ފާހިޝް އަމަލު ތަކަކީ އެކަންތަތަކުން ފިސާރި ހިތިނަތީޖާތައް ނުކުންނަ އަމަލުތަކެކެވެ. އެތައް ދިރިއުޅުމެއް ގެއްލުމާ ހަލާކުގެ ތެރެއަށް ވައްޓާލަނީ އިންސާނުން އެއްވެސް ގޮތަކަށް ނުވިސްނާ ހިންގާ އަމަލުތަކުންނެވެ. ކައިވެނިން ބޭރުން ގުޅުން ހިންގުން މިހާރު ޒުވާނުންނަށްވަނީ އާދައަކަށްވެފައެވެ. އެއީ އެއްވެސް ކަމެއްކަމަށް ނުބަލާ ﷲ سُبْحَانَهُ وَ تَعَالَى ނަހީ ކުރެއްވި ބޮޑު ފާފައަށް ދަނީ އަރާގަންނަމުނެވެ. ނަމަވެސް ކޮންމެ ވަގުތީ އުފަލެއްގާ އެކަމުގެ ހިތިކަންވެސް ފެނިގެންދާނެއެވެ.
މިރޭވެސް އަހަރެން އަވަސް އަރުވާލާފަ ރީތިވެލީ އެޒުވާނާއާ ބައްދަލުކޮށްލާށެވެ. އޭނާއާއެކު ދިގު ވަގުތުތައް ހޭދަކޮށްލާށެވެ. ހުދުހަމަކާ ރީތި ހަށިގަނޑެއްގެ އިތުރުން ރީތި ދިގު އިސްތަށިގަނޑެއް ލިބިފާވާ އެޒުވާނާ ފެނުމުން އަހަންނަށް އަބަދުވެސް ހިތްހަމަ ޖެހުން ލިބެއެވެ. ނަމަވެސް އޭނާއާ ބައްދަލުވާ ކޮންމެ ފަހަރަކު ވަގުތުދާލެއް އަވަސްކަމުން އެކަމާ އަހަރެން އަބަދުވެސް ޝަކުވާކުރަމެވެ. އަހަރެންގެ ޝަކުވާތަކަށް އެޒުވާނާ އަބަދުވެސް ދޭނީ ފިނިޖަވާބެކެވެ. “ވަގުތު ޖެހުމުން އަހަރެންވެސް ދާންޖެހޭނެ.” މިހެން އަބަދުވެސް އޭނާ އަހަރެމެން އަލްވަދާއުކިޔަން ޖެހޭވަގުތު ބުނެލައެވެ.
އަހަރެންނާ އެޒުވާނާ ބައްދަލުވީ ރާއްޖެތެރެއަށް ދަތުރުގޮސް އުޅެނިކޮށްށެވެ. އަހަރެން ރަށުތެރެބަލާލަން ހަވީރު އެކަނިމާއެކަނި ހިނގާލަން ގޮސްއުޅެނިކޮށް އަރައިގެންހުރިބޫޓު ގަހެއްގެ މުލެއްގާ އަޅައިގަނެފަވެއްޓެންދަނިކޮށް ހިފެހެއްޓީ މިބުނާ ޒުވާނާއެވެ. އަހަރެންގެ ހިތް އޭނާ އިސާހިތަކުވަނީ ދަމާގަނެފައެވެ. ނަމަވެސް އޭނާއަށް އެކަން އެނގިހުރެ ދުވަހަކުވެސް އަހަރެން ފަރާތުން އެއްވެސް ނަޖާއިޒް ފައިދާއެއް މިހާތަނަށް އަހަރެމެން ދެމީހުން ބައްދަލުވިހާ ދުވަހަކު ނުނަގައެވެ. މިކަމުގެ ސަބަބަބުން އަހަރެން އޭނާދެކެ ވަރަށް ލޯބިވިއެވެ. އަދި އިތުބާރުވެސްކުރަންފެށީމެވެ.
އަހަރެން ރީތިވެލާން ނުކުންނަން ހިނގާގަތްތަނުން މަންމަ އިދެފާ ގޮވާލިއެވެ.
“ދަރިފުޅާ ތި ދަނީ އެސޮރާ ބައްދަލުކޮއްލަންދޯ؟. ކޮންއިރަކުންތަ މަންމަ ކައިރިއަށް އެސޮރުގެންނާނީ މަންމަ ވަރަށް އޭނަ ދެކިލާހިތްވޭ”
އަހަރެން ލަދުން ހުއްޓި ހުރެލާފާ އަވަހަށް ގޭން ނުކުމެ އެޒުވާނާއާ ބައްދަލުކުރަން ރަށުގެ ބަނދަރުކައިރީ އިންނަ އަށްޓަށް ދިޔާމެެވެ. އިރުކޮޅަކުއެތާ އިށީންދެލައިގެން އިންދާ ފަހަތުން މީހަކުއައިސް އަހަރެން ގައިގާ ވަރަށް މަޑުން ބައްދާލިއެވެ. އަހަރެން ފަހަތަށް އެނބުރި ބަލާލިއިރު ޒުވާނާ ހިނިތުންވެފާހުއްޓެވެ. އަދި ލަދުރަކިކަމާއެކު އަހަންނާދިމާލަށް ބަލާލާފަ އަހަރެންގެ ރީތި ވާހަކަ އޭނާ ބުނެލިއެވެ. ފޮނިވާހަކަތަކަށް ދެމީހުން ގެނބިފައިތިއްބާ ވަގުތު އަރާން ދިޔަގޮތްވެސް ނޭނގުނެވެ. ޒުވާނާ ދާންވެއްޖޭ ބުނުމުން އަހަރެންގެ މަންމަ އޭނާ ދެކިލާހިތުންއުޅޭ ވަހަކަ ބުނެލީމެވެ. ޒުވާނާ ބުނެލީ އެންމެ ކަމެކެވެ. އެއީ އޭނާ އަދި މަންމައާ ބައްދަލުކުރަން ބޭނުންނުވާ ވާހަކައެވެ. ނަމަވެސް އަވަސް މުއްދަތެއްގާ ބައްދަލުވާނެ ޙަބަރު މަންމައަށް ދިނުމަށް ބުނެލީމެވެ. އެހެން ބުނެ ޒުވާނާ ހިނގާގަތުމުން އަހަރެން އޭނާ އުޅޭ ގޭގަ ވަގުތުހޭދަކޮށްލަން ގެންދިޔުމަށް ބުނެލީމެވެ. ޒުވާނާ އަހަރެން ކައިރި މާދަންރެއަށް ތައްޔާރުވާން ބުންޏެވެ. ވީ އުފަލުން އަވަހަށްގޮސް މަންމަ ހޯދާފަ އެ ޙަބަރު ދިނީމެވެ. މަންމަވެސް އިނީ ވަރަށް އުފަލުންނެވެ.
