އެއްލާލި ޙަޒާނާ

ފަނާވަމުން ދަނިވި ދުނިޔެއަށް މީސްތަކުންވަނީ ބުރަވެފައެވެ. ދިރިއުޅުން އެތައް ގުނައަކަށްވަނީ ބަދަލްވެފައެވެ. އިސްލާމްދީންއަށް ތަބާވެ ކަމޭހިތަމުން ދަނީ މަދުބަޔެކެވެ. އަނެއްބަޔަކު ތިބެނީ ނަމެއްގާ އިސްލާމްކަންމަތީގައެވެ. އެބައިމީހުންގެ ކުރިމަތީގާ އޮތް އެތައް ޙަޒާނާއެއް އެބައިމީހުންގެ ކަނު ލޯތަކަށް ހަމަ ނުފެންނަނީއެވެ. އެބައި މީހުންނަށް ވިސްނަނީ އަޖަލު ހަމަވާން ގާތްވެ މަރު ހާޒިރުވުމުންނެވެ.

ޔަޒީދުއަކީ ޒުވާނެވެ. ބުރަ މަސައްކަތްކޮށްގެން ޔަޒީދުގެ އުމުރުން ފަންސަވީސް އަހަރުގާ މުއްސަނދިވެއްޖެއެވެ. އެ މުއްސަނދިކަމުގެ ސަބަބުން އޭނާ ހުންނަނީ ވަރަށް ބޮޑާވެ ފޮނިވެފައެވެ. މީހަކު ގޮވާލިޔަސް ބައެއްފަހަރު ދަންނަ ކަމަށްވެސް ނުހަދައެވެ. ޔަޒީދު އެންމެ ކުރާހިތްވާކަމަކީ މަސްވެރިކަމެވެ. އަގުބޮޑު ލޯންޗެއް ގަނެ އެންމެ ގާތް އިތުބާރުކުރާ މީހުން ގޮވާގެން ކޮންމެ ދުވަހަކު ހަވީރު ޔަޒީދު މަހަށްދެއެވެ. އެކަމަށް އޭނާގެ މުއްސަނދިކަމުން އެތައް ހަރަދެއްކޮށްލާކަށް ޖެހިލުމެއްނުވެއެވެ. ދާ ކޮންމެ ދުވަހަކުވެސް ބޭނޭ އެއްޗެއް ވިއްކާލާ ފައިދާ ބަހާއިރު ޔަޒީދު ބޮޑުބައި ނަގާތީ އެކުވެރިންނާ ބައެއްފަހަރު މައްސަލަވެސްޖެހެއެވެ. ނަމަވެސް ޔަޒީދޫ އެމީހުންނަށް އެކި ގޮތްގޮތުން ބަހަނާ ދައްކާ މައްސަލަ އޮއްބާލައެވެ.

އެހެން ދުވަސްތަކެކޭވެސް އެއްގޮތަށް މިއަދުވެސް ޔަޒީދުއާ އޭނާގެ އެކުވެރިން މަހަށް ނުކުތެވެ. ފޯރީގާ ތިއްބާ އިންޖީނުން ބާރު އަޑެއްކިޔާފާ ލޯންޗް ހުއްޓިއްޖެއެވެ. ޔަަޒީދުއާ އޭނާގެ ރަހްމަތްތެރިން އިންޖީނަށް ވީގޮތް ބަލާ ހައްލު ހޯދުމަށް މަސައްކަތްފެށިޔެވެ. ނަމަވެސް ރަނގަޅު ނުވުމުން ކޯސްޓްގާޑްގެ އެހީއާއެކު ކައިރި ރަށަކަށް ލޯންޗް ގެންދެވުނެވެ. ކޯސްޓް ގާޑްގެ މެކޭނިކެއްކަމަށްވާ ޔޫސުފް އައިސް އިންޖީނު މަރާމާތުކުރުމުގެ މަސައްކަތްފެށިޔެވެ. ނަމަވެސް އިރުކޮޅަކުން ބަންގިގޮވުމުން ޔޫސުފް މަސައްކަތް ހުއްޓާލުމަށްފަހު ނަމާދަށް އެރުމަށް ހިނގާގަތެވެ. އެހިނދު ޔަޒީދު އައިސް ޔޫސުފް އަތުގާ ހިފެހެއްޓިޔެވެ.

