އެވެސް މަންމައެކެވެެ.

ހާއްސަ ހައިސިއްޔަތަކުން އަހަރުމެން ހަތަރު މީހުން، ހަވީރުގެ ވަގުތެއްގައި އެގެއަށް ޒިޔާރަތް ކުރީމެވެ. އެ މަންމަ ގާތަށެވެ. އެކަމަކު މަގާމުގެ ގޮތުން އެއީ އަހަރެންނަށް މާމައެކެވެ. ހަގީގަތުގައި އަހަންނާ މާ ބޮޑު ގުޅުމެއް ނެތެވެ. މުސްކުޅިވެ ގައިބާރު ދެރައެވެ. ހިނގާލެވެނީވެސް އަސާއެއްގެ އެހީގައެވެ. ވަގުތުގެ ގޮތުން އެ ގޭގައި އަހަރުމެން ފިޔަވާ އިތުރު މީހަކު ނެތެވެ. އަހަރެމެން ވަރަށް އުންމީދާއެކު އެ މާމައަށް ހަދިޔާއެއްދިނީމެވެ. ޗާލު ރީތި ފޮތި ގަނޑެކެވެ. އަހަރެން އަހާލީމެވެ.

މާމަ ސައިބޮއެފިންތަ؟ ހަވީރު ވަގުތުކަމުން އަހަރެން އަހާލީމެވެ.

(މ) “ސައި އެއީ އަހަންނަށް މިހާރު ލިބޭ އެއްޗެއް ނޫން. ސައިކޮޅެއް ނުލިބޭތާ ވީ ދުވަހެއް ބުނާކަން ނޭނގޭ…… މާމަގެ ކޮންމެ އިރެއްގެ ކެއުމަކީ މީ….”

މާޔޫސްވެފައިވާ މާމަ އިޝާރާތުން ދައްކާލީ އެނދުގެ އެއްފަރާތެވެ. ތެދެކެވެ. އެއީވެސް ކާއެއްޗިއްސެވެ. އެކަމަކު އެއީ އެހާބަަލި މަންމައަކަށް ދޭން އެންމެ ރަނގަޅު އެއްޗެތިބާއެވެ ؟؟. ޕިކްފައިން، ސުޕަރިންގް، ޗީޒްބޯލް ޕެކެޓެވެ. އަހަރެން ވަރަށް ހައިރާންވިއެވެ. މާމަގެ އެ ހާލަތުފެނި އަހަރެންގެ ހިތް ސިއްރުން ރޯންފެށިއެވެ. ވަރަށް ބާރަށެވެ. އަހަރެންގެ ލޮލުން ކަރުނަ ހިލުނެވެ. އެކަމަކު ސިއްރެއް ނުކުރެވުނެވެ. އަހަރެންގެ އެކުވެރިންވެސް ތިބީ ބުނާނެ އެއްޗެއް ނޭނގޭހާލު ހަމަހިމޭން ވެފައެވެ.

އަނެއްކާވެސް މާމަ ބުނެލިއެވެ.

(މ) “މި ފޮތިގަނޑުން އަހަރެން ހެދުން ފަހައިން ލާނީ ކިހިނެއްހެއްޔެވެ؟ އަހަންނަށް ފަހާނެ ގޮތެއް ނޯންނާނެތީ ރައްޓެހިން ގެނެސްދެނީ ފަހައިންނެވެ. އެކަމަކު ރައްޓެހިން ފަހައިން ގެންނަ އެއްޗިއްސަށް ވާވަރު ދަރުފުޅުމެންނަށް އެނގޭހެއްޔެވެ؟….. އިރުއަރާއިރު އެއެއްޗެތި މިކޮޓަރީގައި ނުހުރެއެވެ. އެންމެ ފަހުން ލިބުނު ދެ ހަރުވާޅުވެސް ގެއްލިއްޖެއެވެ. މިގޭގައި އުޅެނީ މާމަގެ އިތުރުން މާމަގެ އަންހެންދަރި އެކަންޏެވެ. އެއެއްޗެތި ވަގަށް ގެންދަނީ އޭނައެވެ. ކިތަންމެ ފަހަރަކު އަހަރެން ދެކެމެވެ. އެކަން ހުއްޓުވާނީ ކިހިނެއްހެއްޔެވެ؟ އޭނާ އެއްޗެތި ގެންގޮސް ވިއްކާލަނީހެން މާމައަށް ހީވެއެވެ. އެކަމާ އެއްޗެއް ބުންޏަސް، މާމައަށް ވުރެ އޭނަގެ ޖަވާބު ހަރުކަށިވާނެއެވެ. މިއަދު އަހަންނަކީ ހަމައަށް ނުހިނގޭ މީހެކެވެ. އެތަކެތި ހޯދަން އަހަންނަށް ދެވޭނީ ކޮންތާކަށްހެއްޔެވެ؟”

