ދީވާނާ ކޮއްލީ ތިޔަ ލޯބިންނޭ….._6 ,7 އަދި 8

ކުއްލިޔަކަށް ދޮރު ހުޅުވާލުމާއިއެކު ހުރިހާއެންމެން އެއްކޮށްކަހަލަ ގޮތަކަށް ކޮޅަށް ތެދުވިއެވެ. “. ސަޕްރައިޒް. !!!!!. ” ގެ އަޑު މުޅި ހިސާބުގައި ގުގުމައިގެންދިޔައިރު އަނގަމަތީ އަތް އަޅައިގެން ބުނާނެއެއްޗެއް ނޭނގިފައި ކަހަލަގޮތަކަށް ހުރެގެން އައިޝާދައްތަ އެތެރެއަށް ވަންނަނީއެވެ. ފަހަތުން އައި މުޙައްމަދުބެވެސް ހުރީ ތައްޔާރުކޮށްފައިވާލެއް ފުރިހަމަކަން ފެނިފައި ހައިރާންވެފައިކަން މޫނުމަތިން ފެންނަން ހުއްޓެވެ. އެއާއިއެކު މަޑުމައިތިރި ހިތްގައިމު މިއުޒިކުން ޙަފްލާފެށިގެން ދިޔައެވެ.

ހޫނު މަރުޙަބާއަކުން އެނިވަރސަރީ ފާހަގަ ކުރެވެމުންދާ އައިޝާދައްތަގެ ދެމަފިރީންނަށް ޕާޓީއަށް އައިސްތިބި ގާތްތިމާގެ މީހުން މަރުޙަބާކިޔަމުން ދިޔައެވެ. ރިޔާ އާއި ރަނާވެސް އައިޝާދައްތަ ގާގައި ބައްދާލީ އުފަންދުވަހާއި އެނިވަރސަރީގެ ހެޔޮއެދުންތައް އަރިސްކުރަމުންނެވެ. އަހަރެންވެސް ހަގްއެއްދިނީމެވެ. އައިޝާދައްތަ ހުރީ ވަރަށް އުފާވެފަކަން އެނގެއެވެ. އެމޫނުގެ އުޖާލާކަމުން މިރޭ އެއީ ފަންސަވީހަކަށް އަހަރުގެ ޒުވާން ކުއްޖެއްހެން ހީވެއެވެ. އެއާއިއެކު އެދެމަފިރިންނަށް ޚާއްސަކޮށްފައިވާ މޭޒަށް ގެންދެވުނެވެ. ކުޑަކޮށް އުސްކޮށް ހަދާފައިވާ ސްޓޭޖެއްގެ މަތީގައި ހުދުފޮތިން ޒީނަތްތެރިކޮށް ރަތް ރިބަނުން ފަޅުފިލުވާލައިފައިވާ މޭޒުދޮށުގައި އައިޝާދައްތައާއި މުޙައްމަދުބެ ބޭންދުނެވެ. ވަކިން އެ މޭޒަށް އަލިއެޅޭ ގޮތަށް ހުރި ފްލޮރިޒެންޓް ލައިޓް ތަކުން އެމޭޒުވަނީ ވަކިން ދިއްލުވާލައިފައެވެ. އުފާވެރި ކަމާއި ހިނިތުންވުން ހުރިހާ އެންމެންގެ މޫނުމަތިންވެސް ފެންނަމުން ދިޔައެވެ.މަޑުމަޑުން ކާއެއްޗިއްސަށް އިންސާފުކުރަން ފެށިގެންދިޔައެވެ.

އުފާވެރި، އެކުވެރި މާޙައުލެއްގައި ކެއުމާއިގެން ކުރިއަށް ދިޔައެވެ. ކާއެއްޗިހީގެ ރަހަތަށްވެސް ވަކި ރެސްޓޯރެންޓަކުން ޝެފެއް ކައްކާފައިވާ އެއްޗެކަށްދުލެއް ނުކުރެއެވެ. އަހަރެންގެ މަންމަވެސް ގުޅާފައި އައިޝާދައްތަ މެންނަށް ތަހުނިޔާ އަރިސްކުރިއެވެ. އެކިކަހަލަ އަނގަތެޅުމުގައި ޕާޓީނިމުނުއިރު އެގާރަ ޖަހައިފިއެވެ. އޭރު ޒާނިޝް އާއި އަޔާންތިބީ ކޭކޭނުން ހެލެނުލެވިފައެވެ. ރިޔާއާއި ރަނާ އެދެމީހުންނާއި ދިމާކުރަމުން ދިޔައެވެ. ހީވަނީ ފަލަވެދާނެތީ ބިރުން އުޅޭހެނެވެ. އަހަރެންނަށްވެސް ވަރަށް ރަނގަޅަށް ކެވުނެވެ.

މަޑުމަޑުން މީހުން މަދުވެ ޕާޓީއަށް ތައްޔާރުކުރި ގްރޫޕްގަނޑު ނޫން ހުރިހާއެންމެން ހިނގައްޖެއެވެ. ކެއްކި ސާމާނުތައް ދޮވެ ސާފުކުރު މާއި ޕާޓީ ރޫޅުން މާދަމާއަށް ލަސްކޮށްލީއެވެ. ހުކުރުދުވަހަށް ވުމާއިއެކު އަވަހަށް ތެދުވާންޖެހޭނެތީއާއި އެއްކޮށެވެ.

“ސަމްވަން ޕްލީޒް ޓެލް މީ ވަޓްސް ގޮއިންގް އޮން. ” އަހަރުމެންތިބީ ނިދަން އަރައެވެ. އަޔާން އާއި ޒާނިޝް ހަދައިގެން އުޅޭ އެއްޗެއް ބަލަން ބޭނުން ވެއްޖެއެވެ.

“ވަޓް. އަހަރުމެން ކަމެއް ނުކުރަން. ” ޒާނިޝް ދެއަތް ދުރުކޮށްލަމުން ބުނިއިރު އެދެމީހުން ތެދު އަލިފުތަކެއް ފަދައެވެ.

“ދެން ކޮން ‘އާންބެ އަކާ ޒެން ބެއަކާ ރިޔާ ކޮއްކޮ އަކާ ރަނާ ކޮއްކި’ އެއްތަ؟؟” އަހަރެންގެ ހިތަށް އުނދަގޫކުރަމުން ދިޔަ ސުވާލު ކުރީމެވެ.

“ހަހަހަ. ތީ ދޯ. ” އަޔާން ފުރޮޅިލާފައި ބަންޑުންޖެހިލާ ކުޑަކޮށް ބޯހިއްލާލަމުން ކިޔައިދިނެވެ. އޭރުވެސް އަޔާން އާއި ޒާނިޝް ދިޔައީ އެދެކުދިންނަށް މެސެޖް ކުރަމންނެވެ. ނިދެނީވެސް އެޙާލުގައި ތިބެއެވެ. “މުޙައްމަދުބެ ބުނީ ކޮއްކޮއިން ގޮތުގައި ދެކޭށޭ. އެހެންވީރު. ބޭބެއެއް ކޮއްކޮއެއްދެކެ ލޯބިވުމަކުން މައްސަލައެއް ނެތެއްނު. ހަހަހަ. ” ޒާނިޝް އާއި އަތް ޖަހާލަމުން ދެމީހުން ހެމުންދިޔައިރު ބޮޑު ކާމިޔާބީ އެއް ފާހަގަ ކުރަމުންދާކަހަލައެވެ.

“ޔޫ ޓޫ ވޮންޓް ޗޭންޖް. ” އަހަރެންވެސް އެމީހުންގެ ބޯހަރުކަމުން އިތުރަށް އެއްޗެކޭ ނުބުނެ އޮށޯތީމެވެ.

ޝާޔާއަށް ނޭވާ ނުލެވިގެން ތެޅިފޮޅެނީއެވެ. ފަތަން ނޭނގޭތީއާއިއެކީ ހަތަރެސްފައިން ސަލާމަތް ވުމަށް އެދި ކުރަމުން ދިޔަ މަސައްކަތް ނާކާމިޔާބު ވަމުން ދިޔައެވެ. ޝާޔާއަށް ފެންނަހިސާބުގައި އެއްވެސް މީހަކު ނެތެވެ. ޝާޔާ އަޑުގެ ކޮޅަށް ހަޅޭލަވަމުން ދިޔައެވެ. ނަމަވެސް ޝާޔާގެ އަނގައިން އަޑެއް ނުނިކުތެވެ. ނޭވާލާން ކުރިމަސައްކަތުން އަނގައާއި ނޭފަތަށް ވަންނަންފެށީ ލޮނެވެ. ކޮށިއަރާ ފުއްޕާމޭ ފުރެމުން ދިޔައިރު ޝާޔާގެ މޫނުމައްޗަށް އަނދިރިވަމުންދިޔައެވެ. އެއަނދިރިކަމުގެ ތެރެއަށް ޝާޔާދަމައިގަނެވުނެވެ.

