓަރީގެ އެންމެ އަރިމަތީގައިވާ ބެހެއްޓިފައިވާ ކިންގް ސައިޒުގެ އެނދަށް ށެވެ.އެނދުގެ މަތީގައި ވާ ބްލޭންކެޓް ގައި ހުރީ ނޫ ކުލައިއެވެ.އެހެން ނަމަވެސް ދެން އެނދުގައި އަޅާފައި ވާ ރަޖާގެ އިތުުރުން ބާލީސްތައް ހުރީ ހުދު ކުލައިގައި އެވެ.އެނދުގެ ކައިރީގައި ބެހެއްޓިފައިވާ ހުދު ކުލައިގެ ސައިޑް ޓޭބަލް މަތި ފަޅު ފިލުވައި ދީފައިވާ ނައިޓް ލޭމްޕް ފަރުމާ ކޮށްފައިވަނީ ހަނދެއްގެ ސިފައިގައި އެވެ.އެނދާއި މާ ދުރުނޫން ހިސާބެއްގައި ސައިޓް ޓޭބަލް ހުރި ބިތުގައި ޖައްސާފައި ދެ ދޮރުފަތް ލީ އަލަމާރި އެއް ހުއްޓެވެ.އަލަމާރި އާއި ޖެހިގެން ތަންކޮޅެއް ދުރުގައި ފާހަނަ ހުރި ކަމީ މިޝްޔާ ގެ ނަސީބެވެ.

މިޝްޔާގެ ނަޒަރު މުޅި ކޮޓަރި ތެރެ އަށް ދަތުރު ކުރަމުން ދިޔަ އިރު ޒީކާން ގެ ނަޒަރު ހުއްޓިފައި ވަނީ މިޝްޔާ އަށްށެވެ.ކޮޓަރީގެ ފަހަރަކު ދިމާލަކަށް ބަލަމުން ދިޔަ މިޝްޔާ ޒީކާން އާއި ދިމާލަށް ބަލައިލީ ސުވާލުގެ ނަޒަރަކުން ނެވެ.މިޝްޔާ ބަލާލުމާއިއެކު ޒީކާން އެހެން ދިމާލަކަށް ބަލާލީ ހަތަރު ކަޅި ހަމަނުކުރާން ކަންނޭނގެ އެވެ.ޒީކާން ނަޒަރު އެހެން ދިމާލަކަށް ބަދަލުކޮށްލި ކަމުގައި ވީ ނަމަވެސް މިޝްޔާ އާއި ސިކުންތު ކޮޅަކަށް ނަމަވެސް ހަތަރު ކަޅި ހަމަވިއެވެ.

“ދެން ޒީކާން ނިދާނީ ކޮން ތާކު؟”ޒީކާން ގެ ގާތު މިޝްޔާ އަހާލީ ޒީކާންގެ ސަމާލުކަން ހޯދަމުން ނެވެ.”މިޝްޔާ ހީކުރީ މިޝްޔާ އަށް އެކަނި ކަމަށް ތަ އެ އެނދު.އެ އެނދުގަ ނިދިދާނެ ޔޭ ޒީކް އަށް ވެސް”ޒީކާން ގެ ޖުމުލަ އިން މިޝްޔާ ގެ ދެލޯ ބޮޑުވި އިރު އޭނާ އަށް ފަހަތަށް ދެތިން ފިޔަވަޅު އަޅާލެވުނެވެ.މިޝްޔާ އާއި ދިމާލަށް ބަލަހައްޓައިގެން ހުރި ޒީކާން ގެ މޫނު މައްޗަށް ފަނޑު ހިނިތުންވުމެއް ވެރިވީ މިޝްޔާ އަަށް ވީ ގޮތް ފެނުމުންނެވެ.އެހެން ނަމަވެސް ކުޅަދާނަކަމާއި އެކު ޒީކާން އެ ހިނތުންވުމުން ފަރުދާ ކޮއްލީ ސިކުންތު ކޮޅެއްގެ ތެރޭގައި އެވެ.

“އެދޮގެެއް.ދެން މި ރޭ ނުނިދާނީ ކަމަށް ބަލަމާ”ޒީކާން މިޝްޔާ އާއި ދިމާލަށް ބަލައިލަމުން ބުނެލީ އަސަރެއް ނެތް ގޮތަކަށް ށެވެ.މާދަމާ އޮފީހަށް ދާން ޖެހޭ އިރު ވެސް ޒީކާން އޭނާ އަށްޓަކައި ނުނިދާނެ ހެން ހީވުމުން މިޝްޔާ ގެ ހިތުގައި އެކި އެކި ކަހަލަ އިހުސާސްތައް މަސްހުނި ވިއެވެ.އެއް ފަހަރު އޭނާ އަށް ޓަކައި ޒީކާން ނުނިދާނެތީ އުފާވެރިކަން ހިތުގައި އުފެދޭ އިރު ޒީކާން ގެ ހާލަތަށް ބަލާފައި ހިތުގައި ހިތް ހަމަނުޖެހުމުގެ އޮޔެވަރު ވެސް ދަތުރު ކޮށްލައެވެ.

