ސިއްރު

ކުއްލިއަކަށް ސިއްސައިގެން ދިޔައީ ފަހަތުން މީހަކު ގައިގައި އަތްލިހެން ހީވީމައެވެ. ފަހަތަށް އެންބުރި ބެލި އިރު އެކަކުވެސް ފެންނާކަށް ނެތެވެ. އޭރު ގަޑިން 12 ޖަހާ ބޮޑު ވަނީއެވެ. ގެހުންނަނީ ސަހަރާ މަގުގައި ކަމުން މަގަށް އަޅާލުމައިހެން މީހަކު ފަހަތުން އަންނަކަމުގެ އިހުސާސް ކުރެވެން ފަށިއެވެ. ވެފާ ހުރި ބިރަކައިގެން އެޅުނުހާ އަވަހަކަށް ފިޔަވަޅުތަށް އަޅަން ފެށީމެވެ. ކުއްލިޔަކަށް އަހަރެންގެ ފިޔަވަޅުތައް މަޑު ޖައްސާލެވުނީ އެއްޗެއް އިވުނުހެން ހީވީމައެވެ. ރަންގަޅަށް އަޑު އަހާލުމުން އެއީ ކުޑަ ކުއްޖެއްގެ ރުއިމުގެ އަޑު ކަން ސާފުވިއެވެ. އަޑު އަންނަދިމާލަށް އެންބުރުމާއެކު ދެލޯ ބޮޑު ވިއެވެ. ކުރިމަތީގައި ހުރީ ސަހަރާގެ ބޮޑު ފާރެވެ. އެ އަޑު އެ އިވެނީ ސަހަރާ ތެރެއިންކަން ޔަގީންވިނަމަވެސް ފަހަތަށް އަޅަންވީ ފިޔަވަޅު އެޅުނީ ކުރިޔަށެވެ.

ކިތަންމެ ވަރަކަށް ގެޔަށް ދުއްވައިގަންނަން ހިތް ބޭނުންވި ނަމަވެސް އެޔާ ހިލާފަށް އަހަރެންގެ ހަށިގަންޑު އަމަލު ކުރަން ފެށީ އިދިކޮޅަށެވެ. ސަހަރާ ފާރާއި ގާތް ވާ ވަރަކަށް ރުއިމުގެ އަޑު ދަނީ ކެނޑެމުންނެވެ. ކުއްލިއަކަށް އިވުނީ އަންހެނެއްގެ ހުނުމުގެ އަޑެވެ. ސަހަރާ ފާރުގައިި ކަންފަތް ޖައްސައިގެން އަޑުއަހަން ހުއްޓުނުތާ 1 މިނަޓު ނުވަނީސް އަޑު މުޅީންހެން ކެނޑުނެވެ. މުޅި މާހައުލު ހަމަ ހިމޭން ވިއެވެ. ނަމަވެސް ކޮންމެސް ކަމަކައިގެން ހިތް ބިރުގަންނަން ފެށިއެވެ. ދެން އިވުނީ “އިފާ!” އަހަރެންގެ ނަމުން ކަންފަތުގައި ގޮވާލިއަޑެވެ.

ގައިގައި ހުރިބާރެއްލާ ގެޔަށް ދުއްވަގަތް އިރު ކަރުނަތައް ކޯތާފަތުން ހޯސްލާފައި ފައިބައިގެން ދަނީއެވެ. އަތް ތުރު ތުރު ލާ ވަރުން ގޭގެ ތަޅުދަނޑި ވެސް ނުހޯދުނެވެ. ގެޔައްވަދެ ގޮސް ކޮޓަރި ތަޅުލީމެވެ. ކުޑަދޮރު ލައްޕާ އެޔާ ކޯރން ޖައްސާ ހަމަ ޖެހޭތޯ އެންދުމަތީގައި އަހަރެން އޮށޯވެލީމެވެ. އެހެންއޮއްވާ ނިދުނު އިރެއްވެސް ނޭންގުނެވެ. ދެފަޅި ދަފަޅި އަށް އެންބުރޭންފެށީ އުނދަގޫ ތަކެއް ވާތީއެވެ. ހީވަނީ މީހަކު ދެލޯ ބޮޑުކޮށް ބަލަހައްޓައިގެން ހުންނަހެންނެވެ. ހިތްނުތަނަވަސް ވާން ފެށުމުން މަޑު މަޑުން ދެލޯ ހޮޅުވާލިއިރު ކުރިމަތީގައި ލެއިން ފުރިފާވީ ހިނިތުންވުމެއް ދައްކައިގެން ހުރި އަންހެނަކު ހުއްޓެވެ. އިސްތަށިގަނޑުން މޫނު ފޮރުވިފާ ހުދު ކުލައިގެ ހެދުމެއް ލައިގެން ހުރި އެ މީހާ ބަލަ ބަލަ ހުއްޓާ އަހަރެންނާ ދިމާލަށް ފުންމާލީ ކަރުގައި ހިފައިގަންނާށެވެ.