އިވުނު އަޑުން، އަނެއްކާވެސް އަހަރެން ހިތުގައި ޖެހުނެވެ. އިތުރަށް ސުވާލު ކުރާކަށް ދެން އަހަންނަކަށް ނުކެރުނެވެ. އެކަމަކުވެސް އަހަރެން އެ މާމަގެ ހިތާމައިގައި ބައިވެރިވީމެވެ. މާމަގެ ވާހަކަތައް މާމަ ހިއްސާކޮށްލާން ބޭނުންވީތީއެވެ. އަހަރެން އަޑު އަހާލަން ޝައުގުވެރިވިޔަސް އެއީ ހާދަހާ އަސާރުގަދަ ވާހަކަތަކެކެވެ.

އަނެއްކާވެސް މާމަ ބުނެލިއެވެ.

(މ) “ދުފާލަންވެސް އަހަރެން ވަރަށް ބޭނުންވެއެވެ. ރައްޓެއްސަކު އަހަންނަށް ކިއްލި ގެނެސްދެއެވެ. އެކަމަކު އެ ކިއްލިފުޅިން އެތިކޮޅެއްވެސް ނުކެވެނީސް އެފުޅި ގެއްލެއެވެ. މާމަ އެވާހަކަ ކިޔައިދިނުމުން އެ ރައްޓެހިމީހާ ފަހުން ގެނެސްދެނީ ކިއްލީގެ ކުދި ޕެކެޓެވެ. މާމައަށް ކިއްލި ކޮޅެއް ލިބެނީ ބާލިސް ދޮށަށް އެ ދެތިން ޕެކެޓްލާ ފޮރުވައިން އުޅޭތީއެވެ……”

“މާމައަށްވެސް ކާޑުންނެގޭ ފައިސާ ހައްގުވެއެވެ. އެކަމަކު އެކާޑު ގެންގުޅެނީ އަންހެން ދަރިއެވެ. އެއިން ލޯލާރިއެއް މާމަ ނުދެކެމެވެ. އެ ފައިސާއިން މާމަ ކައި ބޮއެ އުޅެނީ އެކިކަހަލަ ޕެކެޓެވެ. މިއީ މާމަގެ ހާލަތެވެ. މާމައަށް މިވާހަކަތައް މި ދެއްކެނީ ދެރަވެފައި އިންވަރުންނެވެ. މާދަންވެސް މިމާމަ ދުނިޔެ ދޫކޮށް ދާންޖެހިދާނެއެވެ. މާމައަށް ރަހުމަތް ލެއްވުން އެދި ދުޢާ ކޮށްދެއްޗެއެވެ. އޯގާތެރި ހެޔޮ ދަރިއަކު އަހަރެންގެ ނެތީއެވެ. ދުނިޔޭގެ އެންމެ ގަދަ ވޭނުގައި އެގާރަ ދަރިން އަހަރެން ވިހާފައި ވާނެއެވެ. މި ބިމުގެ އެކި ހިސާބުތަކުގައި އެދަރިން އުފަލުގައި އުދުހެނީއެވެ. މާމަ އިނީ ކޮއްޓަށްލާފައެވެ.”