ޖެހިގެން އައިރޭ އެޒުވާނާ ދިރިއުޅޭތަނަށް އަހަރެން ގެންދިޔައެވެ. އޭނާ އުޅެނީ އެކަނި ކޮޓަރިއެއްގައެވެ. އެތެރެއަށް ވަދެވުނުތާ މާގިނައިރެއްނުވިއެވެ. އަހަރެންނަށް އެޒުވާނާއެކު ފޮނިވާހަކަތަކަށްވުރެ މިރޭ އިސްކަން ދެވުނީ ޝައިތާނާގެ ނުބައި ވަސްވާސްތަކަށެވެ. ދެމީހުން މަސްތުގެ އުފާތަކުގެ ތެރެއަށްގެނބި އެތައްއިރެއްވިއެވެ.
އެރޭގެފަހުން ދެމީހުންގެ ވާހަކަ ތަކުގެ ބަދަލުގާ އަބަދުވެސް އެޅެވެނީ މަސްތީއުފާ ހޯދާށެވެ.
ދުވަސްތައް ފާއިތުވެގެން ގޮސް އަހަރެން ބަލިވާންފެށިއެވެ. އާދަޔާ ޙިލާފު އެއްޗެހިވެސް ގައިގާ ލާންފަށާފިއެވެ. ހަންވެސް މުޅި ހަށިގަނޑުން ފޮޅެނީއެވެ. މިކަމާ ކަންބޮޑުވެ ޑޮކްޓަރަށް ދައްކާ ޓެސްޓްތައް ހެދީމެވެ. ނަތީޖާ ހިފާން އައިސް ޑޮކްޓަރު ފުންނޭވައެއްލަފަ ބުނެލިއެވެ.
” އެޗް އައިވީ ޕޮޒިޓިވް ”
އެހެން ބުނުމުން އަހަރެންގެ ދެފައިދަށުން ބިންގަނޑު ހީވީ ދަމާގަތްހެނެވެ. އަހަރެންނަށް ހުރެވުން ތަނެއްވެސް ނޭގުނެވެ. އަހަރެން ގެއަށްގޮސް މަންމައަށް ހުރިހާއެއްޗެއް ކީޔާދިނީމެވެ. ނަމަވެސް މަންމަ ރުޅިއެއްނާދެއެވެ. ދިނީ ވަރަށް އަގުހުރި ނަސޭހަތެކެވެ.
” ޝައިތާނާ ތިދެމީހުން ވަނީ ހަލާކުކޮށްފަ. މަންމައަށް ރަނގަޅީ އަވަހަށް ކައިވެނިކުރުމަށް އަދި ދެކުދިން މިގޭގައުޅުމަށް ”
އަހަރެން އަވަހަށް އެޒުވާނާ ހޯދަންދިޔާމެވެ. އެގެއާ އަރާހަމަވިއިރު އެގޭދޮށުގާ ވަރަށް މީހުންއޮތެވެ. ގޮސް ވެގެން އުޅޭގޮތް ބަލާލީމެވެ. އަހަރެންގެ ލޯބިވާ ޒުވާނާ އޮތީ އެނދުމަތީ މަރުވެފައެވެ. އަނގާންވަނީ ބައިވަރު ލޭނުކުމެފައެވެ. އެހިސާބުން އަހަންނަށް ޒުވާނާ ބުނި އެއްޗެއް ހަނދާންވިއެވެ.
” ވަގުތު ޖެހުމުން އަހަރެންވެސް ދާނަން “.
މިއަދު އަހަންނަށްވަނީ ދެކޮޅުން ހިތާމައެވެ. އެއްކޮޅުން އެޗް އައިވީ އެވެ. އަނެއްކޮޅުން އަހަރެންގެ ލޯބިވެރިޔާގެ މަރެވެ. އޭނާ ދުނިޔެ ދޫކޮށް އެދިޔައީ އަހަރެންނަށް އެންމެ ނުރައްކާތެރި އެއްބަލި ދީފައެވެ. ނަމަވެސް އަހަރެން އޭނާދެކެ ރުޅިއެއް ނާންނަމެވެ. މީ އަހަރެންގެ ކުށުގެ ސަޒާއެވެ. އަހަރެން އޭނާއާއެކު އޭނާގެ ކޮޓަރީގާ ހޯދި އުފާތަކުގެ ހިތިރަހައެވެ،
– ނިމުނީ –
Other Articles
ތިނެސްކަން ލޯބި (12)
ހަނދުވަރު ދިން އެރޭ … 14