ޒީކާން ޗުއްޓީއަށް ރަށަށް ދާން ބޭނުންވާ ވާހަކަ އޭނާގެ ގާތުގައި އެބުނީ ދެންމެ ވިއްޔާ އެވެ.އެހެން ކަމުން ބައިވަރު މަސައްކަތް ވެސް ކުރަން ޖެހޭނެ އެއް ނޫން ހެއްޔެވެ؟ނުނިދާ ޒީކާން ކުރަން ބޭނުންވާ ހުރިހާ މަސައްކަތެއް ކުރެވިދާނެ ބާއެވެ.

ފާޑަކަށް މިޝްޔާ އޭނާ އާއި ދިމާލަށް ބަލަން ހުރުމުން ކަންނޭނގެ އެވެ.ޒީކާން ޖީބަށް އަތް ޖަހާލަމުން ބެލްކަންޏަށް ނިކުމެވެން ހުރި ބިއްލޫރި ދޮރުން ބޭރު ބަލާލިއެވެ.އޭރު ވެސް ބޯކޮށް ވާރޭވެހެމުން ދިޔަ އެވެ.ވެހެމުން ދިޔަ ވާރޭ އާއި ދިމާލަށް ބަލައިލި ޒީކާންގެ ދެލޮލުން މި ފަހަރު ކަރުނައިގެ އަސަރު ފާޅުވެލިހެން މިޝްޔާ އަށް ހީވިއެވެ.ހީވީކީ ނޫނެވެ.ހަމަ ޔަގީނެވެ.

މިޝްޔާ އޭނާ އާއި ދިމާލަށް ބަލަން ހުރިކަން ޔަގީން ވުމާއި އެކު ޒީކާން މިޝްޔާ އަަށް ފުރަގަސް ދިނެވެ.ޒީކާން އެހެން ހެދީ އޭނާގެ ދެލޮލުގައި ވާ ކަރުނަ ތައް މިޝްޔާ އަށް ނުދައްކާން ކަންނޭނގެ އެވެ.

ޒީކާންގެ އަތުގައި އެ ވަގުތު ނަސީބު ހިފާލީ ދޮރުގައި މީހަކު ޓަކި ދޭން ފެށުމުންނެވެ. ކަރުނަތައް އެތެރެ އަަށް ހިންދާލުމަށްް ފަހު ޒީކާން މިޝްޔާ އާއި ދިމާލަށް ބަލައިލި އެވެ.އެ ބެލުމުން އެކަނި ވެސް އެބުނީ ދޮރު ހުޅުވަން ދާށޭ ކަން މިޝްޔާ އަށް ޔަގީންވިއެވެ.

މަޑުމަޑުން ގޮސް ކޮޓަރީގެ ދޮރު ހުޅުވާލި މިޝްޔާ އަށް ފެނުނީ އެތަނުގައި މަސައްކަތްކުރާ މުވައްޒަފަކު އައިސް ހުރި ތަނެވެ.މިޝްޔާ ގެ އަތަށް ދެފޮށި ލައި ދިނުމާއި އެކު މިޝްޔާގެ ހިތުގައި ސުވާލު މާކެއް ޖެހުނެވެ.”ބޮސް ބުނެގެން”މިޝްޔާ ބަލަން ހުރި ގޮތުން އެ އަންހެން ކުއްޖާ ބުނެލުމާއި އެކު މިޝްޔާ ޒީކާން އާއި ދިމާލަށް ބަލައިލި އެވެ.”ތެންކިއު”މިޝްޔާ ބުނެލީ ޝުކުުރު އަދާ ނުކޮށް އެކުއްޖާ ފޮނުވާލަން ނުކެރުމުންނެވެ.

ކޮތަޅު ހުޅުވާލުމެއް ނެތި ޒީކާންގެ ކުރިމަތީގައި ހުރި ބިއްލޫރި މޭޒު ގައި މިޝްޔާ އެ ފޮށި ބަހައްޓާ ލިއެވެ.މިޝްޔާ އަށް ކުރި އަށް ފިޔަވަޅެއް ނޭޅި އުޅެނިކޮށް ޒީކާން މިޝްޔާ އަަށް ގޮވާލިއެވެ.”ތީ މިޝްޔާ އަށް”ޒީކާން ބުނެލީ އޭނާ އާއި ދިމާލަށް ބަލައިލި މިޝްޔާ ގެ ގާތުގައި އެވެ.

