އިންތިހާ ލޯބި

މުޅިން ނުދަންނަ މާހައުލަކަށް ސުހާ ފޭބީ ހިތުގައިވާ މުރާދު ހާސިލް ކުރަން ބޭނުންވެ ފައިވާލެއް ބޮޑުކަމުންނެވެ. ދުވަހަކުވެސް އައިސްފައި ނުވާ މާލެ ފެނުމުން ސުހާ ގެ ބޮލަށް ކޮންމެސް ވަރަކަށް ބަރުވިއެވެ. ރަށުގެ ހަމަހިމޭން މާހައުލެއްގާ އުޅުމަށްފަހު މިކަހަލަ މާހައުލަކަށް އަންނަން ވުމުން ކުރެވުނީ ތަފާތު މުޅިން އެހެން އިޙްސާސް އެކެވެ. ތަންކޮޅެއް ދުރުގައި ސައިކަލު މަތީ އިން  ދޮންތަ ފެނުމުން ސުހާ ދުވެފައި މަގުހުރަސް ކުރަން އުޅުނީ މީ މާލެ ކަން ހަނދާނުން ކައްސާލާފައިވުމުންނެވެ. އެހެންނަމަވެސް ދޮންތަ ގެ ބާރު ހަޅޭކުގެ އަޑު ސުހާއަށް އިވުނީ ކައިރިން އަންނަމުން ދިޔަ ކާރުގެބަރު ގޮނުގެ އަޑާއެކު އެވެ. ސުހާ ބިރުން ތުރުތުރު ލައިގަތީމީ ޙަޔާތުގެ ފަހުވަގުތުކޮޅޭ ހިތާއެވެ. އެހެންނަމަވެސް ސުހާގެ އަތުގާ ހިފާ މީހަކު ދަމާލީ ނުވިސްނާހުރުމުން ކަމުން އެއްވެސް ބާރަކާ ނުލާ ސުހާގޮސް އޭނާގެ ތަނަވަސް މޭމަތީގައި ލަތްވެގަނެވުނެވެ. އެއީ ފިރިހެނެއް ކަން އިނގުނީ ބާރުގަދަ އަތުގެ އިޙްސާސް ވެ ދުވަމުން ދިޔަ ފިރިހެން ސެންޓުގެ ވަހުންނެވެ. ” ތަންކޮޅެއް ބަލައިލައިގެން އުޅެލަން ފެނޭ, ނުރައްކާތެރި ހާދިސާ އެއް ހިނގުން އެކަށީގެން ވޭ” ގާތުން އިވުނު ފިރިހެންވަންތަ އަޑުގެ ޖާދޫގާ ސުހާ އެމަދުވަގުތު ކޮޅުގާވެސް ޖެހުނެވެ. “ޝުކުރިއްޔާ”  އެމީހާގެ ގައިން ދުރުވެލަމުން ސުހާބުނެލީ އިސްއުފުލާލަމުންނެވެ. ހަންގަނޑު އަލި ފަންއިސްތަށިކޮޅެއްގެ އެވެރިޔާގެ މޫނުމަތިން ފެންނަމުން ދިޔަ ކުލަވަރު ދިރާސާ ކުރަން ދަތިވިއެވެ. އެ މަދުވަގުތު ކޮޅުވެސް ސުހާގެ ހިތް އަތުން ދޫވެގެން ގޮސްފިއެވެ.

މަޢުސޫމު ގޮތަކަށް ހުރި އެ އަންހެން ކުއްޖާ ގެ ސަބަބުން ވިޝާމް އަށް އެތްމިޔަކަނިން ހީލެވުނެވެ. އެރީތިކަމުން އޭނާގެ ހިތަށް އަސަރުކޮށްލި ފަދައެވެ. ފުރަތަމަ ނަޒަރުން ވެސް އެހިތުގައި އެ ސޫރަ ބިންވަޅުނެގިގެން ދިޔައެވެ.

