ނަން ކަލާގެ މިހިތުގައި ފެވިއްޖޭ(ސަތާރަވަނަ ބައި)

ނުކްޝާން އޭނާގެ ތައްޔާރު ލަގެޖް ތައްލަމުން އަލަމާރިން ހުދު ކުލައިގެ ޓީޝާޓަކާއި މަޑު ނޫކުލައިގެ ޖިންސެއް ނެގީ ފެންވަރަލުމަށްޓަކައި އެވެ.ފެންވަރައިގެން ނުކުމެ ނުކްޝާން ތައްޔާރު ވި އިރު ވެސް އަޔާންމެންނާއި ވާހަކަ ނުދައްކާ ހުރުމުން އަޔާން މެން ވެސް ނުކްޝާން އާ ވާހަކަ ދައްކާކަށް މަސައްކަތެއް ނުކުރެއެވެ.”އަޔާން ރިޔާން.މަ ބުނި ކަންތައް ކޮށްލަދޭތި”ނުކްޝާން ދަމުން ދެމީހުންނާއި ދިމާލަށް ބަލައިލަމުން އޭނާ ކުރިން ބުނެލި ވާހަކަތައް ހަނދާން ކޮށްލަ ދިނެވެ.ލަގެޖް ދަމަމުން ދަމަމުން ނުކްޝާން ކޮޓަރިން ނިކުމެ ސިޓިންރޫމް މެދެއްހާ ހިސާބުގައި ލަގެޖް ބަހައްޓާލަމުން ނަވްޔާގެ ކޮޓަރި އާއި ދިމާލަށް ހިނގައިގަތެވެ.ދޮރުގައި ޓަކި ޖަހަން އަތް ހިއްލާލާފައި ވެސް ނުކްޝާން އަށް އަތް ތިރި ކޮށްލެވުނެވެ.ނަމަވެސް ދެވަނަ ސިކުންތަކަށް މާތް ﷲ އަށް ވަކީލު ކޮށްލަމުން ދޮރުގައި ޓަކި ޖަހާލިއެވެ.

*********************

ދޮރުގައި ޓަކި ޖަހާލި ކަމެއް ނޭނގި ޒާރާ ދޮރު ހުޅުވާލައިފިއެވެ.ނުކްޝާން އަށް ވަގުތުން ޒާރާ ނުނިދަނީކަން ނަގައިގަނެވުނެވެ.”ކޮބާ ނާޔާ؟” ވަގުތުން ނުކްޝާން ގެ ސުވާލު ޒާރާ އާއި ކުރިމަތި ވިއެވެ.”އެބެން އެތެރޭގަ”ޒާރާ ބުނެލީ އަތުގެ އިޝާރާތުން ކޮޓަރިތެރެ ދައްކާލަމުންނެވެ.”އަދިވެސް ނުނިދަނީ ދޯ.ނާޔާ އާ ޒާ އާ ދެމީހުން ރެޑީ ވެލައިގެން އާދެބަލަ.ނާޔާ ކައިރީގަ ބުނާތި ލަގެޖް ރެޑީ ކުރާށޭ.ޒާގެ ލަގެޖް ރެޑީ ކުރަން ގެ އަށް ވެސް އަދި ދާން ޖެހޭނެ”ނުކްޝާން ގެ އަޑުގައި ހުރި ހިތްދަތި ކަން ޒާރާ އަށް ދެނެ ނު ގަނެވުނަސް ބޮޑު ކަމެއް ވެއްޖެ ކަން ޒާރާ އަށް ނަގައިގަނެވުނެވެ.”އެ ކީއްކުރަންނޯ ލަގެޖް ރެޑީ ކުރަންވީ؟”ނުކްޝާން އާއި މިފަހަރު ސުވާލު ކުރީ ޒާރާ ގެ ކައިރީގައި އައިސް ހުއްޓިލި ނަވްޔާ އެވެ.

