ހިމޭން

ކޮންމެ ނަފްސެއްވެސް މަރުގެ ރަހަ ދެކޭނެއެވެ. މިވަގުތީ ދުނިޔެއަށް ވަކި މުއްދަތަކަށް އިންސާނާ ފޮނުވިފައިވަނީ އިމްތިހާންނެއްގެ ގޮތުންނެވެ. އެ މުއްދަތު ހަމަވުމުން ކަފުންކުރެވި ވަޅުލެވެއެވެ. އެއީ ކިތަންމެ ބާރުވެރި މީހަކަސް ނުވަތަ ނިކަމެތި ފަގީރެއްކަމުގައި ވިޔަސްމެއެވެ.

ޒުބެއިރުއަކީ ހަރު ހިތެއްގެ ވެރިއެކެވެ. ޖާނުން ވަރުގަދަ ބިޔަ ހަށިގަނޑެއްގެ ވެރިއެކެވެ. މީސް މީހުންނަށް އެއްވެސް ސަބަބެއްނެތި ގޯނާކޮއް އޭނާގެ ނުލަފާކަން ދައްކާ މީހެކެވެ. ޒުވާން އަންހެން ކުދިންނަށް އޭނާގެ އުނދަގޫ ވަކިން ބޮޑެވެ. އަންހެން ކުއްޖަކު ފެނިއްޖެނަމަ ޖެއްސުންކޮއް ފުރައްސާރަ ކުރަނީ ހަމަ އެކަނި އެކުއްޖަކަށްނޫނެވެ. އެކުއްޖެއްގެ މައި މީހާ އެކުއްޖަކު ކައިރީ ހުއްޓަސް ޒަބެރުގެ ޙުތުރު ދުލުން އެމީހުން ލަދުގަންނުވާލާވަރުކޮއްލައެވެ.

އެއްދުވަހެއްގެ ހެނދުނެވެ. ޒުބެއިރު ނިދާ ތެދުވިގޮތަށް ހުސްގަޔާ ހަދާލައިގެން އޭނާގެ ގޭ ދޮރުމައްޗަށް ނުކުތެވެ. ނުކުމެ ސިނގިރޭޓެއް ރޯކޮއްލައިގެން ފާރުގަ ލެނގިލިއެވެ. ޒުބެއިރު އުޅޭ ގެ ހުންނަނީ ސަހަރާއެއް ކުރިމަތީއެވެ. ކޮންމެ ދުވަހަކުހެން އޭނާއަށް މީހުން އެތަނުގައި ވަޅުލާތަން ފެނެއެވެ. މިއަދުވެސް އޭނާގެ ލޯ ކުރިމަތީ ދިޔައީ ޖަނާޒާއެއް ކުރިޔަށް ދަމުންނެވެ. ނަމަވެސް އޭނާގެ ހަރު ހިތަށް އެކަމުން އެއްވެސް އަސަރެއް ނުކުރެއެވެ. އޭނާގެ ދުވަސް ފަށަން އޭނާ ބޯން ހުރި ސިނގިރޭޓުގައި މަސްތުވާ ތަކެތި އުނގުޅާލިއެވެ. އަދި ފުން ނޭވާއެއް ލުމަށްފަހު އެ ސިނގިރޭޓް އެއްކޮއް ބޮއެ ހުސްކޮއްލިއެވެ. އިސާހިތަކު މީހާ ހަމަ ބުއްދިން ނެއްޓުނެވެ. އަދި ކައިރިން ދިޔަ މީހަކަށް ހަމަލާ ދިނުމަށްފަހު އެމީހާގެ ބޯ ފަޅާލިއެވެ. އެއަށްފަހު ސަހަރާ ފާރުމަތިން ފުންމާލައިގެން ޖަނާޒާއޮތް ދިމާލަށް ހިނގައިގަތެވެ. އެ އައިގޮތަށް އައިސް ސަންދޯކު ކަށްވަޅަށް ތިރިކޮއްކޮއް އޮއްވާ ތިރިކުރަން ތިބި މީހުން ކޮއްޕާލިއެވެ. އެއާއެކު ސަންދޯކު އެމީހުން އަތުން ދޫވެ ވެއްޓުނު ވަގުތު ސަންދޯކުގެ މަތި ނައްޓައިގެން ގޮސް ގަބުރުވެސް ބޭރުވިއެވެ.