ޔަޒީދު : އޭ ބުރޯ ކޮންތާކަށް ތިދަނީ މަސައްކަތް ހުއްޓާލާފަ؟

ޔޫސުފް : މިދަނީ ނަމާދަށް. ކަލެޔަށް ނީވޭތަ ބަންގިގޮވާއަޑު؟

ޔަޒީދު : ނޫނޭ ބުރޯ އިވޭ އެކަމު އަހަރުމެން ފުރަން ބޭނުން އަވަހަށް މިކަން ނިންމާލަދީބަލަ ކަލޭ ބުނި އަދަދެއް ދޭނަމޭ.

ޔޫސުފް : (ހިނިގަނޑެއް ޖަހާލާފަ) ކަލޭގެ ފައިސާއާ އެކަލާނގެ އަހަރެންނަށް ދެއްވާ ސަވާބާ އަޅާވެސް ކިޔާނުލެވޭނެ. އަހަރެން ނަމާދުކޮށްލާން އަންނަންދެން މަޑުކޮށްލާ. އިތުރު ޝަކުވާއެއް އޮތިއްޔާ އަހަރެންގެ ކޮމާންޑަރާ ވާހަކަ ދައްކާ

ޔަޒީދު : (ޔޫސުފް ދުރަށް ދިޔުމުން) މާ ސޯލިހު މީހެއްވިއްޔާ….. ހަމަ ކީއްތަވާނީ ނިންމާލާފަ ދިޔައްޔާ. ފަހުންވެސް ނަމާދުކުރެވިދާނު

ފަނަރަ މިނެޓްފަހުން އައިސް ޔޫސުފް މަސައްކަތްފަށާގަތެވެ. އިރުގަނޑެއްގެ މަސައްކަތަށްފަހު ޔަޒީދުގެ ލޯންޗް އިންޖީން ހަދާ ނިމިއްޖެއެވެ. މިކަމާ ޔަޒީދު ހުރީ ވަރަށް ހިތްހަމަ ޖެހިފައެވެ. ނަމަވެސް ޔޫސުފް ދެން ދިން ހަބަރުން ޔަޒީދު މާޔޫސްވެ ރުޅިގަދަވިޔެވެ. އެއީ ޔޫސުފްގެ މަސައްކަތުން ގެނެވުނީ ވަގުތީ ހައްލަކަށްވާތީއެވެ. ލޯންޗް އަނބުރާ މާލެ ގެންގޮސް ބޮޑު މަރާމާތެއް ކުރަންޖެހޭތީއެވެ. ޔަޒީދު އައި ރުޅިގާ ހެއްދެވި ނެހެއްދެވިޔެއް ޔޫސުފްއަށް ގޮވާ މަލާމާތްކުރަމުން ދަނިކޮށް ކޮމާންޑަރު އައިސް އެދޭތެރެޔަށްވަދެ ޔަޒީދު ދުރަށް ޖައްސަން މަސައްކަތްކުރިޔެވެ. ނަމަވެސް ޔަޒީދުއާ އޭނާގެ ރައްޓެހިން ގަދަ ދައްކަމުންދަނިކޮށް ކޯސްޓްގާޑްގާ ތިބި އިތުރު ސިފައިން ފައިބާ ޔަޒީދުމެން ދުރުކޮށް އިންޒާރުދިނެވެ. އެއަށްފަހު ޔަޒީދުމެންނާ ލޯންޗް ދޫކޮށްލުމަށްފަހު ކޯސްޓްގާޑް ފުރާގެންދިޔައެވެ. ޔަޒީދުމެން ލޯންޗްއަށް އަރާ ދުއްވާލިޔެވެ. މާކަށް ދުރަށް ނުދެވެނީ އިންޖީނުން އަނެއްކާވެސް ކުޑަކޮށް އަޑުކިޔާފިޔެވެ. މިފަހަރު މާލެ އަނބުރާ ދިޔުން ނޫންގޮތެއް ނެތިގެން އަނބުރާ ގޮސް ބަނދަރުކުރުމަށްފަހު ޔަޒީދުއާ އޭނާގެ އެކުވެރިން ގެޔަށްދިޔައެވެ.