އެކަކުއަނެކަކަށް ގެއްލިފައި ތިބި ދެމީހުންވެސް ސިއްސާގެން ދިޔައީ ފަހަތުން ގޮވަމުން އައި ސުހާ ގެ ދޮންތަ މައިރާގެ ސަބަބުންނެވެ. ” މީ ރަށެއް ނޫނޭ ސުހާ، ދެންމެ ކިރިޔާ ތިހިރަ ސަލާމަތް ވީ ” ކުރިމަތީ ހުރި ވިޝާމް އަށް ނުބަލާލާ މައިރާ ބަނދިވަރެއް އަމުނާލިކަމަށް ވީނަމަވެސް ސުހާގެ ކަންފަތަށް އެ ވަންހެނެއް ހީނުވެއެވެ. ” މައިރާ” ކައިރިން އިވުނު އަޑެއްގެ ސަބަބުން މައިރާ އަށް ވިޝާމް އަށް ނަޒަރެއް ދޭން މަޖުބޫރުވެގެން ދިޔައެވެ. ” އަހަ، ވިޝާމް ، ނުވެސް އިނގުނު ، އެހެންނުވާނީ މީހަކު ބިރުން ފިތްކަނޑާގެން ނުދާނެ ގޮތަކަށް ނޫންވީއްޔަ މިހިރަ ސުހާ އެތް އުޅެނީކީ ” ކައިރީ ހުރި ސުހާ އަށް ލޯއަޅާލަމުން މައިރާ ބުނެލިއެވެ. އެއްފަހަރު ވިޝާމް އަށް އަނެއްފަހަރު މައިރާ އަށް ބަލައިލަން ސުހާ އަށް ހުރެވުނީ ވާނުވާގައެވެ. ” އޫޕްސް ، ސުހާ މީ ދޮންތިބެގެ ބެސްޓް ފްރެންޑް އެތް ވިޝާމް ، އެން ވިޝާމް ދިސް އިޒް މައި ކަންތައްބޮޑޫ ކޮއްކޮ ސުހާ ” އެދެމީހުން އެކަކު އަނެކަކަށް ތަޢާރަފް ކޮށްލަދެމުން މައިރާ ސުހާ ގޮވާގެން ގެއަށް ދާން ދިޔައީ ވިޝާމް ވެސް ގޮވާގެންނެވެ. ދެމީހުންގެ ހިތުގައި އުފާވެރިކަން ރަސްކަން ކުރަމުން ދިޔައިރު ، ދެހިތުގައި ވެސް ވަނީ އެހާ އަވަހަށް އައު ވިންދެއް ޖަހާފައެވެ.

ގެއަށް ވަދެވުމާއެކީ ފުރަތަމަ ވެސް ސުހާ ދިޔައީ ތާޒާ ވެލުމުގެ ނިޔަތުގައި ކޮޓަރިއަށެވެ. އެހެނީ ދަތުރު ވަރުބަލިކަން ކޮންމެސް ވަރަކަށް އިޙްސާސް ވި ނަމަވެސް ވިޝާމް އެގޭގައި އިން ހިނދަކު ލޮލު ފިޔައެއް ޖަހަންވެސް ސުހާގެ ހިތް ނުރުހުނެވެ.

