ފުރުސަތުގެ ބޭނުން ހިފާށެވެ.
އިސްމާޢީލް ޢަލީ ކަނދޮޅުދޫ
ތިބާ ހެއްދެވީ ﷲ އެވެ.ތިބާގެ ރިޒްޤާއި ގުޅޭ ހުރިހާ ކަމެއް ހިންމަވާ ދެއްވަނީ ﷲއެވެ.އެކަލާނގެ ތިބާއަށް ތެދުމަގު ދެއްކެވިއެވެ.ތިބާގެ އީމާންކަމުގެ ގަހަށް ފެންލިބޭނޭ އެތަކެއްގޮތް ދެއްކެވިއެވެ.ﷲގެ ނިޢުމަތްތައް ގުނާ އަދަދު ނުކުރެވޭހައި ގިނަގުނައެވެ.
ﷲއަށް ގިނަގިނައިން ޙަމްދުކުރާ މީހަކަށް ތިބާ ވާށެވެ.އެކަލާނގެ ދެއްވާ ގިނަގުނަވި ނިޢުމަތްތައް ހަނދާންކޮށް ﷲއަށް ޝުކުރުވެރިވާން ދަސްކުރާށެވެ. އޭރުން ތިބާއަށް ނިޢުމަތްތައް އިތުރުވެގެންދާނެއެވެ.
ތިބާއަށްޓަކައި ﷲގެ ރަޙުމަތުގެ ދޮރުކޮޅުތައްވަނީ ހުޅުވިފައެވެ. ތިބާއަށް ދިމާވާ ކޮންމެ ކަމަކީވެސް ރަޙުމަތެއް ކަމުގައި ދެކޭށެވެ. އެކަމުގެ ފަހަތުގައި ފޮރުވިފައިވަނީ ކޮންފަދަ ނަސީބެއް ކަމެއް ހަމަ އެކަކަށްވެސް ނޭގެއެވެ. ފެންނަފެނުމަށް އެއީދެރަކަމެއްހެން ހީވިޔަސް އާޚިރުގައި އެކަން ވެގެންދަނީ ފައިދާ ހުރިކަމަކަށެވެ.
ދުނިޔެވީގޮތުން އުފަލެއް ފެންނަން ނެތަސް އާޚިރަތަށްޓަކައި މަގެއް ކޮށިގެންދާނަމަ އެކަމާމެދު އުފާކުރާށެވެ. އެހެނީ ދުނިޔެއަކީ އެއްވެސް އަގެއްހުރި ތަނަކަށްނުވެއެވެ. ތިބާ ދުނިޔެއަށް ފޮނުއްވުމުގެ ބޭނުމަކީވެސް އާޚިރަތަށްޓަކައި ތައްޔާރުވުމެވެ.ދުނިޔޭގައި ތިބާގެ ހެޔޮކަމުގެ ތިލަފަތް ބަރުކުރާނޭ އެތަކެއް ފުރުސަތު ލިބިގެން ދެއެވެ.ބުއްދިވެރިންނަކީ ފުރުސަތުގެ ބޭނުން ހިފަން ދަންނަމީހުންނެވެ.