ފުންމައިގެން އަހަރެންނަށް ތެދުވެވުނުއިރު އޮވެވުނީ އެނދުމަތީގައެވެ. އޭރު ގަޑިން ތިނެއް ޖެހީއެވެ. އެއީ މީގެކުރިންވެސް އަހަރެންނަށް ހުވަފެން ފެންނަ ގަޑިއެވެ. އަހަރެންގެ ހިތް މޭގެތެރޭގައި ތެޅެމުންދާއިރު ފަޅާލާފައި ނިކުންނަން ބޭނުންވެފައި ވާކަހަލައެވެ. ދާހިއްލާ ފޯވެފައި އިންއިރު އަހަރެންގެ ހައްޓަށް ނޭވާ ނުފެތިވެއެވެ. ދެލޮލުން ކަރުނަ އަންނަމުން ދިޔައީ ހިތަށް ކުރަމުންދިޔަ ހިތްދަތި އަސަރު ތަކުގެ ސަބަބުންނެވެ.

“ނޫން ނޫން. ޝާޔާއެއް މަރެއްނުވާނެ. ޝާޔާއެއް. ” އަހަރެންނަށް ގިސްލެވެން ފެށުނެވެ. އެހެން ނުވާންވީ ކީއްވެހެއްޔެވެ. މީގެ ކުރިން އަހަރެންނަށް ފެނުނު ހުރިހާ ހުވަފެނެއް ވަނީ އަހަރެންގެ ލޯކުރިމަތީގައި ތެދު ޙަޤީގަތަކަށްވެ ނިމިފައެވެ. މިއީ ތަޤުދީރުގެ ނިޔާ އަންނަން އޮތް ގޮތް ކަމުގައި ވަނީނަމަ އަހަރެންނަކަށް ކުރެވޭނެ އެއްވެސް ކަމެއް ނޯންނާނެކަން ޔަޤީނެވެ. ނަމަވެސް އަހަރެންގެ ފުރާނައިން ލޯބިވާ ޝާޔާ އަހަރެންނާއި ވަކިވާކަށް ނޭދެވޭނެއެވެ. އެ ޙާދިސާ ޙަޤީގަތަކަށް ވިޔަކަ ނުދޭނަމެވެ. އަހަރެން ޝާޔާ ސަލާމަތް ކުރާނަމެވެ. އަހަރެން އަހަރެންގެ އަމިއްލަ ނަފްސައް ވިސްނުވައިދިނީމެވެ. އަހަރެން ތެދުވެގެން ނިކުތީ ގޭގެ ފެންޑާއަށެވެ. އަތުގައި އޮތް ފެންފުޅިން ފެންކޯވަރަކުން ކަރު ތެންމާލީމެވެ. ހިތަށް ލިބިފައިވާ ނުތަނަވަސްކަން ލުއިވޭތޯއެވެ. އިތުރަކަށް އަހަރެންގެ ލޮލަކަށް ނިންޖެއް ނައެވެ. އެފަދަ ޙާލެއްގައި ވިސްނަން އިންދާ ފަތިސްނަމާދު ބަންގި ގޮވައިފިއެވެ. އަހަރެން ފާހާނަ އަށް ވަދެ ފްރެޝް ވެލައިގެން، ވުޟޫ ކޮށްލައިގެން ނިކުތީ ނަމާދަށް ދާށެވެ.

ނަމާދުކުރުމަށްފަހު މާތްﷲ ގެ ޙަޟްރަތަށް އަހަރެން ދުޢާދެންނެވީމެވެ. އެފަދަ މުޞީބާތްތަކުން ޝާޔާ ރައްކާތެރިކޮށް ދެވުންއެދިއެވެ. ޝާޔާއަށް އެފަދަ މުޞީބާތެއް ކުރިމަތި ނުކުރައްވާތޯއެވެ. ނަމާދު ނިމުމާއިއެކު އަހަރެން ބެލީ އަވަހަށް ޝާޔާ އުޅޭ ގޭދޮށަށް ދާށެވެ. ޝާޔާ އަހަރެންގެ އިންތިޒާރުގައި ހުންނާނެކަން އެނގޭތީއެވެ. މިސްކިތުން އަހަރެން ނިކުތް އިރު ބަކުރުބެ އާއި ވެސް ދިމާވިއެވެ. ޙާލު ބަލާ ހަދާފައި ބަކުރުބެ ދަންދެން އަހަރެން މަޑު ކުރީމެވެ. ބަކުރުބެގެ ފަހަތުން ނުފެންނާނެހެން ފިލައިގެން އަހަރެން ދިޔައީމެވެ. ބަކުރުބެ ގެޔަށް ވަނުމާއިއެކު އަހަރެން އެގޭ ކުރިމައްޗަށް ހުއްޓި ބަލައިލީ ޝާޔާގެ ހިލަމެއް ވޭތޯއެވެ.

އަހަރެން ފެނުމާއިއެކު ޝާޔާ ފެންޑާގައި ހުރި ޖޯލިފަތިން ތެދުވެގެން ގޯތި ތެރެއަށް ނިކުތެވެ. އެއާއިއެކު ގޯތީގެ ބިއްދައްފަރާތަށް ދާން ހިނގައިގަތެވެ. އެފަރާތަށް ދަމުން އަހަރެންނަށް އިޝާރާތް ކޮށްލީ ވަށާލާފައި އެގޯތީ ބިއްދަށް ފަރާތަށް އައުމަށެވެ. އެބްލޮކް ވަށާލާފައި ބިއްދަށަށް ދެވެން އޮތްކަން އެނގުނީދެނެވެ. އަހަރެންވެސް ޝާޔާ އިޝާރާތްކުރިފަދައިން ބްލޮކް ވަށައިލީމެވެ. އެފަރާތުގައި ހުރީ ހަދަންފަށާފައި ނުނިމި ހުރި ގެއެކެވެ. ގޯތިތެރޭގައި ވަރަށް ގަސްބޯވެފައި ވެއެވެ. އަހަރެން ފޯނުން އަލިކުރަމުން އެ ގޯތިތެރެއަށް ވަދެގެން އަނެއް ފަރާތަށް ނިކުތީމެވެ. ތެޅިގަލުން ރާނާފައިވާ ދުވަސްވީއިމާރާތެކެވެ. އެއީ އެގޯތީގައި ކުރިން އަޅާފައި ވާ އިމާރާތްކަން ބަލާލީމައި އެނގެއެވެ. އެ ފަޅުގޭގައި ފުރާޅެއް ނެތެވެ. އަހަރެން ވަދެގެން އަލިކުރަމުން ކުރިއަށް ދިޔައީމެވެ. ކުއްލިޔަކަށް މީހެއްގެ ފަޔަށް އަލި ކުރެވުނުހެން ހީވެގެން ސިހިފައި ބަލައިލީމެވެ. އެއީ ޝާޔާއެވެ.

އަހަރެންނާއި ޝާޔާއަށް ތިބެވުނީ ވީރާނާވެފައިވާ ފަޅުގެއެއްގެ ތެރޭގައެވެ. ތިބެވުނު ތަނުގެ ގޮތުން އަހަރެންގެ ހިތަށް ކޮންމެވެސް ވަރަކަށް ނުތަނަވަސްކަން ވެރިވަމުން ދިޔައެވެ. ނަމަވެސް ޝާޔާއަށް ހީވަނީ އެކަހަލަ އެއްވެސް އަސަރެއް ނުކުރާހެނެވެ.

“ބިރެއް ނުގަނޭތަ. ” އަހަރެން ވައިއަޑުން އަހައިލީމެވެ. އަހަރެން ހުރީ އެކަހަލަ، ބިރުވެރި ފިލްމު ތަކުން ދައްކާ ހައުންޓެޑް ހައުސް އެއްގެ ތެރެގައި ހުރެވުމުން ހިތް އަވަސް ވެފައެވެ. ޝާޔާ ދެފަރާތަށް ބޯ ހޫރާލީ ބިރެއް ނުގަނެޔޭ ބުނާކަހަލަ ގޮތަކަށެވެ. ޝާޔާގެ ތުންފަތް މަތިން ފެނިގެން ދިޔައީ ފަނޑު ހިނިތުންވުމެކެވެ. އަހަރެން ބިރުގެންފައި ހުރިހެން ހީވެގެން ތޯއްޗެކެވެ. ވަގުތުން އަހަރެންވެސް ވަރަށް ހަމަޖެހިލައިފީމެވެ. ހަމަ ގައިމުވެސް އަންހެން ކުއްޖަކަށް ވުރެ ކެރެން ވާނެތާއެވެ. މަޑު މަޑުން އަހަރެންގެ ހިތަށް ހަމަޖެހުން ލިބެމުން ދިޔައެވެ.