ލޯންޗްގާ މައްސަލަ ޖެހިފާވުމުން ޔަޒީދު ދެކޮޅަށް އެނބުރެނީއެވެ. ގެނެވުނު އެންމެ މޮޅެތި މެކޭނިކުން ގެނެސް މަސައްކަތްކުރުވިޔެވެ. ނަމަވެސް ހައްލެއް ހަމަ ނުފެނުނެވެ. އެންމެ ފަހަށް އެކަމާ ފޫހިވެގެން ޔަޒީދުގެ މައިންބަފައިންނާ އެވާހަކަ ހިއްސާކޮށްލިޔެވެ. އެކަމާ މެދު މައިންބަފައިން ދެއްކި ވާހަކަޔާމެދު ޔަޒީދު ޖެހުނީ ހިތްހަމަ ނުޖެހިގެން ގެއިން ނުކުންނާށެވެ. އެއީ ޔަޒީދު އަޑުއަހަން ބޭނުންވާފަދަ ވާހަކަތަކަކަށް ނުވާތީއެވެ. ދީނީ ވާހަކަތަކަކަށްވާތީއެވެ. ފޫހިވެގެން މާލެތެރޭ ދުއްވާލަން ނުކުމެ ގޮސް އައިޖިއެމް އެޗް ކައިރީ ހުރި ތަނެއްގާ އިށީންދެލައިގެންއިނެވެ. މިހެން އިންދާ މީހަކު ފަހަތުން ސަލާމް ގޮވާލިޔެވެ. ޔަޒީދު ފަހަތް އެނބުރި ބަލާލިއިރު ހިނިތުންވުމާއެކު ހުރީ ޔޫސުފްއެވެ.

ޔަޒީދު : ކަލޭ ކޮން މަލާމާތްކުރާ ފާޑަކަށް ހިނިއައިސްފަ ތިޔަހުރީ؟

ޔޫސުފް : މައާފްކުރައްވާތި އެކަމުވެސް ހިނިތުންވުމަކީ ސަދަގާތެއް. ކޮބާ އިންޖީނު ހެދިއްޖެތަ؟

ޔަޒީދު : ނޫނޭ އެކަކަށްވެސް އެކަމެއްނުވި. ވަރަށް ދެރަ. މައިންބަފައިންނާ އެވާހަކަ ހިއްސާކޮށްލީމަވެސް ފެށީ ދީނީ ނަސޭހަތް

ޔޫސުފް : ކީކޯ ބުނީ؟

ޔަޒީދު : އެފަދަ ކަންތައްތައް ދިމާވަނީ އަހަރެންގެ ދިރިއުޅުން ހުންނަގޮތުންނޯ. ނަމާދުނުކޮށް ގުރުއާން ނުކިޔަވާ އަދި ނުވީތާކަށް ސަދަގާތްވެސް ނުދޭތީޔޯ.