ކުރެވުނު ކަންތަކާ ފަޙުރުވެރިވެގެން މަސްތުގެ ހާލުގައި ޒުބެއިރު ހެމުން ހެމުން އައިސް އޭނާ ގޭދޮށުގައިހުރެ ސަހަރާގައި ތިބި މީހުންނަށް އައުގުރާނަ ގޮވަމުން ގެންދިޔައެވެ. މިގޮތުގައި ހުއްޓާ މީހަކު އައިސް ޒަބެއިރު ކައިރީ ހުއްޓުމުން އޭނާ ސިއްސައިގެން ގޮސް ބަލާލިއެވެ. އެއީ އޭނާ އުޅޭ ސަރަހައްދުގެ މިސްކިތުގެ އިމާމްއެވެ.

” ކޮއްކޮއަށް ތިޔަ ކުރެވުނު ކަންތައް އެނގޭތަ؟ ” އެމީހާ މަޑުމައިތިރިކަމާއެކު ބުނެލިއެވެ.
” އެއީ އަހަރެން މަޖަލަކަށް ކުރި ކަމެއް. އެހެންނޫނަސް ކަލެއަށް ކީއްތަ ބީތާޔާ ” ޒުބެއިރު އޭނާގެ މުޑުދާރު ބަހުރުވައިން އިމާމް މީހާއާ މުޙާތަބްކުރިއެވެ.
” ކޮއްކޮއަށް އެނގޭތަ އެއްދުވަހަކުން ކޮއްކޮވެސް އެގޮތަށް ވަޅުލެވޭނެކަން. މިދުނިޔެ ނޫނަސް އެހެން ދުނިޔެއެއް އޮތްކަން ދަންނާތި މިއީ ވަގުތީ ތަނެއްކަން ހަނދާންކުރާތި. ކޮއްކޮގެ ލޯމައްޗަށް ތިޔަ ފެންނަނީ ވަޅުލެވި ހިމޭންވެފައިވާ ސަހަރެއް ނަމަވެސް އެނގޭތަ އެމީހުންގެ ކައްވަޅުތަކުގައި އަލުން ދުނިޔެ ފޮނުއްވުމަށް އާދޭސް ކުރަމުންދާނީ ކިތައް މީހުންކަން. އެމީހުންގެ އަމަލް ތަކުގެ ސަބަބުން ދެވޭ އަޒާބުގެ އަޑު އަހަރުމެނަށް އަޑު ނީވޭގޮތް ހަދާފައިވަނީ ސަބަބެއް އޮވެގެން. އެހެންވެ ބޭބެ ނަސޭހަތް މިދެނީ ތި އުޅުން ދޫކޮއްލާ އިސްލާހްވޭ އަދިވެސް ވަގުތު އެބޮތް ” އެމީހާ ދަމުން ބުނެލިއެވެ.
” ކޮންމެހެން މަށަށް ނަސޭހަތް ދޭނެކަމެއްނެތް ” ޒުބެއިރު ރުޅިއައިސްގެން ގެއަށް ވަންނަމުން އިމާމް މީހާއާ ދިމާލަށް ހަޅޭއްލަވައިގަނެފާ ބުންޏެވެ.

އެރޭގެ ދަންވަރެވެ. ޒުބެއިރު ނިދަން ވަރަން މަސައްކަތް ކުރިއެވެ. ނަމަވެސް އޭނާ ގާތަށް ނިންޖެއްނައެވެ. މުޅި މީހާވަނީ ހޫނުވެ ދާހިތްލާފައެވެ. ވާއެއް ނުވާއެއް އެނާއަކަށް ނުވެސް އެނގެއެވެ. ދެކޮޅަށް ފުރޮޅި ފުރޮޅިފައި ނުނިދިގެން ބޭރަށް ނުކުތެވެ. ނުކުމެ ފާރުގައި ލެނގިލައިގެން ސަހަރާއަށް ނަޒަރު ހިނގާލިއެވެ. މިއަދު މުދިންބެ ދެއްކި ވާހަކަތަކާމެދު އޭނާ ވިސްނާލިއެވެ. ނަމަވެސް އެކަމަށް މާގިނައިރެއްނުވިއެވެ. ފަތިހު މިސްކިތަށް ދާން ނުކުތް އަންހެން ކުއްޖަކު އޭނާ ކައިރިން އަޅާފައި ދާންފެށުމުން އެކުއްޖާއާ އޭނާ ފޮށިގަނެ އެކުއްޖާ ފަހަތުން ގޮސް އަތުގައި ހިފާ ދަމާގަތެވެ.