ނުކްޝާން އަށް އެސުވާލަަށް ދޭނެ ޖަވާބެއް ނޭނގި އިރުކޮޅަކު ހުރެވުނެވެ.އަދިވެސް ނަވްޔާ އާއި ޒާރާ ގާތު އެވާހަކަ ބުނުމަށް ނުކްޝާން ގެ ހިތް ދެކޮޅު ހަދައެވެ.”މެލޭޝިޔާ އަށް ހަފްތާ އަކަށް ޖައްސާލަން ކަމަށް”ނުކާޝާން ބެލީ ވީހާވެސް ހަމަޖެހިގެން ވާހަކަ ދެއްކޭތޯ އެވެ.”ދެން ކަލޭނޭ މާދަން ހެނދުނު ވެސް ދެވޭނެ ދޯ މިއޮށް ފަދަ ރޭގަނޑު ނުގޮސް.އާނ އެހެންޏަ މިހާރު އެއޮށްގެން ގޮސް ދަންވަރު އެކެއް ޖަހާ ބޮޑުވީ ވިއްޔަ”ނަވްޔާ ފޯނުން ގަޑި ބަލާލަމުން ނުރުހުމުގެ އަޑެއް ލައްވާލިއެވެ.”ދެން މާގިނަ ވާހަކަ ނުދައްކާ ދޭ ރެޑީ ވެގެން އަންނަން.ތިނެއް ޖަހާ އިރަށް ޗެކިން ފެށޭނެ”ނުކްޝާން ބެލީ ކޮންމެވެސް ގޮތަކުން ވިޔަސް ނަވްޔާ އާއި ޒާރާ ގާތު ނުބުނެ ވޭތޯ އެވެ.”ދޮންބެ މި އިނީ މިތާ ބޭރުގަ.ރެޑީ ވެގެން ދެމީހުން އާދޭ”ނުކްޝާން އެހެން ބުނުމަށްފަހު ޒާރާ އާއި ނަވްޔާގެ ޖަވާބަކަށް އިންތިޒާރު ކުރުމެއް ނެތި ފަސް އެނބުރި ދާން ހިނގައިގަތެވެ.

ނަވްޔާ އާއި ޒާރާ ވެސް އެކަކު އަނެކަކާއި ދިމާލަށް ބަލާލަމުން ކޮނޑު އަރުވާލަމުން ކޮޓަރި ތެރެ އަށް ވަދެ ދޮރު ލައްޕާލިއެވެ.”ކީކޭ ތަ ނުކް ބުނީ؟”އެންމެ ފުރަތަމަވެސް ޒާރާ އާއި ނަވްޔާ ކުރިމަތި ލާން ޖެހުނީ އައިކާގެ ސުވާލާ އެވެ.”ނޭނގެ.ހަފްތާ އަކަށް މެލޭޝިޔާ އަށް ދާން ވިއްޔޯ”ޒާރާ ބުނެލީ އަޅައިގެން ހުރި ބުރިގާ ބާލަމުންނެވެ.”މި ގަޑީގަ ދެން ކީއްކުރަން ދެން އެއައީ.މާދަން ހެނދުނު ވެސް ބުނެވުނީސް ދޯ ދާ ވާހަކަ”ލައިނީ އާއި އައިކާ ދިޔައީ ސުވާލަކަށް ފަހު ސުވާލެއް ކުރަމުންނެވެ.

“ޔަގީންތަ މީހަކު ދަންވަރު ގަޑީގަ ކަމެއް ނުވަނީސް ދާނެ ކަން އެ ގޮތަށް ފުރައިގެން”ލައިނީ ކޮށްލި ސުވާލާއި މެދު ވިސްނަން ޒާރާ ގެ އިތުރުން ނަވްޔާ އަށް ވެސް މަޖުބޫރުވިއެވެ.ލައިނީ އެބުނީ ވެސް ދޮގެއް ނޫން ވިއްޔާ އެވެ.މީހަކު ދަންވަރުގަޑީގައި ޗުއްޓީ ހޭދަކޮށްލުމުގެ ނަމުގައި އެހެން ގައުމަކަށް ފުރާނެ ހެއްޔެވެ؟ނަވްޔާ އާއި ޒާރާގެ ހިތުގައި ވެސް އުފެދުނީ ހަމަ އެންމެ ސުވާލެކެވެ.

ނަމަވެސް ވިސްނަން މަޑު ނުކޮށް ނަވްޔާ ކަޅު ކުލައިގެ ގަމީސް މަތިކޮޅަކާއި ކަޅު ކުލައިގެ ޖިންސެއް ނަގަމުން ފާހަނަ އާއި ދިމާލަށް މިސްރާބު ޖެހީ ލަގެޖް ވެސް ތައްޔާރު ވެފައި ހުރުމުންނެވެ.

