ޙަޤީޤަތް ހޯދުމޭ – ޓްރެއިލާ

ނޯޓް:މިއީ އެއްވެސް އިރެއްގައި ހިނގައިފައިވާ ނުވަތަ ހިނގައިފާނެ ކަމެއް ލިޔެފައިވާ ވާހަކައެއް ނޫނެވެ. މިއީ އަޅުގަނޑުގެ އަމިއްލަ ޚިޔާލުގެ މައްޗަށް ލިޔެފައިވާ މުޅިން ޚިޔާލީ ވާހަކައެކެވެ.

***

މިއީ ތޭވީސް ވަނަ ޤަރުނެވެ. ސީދާކޮށް ބުނާނަމަ 2221 ވަނަ އަހަރެވެ. މި ޒަމާނުގައި ދިވެހިރާއްޖެ ތަހުޒީބާއި ތަމައްދުނުގެ ރޮނގުން ކުރިއަރައިފައި ވަނީ އިންތިހާއަށެވެ. ދުނިޔެއަށް މަޝްހޫރު ބައެއް ކޮންޕެނީތަކުގެ ވެރިންނަކީ ދިވެހީންނެވެ. ދިވެހި ސައިންސުވެރިންގެ ދިރާސާ ތަކުން ވެސް އައު އެތައް ކަމެއް ހޯދިފައިވެއެވެ. ފަތުރުވެރީން އެންމެ ގިނަ އަދަދަކަށް ޒިޔާރަތް ކުރާ ވިހި ވަނަ ޤައުމަކީ ވެސް މިއީއެވެ. 

ފަންނިއްޔާތުގެ (ޓެކްނޮލޮޖީގެ) ގޮތުން އެހާ ވަރަށް ކުރިއަރައިގެން ދިޔަ ނަމަވެސް ދިވެހީންގެ ރީތި އުޅުމާއި މުރާލިކަމަކަށް ބަދަލެއް ނާދެއެވެ. މިކަމުގެ އެއް ހެއްކަކީ އެއްވެސް ބިދޭސީއަކު ދިވެހިރާއްޖޭގައި ވަޒީފާ އަދާކުރަން ނޫޅުމެވެ. ހަމައެހެންމެ މި ޤައުމުގެ ކުށުގެ އިންސައްތަ ވެސް ވަނީ އެއް ހަމައެއްގައި ހިފެހެއްޓިފައެވެ. މާލޭގައި އެޅިފައި އެވާ ޖަލަށް ވަންނަ ކުށްވެރިއަކަށް ނުކުމެވޭނީ ހަމައެކަނި އެމީހެއްގެ މުއްދަތު ހަމަވުމުންނެވެ. މި ސަބަބާއި ހުރެ ކުށްވެރިން އެމީހުންގެ ނުބައި ޢަމަލުތައް ހިންގަނީ ވަރަށް ސިއްރިޔާތުގައެވެ. އެގޮތުން މިހާތަނަށް އެންމެ ފާހަގަކޮށްލެވޭ މައްސަލަ އާއި ގުޅުން ހުރި އެއްވެސް ކަމެއް އެނގިފައެއް ނުވެއެވެ. އެ މައްސަލައިގެ ޙަޤީޤަތް ހޯދުމަށް ފުލުހުންނާއި އެހެން ފަރާތްތައް ވަނީ ނުކުޅެދިފައެވެ. 

ރެހެންދި ސްކޫލުގައި އޯލެވެލް އިމްތިހާނު ހެދުމަށް ތައްޔާރު ވަމުންދާ ރިފްޤާއާއި ޝެހެނާޒާއި ހޫދަކީ ނުހަނު ގާތް އެކުވެރީންނެވެ. ތިން ކުދީންގެ ބޭރު ފުށާއި އެތެރެ ފުށުގެ ސިފަތައް އުޑާއި ބިމާހައި ތަފާތު ވިޔަސް ގުޅުން ވަރުގަދައެވެ. ރިފްޤާ އަކީ ހިސާބަށް ވުރެ ހަލަނި އާދަޔާ ޚިލާފު ރީތި ކަމެއް މިލްކުކޮށްފައިވާ އަންހެން ކުއްޖެކެވެ. މިއާއި ޚިލާފަށް ޝެހެނާޒަކީ މަޑުމައިތިރި، ކިޔެވުމަށް ލޯބިކުރާ، ކަންކަން ޖާސޫސްކޮށް ތަޙުޤީޤު ކުރާހިތްވާ ކުއްޖެކެވެ. ހޫދަކީ ސަކަރާތް ގަދަ، ހަށިގަނޑުގެ ބާރުގަދަ ފިރިހެނެކެވެ. 