އަހަރެން މަޑުމަޑުން ޝާޔާ އާއި ކައިރިޔަށް ޖެހިލީމެވެ. ޝާޔާ ލަދުން އިސްދަށަށް ޖަހައިލީ އަހަރެންގެ ލޮލުގެ ތޫނު ނަޒަރުން ސަލާމަތްވާން ކަހަލައެވެ. ޝާޔާއާއި އެހާ ކައިރީގައި ހުރެވުމުން އަހަރެންގެ ހިތުގެ ތެޅުން ބާރުވަމުން ދިޔައެވެ. ޝާޔާ އަހަރެންނާއި ބައްދަލުކުރަން ބޭނުންވީ ކީއްވެގެން ބާއޭ އަހަރެންގެ ހިތަށް އެރިއެވެ. ހަމަގައިމުވެސް ޝާޔާ އަހަރެންނާއި ދޭތެރޭގައި ޚާއްސަ ނަޒަރަކުން ނުދެކޭނަމަ އަހަރެންނާއި މިކަހަލަ ގޮތަކަށް ބައްދަލު ކުރާކަށް ނުކެރުނީހެވެ.

ޝާޔާ އިސްއުފުލާލައި މޫނު މައްޗަށް ވެއްޓިފައިވާ އިސްތަށިތައް އެއްފަރާތް ކޮށްލަމުން އަހަރެންނަށް ބަލައިލިއެވެ. އެލޮލުގައި ވިދަވިދާހުރި ކަރުނައިގެ މުތީތައް ފެނިފައި އަހަރެންގެ ހިތް ގަނޑުވި ކަހަލައެވެ. އެމޫނުމަތިން ފެންނަން ހުރީ ވަރުބަލިކަމާއި ހިތް ދަތިކަމެވެ. ބަލާބެލުމަށް ރޭ ހަތަރުދަމު ހޭލާ ހުރިކަހަލައެވެ. އަހަރެން ކައިރިވެލާ ޝާޔާގެ ލޮލުގައިހުރި ކަރުނަތައް ފުހެދިނީމެވެ.

“ވަޓްސް ރޯންގް. ޝާޔާ. ކީހިނެއްވީ އަނެއްކާ. ” ޝާޔާ މޫނު މަޑުމަޑުމަޑުން އަނބުރައިލިއެވެ. އަދި އަހަރެންނާއި ފުރަގަސްދީ ދެލޯ ފުހެލިއެވެ. އެއަށްފަހު އަހަރެންނާއި ދިމާލަށް އެނބުރުނެވެ. ވަރަށް ހިތްވަރާއިއެކު ޝާޔާގެ އިޝާރާތުން އަހަރެންނަށް އެއްޗެއް ބުނެދޭން އުޅޭހެން ހީވިއެވެ. އަހަރެންވެސް ޝާޔާ ބުނަން އުޅޭ އެއްޗެއް ދެނެގަތުމަށް ހުރިހާ ޝަޢުޤުވެރިކަމެއް ހުސްކޮށްލީމެވެ.

“އަހަރެންނަކަށް ޝޯންއެއް އެކަށިގެނެއް ނުވޭ. ދެ މީހުންނަށް ވެސް. އެންމެ ރަނގަޅު ވާނީ. މިއީ ނުވާކަމަކަށް ހެދިއްޔާ. ޝޯން. އަހަރެންގެ މަތިން ހަނދާން ނައްތާލާ. ” ޝާޔާ ގެ ލޮލުން ފައިބަމުން ދިޔަ ކަރުނަތައް ކޯތާފަތް މަތި ތެންމަމުން ދިޔައެވެ. ޝާޔާގެ ވާހަކަތައް ނިމުނު އިރު މުޅި މީހާގެ ހަށިގަނޑުގައި މަޑު ތުރުތުރެއް ހުއްޓެވެ. ހަށީގައިވި ހުރިހާ ހިތްވަރެއް އެބަސްތައް ބުނުމަށް ބޭނުން ކޮށްފައިވާ ކަހަލައެވެ. ޝާޔާއަށް ކުރަމުން ދިޔަ އަސަރު ތައް ފެނިފައި އަހަރެންގެ ހިތް ކުދި ކުދި ވަމުން ދިޔައެވެ. ހިތްދަތި ކަމުން ފުރިގެންވާ ބެލުމަކާއެކު ޝާޔާ ދިއްކޮށްލީ ގަނޑުކޮޅެކެވެ. އެއަށްފަހު އެނބުރި ހިނގައިގަތީ ގެއާއި ދިމާލަށެވެ. އަހަރެންނަށް ހުރެވުނީ ބަސް ހުއްޓިފައެވެ. ޝާޔާ ހުއްޓުވަން އަހަރެން ވަރަށް ބޭނުމެވެ. ނަމަވެސް އެހިތްވަރެއް އަހަރެންގެ ދެފަޔަކު ނެތެވެ. އެވޭނީ ވަދާޢުގައި އަހަރެންގެ ހިތުގެ ގޮވުން ޝާޔާއަށް އަޑުއިއްވާލަން ބޭނުންވިއެވެ.

“އެހޯދި އުފާތަކާ.

އެމަސްތީ ރޭތަކާ.

އެއައި މޫސުމް ނަޔާ.

ފިލާ ނެތިގެންދިޔާ.

އެފަރި ހިނިތުން ވުމާ.

އެރީތި ބެލުންތަކާ.

ހަނދެއްފަދަ ރީތިކަން

ލޮލަށްވީ ގެއްލިފާ.

އެމަންޒިލް އަދު ކޮބާ.

އެހަނދުވަރު އޮއްސިފާ.

ހުރީ ވެވިފާ. ބާކީ.

ޝާޔާގޮސް ކުރިމަތިން ގެއްލެންދެން އަހަރެންނަށް ހުރެވުނީ ގުޑިލަންވެސް ނޭނގިފައެވެ. ކުއްލިއަކަށް އަހަރެންނަށް ހަނދާންވީ ރޭގައި ފެނުނު ހުވަފެނެވެ. އެއާއިއެކު ގައިގާ ހުރި ހުރިހާ ލޯލިތަކެއް ކޮޅަށް ޖެހިގެން ދިޔައެވެ. ޝާޔާ އަމިއްލަޔަށް މަރުވާން އުޅެނީ ބާއޭ ހިތަށް އަރާފައެވެ. ނޫނެކެވެ. ޝާޔާއަކީ އެއަށްވުރެ މާ ހިތްވަރުގަދަ ކުއްޖެކެވެ. އަހަރެންގެ ހިތް ބުނަމުން ދިޔައެވެ. އަހަރެން ހަދާނެ ގޮތް ހުސްވެފައި ވާ މީހެއް ފަދައިން ދެކޮޅަށް ދެކޮޅަށް ހިނގަ ހިނގާ ހުރީމެވެ. މަޑުމަޑުން އުދަރެސްމަތި އަލިވަމުން ހުރެ އާދެއެވެ. ނަމަވެސް އަހަރެންގެ ހިތަކަށް ފިނިކަމެއް ނުލިބުނެވެ. އެންމެފަހުން އަތުގައި އޮތް ގަނޑުކޮޅު ކިޔާލުމަށް ރޫޅާ ލީމެވެ.

“ޝޯން.

ކަލާގެ ތިހިތުގައި އަހަރެންފަދަ ނިކަމެތި، ނުކުޅެދޭ ކުއްޖަކަށް ތިޔަފަދަ މަތިވެރި މަޤާމެއް ދިނުން ވާނީ ބޭއިންސާފަކަށެވެ. އަހަރެންނަކީ އެއްވެސް މީހަކަށް ބޭނުންހިފޭވަރަށް ވުރެ ނުކުޅެދޭ މީހަކީމެވެ. އަމިއްލަ އިޙްސާސްތައް ދުލުން ބަޔާން ނުކުރެވޭ މަންމަނަކީމުއެވެ. ތަޢުލީމުން މަޙްރޫމުވެފައިވާ ކުއްޖަކީމުއެވެ. ނަމަވެސް ކަލާ ތިއީ ކަޅުފޮއެ ރޭރޭގެ އަދިރިކަން އަލިކޮށްދޭ ހަނދުފަދަ ރީތި، ފުރިހަމަ ޒުވާނެކީމުވެ. ކަލާއަކީ ފޯރާ މުއްސަންޖެކީމުވެ. ކިޔަވައިގެންހުރި މޮޅު މީހަކީމުއެވެ. އަހަރެންނަކީ ކަލާއާއި އަޅާކިޔޭވަރުގެ މީހެއް ނޫނެވެ. ކަލާއާއި އަހަރެންގެ ފަރަޤު އުޑާ ބިމާހާ ތަފާތެވެ.

ކަލާގެ ތިހިތުގައިވި އެކަނިވެރިކަން ފިލުވައިދޭނެ ހިތްތައް އުޑުގައި ވާ ތަރިތައް ފަދައިން ވާނެއެވެ. ކަލާގެ ޙަޔާތަށް އަލިކަން ގެނެސްދޭނެ އަތްތައް ކަލާގެ އެންމެ އިޝާރާތަކަށް އެދިއެދި ވާނެއެވެ. ނަމަވެސް އަހަރެންނަކީ އެފަދަ ނަސީބެއް ހުވަފެނުންވެސް ލިބޭވަރަށްވުރެ ނިކަމެއްޗެކީމުވެ. މި ޙަޔާތުގައި އެފަދަ އުފަލެއް މިންވަރު ކުރައްވާފައެއް ނުވެއެވެ. ވީ އިރު ކަލާގެ ފުރިހަމަ ޙަޔާތަށް އަހަރެންފަދަ އަނދިރި، ނިކަމެތި ކަމެއް ގެނައުން އެއީ ބޭއިންސާފެކެވެ.

