ކުރާ ކަމެއް ކުރުމުގެ ކުރިން ވިސްނައިލާށެވެ.

މުދައްރިސުންނާއި ބެލެނިވެރިންގެ ބައްދަލުވުން ނިންމާލާފައި އަމީނިއްޔާ ސްކޫލުން ނިކުތް އިބިރިހިމާއާއި އޭނާގެ ދަރިފުޅު އީނާ ތިބީ ވަރަށް ހިތްހަމަޖެހިފައެވެ. އިބިރިހިމާގެ މޫނުން ފެންނަ ހިތްހަމަޖެހުމުގެ ކުލަވަރު އަދި މާ ފުޅަލެވެ. އެހެން ނުވާންވީ ހަމަ އެއްވެސް ސަބަބެއް އޮތީއެއްވެސް ނޫނެވެ.

މުދައްރިސުން ވިދާޅުވި ގޮތުގައި އީނާއަކީ ކުލާހުގައި ހުރި އެންމެ އަޚުލާޤު ރަނގަޅު ދަރިވަރުންގެ ތެރެއިންވެސް ފާހަގަކޮށްލެވޭ ދަރިވަރެކެވެ. ކިޔެވުމަށްވެސް އެހާ މޮޅީއެވެ. ގަދަ ދިހައަކަށް އަރާނެކަމަށް ވަރަށް ގިނަ މުދައްރިސުން ޔަޤީންކަން ދެއްވިއެވެ.

އިބިރިހިމާ ވީ އުފަލުން ސައިކަލުގައި ގޮސް އެމަޑުކޮށްލީ އައިފޯނު ވިއްކާ ފިހާރައެއްގެ ކުރިމައްޗަށެވެ. އީނާވެސް ހައިރާންވެފައި ހުރެ ބައްޕައާއި ދިމާލަށް ބަލައިލައިފިއެވެ.

“ދަރިފުޅާ! މިއަދަކީ ދަރިފުޅަށް ދަރިފުޅު ކުރި ބުރަ މަސައްކަތުގެ އަގު ލިބޭ ދުވަސް! އަވަހަށް ވަދޭ! ގޮސް ބޭނުން ވައްތަރެއްގެ ފޯނެއް ނަގާ!” އިބިރިހިމާގެ ލޮލުން ކަރުނަ ފާއްދާލައިފިއެވެ.

އީނާ ވީ އުފާ ބުނެދޭންވެސް ނޭނގެއެވެ. އަވަހަށް ގޮސް ފިހާރައަށް ދެމިގެންފިއެވެ. އަދި އެންމެ މިޒަމާނުގެ އައިފޯނަކާއި އެއަށް ލައްވާނެ ރީތި ބަނޑޭރިއެއްވެސް ނަގައިފިއެވެ. އިބިރިހިމާވެސް އުފަލުން ހުރެ އެއަށް އަގުދައްކާ ނިންމާލައިފިއެވެ.

*****************************************************************************

ދެމަސް ދުވަސް ފަހެެވެ. އީނާގެ ކަމަކީ އަބަދު ފޭސްބުކަށް ވަނުމެވެ. ވާޖިބަކަށްވެސް ވީ ތޯއްޗެކެވެ. ނުވަނިއްޔާ ފާފަވެރިވެސް ވެދާނެ ދަރަޖައަށް އެއަށް އެވަނީ ދެވިހިފާފައެވެ.

މިހެން އުޅެމުން، ވަރަށް ރީތި ޒުވާނަކާވެސް ރައްޓެހިވެވިއްޖެއެވެ. އޭނާއާއި ނުލާ ނޫޅެވޭ ވަރަށް “ލޯބި”ވެސް ވެވިއްޖެއެެވެ. ފުަރަތަމަ ހަމަލޮލުން ބަލާލުމަށް ދިޔަ ރޭވެސް، އެންމެ ސޯޅަ އަހަރުގެ އީނާ ދިޔައީ ވަރުގެ ކޮޅަށް ނަލަހެދިގެންނެވެ. ތުންފަތްވެސް ރަތްކަމުން ހީވަނީ ލޭ އުނގުޅާފައި ހުރިހެންނެވެ. ލައިގެން ހުރި ހެދުން ކުރުކަމުން ބުޑު ނުފޮރުވޭތީ ފަޤީރުކަމުން އުނުއޮރިޔާން ނިވާކޮށްލާނެ ފަދައެއް ނެތް ކުއްޖެއްހެންވެސް ހީވެއެވެ.

އަޅައިގެން ހުރި ބުރުގާގެ ވާހަކަ ނުދެއްކިއްޔާ ރަނގަޅުވާނެއެވެ. މޭމަތި ނުފޮރުވޭ ތާނގައި މައްޗަށް އޮޅަމުން އޮޅަމުން ގޮސް އުޑާއި ހަމައަށް ނަގަން އުޅޭހެން ހީވެއެވެ. ޖަމަލުގެ ގޮންގަޑަކާއި ވަރަށް ވައްތަރެވެ.

އަރައިގެން ހުރި ފުންނާބު އުސް ކަށީގައި ހިނގާފައި ދާއިރު، މުސްކުޅި ބެއްޔަކަށްވުރެ ހާލު ދެރައެވެ.

މިދެކުދިން ވަރަށް “އުފަލުގައި” ދުވަސްތައް ވޭތުކުރަމުން ދަނިކޮށް ވަރަށް އެހެން ކަހަަލަ ކަމަކާވެސް ދިމާވެއްޖެއެވެ.