މި ތިން ކުދިން ކަރު ހިއްކައިގެންފައި ވަނީ އެ އުޅޭ ކުލާހުގެ އެހެން ކުއްޖަކަށް ދިމާވާ ކަންތައްތަކެއްގެ ޙަޤީޤަތް ހޯދުމަށެވެ. އެ ކުއްޖާ ސިއްރުކުރަމުން ދާ ކަންކަން ހޯދައިގަތުމަށެވެ. އެ ތިން ކުދިންނަށް ކިޔާރާގެ ޙާލު އެނގި ޙަމްދަރުދީވެއެވެ. އެހެނަސް ކަންތައް ވެގެން ދަނީ ވަރަށް ވެސް ހީނުކުރާ ކަހަލަ ގޮތަކަށެވެ. ދެން ދުވަސްގަނޑެއް ފަހުން (އޯލެވެލް އިމްތިހާނުތައް ހަދާ ނިމޭ ފަހުން) އެކުދިންނަށް ރާއްޖޭގެ އެންމެ ފާހަގަކޮށްލެވޭ މައްސަލައިގެ ތެރެއަށް ވަންނަން ގޮތަކަށް މަޖުބޫރު ވަނީއެވެ. އެކުދިންގެ އޮމާން ދިރިއުޅުން އެފުށް މިފުށަށް ޖަހާލަމުންނެވެ. ސަކަރާތް ޖަހާ މަޖާ ކޮށް އުޅުނު ކުދިންގެ ވިސްނުން އެ މައްސަލައިން ހިސާރު ކޮށްލަމުންނެވެ. 

ކިޔާރާއަށް ވެގެން އުޅެނީ ކިހިނެއް ހެއްޔެވެ؟ އެ ކުއްޖާއަށް ދިމާވެފައިވާ ކަންކަމުން ސަލާމަތް ކުރުމުގައި ރިފްޤާމެން ކާމިޔާބު ވާނެ ހެއްޔެވެ؟ ރާއްޖޭގެ ހަމަޖެހުން ނަގައިފައިވާ މައްސަލައިގެ ތެރެއަށް އެ ކުދިން ވަންނަން ޖެހެނީ ކީއްވެގެން ހެއްޔެވެ؟ އަނެއްކާ އެ ކުދިންނަށް އެ މައްސަލަތަކުގެ ޙަޤީޤަތް ހޯދޭނެ ހެއްޔެވެ؟ ނުވަތަ ކުރިހާ މަސައްކަތެއް ވާނީ ކުރި އެކޭ އެއްގޮތަށް ފޫނެއް ފަޔަކަށް ފެންފުރުން ކަހަލަ ކަމަކަށް ހެއްޔެވެ؟

މި ހުރިހާ ސުވާލުތަކެއްގެ ޖަވާބު ހޯދުމަށް މި ވާހަކަ ‘ޙަޤީޤަތް ހޯދުމޭ’ ކިޔުއްވާލާ. މި ވާހަކަ މައިގަނޑު ގޮތެއްގައި ކެޓަގަރައިޒް ކުރެވޭނީ ޑިޓެކްޓިވް ފިކްޝަނެއްގެ ގޮތުގައެވެ. 

– މިއީ އަޅުގަނޑު މި ބަޔަށް ލިޔާ ފުރަތަމަ ދިގު ވާހަކަ ކަމުން ކުށް ހުރުން އެކަށީގެންވެއެވެ. މި ވާހަކައަށް ތިޔަ އެންމެހާ ކިޔުންތެރީންގެ ތަރުހީބު ލިބޭނެކަމަށް އުންމީދު ކުރަމެވެ. – 

– އިންތިޒާރު ކޮއްލައްވާ –