ކަލާތިއީ މިޙަޔާތަށް ބަހާރުމޫސުން ގެނުވި ފަރާތެވެ. މި ބަދުނަސީބު ޙަޔާތަށް ހިނިތުންވުމެއް ގެނުވި މީހަކީ ތިއީއެވެ. ނަމަވެސް ތިއީ އަހަރެންނަށް ފެނުނު ރީތި ހުވަފެނެކެވެ. ދެދުވަހެއްގެ މެޙެމާނެކެވެ. ނަމަވެސް ކަލާ މިޙަޔާތުގައި ވީ މަދު ދުވަސްކޮޅަކީ މިހިތުގައި ވި އެންމެ ފޮނި ހަނދާންތައް ކަމުގައި ވެފައިވެއެވެ. އެ ހަނދާންތައް އަބަދަށް މި ހިތުގައި ރައްކާކުރާނަމެވެ. ކަލާގެ ހަނދާންތަކުގައި ޢުމުރު ހޭދަކޮށްލުމަކީ އަހަރެންނަށް ލެބޭނެ އުފަލެކެވެ.

ކަލާގެ ޙަޔާތް އަހަރެންފަދަ ނިކަމެއްޗަކަށްޓަކާ ޤުރުބާން ކޮށްނުލާށެވެ. އަހަރެންގެ ހަނދާންތައް ތިހިތުން ފޮހެލަދޭށެވެ.

މިއީ އާދައިގެ ނިކަމެއްޗެއް، ތިއީ މާލޭގެ މުއްސަންޖެއް،

އަނާމީ ނުކުޅެދޭ ކުއްޖެއް، ތިއީ ހުވަފެނެކެ ފެންނާނޭ.

ލޯބިވާ

ޝާޔާ. ”

“ދެޓްސް ނޮޓް ފެއަރ. ޑެމިޓް!!” އަހަރެން ކައިރީހުރި ފާރަށް އެތިފަހަރެއް ވީއްލާލީ ހިތަށްކުރި އަސަރުންނެވެ. ޝާޔާ ގެ ޙާލަތު އަހަރެންނަށް އިޙްސާސްކުރެވެއެވެ. ނަމަވެސް އަހަރެންގެ ފޯރުންތެރިކަމަކީ އަހަރެން އެދިގެން ދެއްވި ނިޢުމަތެއް ނޫނެވެ. ޝާޔާގެ ނުކުޅެދުންތެރި ކަން ފަދައިންނެވެ. ޝާޔާ އާއި ނުލާ އަހަރެންގެ ފޯރާކަމަކުން، މުއްސަނދިކަމަކުން ލިބޭނެ އުފަލެއް ކޮބައިހެއްޔެވެ؟ އެއެއްޗިއްސަކީ އެއްވެސް ބޭނުމެއް ނުހިފޭ އެއްޗެއް ކަމުގައިވާނެއެވެ. އަހަރެންގެ މިހިތަށް ޝިފާއެއް އެ މުއްސަނދިކަމަކުން ލިބޭނެ ހެއްޔެވެ؟ އަހަރެންނަށް ލޮލުން އައި ކަރުނަތައް ފޮހެ އަމިއްލަނަފްސު ކޮންޓްރޯލް ކުރަން އިރުގަނޑެއް ބޭނުންވިއެވެ. ޝާޔާގެ ނިންމުމުން އަހަރެންނަށް ޝާޔާދެކެ ހިތްހަމަވެސް ނުޖެހެވުނެވެ. އެއީ ދަރަޖައިގެ ތަފާތު ދައްކައިގެން ދުރުވާން އުޅުނީމައެވެ. އަހަރެންގެ ޙަޔާތަށް ޝާޔާގެ މުހިންމުކަން ޝާޔާއަށް އިޙްސާސް ކުރެވޭނެނަމަ އެހެން ބުނާކަށް ނުކެރުނީހެވެ.

އަހަރެން އެނބުރި ގެޔަށް ދިޔައީ އެއްކަމެއް ނިންމައިގެނެވެ. މަންމަ އަށް ގުޅާފައި ޝާޔާ އާއި ބެހޭ ހުރިހާ ވާހަކައެއް ކިޔައިދޭށެވެ. ޝާޔާއަކީ އަހަރެންނަށް ކިހާ މުހިންމު މީހެއްކަން މަންމައަށް އަންގައިދޭށެވެ. މަންމަގެ ރުހުން ލިބިއްޖެނަމަ އަހަރެން ދެން ޖެހިލުންވާނެ އެއްވެސް ކަމެއް ނެތެވެ.

ހެނދުނު ހަތެއް ޖަހަންވާއިރަށް ގެއަށް އަންހެންވެރިން އައިސްފިއެވެ. ކައްކާފައިހުރި ތާސްތަކާއި އެއްޗިހި ދޮވުމުގެ ކަންތައްތައް ފޯރީގައި ކުރަން ފަށައިފިއެވެ. ރިޔާ އާއި ރަނާ، އައިޝާ ދައްތަ އާއި އެއްކޮށް ބަދިގެފަރާތުގައި ސައި ތައްޔާރުކުރަން އުޅުނެވެ. އިތުރު ދެކުދިންވެސް އެހީވެ އުޅުނެވެ. ހެނދުނުގެ ސައިވެސް ތަންކޮޅެއް ގިނައިން ތައްޔާރު ކުރަން ޖެހޭތީއާއި އެއްކޮށެވެ. އަހަރެންވެސް ބެލީ ވީހާވެސް ނޯރމަލްކޮށް އުޅެވޭތޯއެވެ. ހިތުގައިވާ އެއްޗެއް އެހެންމީހުންނަށް ނުދައްކައި އުޅެވޭތޯއެވެ.

އަޔާން އާއި ޒާނިޝް ރީތިވާން ކޮޓަރީގައި ތިއްބެވެ. ސައިބޮއިގެން ފިރިހެން ވެރިންނަށް އޮތީ ޕާޓީ އަށް ތައްޔާރުކޮށްފައިވާ ޑެކެރޭޝަންތަށް ރޫޅާ މޭޒުތަކާއި ގޮނޑިތައް ގެނައި ތަންތަނަށް ގެންދިއުމެވެ. އެހެންކަމުން އެކަމަށް ތައްޔާރުވެގެން ހާފިޒް އާއި ޝިޔާމް ވެސް އައިސް އުޅުނެވެ.

“ކޮބާ. މާދަން ދަތުރު ދާން ވާނެ އިނގޭ. ޕާޓީ ނިމިގެން މިކަންތައް ކޮށްފަ ޖެހޭނެ މި ގުރޫޕް ދަތުރުވެސް ދާން. ދޯ ހާއްޕޭ. ” ޝިޔާމް އާއި ހާފިޒް އަހަރެން ކައިރީ ސޯފާ ގައި އިށީންނަމުން ބުނެލިއެވެ.

“އާން. ދަތުރު ނުގޮހެއް ނުވާނެއެއްނު. އަދި މިމީހުން އައި ފަހުން ދަތުރެއްވެސް ނުދެވެއެއްނު. ދޯ. ” އަހަރެންނަށް ދޯއެއް ދެމުން ހާފިޒް ބުނެލިއެވެ. އަހަރެންވެސް ދަތުރަކުދާން ހުރީ ވަރަށް ބޭނުންވެފައެވެ. ރާއްޖެއަށް އައިސް އަދި މިއުޅެނީ މޫދަށް އެރިލާ ފަތާލާ ނުހެދިގެންނެވެ. އެހެންވެ އަހަރެންވެސް ދަތުރު ދިއުމުގެ ޚިޔާލާ ވަރަށް އެއްބައެވެ. އޭރު އަޔާން އާއި ޒާނިޝް ނިކުންނަނީއެވެ.

“އޭ. ކޮންދަތުރެކޭ. ؟ ދަތުރެއް ދާންވީއޭ. !! ހިނގާ ރާވަމާ. ” އަޔާން އައިގޮތަށް އައިސް އަނގަ ބާނާގަނެއްޖެއެވެ. ޝިޔާމް އާއި ހާފިޒްވެސް އަޔާން އާއިއެކު ދަތުރުދިއުމުގެ ކަންތައްތައް ރާވާނެ ގޮތް ކިޔައިދެމުން ދިޔައެވެ. އަހަރެންނާއި ޒާނިޝް ވެސް ގޮތްކިޔަމުން ދިޔައީމެވެ.

“ކޮންވާހަކައެއްގަ މާ އޮލަ ކޮށްލާފަ. ” މުޙައްމަދުބެ އައިސް ވަނީ އެވަގުތުއެވެ. އެއާއިއެކު މުޙައްމަދުބެ ވެސް ދަތުރު ދިއުމުގެ ކަންތައްތައް ކުރިޔަށް ގެންދިއުމަށް ހިތްވަރު ދިނެވެ.