އަތްމަތި އަވަސް ކޮށްލަމުން ސުހާ ކޮޓަރިން ނިކުތީވެސް ވިޝާމް އާ ދިމާނުވެ ހިނގާދާނޭތިއެވެ. އެހެންނަމަވެސް ސޯފާގައި ވިޝާމްގެ އިތުރުން މައިރާގެ ފިރިމީހާ އަނޫފް އާ ދެމީހުން އޮލަ ވާހަކައިގައި ތިބިތަން ފެނުމުން އެހިތަށް ކުޑަތަސައްލީއެއް ލިބުނެވެ. ވިޝާމްގެ ނަޒަރު ހުއްޓުމާއެކީ ސުހާ އަށް ރަކި ހިނިތުންވުމަކާ އެކީ އިސްޖަހާލަމުން ބަދިގެއަށް ވަންނަން ދިޔައީ މައިރާ ވީއެތާކަމަށް ވިތީއެވެ. ” ކިހިނެތް ވީ ؟ ހާދަ ހެވިފާ ؟ ” ސުހާގެ މޫނުން ކަމެއް ދިރާސާކުރާފަދައިން މައިރާ އަހާލީ ވާނުވާ ކޮންމެސް ވަރަކަށް ފަހުމް ވުމުންނެވެ. ” ކަ..ކަމެއް ވެއްޖެތަ ” މައިރާ އާ އަތްގާތްކޮށްދެމުން ސުހާ ބުނެލީ މޫނުމަތީގެ ކުލަވަރު ބަދަލުކޮށްލަމުންނެވެ.

” ކަމެއް ނުވެއޭ ބްރޯ، އަހަރެންގެ ހިތް ހީވަނީ އަތުންދޫވެއްޖެ ހެން ” ސުހާ ދިޔަ ދިމާލަށް ބަލަހައްޓައިގެން އިނދެ ވިޝާމް އަނޫފް ގެ ސުވާލަށް ޖަވާބުދިނެވެ. ” އަހަރެން ވަކި ދޭނެ ލަފައެއް ވެސް ނެތް އެތްކޮޅުން އަހަރެންގެ ބެސްޓްފްރެންޑް ، އަނެތްކޮޅުން އަހަރެންގެ ކޮއްކޮ އެތްކަހަލަ ސުހާ ” ސޯފާގާ ލެނގިލަމުން އަނޫފް ބުނެލިއެވެ. ” ކަލޭ ހުރޭ ބަލަން އަހަރެން ސުހާ ހާސިލް ކޮށްލާފާ ދައްކާލާނަން ”. ވަރުގަދަ އަޒުމަކާ އެކީ ވިޝާމް ބުނެލިއެވެ. ސުހާ އަށްޓަކައި އެހިތް ފިދާވެފައި ވާއިރު އެލޯބީގެ ފޮނިކަން އިޙްސާސް ވީހާވެސް އަވަހަކަށް ކޮށްލަން ވިޝާމްގެ ހިތްދަނީ ތެޅިފޮޅެމުންނެވެ.

ވިޝާމް ގެ ހިތުގެ ހާލު ނޭނގޭއިރު ވެސް ސުހާ އަށް އެތައް ފޮނިހުވަފެންތަކެއް ކުރެވެމުން ދިޔައެވެ. އެ ހިނިތުން ވުމާ ބަލާލާ ގޮތުންވެސް އެ ހިތުގާ ވެސް ޙާއްސަ ކަމެއް ވާކަން ސުހާ އަށް ފަހުމް ވެގެން ދިޔަތާ މާގިނަ ދުވަހެއް ނުވެއެވެ.

