ތިޔަ ލޯތްބަށް އެދެވޭތީ… ޓްރެއިލަރ

އެކުވެރިކަމަކީ ގަދަފަދަ ބާރެކެވެ. އެއީ ދެ މީހެއްގެ ދޭތެރޭގައި، ނުވަތަ ބައެއްގެ މެދުގައި އުފެދޭ ވަރަށް ވަރުގަދަ ގުޅުމެކެވެ. ޒަމާންވީ އެކުވެރިކަމުގެ ތެރެއިން ޔައިލްއަށް އަޒަލް ދެކެ ލޯބިވެވެއެވެ. އެ ހިތުން އަޒަލްއަށް ޚާއްސަ މަޤާމެއް ދެވެނީ ނުވެސް އެނގިހުއްޓައެވެ. އެހެނަސް، އޭރު އަޒަލްގެ ހިތުގައި ރިއާންގެ ނަން ވަނީ ރަން އަކުރުން ފެވިފައެވެ. މި ޚަބަރު ޔައިލްގެ ކަންފަތާ ހަމައަށް ފޯރަނީ ހޮނު ގުގުރިއެއްގެ ސިފައިގައެވެ. އެ ޒުވާން ހިތުގެ ފުރަތަމަ ލޯބި ބީވެގެން ދިޔުމާއެކު، ޔައިލްގެ ހިތް ލެއިން ކަޅިވެގެން ދެއެވެ. އެހެނަސް އެންމެ ގާތް އެކުވެރިޔާ އަޒަލްގެ އުފަލަށްޓަކައި، އަޒަލްއާއި ރިއާންގެ ގުޅުމަށް ޔައިލް މަރުޙަބާ ކިޔެވެ. އަޒަލްގެ ހިތުން ހަމައެކަނި ރަޙުމަތްތެރިއެއްގެ ޖާގަ ލިބުނުކަމަށް ޓަކައިވެސް ޝުކުރު ކުރިއެވެ. އެހެނަސް، އެއީ ކުޑަ ދުވަސްކޮޅަކަށެވެ. ރިއާން އަޒަލްއާ ދޭތެރޭގައި ކަންތައް ކުރަމުން ދިޔަ ގޮތް ޔައިލްއަށް އެނގުމާއެކު، އަޒަލްއަށް ވިސްނައިދޭން ޔައިލް މަސައްކަތް ކުރެއެވެ. އެހެނަސް، އެކަމުން ހީނަރުވެގެން ދަނީ އަޒަލްއާއި ޔައިލްގެ އެކުވެރިކަމެވެ.

ޒައުލްއާއި އާރާގެ ހިތުގައި އެކަކު އަނެކަކަށްޓަކައި ލޯބި އުފެދެން ފަށަނީ ނުވެސް އެނގި ތިއްބައެވެ. ހިތުގައިވާ ލޯބި ފާޅު ކުރަން ދެމީހުންވެސް ފަސްޖެހެނީ އެ ދެމެދުގައިވާ ދެބެންގެދެދަރި ކަމުގެ ގުޅުމުގެ ސަބަބުންނެވެ. ދެފަރާތުގެ ޢާއިލާ އެ ގުޅުމަށް ނުރުހިދާނެ ކަމުގެ ބިރަށެވެ. އެހެންނަމަވެސް، އެކަކު އަނެކަކު ދޫކޮށްލުމަށްވުރެ، އެ ޒުވާން ދެހިތުގައި ވިންދު ޖަހަމުން ދިޔަ ލޯބި މާ ވަރުގަދައެވެ. އާރާގެ ލޯބި ޙާސިލް ކުރުމަށް ޒައުލް ގަދައަޅައި މަސައްކަތް ކުރެއެވެ. އަދި އެ ކުރެވޭ މަސައްކަތުގެ ތެރެއިން، އެންމެންގެ ލޯމައްޗަށް ފަރުދާ ކުރެވިފައިވާ ހިތި ޙަޤީގަތެއް ޒައުލްއަށް ކަޝްފުވެގެން ދެއެވެ.