“ބަލާ ބަލަ މީގެ ލޮނު ހިޔަވަރު ތޯ. ” ރިޔާ ދޭފަތެއް މައްޗަށް ތައްޔާރުކުރަމުންދާ ސައިޑްޑިޝްގެ ސޯސްގަނޑުން އެތިކޮޅެއް ލައިގެން އައިސް ޒާނިޝް ކައިރީގައި ހުއްޓިލިއެވެ. އެއާއިއެކު ޒާނިޝް އެތިކޮޅެއްގައި އިނގިލި ޖައްސާލާފައި އަނގަޔަށް ލާން އުޅުނެވެ.

“ތިހާ ކުޑަ އެތިކޮޅަކުން މީހުން ލޮނު ރަހަ ބަލާތަ. ” ރިޔާ އެހެން ބުނުމުން ތަންކޮޅެއް ގިނައިން އަނގައަށް ލައިފިއެވެ. އެއާއިއެކު ޒާނިޝްގެ މޫނުމަތި ކުނިވެގެން ދިޔައެވެ.

“ވާވް. އުމް. ދިސް އިޒް ޓޭސްޓީ. އެއަށްވުރެ އަވަހަށް އެމޫނުމަތި އުޖާލާވެގެން ދިޔައީ މާ މީރު އެއްޗެއް ކެވިގެން އުޅުނު ހެނެވެ. އަހަރެމެން އެންމެންވެސް ރަހަބަލަން އެތިކޮޅެއް އަނގަޔަށް ލީމެވެ.

“ޕު…ހް. ” އެއީ ހުސް ލޮނެވެ. އެސޯސް ތަކުގެ މައްޗަށް ވަކިން ބައިވަރު ލޮނު އަޅައިގެނެވެ. އެންމެންނަށް ކުޅުޖަހައިލެވުނީ އެއްފަހަރާއެވެ. ރިޔާ ދުވެފައި ބަދިގެ ފަރާތަށް ދިޔައިރު ރަނާ ދޮރުން ބޯދިއްކޮށްގެން އޮވެ ހެނީއެވެ. ޒާނިޝްވެސް އަހަރެމެންނަށް ލަނޑެއް ދެވުނީމައި ހީނ ހީނފައި އުޅޭއިރު ހީވަނީ އާކުކުޅަކަށް ގާ ބިހެއް އެޅިގެން އުޅޭހެނެވެ.

************************

7ވަނަ ބައި

“ޕު…ހް. ” އެއީ ހުސް ލޮނެވެ. އެސޯސް ތަކުގެ މައްޗަށް ވަކިން ބައިވަރު ލޮނު އަޅައިގެނެވެ. އެންމެންނަށް ކުޅުޖަހައިލެވުނީ އެއްފަހަރާއެވެ. ރިޔާ ދުވެފައި ބަދިގެ ފަރާތަށް ދިޔައިރު ރަނާ ދޮރުން ބޯދިއްކޮށްގެން އޮވެ ހެނީއެވެ. ޒާނިޝްވެސް އަހަރެމެންނަށް ލަނޑެއް ދެވުނީމައި ހީނ ހީނފައި އުޅޭއިރު ހީވަނީ އާކުކުޅަކަށް ގާ ބިހެއް އެޅިގެން އުޅޭހެނެވެ.

ހެނދުނުގެ ނާސްތާއަށް ހުރިހާ ފިރިހެންވެރިން އެއްސުފުރާއެއްގެ މަތީގައި އިންސާފުކުރަމުން ދިޔައިރު އެކިކަހަލަ މަޖާ ވާހަކަތައް ދެކެވެމުން ދިޔައެވެ. ހާފިޒް އާއި ޝިޔާމް ހުރުމުން މުޙައްމަދުބެ އަކީވެސް އަނގަ ގަދަ މީހެންކަން އެނގިއްޖެއެވެ. ދަތުރު ދިއުމުގެ ކަންތަކުގައި މަޝްވަރާ ކުރެވެމުން ދިޔައެވެ. ނަމަވެސް މިއިން އެއްވެސް ކަމަކުން އަހަރެންގެ ހިތަށް ކުޑަވެސް ފިނިކަމެއް ނުލިބުނެވެ. އަޔާން އާއި ޒާނިޝް އެހާ އަނގަތަޅާ އުޅުނުއިރު އަހަރެންނަކަށް އެމީހުން ދައްކާ ވާހަކައަކަށް ވެސް މާބޮޑު ސަމާލުކަމެއް ނުދެވުނެވެ. އަހަރެންގެ ހިތަށް ލިބިފައިވާ ޒަޙަމްތަކުން ލިބެމުންދިޔަ ވޭން ވަނީ މާބޮޑުވެފައެވެ.

ސައިބޮއެ ނިމިގެން އަހަރެން މަންމަ އަށް ގުޅާލީމެވެ. އާދައިގެ މަތިން ކުރެވުނު މަޖާކަންތަކާއި އެއްޗިހި ކިޔައިދީ ހެދީމެވެ. އަހަރެންނަށް ޝާޔާގެ ވާހަކަ ފަށާނެ ގޮތެއް ނޭނގުނެވެ. މަންމަގާތު އެވާހަކަތައް ކިޔައިދޭނެ ގޮތެއް ނުވިސްނުނެވެ.

“ދަރިފުޅު ކޮންކަމަކާ ތި ވިސްނަނީ. ” އަހަރެންގެ އަޑެއް ނީވި ގިނައިރު ވުމުން ކަން ނޭނގެއެވެ.މަންމަ އަހައިލިއެވެ. މަންމަ ވަރަށް ފަސޭހައިން އަހަރެންގެ ހުރިހާ އިޙްސާސެއްވެސް ދެނެގަންނާނެއެވެ.

“ނަތިން. ހަމަ. މޮމް. އައިތިންކް އައިމް އިން ލަވް. ” އަހަރެންނަށް ބުނެވުނީ އެހިސާބަށެވެ.

“ހަމަ އަސްލުވެސްތަ. ކޮންކުއްޖެއްތަ މަންމަގެ ސިއާންގެ ހިތް އަތުލައިގެން އެއުޅެނީ. ވަރަށް ރީތި ކުއްޖެއްތަ؟ ދެން ރީތި ވީމަތާ ދޯ ދަރިފުޅުގެ ހިތް އަތުލެވޭނީ. ހެހެހެ. ޓެލް މީ މޯރ. ” މަންމަ އެކުއްޖާއާއި ބެހޭގޮތުން އޮޅުންފިލުވަން ބޭނުންވެފައި ހުރި ވަރު ހާމަކުރިއެވެ. އަހަރެން މަންމައަށް އެންމެ ފުރަތަމަ ހުވަފެނުން ފެނުނު ރެއިން ފެށިގެން މިރޭ ފަތިހު ކަންތައްވީ ގޮތާއި ހަމައަށް މަންމަ އަށް ކިޔައިދިނީމެވެ. އެއަށްފަހު ދިޔައީ ހުސްކަމެކެވެ. އަހަރެން އިންތިޒާރުކުރަމުން ދިޔައީ މަންމަގެ ބަހަކަށެވެ.

“އައި އޯލްރެޑީ ލައިކް ހަރ. ” މަންމަ އެކްސައިޓެޑް ވެފައި ހުރި އިރު ހީވަނީ ފުރާވަރުގެ އަންހެން ކުއްޖެއް ހެނެވެ. ޝާޔާއާއި ބައްދަލުކުރާހިތުން މަންމަ ހުރީ ކެތް މަދުވެފައެވެ. މަންމައާއި ބައްޕައަކަށް އަންހެން ކުއްޖެއް ނުލިބެއެވެ. އަހަރުމެން އާއިލާގއި ތިބެނީ ދޮންބެއާއި އަހަރެންނެވެ. އެހެންކަމުން މަންމަ ހުންނަނީ ދޮންބެވެސް މީހަކާ ނީންނާތީ އަބަދު ޝަކުވާ ކޮށްލަ ކޮށްލައެވެ.

“ޝާޔާ އަށް މަންމަގެ ސަލާމް ބުނެދެއްޗޭ އިނގޭ. މަންމަ ވަރަށް އަވަހަށް ދާނަން ތިރަށަށް އިރާދަކުރެއްވިއްޔާ. ދަރިފުޅުގެ ޝާޔާ ދެކިލަން. ދެން ދަރިފުޅު އެކަމާ މާބޮޑަށް ފިކުރު ނުކުރައްޗޭ. މަންމަ ގޮސް ތިހުރިހާ ކަމެއްވެސް ހަމަޖައްސާލަދޭނަން. ” މަންމަ ފޯން ބޭއްވީ އަހަރެންނަށް އުންމީދު ތަކެއް އާކޮށްދީފައެވެ. ހިތުގައިވި ހުރިހާ އުދާހެއް އެއްފަހަރާ ކަހަލަ ގޮތަކަށް ފިލައިގެން ދިޔައެވެ. ހިތަށް ހަމަޖެހުން ލިބުނެވެ.