އެއްރެއަކު އީނާ ރައްޓެހިވެގެން އުޅޭ ފިިރިހެންކުއްޖާ ކަމަށްވާ އަހުމަދު، އީނާ ގޮވައިގެން ގޮސް ކޮޓަރިއަކަށް ވައްދައިފިއެވެ. ފުރަތަމަކޮޅު ބިރުގަތަސް، އީނާއަށްވެސް ދާދި ފަސޭހައިން އަހައްމަދާގެ އަތުތެރެއަށް ވިރިގެން ދެވުނެވެ.

އެރޭގެ ފަހުން، އީނާ ހުންނަނީ މޭނުބައިކުރުވާގޮތްވެފައެވެ. އެނދުން ނުތެދުވެވި، ކާއެއްޗެއް ނުކެވި، ހުން ގަދަވެ، ހޮޑު ލެވި، ނުވާކަށް ކަމެއް ނެތެވެ.

އީނާގެ މައިންބަފައިން ހީކޮށްގެން ތިބެނީ އީނާ ހުންގަދަވެގެންގޮސް ވާ ގޮތްތަކެއް ކަމުގައެވެ.

ކޮންމެވެސް ގޮތަކުން، އީނާ އަހުމަދާ ބައްދަލުކުރާކަން އެނގިގެން މީގެ ކުރިން އެދެމަފިރިން ވަނީ އަހުމަދާ ބައްދަލުކޮށް، އީނާ ކިޔަވާ ނިމެންދެން މަޑުކުރުމަށް އެދިފައެވެ. އަދި އޭގެ ފަހުގައި އަހުމަދު ރަނގަޅުކަމަށް ފެންނަނަމަ އަހުމަދާއި އީނާގެ ކައިވެންޏަށް އާނބަސް ބުނާނެކަމަށް ބުނެފައެވެ. އެހެންނަމަވެސް އެއިރަށް އަހުމަދަށް ކެތްނުވީއެވެ.

އެންމެ ފަހުން، އީނާ ޑަކުޓަރަށް ދައްކާ ނިމި، ޓެސްޓުތައް ހެއްދުމަށްފަހު އެދެމަފިރިން ދެކުނު ފޮނި ހުވަފެންތައް ފެނަށް ދިޔަހެން ހީވިއެވެ. އީނާ ބަނޑުބޮޑުވީއެވެ.

ޖަމީލާދިޔެވެސް އަޑުން އަޑުނަގާ ރޮމުން ގެންދިޔައެވެ. އިބިރިހިމާއަށްވެސް އަރުތެރޭގައި ހިތިރަހައެއް ލެވުނުހެން ހީވިއެވެ.

މިހެން މިދެމަފިރިންނަށް ނުވާނީވެސް ކީއްވެހެއްޔެވެ؟ ލިބުނު ހަތަރު ދަރިންގެ ތެރޭގައި ހުރި ހަމައެކަނި އަންހެންކުއްޖަކީ މިޔެވެ. ހަގަށް ތިބި ދެކުދިންނަކީ ލޭއަޅާ ދެކުދިންނަށް ވެފައި އީނާއަކީ ސިއްޙަތު ރަނގަޅު ކުއްޖަކަށް ވުމުން އެދެމަފިރިން އީނާއާއި ދޭތެރޭގައި ހާދަ އުންމީދުތަކެއް ކުރިއެވެ.

އީނާ ބަނޑުބޮޑުކަން އެނގުމުން، ގާތްތިމާގެ މީހުންގެ މަލާމާތާއި ފުރައްސާރައާއި ކުރިމަތިލާން ޖެހުނެވެ. ޖަމީލާދިޔެއާއި އިބިރިހިމާވެސް ތިބެން ޖެހުނީ ލަދުންނެވެ.

އީނާގެ ބަނޑަށް ހަމަހުގައި އަހުމަދު، ކައިވެނީގެ ފޯމު ހިފައިގެން އެގެއަށް އައުމުންވެސް އިބިރިހިމާ އައި ރުޅީގައި ތިކަހަލަ މީހަކާ މަގޭ ދަރިއެއް ނުދެވާނަމޭ ބުނެ، ދެން ދުވަހަކުވެސް ކުރިމައްޗަށް ނައުމަށް ބުނެ އަހުމަދު ފައްސާލީއެވެ.

އެންމެ ސަތާރަ އަހަރުގައި، އީނާ، ފިރިހެންކުއްޖަކު ވިހެއެވެ. ބައްޕަ ނެތް ކުއްޖަކަށް ވީތީ ހިތާމަ ކުރެވުނަސް، މިކަމުގައި އީނާގެ ކުށްވެސް ވާކަން އޭނާ ޤަބޫލުކުރިއެވެ.

އިބިރިހިމާގެ ދެމަފިރިން، އީނާ، އޭނާގެ ދަރިފުޅާއެކީ އޭނާގެ ބޭބެގެ ދެމަފިިރިން ކިޔަވަން ތިބޭ ޤައުމު ކަމަށްވާ ލަންކާއަށް ފޮނުވާލިއެވެ. އީނާ، މަތީ ތަޢުލީމު ޙާސިލުކުރުމަށްޓަކައެވެ.

*********************************************************************************

ލޮބުވެތި އަޚުންނާއި އުޚުތުންނޭވެ! ފޭސްބުކުވެސް ހެޔޮގޮތުގައި ބޭނުންކުރައްވާށެވެ! ކުރާ ކަމެއް ކުރުމުގެ ކުރިން ވިސްނައިލާށެވެ! އެހެންނޫނީ އީނާއަށް ދިމާވިފަދަ ދެރަ ގޮތެއް ވެދާނެއެވެ.

ނޯޓު: މިއީ އަޅުގަނޑުގެ ގާތްތިމާގެ ކުއްޖަކަށް ދިމާވި ޙަޤީޤީ ޙާދިޘާއެކެވެ.