ޔޫސުފް : ތިކަމުގާ އަހަރެން ބުނާނެ ވަކި އެއްޗެއް ނެތިން. އެކަމު ފައިސާ ހުރެ އެ ހެޔޮގޮތުގާ ބޭނުން ނުކުރަންޏާ އެކިކަހަލަ މުސީބާތްތަކާ ކުރިމަތިވާނެ. އެހެންވެ އަނގަވާފަ އެއޮންނަނީ ގައިގާ ވަރުހުރި ދުވަހު ހައްޖަށްވެސް ދާން. ނަމާދުވެސް ނާޅާން މާދަމާ ވާނެ ގޮތެއް ހަމަ ނޭނގޭނެ. މިދުނިޔެއަށް އަލްވަދާއު ކިޔަންޖެހިދާނެ

ޔަޒީދު : ހޫ ކަލޭވެސް ފެށީ ދޯ ދެން ހުއްޓާލާ މަ މިދަނީ

ޔަޒީދު ގެޔަށް ގޮސް ވަންނަނިކޮށް ފޯންކުރީ އޭނާގެ އެކުވެރިޔެކެވެ. ލޯންޗްގާ ހުޅުހިފާ ރޯވެ އަނދަމުންދާކަމުގެ ހަބަރު ދިނުމާއެކު ޔަޒީ ބާރަށް ސައިކަލްގާ އެދިމާލަށް ދިޔައިރު ކަންވެ ނިމިއްޖެއެވެ. ޔަޒީދުގެ ލޯންޗް އަނދާ އަޅިޔަށްވެއްޖެއެވެ. އޭތިވަނީ މިހާރު މޫދު އަޑީގައެވެ. މަންޒަރު ފެނިފާ ޔަޒީދު ވަރަށް ހިތުގާ ޖެހުނެވެ. އޭގެ ދުވަސްކޮޅެއް ފަހުން ޔަޒީދު ހުޅުވާގެން އުޅުނު އަމިއްލަ ކުންފުނި ބަނގުރޫޓުވެ އަތުން ފައިސާ ހުސްވެ ފަގީރު ހާލަތަށްދިޔައެވެ. މައިން ބަފައިންގެ ބެލުމުގެ ދަށުގާ ޔަޒީދު ގެންގުޅެނިކޮށް މަގުމަތިން ހިނގި އެކްސިޑެންޓްއެއްގާ ޔަޒީދުގެ އެއްފައި ބިންދާންގޮސް ނުކުޅަދޭ މީހަކަށް ވެއްޖެއެވެ. އެންމެ ގާތުން އުޅުން ރައްޓެހިންވެސް އޭނާއަށް ދޯކާދީ ދަންނަ މީހަކަށްވެސް ނަހަދައެވެ. މުޅިން އެކަނިވެއްޖެއެވެ. މިހާލުގާ އެއްދުވަހު މަންމަޔާ އެއްކޮށް ރަސްފަނަށް ދިޔަތަނުން މީހަކު ފަހަތުން ސަލާމް ގޮވާލިޔެވެ. ފަހަތް ބަލާލިއިރު ހުރީ ޔޫސުފްއެވެ. ޔަޒީދުގެ ދައުވަތަށް ޔޫސުޕް އޭނާ ގާތު އިށީނެވެ.

ޔަޒީދު : އަހަރެންނަށް މައާފްކޮށްފާނަންތަ؟

ޔޫސުފް : އަހަރެންގެ ހިތް ކަލެޔާމެދު ސާފު

ޔަޒީދު : އަހަރެންނަށް މިއަދު މިހާލު ޖެހުނީ ކީއްވެކަން ވަރަށް ސާފުވެއްޖެ. އެއިރު ކަލެޔާ މަންމަޔާ ބައްޕަގެ ނަސޭހަތް އަޑުއެހިނަމަ މިއަދު މިހާލު ނުޖެހުނީސް

ޔޫސުފް : (ޔަޒީދް ކޮނޑުގާ އަތްއަޅާފަ) ތައުބާގެ ދޮރު އަދިވެސް ވަނީ ހުޅުވިފަ. އަވަހަށް ތައުބާވެ އިސްލާހްވޭ.

– ނިމުނީ –