ޒީކާން ޒިވާގެ މޫނުގައި ފެން ލުމުން ވެސް ހޭނޭރުމުން އެންމެ ފަހުން އެމްބިއުލެންސް އަށް ގުޅީ އިތުރު ގޮތެއް ނެތުމުންނެވެ.ޒީކާން ގުޅިތާ އިރުކޮޅެއް ފަހުން އެމްބިއުލެންސް އައުމުން ޒިވާ އެމްބިއުލެންސް އަށް އެރުވުމަށްފަހު ޒީކާން ވެސް އެމްބިއުލެންސް ގައި ހަމަ ޖެހިލިއެވެ.ޒީކާން ޖީބުގައި އޮތް ފޯނު ނަގާފައި ނުކްޝާން އަށް ގުޅާލީ ވާނުވާ އެންގުމަށްޓަކައި އެވެ.މިވަގުތު ނުކްޝާން އަށް ވެސް އޭނާ އަށް އެހީތެރިކަމެއް ނުދެވޭނެ ކަން އިނގި ހުރެވެސް އެހީތެރި ކަމަށް ޒީކާން އަށް އެދެވުނީ ނުކްޝާން ގާތު އެވެ.

ނުކްޝާން ގޮސް ސޯފާގައި ހަމަޖެހިލި ވަގުތުވީ ޒީކާން ގުޅި ވަގުތު ކަމުން ނުކްޝާން ފޯނު ނަގައި ކަންފަތުގައި ޖަހާލައިގެން އިނދެ ވާހަކަ ދައްކަމުން ދިޔަ އިރު ފަހަތުގައި ކިޔާން ހުރި ކަމެއް ރެއެކާ ނުލައެވެ.ފޯނު ބާއްވަމުން އެނބުރިލި ނުކްޝާން އަށް ކިޔާން ފެނުމުން އިސްތަށިގަނޑުގައި އަތް ހިންގާލެވުނީ ކިޔާން ގެ ސުވާލުތައް ކުރިމަތި ވާނެ ކަން އިނގި ހުރެއެވެ.”ތީ ތްރޫތް އޯ ޑެއާރ ކުޅެފަ ނިދަންނޭ ކިޔާފަ ދިޔަ މީހުންނެއްނު އެކަމު އަދިވެސް ނުނިދަމެއްނު”ނުކްޝާން ކިޔާންގެ ސުވާލުތައް އަމާޒުވުމުގެ ކުރިން ވާހަކަ އޮޅުވާލެވޭތޯ މަސަތްކަތް ކުރިއެވެ.”ނިދަން ދާން ނޭ ކިޔާފަ ދިޔަ މީހުން އެބަ ތިބި ނިދާފަ.މަ މިއުޅެނީ ނުނިދިގެން.ދެން އެވާހަކަ އެއް ނޫނޭ.ކޮން ތާކަށް ދާން ތި އުޅެނީ”ނުކްޝާން ހީކުރިހާ ފަސޭހަ ކަމަކަށް އެކަން ވެގެން ނުދިޔަ އެވެ.”މެލޭޝިޔާ އަށް”ނުކްޝާން ގެ ޖަވާބު ކުރެއެވެ.”މި އޮށްފަދަ ގަޑީގަ؟”ކިޔާން ނުކްޝާން އާ ދެވަނަ ސުވާލު ކުރިމަތި ކުރުވިއެވެ.

ނަވްޔާ ފާހަނަ އަށް ވަދުމުން ޒާރާ ދެފައި ވަށްކޮށްގެން އެނދުމަތީގައި އިނީ ނަވްޔާގެ އިންތިޒާރުގައި އެވެ.ނަވްޔާ ނިކުންނަން ދެން ޒާރާ އަށް އެއް ތަނެއްގައި މަޑު ކޮށްލައިގެން އިނދެވޭ ކަމަކަށް ނުވިއެވެ.ނަވްޔާ ނިކުންނަން ދެން ސިޓިންރޫމް އަށް ޒާރާ ދިޔައީ ކޮންމެހެން ނުކްޝާން އާއި ކިޔާން ދައްކަމުން ދިޔަ ވާހަކަތައް އަޑު އިވޭނެ ކަމަކަށް ނޫނެވެ.

ޒާރާ ނިކުން ވަގުތު ކިޔާން އާއި ނުކްޝާން ކޮންމެވެސް ވާހަކަ ތަކެއް ދެއްކުމުން ޒާރާ އެ ވާހަކަތައް އަޑު އަހަން މަޑު ކޮށްލީ ފަހަރެއްގައި ނުކްޝާން މިހާ އަވަސް އަރުވާލައިގެން މެލޭޝިޔާ އަށް ދާން މި އުޅޭ ސަބަބު އިނގިދާނެ ކަމަށްށެވެ.ވީ ވެސް ޒާރާ ހީކުރި ގޮތަށް ށެވެ.ނުކްޝާން އާއި ކިޔާން ދައްކަމުން ދިޔައީ އެވާހަކަ އެވެ.