ފުރާވަރުގައި ވެވުނު ފުރަތަމަ ލޯބި ޔަލީންއަށް ވެގެން ދަނީ ޒަހަރެއް ފަދަ ހިތި އެއްޗަކަށެވެ. އެންމެ ލޯބިވާ ޝަޔާމްގެ ލޯބިން އެ ހިތް ތާއަބަދު ފުރެމުން ދިޔަ ނަމަވެސް، ޔަލީންގެ ހިތް ކުދިކުދިވީ އެ ގުޅުން ކައިވެންޏާ ހަމައަށް ދިޔުމުގެ ކުރިން ޢާއިލާގެ ނުރުހުން އަމާޒު ވުމުންނެވެ. ޔަލީންއާއި ޝަޔާމްގެ ގުޅުމަށް ޔަލީންގެ ބައްޕަ ފުރަތަމަ ރުހުން ދިން ނަމަވެސް، ފަހުން ކުއްލިއަކަށް ނުރުހުމުގެ ފަހަތުގައި ފޮރުވިފައިވާ ބޮޑު ސަބަބެއް އޮވެދާނެ ކަމަކަށް ޔަލީންއަށް ހީކުރެވިފައިވެސް ނެތެވެ. ނަމަވެސް، ޝަޔާމް ދެކެ ވެވުނު މާތް، މަތިވެރި ލޯބީގެ ސަބަބުން ޔަލީން ހުރީ އެހާ ފަސޭހައިން ދޫކުރާ ގޮތަކަށް ނޫނެވެ. އެ ގުޅުމަށް އޭނާގެ ބައްޕަ ކުއްލިއަކަށް ނުރުހެންވީ ސަބަބެއް ނޭނގި ހުރެ، އޭނާއާއި ޝަޔާމްގެ ގުޅުމަށް ބައްޕަގެ އާނ ބަސް ލިބޭތޯ ޔަލީން ދިޔައީ ކެނޑިނޭޅި މަސައްކަތް ކުރަމުންނެވެ. ބައްޕަ އެ ގުޅުމަށް އެހާ ނުރުހެންވީ ސަބަބެއް ހޯދޭތޯ މަސައްކަތް ކުރަމުންނެވެ. ހުރިހާ ކަމެއް ޔަލީންއަށް އެނގި ހާމަވާއިރު، ޢާއިލާގެ ބޮޑު ސިއްރު ފަޅާ އަރައެވެ. ޝަޔާމްގެ އަނދިރި ޙަޔާތުގެ ހިތި ޞަފްޙާތައް ޔަލީންގެ ކުރިމަތީގައި ނިއުޅިގެން ދެއެވެ. ޝަޔާމްއާއި މެދު ބައްޕަ ނުރުހޭ ސަބަބު އެނގުމާއެކު، ޔަލީންގެ ހިތް ކުދިކުދިވެގެން ދެއެވެ.

އެއްވެސް ޚިޔާލެއް ފިކުރެއް ނެތި، ޒުވާންކަމުގެ އުފާވެރި ދުވަސްތައް ގުނަމުން ދިޔަ، މި ހަ ޒުވާނުންގެ ދިރިއުޅުމަށް ބުރޫ އަރަނީ ލޯތްބޭ މި ކިޔައި އިޙުސާސުގެ ސަބަބުންނެވެ. ޔައިލްއަށް އަޒަލްގެ ލޯބި ކާމިޔާބު ކުރެވިދާނެ ބާވައެވެ؟ އަޒަލްއަށް ރިއާންގެ އަނިޔާވެރިކަން ވިސްނި، ރިއާންއާއި ދުރުވާނެ ބާވައެވެ؟ ޒައުލްއާއި އާރާގެ ލޯބީގެ ވާހަކަ ނިމޭނީ ކިހިނަކުން ބާވައެވެ؟ ޒައުލްއަށް އެނގުނީ ކޮން ޙަޤީގަތެއް ބާވައެވެ؟ ޝަޔާމްއަށް ޔަލީންގެ ލޯބި ކާމިޔާބު ކުރެވޭނެ ބާވައެވެ؟ ޔަލީންއަށް އޭނާގެ ބައްޕަގެ ރުހުން ހޯދޭނެ ބާވައެވެ؟ ޔަލީންގެ ބައްޕަގެ ނުރުހުން ޝަޔާމްއަށް އަމާޒުވާންވީ ސަބަބަކީ ކޮބައި ބާވައެވެ؟ ޔަލީންއަށް ފަޅާއަރަނީ ކޮން ޙަޤީގަތެއް ބާވައެވެ؟ ލޯބީގެ ތޫފާނުގައި ޖެހި، މި ހަ ޒުވާނުންގެ ދިރިއުޅުން ބަދަލުވެގެން ދާ ގޮތް މި ވާހަކައިން ވިދާޅުވެލައްވާށެވެ.

*** ** ***

އައްސަލާމުޢަލައިކުމް.. މިއީ އަޅުގަނޑުގެ އައު ވާހަކަ “ތިޔަ ލޯތްބަށް އެދެވޭތީ…”ގެ ޓްރެއިލަރ.. އިންޝާﷲ، މި ވާހަކަ ވެގެން ދާނީ އަޅުގަނޑު ކުރިން ލިޔުނު ވާހަކަތަކަށް ވުރެވެސް މާ ރީތި، މާ ފުރިހަމަ ވާހަކައަކަށް.. އަޅުގަނޑު އުންމީދު ކުރަނީ އަޅުގަނޑު ކުރިން ލިޔުނު ވާހަކަތަކަށް ލިބުނު ސަޕޯޓު ހަމަ މި ވާހަކައަށްވެސް ލިބިގެން ދާނެ ކަމަށް.. މި ވާހަކައިގެ ފުރަތަމަ އެޕިސޯޑް، ޖޫން މަހުގެ މެދުތެރޭގައި ކިޔައިލަން ލިބިގެން ދާނެ، އިންޝާ ﷲ.. އިންތިޒާރު ކޮށްލައްވާ!