ހުކުރު ދުވަސް ކަމަށް ވުމާއިއެކު މަސައްކަތް އަވަސް ކޮށްލާފައި ހާފިޒް އާއި ޝިޔާމް ވެސް ދިޔައީ ގެއަށެވެ. އަހަރެމެން ވެސް އަވަހަށް ފެންވަރާލައިގެން ނިކުތީ ހުކުރަށް ދާން ތައްޔާރުވެގެންނެވެ. އާންމުކޮށް ހުކުރު ދުވަހަކީ އެއްޗިހި ދޮންނަ ދުވަހަކަށް ވީނަމަވެސް މާދަމާ ދަތުރު ރޭވިފައި ވާތީ ދޮވުން ލަސްކޮށްލީ މާދަން ރެއަށެވެ.

“ރޭ ފަތިހު ހޭލާ އުޅުނިންދޯ. ވެއަރ ޑިޑް ޔޫ ގޯ. މަށަށް ހޭލެވިގެން ބަލައިލިއިރު ކޮޓަރިއަކު ނެތް. ” ޒާނިޝް ވާހަކަދެއްކީ މިސްކިތަށް ދާން ނިކުންނަމުން ނެވެ.

“އަހަރުމެން މިހެން ތިއްބަ މިހާރު ދަންވަރު މީޓް ކުރަންވެސް ދާން ފެށީއޭ ދޯ. ޔޫ އަރ ޓޫ މަޗް ޑޫޑް. ” އަޔާން ވެސް އަހަރެންގެ ކޮނޑުގައި ޖަހާލަމުން ދިމާކޮށްލިއެވެ. އަހަރެންގެ ހިތަށް އެރިއެވެ. އެ ހުވަފެން ކިޔައިދޭން ވީބާއެވެ؟ މީގެ ކުރިންވެސް އެހެން ފެންނަ ހުވަފެންތައް ކިޔައިދީ އުޅެމެވެ. އެކަމަކު މިއީ ތަފާތު ހުވަފެނެކެވެ. އެންމެ ފަހުން އަހަރެން ނިންމީ އެދެމީހުންނަށް ކިޔައިދޭށެވެ. އެ ދެމީހުންގެ ވެސް ޚިޔާލު ހޯދާލާށާ އެކީގައެވެ.

“އައި ސޯ އަ ޑްރީމް. އޭގެ ފަހަކުން ނުނިދުނު. އައިލް ޓެލް ޔޫ ލޭޓަރ. ” މިސްކިތަށް އަރަމުން އަހަރެންގެ ވާހަކަ މެދުކަނޑައިލީމެވެ. ގެއާއި މިސްކިތާއި ކައިރި ވީމައާއިއެކު މިސްކިތަށް ދާން ދެމިނެޓެއްހާއިރު ވެސް ނުނަގައެވެ. ހުކުރު ނިމިގެން މިސްކިތުން ފޭބި ގަޑީގައި ބަކުރުބެ އާއި ދިމާވިއެވެ.

“އެކޮއެ. ބޭބެގެ މަރިޔަން މިއަދު ހެނދުނު އަތުވެއްޖެ. ހުންނާނެ ވަރަށް ރަނގަޅަށް ކާން ވެސް ހަދާފަ. ދާންވީއެއްނު ގޭދޮށަށް ގޮތެއް ހަދާލަން. ” ބަކުރުބެގެ އެދުނު ނަމަވެސް އަހަރެންނަކަށް ދާކަށް ނުކެރުނެވެ. އަހަރެންގެ ފިނޑިކަމެވެ. ޝާޔާއާއި ފޭސްކުރާކަށް އަހަރެންނަކަށް މިހާއަވަހަކަށް ފަސޭހައެއް ނުވާނެއެވެ.

“ގޭގަ އައިޝާ ދައްތަ ވަރަށް ރަނގަޅަށް ކާން ހަދާފަ ހުރީ. ދެން އެހެން ފަހަރަކުން ދޯ. ” އަހަރެން އުޒުރު ދައްކާލީމެވެ.

“އެހެންވީރު ކޮންމެހެންވެސް ވާނެ ހަވީރު ސައިފޮދެއް ބޯލަން އަންނަން. ” ބަކުރުބެ ކުރު ނުކުރުމުން އަޔާންމެން ގޮވައިގެން ދާން އެއްބަސް ވީމެވެ.

މެންދުރަށް ވަރަށް ރަނގަޅަށް ކާން ހަދާލާފައި ހުއްޓެވެ. ހަނާކުރި ކުކުޅާއި، ކުކުޅު ރިހަ، ހިކިކޮށް ހަދާފައި ހުރި ސޮސެޖް، ފްރައިޑް ރައިސް، ރޮއްޓާއި، ސެލެޑް، އަދި ދެތިން ވައްތަރެއްގެ މޭވާ ވެސް ހުއްޓެވެ. މިއަދަކީ އެ ޢާއިލާގެ އެންމެ މެންބަރެއް ނޫނީ އެހެން ހުރިހާ އެންމެން ވެސް ހަމަވި ދުވަހެކެވެ. އެއީ އައިޝާދައްތަގެ ދޮށީ ފިރިހެން ކުއްޖާއެވެ.

“ހަމަ އެކަނި ރިޔާޟް ދޯ މަދީ. އެސޮރު މީން ދުވަހަކު ގުޅާލިތަ. ” މުޙައްމަދުބެ އައިޝާދައްތަ ކައިރީ އަހައިލިއެވެ. އެއާއިއެކު އައިޝާދައްތަގެ މޫނުމަތިން ފެންނަން ހުރި އުފާވެރިކަން ގެއްލުނެވެ.

“ކިހިނެއް ގުޅާލާނީ. އެހެރީ ވަރެއްގެ އަންހެނެކާ ޖެހިފަ. އެޝައުޝަން އަހަރެމެންނާ ގުޅިއަކަ ދޭނެތަ. އަހަރެމެންނަށް އެއްޗެއް ފޮނުވިޔަސް އެހާ މައްސަލަ ޖައްސާ. ” އައިޝާދައްތަ ފޫހި ރާގަކަށް އެހެން ބުނެފައި ތަށިތައްޓަށް ފަނި އަޅަމުން ދިޔައެވެ.

“ރިސޯޓުން ޗުއްޓީ އެއް ނަގާވާހަކަ ބުނި އަންނަ މޭމަހު ތެރޭގަ. ނަގައިގެން އަނަނާނެމޭ ބުނި އެންމެ ފަހުން ގުޅި ދުވަހު. ” މުޙައްމަދުބެ އިތުރުކޮށްލިއެވެ. ކުއްލިއަކަށް އަޔާންގެ ފޯން ރިންގުވާން ފަށައިފިއެވެ. ގުޅަނީ އަޔާންގެ މަންމަ އާލިޔާ ދައްތައެވެ. އެއީވެސް އަޔާން ކަހަލަ ސަކަމިޒާޖެއްގެ ހިތްހެޔޮ ދައްތައެކެވެ.

“މަންމާ. އަޅުގަނޑު ކަނީ އޭ. ނިންމާލާފަ ގުޅާލާނަން. ” އެހެން ބުނެފައި ފޯނު ބާއްވައިފިއެވެ. “މަންމަ އެގުޅީ. މަންމަ އައިޝާ ދައްތައާއި ވާހަކަދައްކާލާ ހިތުން އައީއްސުރެ ކިޔާ. އެކަމަކު ރަނގަޅު ވަގުތަކާ ދިމާ ނުވާތީ އަދިވެސް ލަސްވެފަ އޮތީ. ” އަޔާން ހަނާކުރި ކުކުޅު ފައެއް ތައްޓަށް ލަމުން ވާހަކަ ދެއްކިއެވެ.

“މީ ރަނގަޅު ވަގުތެއްނު. އެހެންވީމަ ކައި ނިމިގެން ވާނެ ގުޅާލަދޭން. ދައްތަވެސް ޖެހޭނެއެންނު ތި ދެކުދިންގެ މައިން ބަފައިންނާވެސް ގުޅުން ބަދަހިކުރަން. ” އައިޝާދައްތަ ފަނިފޮދެއް ބޮއެލަމުން ބުނެލިއެވެ. އައިޝާދައްތައަކީ ވަރަށް މީހުންނާ ގުޅޭ ހިތްހެޔޮ މިޒާޖެއްގެ މީހެކެވެ. މުޙައްމަދުބެ ހުރުމާއިއެކު އަޔާން އާއި ޒާނިޝް ތިބީ ވަރަށް މަޑުމައިތިރި ވެފައެވެ. ރަނާ އާއި ރިޔާ ވެސް އިރު އިރުކޮޅާ ވައްކަޅިން ބަލާލުން ނޫން ކަމެއް ނުކުރެއެވެ. ކައި ނިމިގެން އަހަރުމެން ސިޓިންރޫމް ގައި ޖައްސައިލީ ކުޑަކޮށް ބަނޑުދަމާލާށެވެ.