އަހަރެން ހިތަށްއެރިއެވެ. ކުދިކުދި ވެފައިވާ ހިތަކާއެކު އެމާމަ އެއުޅެނީ ކިހިނެއްހެއްޔެވެ؟ ކަރުނަ ނުހިކޭ ދެ ލޮލާއެކުވެސް އެމާމަ ހާދަ ހިއްވަރު ގަދައެވެ. އެކަމަކު އަހަރެންގެ ހިތަށްކުރި އަސަރު ބުނެދޭކަށް ދުލަށް، ގަލަމަކަށްވެސް ނޭނގެއެވެ. އަހަރެންގެ އެކުވެރިންނާއެކު އެތަނުން ނުކުންނަން ތެދުވަމުން މާމައާ ސަލާމް ކޮށްލީމެވެ. އެމާމަގެ އަތް އަހަންނާ ވާހަކަ ދެއްކިިކަހަލައެވެ. އެއަތުން ދޫނުކޮށްލާށޭ ބުނިހެން އަހަންނަށް ހީވިއެވެ. ނޫނީ އަހަރެން ގެންދާށޭ ކިޔާ އާދޭސް ކުރިހެންވެސް އަހަންނަށް ހީވިއެވެ. އެކަމަކު އަހަރެން ކުރާނީ ކީއްހެއްޔެވެ؟ އެމާމަ ބެލުން ވާޖިބުވާނީ މާމަގެ ދަރިންގެ މައްޗަށެވެ. އެބުނާ ކާޑުން ފައިސާ ނަގައިން އެކުދިން އެއިން ފޮނި ބޯހާހިނދު، އެމާމަ އެހެންމީހެއްގެ އަތްމައްޗަށް ދޫކޮށްލާނެހެއްޔެވެ؟

އަހަރެން ހިތަށްއެރިއެވެ. އަގުހުރި މަންމައަށް ނުދެވޭ ލޯތްބެއް ރުފިޔާ ނެގޭ އާދައިގެ ކާޑަކަށް މިދެނީ ކީއްވެހެއްޔެވެ؟ ހަގީގަތުގަވެސް އިންސާނާއަކީ އަމިއްލައެދުން ބޮޑު މީހެކެވެ. މުދާ އެއްކުރުމަށް ލޯބިކުރާ މީހެކެވެ. އެކަމަކު އަބަދު އެހެން ވާނެހެއްޔެވެ؟ މާދަމާ އަމިއްލަ ނަފްސައްވެސް އެހާލު ޖެހުން ދާދި ގާތެވެ. އެދުހުން ކުރާނީ ކީއްހެއްޔެވެ؟

ސިއްރު ސިއްރުން އަހަރެންގެ ދެލޮލުން ކަރުނަ ފޮހެލީމެވެ. މާމަގެ އަތުން ދޫކޮށްލަމުން އެތަނުން ނުކުންނަން ހިނގައިގަތީމެވެ. އެކަމަކު ކުރިޔަކަށް ނުދެވުނެވެ. ފަސްއެނބުރި އެ މާމައަށް އަނެއްކާވެސް އަހަރެން ބަލާލީމެވެ. އެއަށްފަހު އަނެއްކާވެސް ހިއްވަރު ކޮށްލާފައި ކުރިޔަށް ހިނގައިގަތީމެވެ. އެގެއިން ނުކުންނަން މައި ދޮރު ހުޅުވާލި ވަގުތު އެތެރެއަށް ވަދެގެން ދިޔައީ އަންހެނެކެވެ. އެއީ އެމާމަގެ އަންހެން ދަރިކަން އަހަންނަށް އިނގުނީ ކައިރީގައިހުރި އެކުވެރިއެއްގެ ފުށުންނެވެ.

އެދުވަހަށްފަހު އަހަންނަށް އިވުނީ އެމާމަ ދުނިޔެ ދޫކުރި ހިތާމަވެރި ޚަބަރެވެ. މާމައަކީ މާލެ މީހަކަށް ވެފައި އަހަރެންނަކީ ރާއްޖެތެރޭ ރަށެއްގެ މީހެކެވެ. އެހެންވެ އެންމެ ފަހުވަގުތު އެ މައުސޫމު މޫނުދެކިލުމުގެ ފުރުސަތު އަހަންނަށް މިލިބުނީއެވެ. ނަމަވެސް، މާމަ ބުނިފަދައިން އެ މާމައަށް ރަހްމަތައް އެދި އަހަރެން އަބަދުވެސް ދުޢާ ކުރަމެވެ. ދުނިޔޭގެ އުފަލުން މަހްރޫމްވިޔަސް، ޖަންނަތުލް ފިރްދައުސްގެ އުފާ އެންމެ ފުރިހަމައަށް ދެއްވާށިއެވެ.

– އާމީން –

ނޯޓް: މިއީ އަޅުގަނޑަށް ދިމާވި ހަގީގީ ހާދިސާއެއްގެ މައްޗަށް ބިނާކޮށް ލިޔެފައިވާ ވާހަކައެކެވެ.