ރޭގަނޑުގެ ހަމަހިމޭން ވަގުތު ނަމަވެސް މާލެތެރޭގައި ކާރުބާރޫ ބޮޑެވެ. ދުވާރުމަތިން ހިނގާލާފައި ވިޝާމް ވަނީ ޖެހިގެން ހުރި އަނޫފް މެން ގެއަށެވެ. ގޭގެ ބެލް އަޅާލުމާއެކީ ނިކަން ކުޑަކުޑަކޮށް ދޮރު ހުޅުވިގެން ދިޔައެވެ. އެތެރޭ ހުރި ސުހާ އަށް ވިޝާމް ފެނުމުން ދޮރު ބޮޑަށް ހުޅުވާލަމުން ހިނިތުންވެލިއެވެ. ” އެކަނިތަ؟ ” އެތެރެ އަށް ވަން ފުރަތަމަ ފިޔަވަޅާ އެކީ ވިޝާމް އަހާލިއެވެ. ” ހޫމް، ދޮންތަމެން ވީ ދޮންތިބެ މަންމަ މެންގެއަށް ގޮސް ” ދެއަތް ދެއަތާ މޮޑެމުން ސުހާ ބުނެލިއެވެ. މިތަން ވިޝާމް އަށް ފެނުމާއެކީ އެތްމިޔަކަނިން ހީލިއެވެ. ” އެއްޗެއް ގެންނަންތަ؟ ” ސުހާ އަހާލިއެވެ. ” އުހުން އާދެބަލަ މިތާ އިންނަން ” ކުރިމަތީ ހުރި ސޯފާ ގޮނޑީ ދައްކާލަމުން ވިޝާމް ބުނެލިއެވެ. ބަހެއް ބުނުމެއް ނެތި ކިޔަމަންތެރި ކުއްޖެއް ފަދައިން ސުހާގޮސް އެގޮނޑީގައި އިށީންދެލީ ތެޅިފޮޅެމުން ދާ ހިތް ހަމަޔަކަށް އަޅަން ވެސް ނޭނގޭ ހާލުއެވެ. ” ސޯ ، ކޮންކަމެއްގާ ތިއުޅެލަނީ ” ދައްކާނެ ވާހަކަ އެއް ނޭގުމުން ވިޝާމް ބުނެލިއެވެ. ” އެސައިންމެންޓެއް ހަދާލަން އިނީ ” އިސްއުފުލާލަމުން ސުހާ ބުނެލިއެވެ. ” އެހެން، އަނޫފް ވެސް ކަމެއް ޖެހިގެން އުޅޭވަގުތަކު ނޫޅޭނެ ގެޔަކު ، އަންނާނެ އިރެއް ނޭނގޭތަ ” ވިޝާމް އަހާލިއެވެ. ” އާން، އެކަމް ދެން ހީވޭ ވަރަށް އަވަހަށް އައިސްދާނެހެން ” ގަނޑިއަށް ނަޒަރެއް ދެމުން ސުހާ ބުނެލިއެވެ. ” އަންނާނަން ފެންތަޢްޓެއް ބޯލާގެން ” ސޯފާއިން ތެދުވެލަމުން ވިޝާމް ބަދިގެއަށް މިސްރާބުޖެހި ވަގުތުވީ މޭޒުމަތީ އޮތް އޭނާގެ ފޯނުރިންގްވެލި ވަގުތަށެވެ. މޭޒުމަތީއޮތް ފޯނު ސުހާ ނަގާލީ ވިޝާމް އަށް ދޭން ދާން ނަމަވެސް ހުއްޓުން އެރީ އެއަށް އަރާފާ އިންނަމެއްގެ އިތުރުން ފޯނުވޯލްޕޭޕާ އިން ފެންނަމުން ދިޔަ ފޮޓޮއިންނެވެ. ”ޕްރިންސެސް” ނަމުގާ ސޭވްކޮށްފާ އިން މި ނަންބަރުން ގުޅާނީ ޙާއްސަ ފަރާތެކޭ ހިތާ ސުހާގެ ހިތަށް ތަދުވެލިއެވެ. ފޮޓޮއިން ފެންނަމުން ދިޔަ ވިޝާމް އަދި އެ އަންހެންކުއްޖާ ނުހަނު ކައިރީ ތިބިއިރު ދެމީހުންގެ ތުންފަތުގައި ވާ ހިނިތުންވުމުން އެތައް ކަމަކަށް ހެކިދެއެވެ. ހުއްޓުން އަރާފައި ހުރި ސުހާ ސިހިގެން ދިޔައީ ވިޝާމް އައިސް ފޯނުއައްލުމުންނެވެ. ފޯނުނަގާ ކަންފަތުގާ ޖަހަމުން ދަނީކަމަށް ބުނެ ވިޝާމް ގެއިން ނިކުންއިރުވެސް ހުއްޓުން އަރާފައި ސުހާ ހުއްޓެވެ. އޭނާގެ ދުނިޔެ ހުއްޓުނުހެން ހީވިއެވެ. މަޑުފިޔަވަޅުތަކެއްގާ ކޮޓަރިއަށް ވަންއިރުވެސް އިތުރު ހަރަކާތެއް ކޮށްލަން ނޭނގިފައި ސުހާ ހުއްޓެވެ.