“މިއުޅެނީ މައިޓު ސެޓުކުރަން އިނގޭ. މިހާރު މިހިރީ ދޭތިން އެކައްޗަށް ޖައްސާފަ. ” އަޔާން ފޯން ނަގާ އާލިޔާ ދައްތައަށް ޑައިލްކޮށްލަމުން ބުނެލިއެވެ.

“ޔޫ ކާންޓް ބީ ސީރިއަސް. މިހާއަވަހަށް މަންމަކައިރީ ވެސް ބުނީތަ. ” ޒާނިޝް ޝަކުވާކޮށްލި އިރު ހީވަނީ ޒާނިޝްއަށްވުރެ ކުރިން ބުނެގެން ދެރަވެގެން އުޅޭހެނެވެ.

“ވައި ނޮޓް. ދެން އަބަދު ކިހިނެއް ބޭބެ ކޮއްކޮ ވެފަ ހުންނާނީ. ބަޓް އަދި މޮމް ކައިރިއަކު ނުބުނަން ރަނާގެ ވާހަކައެއް. ޔޫ ނޯ. ސްޓެޕް ބައި ސްޓެޕް ތާ ދޯ ޖައްސަން ޖެހޭނީ. ” އަޔާން ވަރަށް ފަޚުރުވެރިކަމާއިއެކު ބުނެލިއެވެ.

“މޮމް މަޑުކުރައްޗޭ. އައިޝާ ދައްތަ ވެސް ވާހަކަ ދައްކާލަން ބޭނުންވެފަ ހުރީމަ ކައިގެން މި ގުޅީ. ” އަޔާން ގޮސް ފޯނު އައިޝާ ދައްތަ އަތަށް ދިނެވެ.

“އައްސަލާމް ޢަލައިކުމް. ” އައިޝާ ދައްތަ ސަލާމް ގޮވައިލިއެވެ.

“ވަޢަލައިކުމުއް ސަލާމް. އައިޝާ ކިހިނެއް ހާލު. މީ އަޔާންގެ މަންމަ އާލިޔާ. ”

“ހާލު ވަރަށް ރަނގަޅު. އަޔާން ބުނި ވަރަށް ވާހަކަ ދައްކާލާ ހިތުން އުޅުނު ވާހަކަ. ”

“އާނ. އަޔާން ވަރަށް ދައްކާނެ އައިޝާގެ ހެޔޮވާހަކައާއި، ތިކޮޅު މަޖާ ވާހަކަ. އަހަރެން ވެސް މިހުންނަނީ އެސޮރު ކިޔާވަރުން ދާ ހިތްވެފަ. ”

“އެހެންވީރު މާ ރަނގަޅަކަށެއްނު މިދިމާވީ އާލިޔާއާއިވެސް ދިމާވާނެތާ. އަވަހަށް އުޅޭ މިކޮޅަށް އަންނަން. އަހަރެން މިކޮޅުގަ ތިބެވޭނެ ގޮތް ހަމަޖައްސާލަދޭނަން. ”

އެ ކޯލު ނިމުނީ އާލިޔާ ދައްތަވެސް މިކޮޅަށް އަންނަ ގޮތަށް ނިމިގެނެވެ. އަޔާން ހުރީ ލިބުނު ކާމިޔާބީއަށް ވަރަށް އުފާ ވެފައެވެ. އަޔާންގެ މަންމަ އަންނަ ވާހަކަ އަޑުއިވުމުން އެއްމެ އުފާވި އެކަކީ ރަނާ އެވެ. ރަނާ އާލިޔާ ދައްތަ އާއި ބައްދަލު ކޮށްލާހިތުން ކެތްމަދުވެފައި ހުންނަހެން ހީވެއެވެ. ޒާނިޝް ވެސް މިހާރު ވިސްނަމުން ދަނީ ރިޔާ އާއި އޮތްގުޅުން އިތުރު ހަރުފަތަކަށް ގެންދާނެ ގޮތަކާއި މެދުގައެވެ.

ހަވީރު ހިޔާއެރުމުން އަހަރެންނާއި ޒާނިޝް އަދި އަޔާން ޒަބަރުޖުދުގެ އަށް ދާން ނިކުތީމެވެ. ދިޔަ މަގުމަތީގައި އަހަރެންނަށް ރޭ ފެނުނު ހުވަފެނުގެ ވާހަކަ ވެސް ކިޔައި ދިނީމެވެ. އަޔާން އާއި ޒާނިޝް ވެސް ހުރީ ފެނުނު ހުވަފެނާމެދުގައި ކަންބޮޑުވެފައެވެ.

“އަހަރެންނަށް ހީވަނީ ޝޯން އަށް ތިފެންނަ ޕްރިކޮގްނިޓިވް ޑްރީމްސް ތަކަކީ ވަރނިން އެއް ހެން. އަދި އެހެނެއް ނުވެއެއްނު. އެހެންވީރު ޔޫކޭން ސްޓޮޕް ދެޓް ފްރޮމް ހެޕެނިންގް. ޔޫ ކޭން ސޭވް ހަރ. ” ޒާނިޝް ގެ ޚިޔާލު ދިނެވެ. އަހަރެންނަށްވެސް އެ ވާހަކަތަކާ އެއްބަސް ވެވުނެވެ.

“ޔާ. އައިކޭން ސޭވް ހަރ. ޔޫ ނޯ ދެޓް. ” އަހަރެންނަކީ އޮސްޓްރޭލިޔާގައި ކިޔަވަން އުޅުނުއިރު ލައިފް ސޭވިންގް ޓްރެއިނިންގް ޕްރޮގްރާމް އިން އެންމެ މަތިން ސްކޯރ ކުރި އެކަކެވެ. އަހަރެންނަށް ޝާޔާ ގެނބެނިކޮށް ފެންނާނެނަމަ އަހަރެންނަށް ޝާޔާ ސަލާމަތް ކުރެވޭނެއެވެ.

“ސޯ. ލެޓްސް ގެޓް ދިސް އޯވަރ ވިތް. ތިބުނީ ޝާޔާ ގެނބެނިކޮށް ފެނުނީ އެއްވެސް މީހަކު ފެންނަން ނެތް ހިސާބެއްގައޭ. އެކަމަކު ޝާޔާ އެކަނި މިރަށު މޫދަކަށް އެރޭކަށް ނުދާނެ. ސޯ މޭބީ. އެއީ ފަޅުރަށެއް. އެން ރިމެމްބަރ ދެޓް ވީ އަރ ގޮއިންގް އަ ޓްރިޕް ޓުމޯރޯ. ” އަޔާން އެ ބުނަން އުޅުނު އެއްޗެއް އަހަރެންނަށް ނަގައިގަނެވުނެވެ. އަހަރެމެން ނިންމީމެވެ. މާދަން ދަތުރު ދާއިރު ޝާޔާ ގޮވައިގެން ދިއުމަށެވެ. އެއީ ހުވަފެނުން އެފެންނަނީ ދާން އޮތް ފަޅުރަށަށް ޝާޔާ ގޮސްގެން އުޅޭ މަންޒަރޭ އަހަރެންނަށް ހީވަނީއެވެ. އެއަށްފަހު ޝާޔާގެ ހުރިހާ ހަރަކާތަކަށް ފާރަލާނީއެވެ. ގެނބިއްޖެ ނަމަ ސަލާމަތް ކޮށްދެވޭ ހިސާބުގައި އަހަރެން ހުންނާނީއެވެ. އެހެން ވީއިރު ހުވަފެން ސީދާވެ، އަހަރެންނަށް ޝާޔާ ސަލާމަތް ކުރެވުނީއެވެ.

“އޯކޭ. ދެން ދެޓްސް ދަ ޕްލޭން. ” އަހަރުމެން އެގޮތަށް ރާވައިލީމެވެ.

ޒަބަރުޖުދުގެ އާއި ހަމައަށް އާދެވުނުއިރު އުނދޯލިގޭގައި ބަކުރުބެ އާއި ހައްވާ ދައްތަ އިނެވެ. ބަދިގެ ފަރާތުގައި ޝާޔާ އުޅޭތަން އަހަރެންނަށް ފެނުމުން އެހެންތަނަކަށް އަހަރެންގެ ނަޒަރު ދުރުކޮށްލުންވީ އުނދަގޫ ކަމަކަށެވެ.

“އަނހާ. މިއޮށް އައީނު. އަވަހަށް އާދޭ އެތެރެއަށް. ދަރިފުޅާ މަރިޔަން. އާދެބަލަ މިކޮޅަށް. ” ބަކުރުބެ އުނދޯލިގެއަށް އައުމަށް އިޝާރާތް ކޮށްލަމުން ގޮވައިލިއެވެ. ހައްވާދައްތަ ތެދުވެ އަހަރުމެންނަށް ތަން ދެއްކިއެވެ. ރީތި ހުދު ކަށިވެލިތަކުގެ މަތިން ހިނގާލާފައި ދާއިރު ހިތަށް ބުނެދޭން ނޭނގޭކަހަލަ ހިތްހަމަޖެހުމެއް ގެނުވަމުން ދެއެވެ. އެ ޖާދުވީ އަޑުން ސިކުނޑި ތާޒާކޮށްދެއެވެ. އަހަރުމެން ގޮސް އުނދޯލީގައި އިށީނީމެވެ. އެއާއިއެކު ގޭތެރެއިން ނިކުމެގެން އައި ރީތި އަންހެން ކުއްޖާ އަހަރުމެންގެ ލޮލުގައި އަޅައިގަތެވެ.

ރީތިގޮތަކަށް އިސްތަށިގަނޑު ހައްޔަރުކޮށްލާފައި ވާއިރު އެ ކަޅުކުލަ ގަދަ އިސްތަށިގަނޑުގެ ބޯކަން އެނގެއެވެ. އަޅާފައިވާ އައިލައިނަރ އަދި މަސްކަރާގެ ސަބަބުން އެލޮލުގެ ވިދުން ގަދަކަމށް ދައްކައެވެ. ތުންފަތުގައި ކުލަޖައްސާފައިވާއިރު އެތެތްކަން ގަދަ ތުންފަތުގެ ޖާދޫގައި ނުޖެހޭނެ ހިތެއް މަދުވާނެއެވެ. ހަމުގެ ކުލަ އަލިވެފައި ހޮލީވުޑްގެ ފިލްމީ ތަރިއެއްފަދައެވެ. ލާފައިވާ ރީނދޫ ކުލައިގެ މެކްސީއިން އެ ރީތިކަން ފުރިހަމަކޮށްދީފައި ވެއެވެ.

“ދަރިފުޅާ. މިތިބީ މިރަށަށް މާލެއިން އައިސްއުޅޭ ކުދިންކޮޅެއް. ސިއާން ކައިރީ ދަރިފުޅުގެ ވާހަކަ ދައްކާލީމަ ދަރިފުޅާ ބައްދަލުކޮށްލާ ހިތުން އުޅޭތީ މި ގެނައީ. ” ބަކުރުބެ ބުނިއެއްޗަކުން ޒާނިޝް އާއި އަޔާން އަހަރެންނާއި ދިމާލަށް ލޯބޮޑުކޮށްލާފައި ބަލައިލީ ކީކޭ ހިތަށް އަރާފައި ކަމެއްވެސް ނޭނގެއެވެ. އެއާއިއެކު އެ ރީތި ކުއްޖާގެ ލޮލުގެ ތޫނު ނަޒަރު އަހަރުމެން ތިންމިހުންނާއި ސީދާވެގެން ދިޔައެވެ. އެބެލުމުގައިވެސް ވަނީ ހިތްތައް ލަންބުވާލާފަދަ ޖާދުވީ ބާރެކެވެ.

“ބެލިގޮތަކުން އެޅުނީ ހިތުކޫރު. ” އަޔާން ދަތްދޮޅީ އަތް ވިއްދާލަމުން ބުނެލީ ޚިޔާލީ ދުނިޔެއަކަށް ގެއްލިފައި އިނދެކަހަލައެވެ.

“އަލި މޫނޭ ސިފަވާ ހޫރު. ” ޒާނިޝްގެ ވެސް ޙާލަކީ އެއެވެ. ހީވަނީ ހޭލާ އިނދެ ހުވަފެން ބަލަނީހެނެވެ.

“ބަލިކޮށްލީ ހިތް ގަދަމަހި ނޫރު ހައިރާންވެއޭ. ” ދެމީހުން އެއްފަހަރާ ކަހަލަގޮތަކަށް ރާގުލައްވާލިއެވެ. އެތާނގައި އެހެން ބަޔަކު ތިބިކަމެއްވެސް ނުދެނެހުރި ތޯއްޗެކެވެ. އަހަރެންނަށް ނިތްކުރިމަތީގައި އަތްތިލައިން ޖަހާލެވުނީ ގަތްލަދެއްގެ ބޮޑުކަމުންނެވެ. އޭރު އެއަންހެން ކުއްޖާގެ ރީތި މިއުޒިކީ ހުނުމުގެ އަޑު އިވެމުން ދެއެވެ.

“ހާއި އަހަރެންނަށް ކިޔަނީ ޝައިހާ. ” އެއަންހެންކުއްޖާ ތަޢާރަފްވެލިއެވެ. ބަލާބެލުމަށް ވަރަށް ޒަމާނީ ގޮތްގަނޑު ހެނދުން އެޅުމުގައި އާއި، ވާހަކަދެއްކުމުގައި ހުރި ކުއްޖެކެވެ. އެއީ އެކަހަލަ ފަގީރު އާއިލާއެއްގެ ކުއްޖެކޭވެސް ބަލާފައެއް މީހަކު ނުބުނާނެއެވެ. އަހަރެމެންވެސް ޝައިހާއަށް ތަޢާރަފް ވެލީމެވެ.

“އާދޭ ދަރިފުޅު އެކުދިން ގޮވައިގެން ސައިބޯން. ” ބަކުރުބެ އެހެންބުނެފައި ބަދިގެފަރާތަށް ހިނގައިގަނެއްޖެއެވެ. ޝައިހާވެސް ފަހަތުން ހައި ހީލްގައި ހިނގަމުން ގޮސް އަހަރުމެންނަށްވުރެ ކުރިން ކާގެއަށް ވަދެއްޖެއެވެ. އޭރު ކާގޭ ފެންޑާގައި ޝާޔާ އިސްޖެހިފައި ހުއްޓެވެ. ޝާޔާގެ މިލާ މޯޅިވެފައިވާ މޫނު ފެނިފައި އަހަރެންގެ ހިތުގެ ހިނގުން ހުއްޓުނު ކަހަލައެވެ. ކިތަންމެ ފަހަރަކު ޝާޔާއާއި ވާހަކަ ދައްކާލަން ހިތްއެދުނެވެ. ނަމަވެސް ވަގުތެއް ތަނެއް ނުދިނެވެ.

“ޝާޔާ. !!” ކުއްލިއަކަށް ކާގޭތެރެއިން ޝައިޙާގެ އަޑު ހޮނު ގުގުރިއެއްފަދައިން އިއްވާލިއެވެ. އަހަރެންގެ ބޮލުގައި ހީވީ މީހަކު އެތިފަހަރެއް ވީއްލައިލިހެންނެވެ. އަހަރުމެން ތިންމީހުންނަށް އެކަކު އަނެކަކަށް ބަލައިލެވުނެވެ. އެރީތި ދޮންކަމާ އެއްވަރަށް ކުޅިވެސް ފިސާރި ގަދަތާއޭ ހިތަށް އެރިއެވެ. އެއާއިއެކު ޝާޔާ ދުވެފައި ކަހަލަގޮތަކަށް އައިސް ކާގޭތެރެއަށް ހުއްޓުނީ އަޅަކު ސާހިބު މީހާގެ ކުރިމައްޗަށް ހުއްޓުނުހެނެވެ. އަހަރެންނަށް ހުރެވުނީ ގަނޑުވެފައި ހުރިހާމަންޒަރެއް ބަލާށެވެ.

“ދަރިފުޅާ ތަންކޮޅެއް ރުޅިމަޑުކޮށްފަ މަޑުމަޑުން ވާހަކަ ދައްކަބަލަ. ” ބަކުރުބެ ހީވީ ޝައިހާގެ އަސްލު ސިފަ އަހަރުމެން ކުރިމަތީ ހާމަވެދާނެތީ ކަންބޮޑުވެގެން އުޅުނުހެނެވެ.

“ކިހިނެއް ރުޅި މަޑުކުރެވޭނީ. ސައިހަދަން ބުނީމަ މިހިރީ ހުރިހާ ހެދިކާތަކެއްވެސް ތަށިތައްޓަށް އަޅާފަ ދިމާލަށް ބަހަށްޓާފަ މެއްސައް ކާންދޭން. ! މަތިގަނޑެއް ނެތީތަ މިގޭގަ. !؟؟” ޝައިހާގެ ރުންކުރު ހަރުކަށި އަޑު އިވުމާއިއެކު އަހަރެންގެ ހިތުގައި ހީވީ މީހަކު ހިފާ ފިތާލިހެންނެވެ. އަހަރެންނަށް މުއްކަވާލެވުނެވެ. އަހަރުމެންގެ ކުރިމަތީގައި ޝާޔާ އެފަދަ އިހާނެތިގޮތަކަށް އެ ނިކަމެތިކޮށްލީ އެކަހަލަ ކުޑަ ކަމަކާ ހެއްޔެވެ؟ އަހަރެންގެ ހަނދާނަށް އައީ ބަކުރުބެ ޝައިހާގެ ވާހަކަ ފުރަތަމަ ބުނި ދުވަހު ޝާޔާގެ މޫނުމަތި ކުލަވަރު ބަދަލު ވި މަންޒަރެވެ. ޝާޔާގެ ބަދުނަސީބު ދިރިއުޅުމަކީ މިއީތާއެވެ. އަހަރެންގެ ލޮލުން ކަރުނަ ނީރާލީ ޝާޔާގެ ލޮލުން ވިދާލި ކަރުނައިގެ މުތީފެނި ހިތަށްކުރި އަސަރުންނެވެ.

*******************

8 ވަނަ ބައި