ދެ ކޮތަޅު ހިފައިގެން ގޮސް މިޝްޔާ އެނދު މަތީގައި ބާއްވާލި އެވެ.ކޮތަޅު ހުޅުވާ އެތެރެ އަށް ބަލާލުމުގެ ކުރިން މިޝްޔާ ޒީކާން އާ އާއި ދިމާލަށް ބަލައިލީ އެއް ފަހަރު ނަމަވެސް ޒީކާން އޭނާ އާއި ދިމާލަށް ބަލައިލާ ތޯ އެވެ.ކޮތަޅު ހުޅުވާލަމުން އޭގެ ތެރޭގައި އޮތް ހެދުމާއި އެކު ޖީންސް އާއި ދިމާލަށް ބަލައިލި މިޝްޔާ ގެ ދެލޮލުން ފާޅުވަމުން ދިޔައީ ހައިރާން ކަމެވެ.ލައިގެން ހުރި އެއްޗިހި ތެތް ކަން ވެސް މިޝްޔާ އަށް އިހުސާސްވީ އެހާ ހިސާބުންނެވެ.ހުދު ކުލައިގެ ކުރުތާ އަކާއި އެކު ނޫކުލައިގެ ސްކިނީ ޖިންސު ފެނުމުން މިޝްޔާ ކުޑަކޮށް ހައިރާން ވެސް ވިއެވެ.އެ ކުރުތާ އާއި ޖީންސް އޭނާ އަށް ހެޔޮވަރު ވާނެ ކަމާއި މެދު މިޝްޔާ ގެ ހިތުގައި ޝައްކެއް ވެސް ނެތެވެ.ޒީކާން އެހާ ހެޔޮވަރުކޮށް އޭނާ އަށް ހެދުން ގެނެސް ދިނީ ކިހިނެތް ކަމާއި މެދު މިޝްޔާގެ ހިތުގައި ސުވާލު އުފެދުނެވެ.

ފަތް ޖަހާލަމުން އެދޭތި ކޮތަޅުގެ ތެރެ އަށް ލަމުން މިޝްޔާ އަދި ވެސް އެއްފަހަރު ޒީކާން އާއި ދިމާލަށް ބަލައިލިއެވެ.އޭރު ވެސް ކުރިން އިން ގޮތަށް ފޯނާއި ކުޅެން ޒީކާން އިނެވެ. ކޮޓަރި ތެރޭގައި ކަމެއް ވާ ކަމެއް ވެސް ޒީކާން އަށް ނޭނގޭ ފަދަ އެވެ.ދެވަނަ ކޮތަޅު ހުޅުވާ މިޝްޔާ ބަލައިލި ވަގުތު ދެލޯ ދިޔައީ ބޮޑު ވެގެންނެވެ.އޭގެ ތެރޭގައި ރޭގަނޑު ނިދަންލާ ކަހަލަ އަތް ދިގު ކަޅު ކުލައިގެ ނައިޓީ އަކާއި އެކު ހަމަ އެ ކުލައިން ފަހާފައި އޮތް ހަރުވާޅެއް އޮތެވެ.

ޒީކާން ގެ ކުރިމަތީގައި ބުރުގާ އަޅާއިގެން ކަމުގައި ވީ ނަމަވެސް އޭނާ އަށް އެ ލާން ކެރިދާނެ އެކޭ މިޝްޔާ ގެ ހިތެއް ނުބުނެއެވެ.އަނެއްކާ އަނެތް ކޮޅުން އޭނާއަކީ އަތް ދިގު އެއްޗިހި ލައިގެން ނިދާ ވެސް މީހެއް ނޫނެވެ.ދެން އެ ލައިގެން ނިދަން އޭނާ އަށް ކެރިދާނެ ހެއްޔެވެ؟

ފޯނު ހިފައިގެން ސޯފާގައި އިން އިރު ވެސް ޒީކާން ގެ ނަޒަރު އިރު އިރު ކޮޅާ އެނދުގެ ކައިރީގައި ހުރި މިޝްޔާ އަށް ހުއްޓެމުން ދިޔަ އެވެ.މިޝްޔާގެ ކޮންމެ ހަރަކާތަކަށް ފާރަވެރި ވެގެން ހުރި ޒީކާން ފޯނު ޖީބަށް ލަމުން ތެދުވީ މިޝްޔާ އެނދު މަތީގައި ނިދަން ލާން އޭނާ މިޝްޔާ އަށް ގަންދިން ހެދުން ނެގުމުންނެވެ.

އެހެދުމާއި ދިމާލަށް އަނގަ އޮރި ކޮށްގެން ބަލަން ހުރި މިޝްޔާ އަށް ހަށިގަނޑު ސީދާ ކޮށްލެވުނީ ޒީކާން އައިސް ކައިރީގައި ހުއްޓުމުން ނެވެ.އެއް ފަހަރު ހެދުމާއި ދިމާލަށް ދެވަނަ ފަހަރު ޒީކާންގެ މޫނާއި ދިމާލަށް ބަލައިލި މިޝްޔާ ގެ ހިތުގެ ތެޅުން ކުޑަ އިރު ކޮޅަކަށް ނަމަވެސް މަޑު ޖެހިލީ ޒީކާންގެ ތޫނު ނަޒަރު އޭނާ އަށް ހުއްޓިފައިވާ ތަން ފެނުމުންނެވެ.ޒީކާންގެ ކަނޑެއް ފަދަ ފުން ދެލޮލަށް ގެނބެމުން ދިޔަ މިޝްޔާ ގެ ހިތަށް ފެން އެއްޗެއް އޮށްސާލި ކަމުގެ އިހްސާސް ކުރެވުނީ ޒީކާން ޖީބަށް އަތް ޖަހާލަމުން ބުނެލި ޖުމުލަ އެއްގެ ސަބަބުންނެވެ.

ނުނިމޭ