” މަންޖެ އާދެބަލަ މަ ފަޅު ފިލުވައިދޭން އަހަރެންނާއެކު ގެއަށް ” އެކުއްޖާ ދަމަމުން ގެއާ ދިމާލަށް ގެންދަމުން ޒުބެއިރު ބުނެލިއެވެ.
” الله سبحان و تعالىٰ ޓަކައި އަހަރެންގެ އަތުން ކަލޭ ހަމަ މިހާރު ދޫކުރޭ ނޫނީ އެފަރާތުން ކަލެއާމެދު ފިޔަވަޅު އަޅާނެ ” އެކުއްޖާ ރޮއެގަނެފާ ބުނެލިއެވެ.
” ތީ ކަލެއަށް ހީވާގޮތް. އަހަރެންނާމެދު ފިޔަވަޅު އަޅާނެނަމަ މިހާރު ވާނީ އަޅާފަ. އެކަމުވެސް އަހަރެން މިހުރީ. މިރޭ ކަނބުލޮ ޖެހޭނީ އަހަރެން ބުނާގޮތް ހަދަން. އަންނަންވީ ގޮތްނުދައްކާ ” ޒުބެއިރު އިތުރު ބާރެއްލާފައި އެކުއްޖާ އޭނާގެ ގެއަށް ވެއްދުމަށްފަހު ތަޅުލިޔެވެ.

އެކުއްޖާ ގައިގަ ޒުބެއިރު އަތްލާން އުޅުމާއެކު ދުޢާކުރަންފެށިއެވެ. އިސާހިތަކު ޒުބެއިރު ހުއްޓުން އެރިއެވެ. އަދި އޭނާގެ ދެލޯ ބޮޑުވެ ބިރުވެރިކަން ފާޅުވިއެވެ. މީހާ ގައިން ދުންއަރަންފެށިއެވެ. އަދި ވޭނީ އަޑުން ހަޅޭއްލަވަންފެށިއެވެ. މީހާގެ ދެއަތާ ދެފައި ބަނޑިލާންފެށިއެވެ. އަދި ކަށިތައް މުގުރޭއަޑު އަންހެންކުއްޖާއަށް އިވިގެންދިޔައެވެ. މިހާރު ޒުބެއިރުގެ ސިފަވެސް ވަކިނުވެއެވެ. މޫނުވަނީ ވިރިފައެވެ. ގައިގެ ހުރިހާ ކައްޓެއްހެންވަނީ މުގުރިފައެވެ. އަންހެން ކުއްޖާ ގަތް ބިރުން އެގެއިން ނުކުމެ ރައްޔިތުން އެއްކުރިއެވެ. އަދި ކޮންމެ މީހަކުވެސް އެގެއަށް ވަނުމަށްފަހު ނުކުންނަނީ ބިރުވެރިކަމާއެކުއެވެ.

ޒުބެއިރު ވަޅުލުމުގެ ކަންތައް ކުރިއަށް ގެންދަން މުދިންބެ ތައްޔާރުވިއެވެ. ސަންދޯކު ހިފައިގެން ތިބި މީހުންނަށް ދުވާ ކުނިވަހުން ނޯއްދަމާލަން ނުކެރުނެވެ. ފަހަރަކު މީހަކު ދިޔައި ބަދަލު ކުރަމުންނެވެ. ޒުބެއިރުގެ ގަބުރުލެވިފައިވާ ސަންދޯކު ތިން ފަހަރު އެމީހުން އަތުން ވެއްޓި ޒުބެއިރުގެ ގަބުރު ސަންދޯކުން ބޭރުވިއެވެ. ސަހަރާއަށް ޒުބެއިރުގެ ގަބުރު ގެންދެވި ކަށްވަޅުކައިރި ބޭއްވިތަނާހެން ބިންގަނޑު އަމިއްލައަކަށް ޒުބެއިރުގެ ސަންދޯކު ކައްވަޅަށް ދަމައިގަނެ ފަސްއެޅިއްޖެއެވެ. މިކަމާ އެންމެން ތިބީ ހައިރާންވެ ބިރުގަނެފައެވެ.

” އަހަރެން އެއިރުވެސް އޭނާއަށް ނަސޭހަތްތެރިވިން. ނަމަވެސް އޭނާ އަހަރެން ބުނި ބަހެއް ނޭހި. މިއަދު ކިހާ ދެރަ ނިމުމެއް އޭނާއަށް އެ ލިބިގެން ދިޔައީ. ކިތަންމެ އަޑުގަދަކޮއް ބާރުދައްކާ އުޅުނެއްކަމަކު މިއަދު އެވަނީ ވަޅުލެވި ހިމޭންވެފައި ” މުދިންބެ އިސްދަށަށް ޖަހާލައިގެން ހުރެފައި ބުނެލިއެވެ

• – ނިމުނީ –