މާޒީއަށް ސޮފުހާތަކެއް ދޫކުރަމުން ދުވަސްތައް އޭގެ ބާރުމިނުގާ ވޭތުވަމުން ދިޔައެވެ. ހަޔާތަށް އައިސްފައިވާ ބޮޑު ތޫފާނާ ކުރިމަތިލަމުން ސުހާ ދިޔައީއޭނާގެ ދިރިއުޅުމާގެން ކުރިއަށެވެ. ވިޝާމް އޭނާއާ ވާހަކަ ދައްކަން މަސައްކަތް ކުރިނަމަވެސް މަދުން ނޫނީ ސުހާ އަނގަޔަކުން ނުބުނެވެ. އެގެއަށް ވިޝާމް އަންނަގަނޑިތަކުގައި ކިތަންމެ ހިތް ނޭދުނަސް ކޮޓަރީ ބަންދުވެ އިންނަނީ ނާކާމިޔާބުވި އެ ލޮއިތްބާ ކުރިމަތިލާނެ ހިތްވަރު ގައިގައި ނެތުމުންނެވެ.

” އަހަންނަށް ހީވަނީ ކޮންމެސް ބޮޑުކަމެއް ވެއްޖެ ހެން އެފަކީރަށް ؟ ނިކަން ނެގިމަޑުވެފައި ހުންނަނީ ވެސް ، އަނގައިން ބުނަނީ ވެސް މަދުފަހަރަކު ” އަނޫފް އަދި ވިޝާމްގެ ކުރިމަތީ މައިރާ އޭނާގެ ކަންބޮޑުވުން ފާޅުކޮށްލިއެވެ. ” ނޭނގެ އަހަންނަކަށް ވެސް ، ސުހާ އާ ވާހަކަ ދައްކާލަން ވަރަށް ބޭނުން ، އަހަރެން އޭނާދެކެ ވަރަށް ބޮޑަށް ލޯބިވޭ، ވީހާވެސް އަވަހަކަށް އިންނަން ބޭނުން ވަނީ ” އިސްޖަހާލަމުން ވިޝާމް ބުނެލީ އޭނާގެ ހިތުގެ އެންމެ ބޮޑު އެދުމެވެ. އެހެންނަމަވެސް އެ ދޭތެރެ މެދު ދެކެވުނު ވާހަކައިގެ އެތްބައި އަޑުއިވުނު ސުހާ އަށް މާނަނެގުނީ ނުބައިކޮށެވެ. ކޮޓަރިން ސުހާ ނިކުތީ ކޮންމެހެން މިވަރުގެ ބޮޑު ވާހަކައެއް އިވޭނެ ކަމަކަށް ނޫނެވެ. ހުރިފިޔަވަޅުމަތީ ދެތިން ސިކުންތުވަންދެން ހުރުމަށް ފަހު އެތެރެ އަށް ވަނީ އެދެލޮލުން އަންނަމުން ދިޔަ ކަރުނަތައް ފުހެމުންނެވެ. މާބޮޑަށް ވެސް އެ ލޯބި އަތުން ބީވީއެވެ. ވެފައި ހުރި ދެރައިގައި ކޮޓަރި ދޮރުވެސް ޖެހުނީ ނިކަން ބާރަށެވެ. މިއަޑަށް އަނެތް ތިންމީހުން ސަމާލުވެލިއިރު އެކަކު އަނެކަކަށް ބަލައިލެވުނީ  ހިތުގައި އުފެދުނު ޝައްކެއްގެ މަތިންނެވެ.