“ހްމްމް މެލޭޝިޔާ އަށް ދާން މި އުޅެނީ މަންމަ އެކްސިޑެންޓް ވީމަ.ކުޑާ ވެސް އެހަބަރު ލިބުނީމަ ހޭނެތުނީ.އެހެންވެ ޒީކް މިތާ އިނދެ އިނދެފަ އެދިޔައީ.ތުއްތު ވެސް ނޫޅެ ރަށަކު އެއް.އެކަމު ނާޔާ އެންޑް ޒާ ކައިރީގަ ބުނާނީ ކިހިނެތް؟މަަށަށް ނުކުރެވުނު ހިތްވަރެއް ވަކި ނާޔާ އަށް ކުރެވޭނެތަ؟”ނުކްޝާން އިސްޖަހާލައިގެން ހުރެފައި އިސް އުފުލާލި ވަގުތު ކިޔާންގެ ފަހަތުގައި ފެންކަޅިވެފައި ހުރި ލޮލަކުން ނުކްޝާން އާއި ދިމާލަށް ބަލަހައްޓައިގެން ހުރި ޒާރާ ފެނުމުން ދުލުގެ ކޮޅުގައި ދަތް އަޅާލެވުނެވެ.”ޝިޓް.ނޯނޯ ޒާ އަށްށޭ އަދި އެ އަޑު އިވުނީ.ޔަގީން ނާޔާ ކައިރީ ބުނާނެ”ނުކްޝާން ދުލުގެ ކޮޅުގައި ދަތް އަޅައިގެން ހުރެ ހިތާހިތުން ބުނެލިއެވެ.

ނުކްޝާން އޭނާގެ ފަހަތަށް މާ ވަރަކަށް ބަލާތީ ކިޔާން ވެސް ފަހަތް ބަލާލީ ވީ ކީތް ތޯ ބަލާލުމުގެ ނިޔަތުގައި އެވެ.ކިޔާން އަށް ވެސް ޒާރާ ފެނުމުން މަޑު މަޑުން އޯހ ޝިޓް އޭ ބުނެލެވުނީ ނުކްޝާން އާއި ދިމާލަށް ބަލައިލަމުންނެވެ.”ކީތްވެ ނާޔާ ކައިރީ ނުބުނަން ތި އުޅެނީ.އެއީ ނުކްގެ މަންމަހެން ނާޔާގެ ވެސް މަންމައޭ”ނުކްޝާން އާއި ކިޔާން އެހެން ހުއްޓާ ޒާރާ ވާހަކަ ދައްކަންފެށިއެވެ.އެ އަޑުގައި ތުރުތުރު ލުމުގެ އަސަރު ހުއްޓެއް ކަމަކު ހިތާމައިގެ އަސަރެއް ޒާރާ ގެ މޫނަކުން ނުފެނެއެވެ.”އިނގޭ ނާޔާ ވެސް ދެރަވާނެކަން.ނުކް އަށް ހިތްވަރު ނުކުރެވުނަސް ނާޔާ އަށް ހިތްވަރު ކުރަން އުނދަގޫވާނެ ކަން ވެސް.އެކަމު މެލޭޝިޔާ އަށް ދާ ފަހުން އެކަން އިނގިއްޖެއްޔާ ނާޔާގެ ހިތަށް މާ އަސަރު ކުރާނެ”ޒާރާގެ ވާހަކަ އަށް ނުކްޝާން ވެސް ވިސްނާލަން މަޖުބޫރުވިއެވެ.”އެޓްލީސްޓް ޒާ ކައިރީ ބުނެލި ނަމަ.އޯކޭ ނުކް ބޭނުމިއްޔާ ނާޔާ އަށް ޒާ ސިއްރު ކުރާނަން”ޒާރާ އެހެން ބުނުމަށްފަހު އައި ކޮޅަށް އެނބުރި ދިއުމަށް ހިނގައިގަތެވެ.އެވަގުތު ޒާރާގެ ފަހަތުގައި ހުރި މީހާގެ ސަބަބުން ޒާރާ އާއި ކިޔާން ގެ އިތުރުން ނުކްޝާން އަށް ވެސް ސިހުމެއް ލިބުނެވެ.

ނުނިމޭ