ސިއްސައިގެން ގޮސް ހޭލެވުނު އިރު މީހާ ހުރީ ދާހިއްލާ ފޯވެފަވެ. މޭގައި އަތް އަޅާލުމުން ހިތް އަވަސް ވެފައި ހުރި މުންވަރު ސާފުވިއެވެ. ދެކޮޅު ދެކޮޅަށް ބޯހޫރާލިއިރު އަހަރެން އިނީ އެނދުމަތީގައެވެ. ކުއްލިޔަކަށް ވީ ފިންޏާއެކު ގައިގައި ބައްދާލެވުނެވެ. އެއާ ކޯރން ހުރީ 16 އަށް ލާފައެވެ. އެހާ ފިނިގަދަކޮށްފައި ހުރި ކަމަގައި ވިޔަސް މީހާ މުޅިން ހެން ތަމި ފޯވެއްޖެެވެ. ކޮޓަރީގައި ހުރި ގަޑި އަށް ނަޒަރު ހިންގާލި އިރު ގަޑިން މެންދަމު 3 ޖެހީއެވެ. ކުރިމަތީގައި ހުރި އަލަމާރި ލޯގަނޑަށް ބަލަމުން އަމިއްލަ ސޫރަ އަށް ގެއްލި ހުޓުނީ ކުއްލިއަކަށް ހޭލެވުނު ސަބަބު މުޅިން ހެން ހަންދާން ނެތުމުންނެވެ. ކިތަންމެ ވަރަަކަށް ހަނދާން ކުރަން މަސައްކަތް ކުރި ނަމަވެސް ހަނދާނެއް ނުވިއެވެ.

އެންދުމަތީގައި އޮށޯވެލަމުން ހަނދާނުގައި ހުރި އެއްޗަކާމެދު ވިސްނާލީމެވެ. އެންމެ ފަހުން ވެސް ހަނދާނުގައި ހުރީ ކައިގެން ނިދަން އޮށޯތި ގަޑިއެވެ. ދެން ހޭލެވުނީއެވެ. އަމިއްލަ ހިޔާލުގައި އޮއްވާ ދެން އިވުނީ ފަތިސް ނަމާދަށް ބަނގި ގޮވި އަޑެވެ. އިރުކޮޅަކަށް ސީލިންނަށް ބަލަން އޮވެފައި ނަމާދު ކުރަން ތެދުވީމެވެ. ރީތިވާން ލޯގަނޑު ކުރިމަތީގައި ހުޓުމާއެކުހެން ލޮލުގައި އެންމެ ފުރަތަމަ ވެސް އަޅައިގަތީ ކަރުގާ ހުރި ނިޝާން ތަކެވެ. މީހަކު ދެންމެ ކަރުގާ ހިފާފައި ދޫކޮށްލިހެން އަތުގެ ތައްގަނޑު ކަރުގައި ރަތް ވެފާ ހުއްޓެވެ. ކިހިނެއްވީކަމެއްކަން އަހަރެންނަކަށް ވެސް ނޭނގެއެވެ. އާއިލާ މީހަކަށް ފެނިދާނެތީ އަވަހަށް ބުރުގާއަޅާ ރެޑީވެ ސައިބޯން ނުކުތީމެވެ.

“އަހާ އިފާ…ދަރިފުޅު އަވަހަށް އާދޭ ސައިބޯން”. ސައިބޯން ނުކުތްއިރު އަހަރެންގެ މަންމަ އަނީސާ އުޅުނީ  ކާން ތައްޔާރު ކުރާށެވެ. ކާން އިށީންނަމުން މަންމަ އަށް ފަނޑު ހިނިތުންވުމެއް ހަދިޔާކޮށަލީމެވެ. “ދަރިފުޅު ހާދަ އަވަހަކަށް ބުރުގާ އަޅައިގެން…..އެހެންނޫނިއްޔާ ސައިބޮއެގެންނު ބުރުގާ އަޅަންދަނީ” އަނީސާ އިފާ އެހެންނޫނީ ނުކުރާ ކަމަކަށް ވުމުން ސުވާލު ކޮށްލިއެވެ. “ދެން އެޅީހަމަ…..ދެން ދަނީ… ފޮތްތައް ރަނގަޅަށް އެޅިފަ ހުރިތޯ ބަލަންޖެހޭނެ އަދި” ރަނގަޅަށް ނުކައި ތެދުވެގެން ދިނުމުން މަންމަ އަށް ކަމެއް ގޯސްވީކަން ޝައްކުވާނެކަން ޔަގީނެވެ.

ސުކޫލަށް ދާން ތައްޔާރުވެ ގެއިން ނުކުތްއިރު ގެކައިރީގައި އުޅޭ އަހަރެންގެ އެކުވެރިޔެއްކަމަށްވާ މިޝާ ވެސް ގެއިން ނުކުތެވެ. ހިނިތުންވަމުން ދެމީހުން ސުކޫލަށް ދާން ހިނގައިގަތީމެވެ. އެކި ވާހަކަ ދައްކަމުން ދިޔައިރު މުޅިންް ހެން ދެއްކީ މީ ފަހު އަހަރު ކަމުން ޖީސީގެ ވާހަކައެވެ. ވާހަކަ ދައްކަމުން ސަހަރާ އާ ހަމަވުމުން އިވުނު ބާރު އަޑަކަށް ދެމީހުންވެސް ފަހަތަށް ބަލާލީމެވެ. ފެނުނުމަންޒަރުން ދެމީހުންގެ ވެސް ދެލޯ ބޮޑުކޮއްލަމުން ދެމީހުން އެކަކު އަނެކަކުގެ މޫނަށް ބަލާލީމެވެ.