ހެނދުނުގެ ވަގުތެވެ. ބަދިގޭގައި މައިރާ ހަރަކާތްތެރި ވަމުން ދިޔައިރު ސޯފާގައި އަނޫފް ޓީވީ ބަލަން އިނެވެ. ކޮޓަރިން ނިކުން ސުހާ މިސްރާބުޖެހީ މައިރާ ކައިރިއަށެވެ. ” ދޮންތާ ” ފަހަތުން ސުހާގެ އަޑުއިވުމުން މައިރާ ނިކަން އަވަހަށް ފަހަތަށް އެނބުރެލިއެވެ. ” އަހަރެން ބޭނުމީ ރަށަށް ދާން ، މަންމަ މެން ކައިރިއަށް ، ކޮލެޖް ގެ ވެސް ޗުއްޓީ ހަފްތާ ވީމާ އިތުރަށް މި ފަސްގަނޑަކު ހުންނާކަށް ބޭނުމެއް ނޫން ” ދެއަތް ދެއަތާ މޮޑެލަމުން ސުހާ ބުނެލިއެވެ. ” ކީއްވެ ކުއްލިއަކަށް ، ބުނީމެންނު ރަށަށް ދެންދާނީ އެތްކޮށް ނިންމާގެންނޭ ، ” ހައިރާން ވީވަރުން މައިރާ ބުނެލިއެވެ. ” ހޫމް ، އެކަމް ވެސް ދެން މިތާ ހުންނާކަށް ބޭނުމެއް ނޫން ” ކުރެކިވެފައިވާ އަޑަކުން ސުހާ ބުނެލިއެވެ. ” ދޮންތަ ކައިރި ބުނެބަ ވީގޮތެއް ، މިހާރު މާފާޑަކަށް ތި ހުންނަނީ ، ” ސުހާގެ ދެއަތުގާ ހިފާލަމުން މައިރާ ބުނެލިއެވެ. ޖަވާބެއް ނުދީ ސުހާ މިސްރާބުޖެހީ ކޮޓަރިއަށެވެ. ތެމިފައިވާ ދެލޮލާއެކީ ސުހާ އަށް އެރުނީ އެގަޑީ އެތެރެއަށް ވަން ވިޝާމްގެ ކުރިމައްޗަށެވެ. އެމޫނު ފެނުމާއެކީ ވަގުތުން ވިޝާމް ގެ ތުންފަތުގާ ވާ ހިނިތުންވުން ފޭދުނެވެ. ސުހާ އަށް ގޮވާލަން އެ ތުންފަތް ހަރަކާތް ކޮށްލިނަމަވެސް އެއްޗެކޭ ނުބުނެވުނީ ހަލުވި ފިޔަވަޅުތަކެއްގާ ސުހާ ގޮސް ކޮޓަރިއަށް ވަނުމުންނެވެ. ” ކިހިނެތް ވީ އޭނަ އަށް ؟ ” ބަދިގެއިން ނިކުން މައިރާ ކައިރި ވިޝާމް އަހާލިއެވެ. ” ނޭނގެ ދެންމެ އައިސް އެބުނީ ރަށަށް ދާން ބޭނުން ވާ ވާހަކަ މިތާ ހުންނަން ބޭނުން ނޫން ވާހަކަ ، އަޅެ ވިޝާމް އޭނަ އާ ވާހަކަ ދައްކާ ވީގޮތެއް ބަލާލަން ވީނު ” ދެރަވެފައި ހުރި މައިރާ އަށް އިތުރު ގޮތެއް ނުވިސްނުމުން ވިޝާމްގެ އެހީއަށް އެދެވުނެވެ. ބޯޖަހާލަމުން ގޮސް ސުހާ ގެ ކޮޓަރީ ލުއި ޓައްކެއް ދިނެވެ. އެތެރެއިން ޖަވާބެއް ނުލިބުމުން މަޑުމަޑުން ތަޅުއަނބުރާލީ ކަންބޮޑުވެފައިވާ ހާލުއެވެ. އެނދުމަތީ ދޮރަށް ފުރަގަސްދީގެން ސުހާ އޮތްއިރު މީހާގެ ގައިގާ މަޑުތުރުތުރެއް އުފެދިފައިވެއެވެ. މިތަން ފެނުމުން ވިޝާމްގެ ހިތަށް ކެތްވީ ކިރިޔާއެވެ. ” ދޮންތާ އަހަރެން ބޭނުމެއް ނޫނޭ މިގަނޑީ ވާހަކަ ދައްކާކަށް ” ދޮރުމައްޗަށް ބަލައިނުލާ އޮވެ ސުހާ ބުނެލިއެވެ. ” މީ އަހަރެންނޭ ވިޝާމް ” މަޑުމަޑުން ވިޝާމް ބުނެލިއެވެ. ކުއްލި ސިހުމަކާއެކީ ސުހާ ތެދުވެލަމުން ވިޝާމް އާ ދިމާލަށް ބަލައިލީ ހައިރާން ކަމާއެކީ އެވެ. ” ކީއްކުރަން…” މަޑުމަޑުން ސުހާ ބުނެލީ ދެއަތުގެ ނުފުށުން ކަރުނަތައް ފޮހެލަމުންނެވެ. ” އަހަރެން ވާހަކަ އެއް ދައްކާލަން ބޭނުންވެގެން ” ވިޝާމް ބުނެލިއެވެ. ” މިދެމެދު ދައްކަންޖެހޭ ވާހަކަ އެތް އޮތްހެނެއް ހީނުވެ ” ހަރުކަށިކަމާއެކީ އަމިއްލަ ހިތަށް ބާރުފޯރުވާލަމުން ސުހާ ބުނެލިއެވެ. ” ސުހާ ޕްލީޒް..” ވިޝާމް އަށް ބުނެވުނީ މިހާވަރަށެވެ. ” އަހަރެންނާ ވާހަކަ ނުދައްކާ ދައްކަން ޖެހޭ މީހުންނަން ދެއްކީމާ ރަނގަޅުވާނެ ، އަހަރެން އެކަނި ހާލަށް ދޫކޮށްލާފައި ދޭ ” އިސްޖަހާލަމުން ސުހާ ބުނެލީ އޭނާގެ ހިތާ ހަނގުރާމަ ކުރަމުންނެވެ. ” ކީކޭ ތިކިޔަނީ ” ނުވިސްނޭ ފަދައިން ވިޝާމް އަހާލިއެވެ. ” ވިޝާމް ވާން އުޅޭ އަންހެނުން ، އޭނަ އަށް އިނގިއްޖެއްޔާ ރުޅި އަންނާނެ އެންނު ، ” ހަރުކަށިކަމާއެކީ ސުހާބުނެލިއެވެ. ” ވަޓް ؟؟ އަހަރެން މީހަކަށް އިންނަން އުޅެންތަ އެބެ، ތިކިޔަނީ ކީކޭ ؟ ” ހައިރާންވީވަރުން ވިޝާމް ބުނެލިއެވެ. އެ ހައިރާން ކަންމަތީ ހުރި ވިޝާމް ގެ ހިޔާލުތައް ދަތުރު ކޮށްލީ މައިރާމެން ކައިރި އެދުވަހު ދެއްކި ވާޙަކަ މަތިންނެވެ. ވީގޮތް ނަގާގަނެވުނު މީހެއްފަދައިން ވިޝާމް ސުހާ އާ ދިމާލަށް ބަލައިލެވުނެވެ. ” އޯހްނޯ ، ވާހަކަ އެއްގެ އެތްބާ އަޑުއަހާގެން އެހާ އަވަހަށް ކަންތައް ތައް ރާވާލާ ނިންމާލީ ދޯ ސުހާ ” ސުހާ ކައިރި އިށީނދެލަމުން ވިޝާމް އަހާލިއެވެ. އެބުނިއެއްޗެއް ނަގާނުގަނެވިގެން ސުހާ ވިޝާމް އަށް ބަލައިލިއެވެ. ” އަހަރެން ނޫޅޭން މީހަކާ އިންނާކަށް އެދުވަހު މައިރާ މެން ކައިރި އަހަރެން ދެއްކީ ސުހާގެ ވާހަކަ ، އަހަރެން.. އަހަރެން ލޯބިވޭ ސުހާ ދެކެ އިންނަން ބޭނުން ވަނީވެސް ސުހާ އާ ” ހިތްވަރުކޮށްލާފައި ވިޝާމް އޭނާގެ ހިތް ހުޅުވާލިއެވެ. ހައިރާން ވީވަރުން ސުހާ ގެ ދެލޯބޮޑުވެލިއެވެ. ” ޔޫމަސްޓް ބީޖޯކިން ، ދެން އެދުވަހު ކޮން ޕްރިންސެސް އެއް ގުޅީ ، އަހަރެން ހިތްހަމަޖައްސާލަ ދޭންތަ ތިއުޅެނީ ” ވިޝާމް އަށް ކަޅިއަޅާލަމުން ސުހާ ބުނެލިއެވެ. ” ކަމޯން ސުހާ އެއީ އަހަރެންގެ ކޮއްކޮ އޭ ” ލާނެތް ހިނިގަނޑެއް ޖަހާލަމުން ވިޝާމް ބުނެލިއެވެ. ” ވަޓް ” ލަދުން މަރުވާވަރުވެފައި އިން ސުހާ ގެ ހިތަށް އުފާވެރިކަމެއް ލިބުނެވެ. ” އައި އޮންލީ ލަވްޔޫ ، ވަރަށް ދުވަސް ވެއްޖެ ބުނަން އުޅޭތާ އެކަމް ރަނގަޅުވަގުތެއް ނުވި ” އިސްޖަހާލަމުން ވިޝާމް ބުނެލިއެވެ. ” ހިތަށް ލިބުނު އުފާވެރިކަމުގާ ވިޝާމްގެ އުނަގަނޑުގާ އަތްއަޅުވާލަމުން އެމޭތެރޭ މޫނުފޮރުވާލިއެވެ. ލިބުނު ކުއްލި ސިހުމެއްގެ ސަބަބުން ވިޝާމް އަށް ހަރަކާތެއްކޮށްލަން ނޭނގިފައި އިންއިރު ހިނިތުންވެލަމުން ސުހާގެ ގައިގާ ބައްދާލެވުނީ ސިކުންތުކޮޅެއް ފަހުންނެވެ. ” އަހަރެން ވިޝާމް ދެކެ ލޯބިވިތާ ކޮންދުވަހެއް ، އަހަރެން ހީކުރީ ތީ މީހެއްގެ ހައްޤެއް ކަމަށް ” އެއިންގޮތަށް އިންނަމުން ސުހާބުނެލިއެވެ. ” އަހަރެން މީސުހާގެ އެކަނި މީހެއް ” ހިނިތުންވެލަމުން ވިޝާމް ބުނެލިއެވެ. ހިތަށް ލިބުނު އުފާވެރިކަމެއްގެ ސަބަބުން ކުރަމުން ދިޔަ ހިތާމަތައް މަތިން މުޅިންހެން ސުހާ ހަނދާން ނެތްފަދައެވެ. އެލޮއިތްބަށްޓަކައި ހިތްތެޅިފޮލެމުން ދިޔަ ލޯބިހާސިލް ވުމުން އެ ހިތައް ލިބިފައިވާ އުފާވެރިކަން ދެގުނަވީފަދައެވެ. އިތުރަށް ވިޝާމްގެ މޭތެރޭ ބޮނޑިވެލީ ޢުމުރަށް ވެސް މި ލޮއިތްބާއެކީ ވުމަށް ހިތާހިތުން ދުޢާކުރަމުންނެވެ.

(ނިމުނީ)